SENTENZA TAL-QORTI TAL-ĠUSTIZZJA (L-Ewwel Awla)
14 ta' Settembru 2006 (*)
"Sitt Direttiva tal-VAT– Artikolu 11A(1)(c) – Użu ta' immobbli li jifforma parti mill-assi ta' negozju għall-użu privat tal-persuna taxxabbli – Assimilazzjoni ta' dan l-użu ma provvista ta' servizz bi ħlas – Determinazzjoni ta' l-ammont taxxabbli – Kunċett ta' l-ispejjeż kollha magħmula mill-persuna taxxabbli għall-provvista tas-servizzi"
Fil-kawża C-72/05,
li għandha bħala suġġett talba għal deċiżjoni preliminari skond l-Artikolu 234 KE, imressqa mill-Finanzgericht München (il-Ġermanja), permezz ta' deċiżjoni ta' l-1 ta' Frar 2005, li waslet fil-Qorti tal-Ġustizzja fil-15 ta' Frar 2005, fil-proċedura
Hausgemeinschaft Jörg und Stefanie Wollny
vs
Finanzamt Landshut,
IL-QORTI TAL-ĠUSTIZZJA (L-Ewwel Awla),
komposta minn P. Jann, President ta' l-Awla, N. Colneric, J. N. Cunha Rodrigues, K. Lenaerts (Relatur) u E. Levits, Imħallfin,
Avukat Ġenerali: P. Léger,
Reġistratur: K. Sztranc-Sławiczek, Amministratur,
wara li rat il-proċedura bil-miktub u wara s-seduta tat-30 ta' Marzu 2006,
wara li rat l-osservazzjonijiet ippreżentati:
– għall-Hausgemeinschaft Jörg und Stefanie Wollny, minn J. Wollny u H. Wollny,
– għall-Finanzamt Landshut, minn D. Baumann, Regierungsdirektor,
– għall-Gvern Ġermaniż, minn U. Forsthoff, bħala aġent,
– għall-Gvern tar-Renju Unit, minn R. Hill, barrister,
– għall-Kummissjoni tal-Komunitajiet Ewropej, minn D. Triantafyllou, bħala aġent,
wara li semgħet il-konklużjonijiet ta' l-Avukat Ġenerali, ippreżentati fis-seduta tal-15 ta' Ġunju 2006,
tagħti l-preżenti
Sentenza
1 It-talba għal deċiżjoni preliminari tirrigwarda l-interpretazzjoni ta’ l-Artikolu 11A(1)(c) tas-Sitt Direttiva tal-Kunsill 77/388/KEE, tas-17 ta' Mejju 1977, fuq l-armonizzazzjoni tal-liġijiet ta' l-Istati Membri dwar taxxi fuq id-dħul mill-bejgħ – Sistema komuni ta' taxxa fuq il-valur miżjud: bażi uniformi ta' stima (ĠU L 145, p. 1), kif emendata mid-Direttiva tal-Kunsill 95/7/KE ta' l-10 ta' April 1995 (ĠU L 102, p. 18, iktar 'il quddiem is-"Sitt Direttiva").
2 Din it-talba ġiet ippreżentata fil-kuntest ta' kawża dwar id-determinazzjoni ta' l-ammont taxxabbli għall-finijiet tat-taxxa fuq il-valur miżjud (iktar 'il quddiem "VAT") relattiv għall-użu privat, minn persuna taxxabbli, ta' parti minn immobbli li kollu kemm hu jifforma parti mill-assi tan-negozju tiegħu.
Il-kuntest ġuridiku
Il-Leġiżlazzjoni Komunitarja
3 L-Artikolu 2(1) tas-Sitt Direttiva jissuġġetta għall-VAT "il-provvista ta' oġġetti u servizzi magħmula bi ħlas fit-territorju tal-pajjiż minn persuna taxxabbli li taġixxi bħala tali".
4 Is-subparagrafu (a) ta' l-ewwel inċiż ta' l-Artikolu 6(2) tas-Sitt Direttiva jqis bħala provvista ta' servizzi magħmula bi ħlas "l-użu ta' oġġetti li jifformaw parti mill-assi ta' negozju għall-użu privat ta' persuna taxxabbli jew tal-persunal tiegħu jew b'mod iktar ġenerali għal skopijiet oħra barra dawk tan-negozju tiegħu fejn [il-VAT] fuq dawn l-oġġetti hija deduċibbli kollha jew parti minnha".
5 Skond l-Artikolu 11A(1)(c) tas-Sitt Direttiva, l-ammont taxxabbli għandu jinkludi "fir-rigward ta' provvisti msemmija fl-Artikolu 6(2), l-ispejjeż kollha [magħmula m]ill-persuna taxxabbli [għall]-provvediment [provvista] tas-servizzi".
6 L-Artikolu 17(2) tas-Sitt Direttiva, jipprovdi:
"Sa kemm l-oġġetti u s-servizzi huma użati għall-iskopijiet fuq it-transazzjoni taxxabbli tiegħu, il-persuna taxxabbli għandha tkun intitolata biex tnaqqas mit-taxxa li hi responsabbli biex tħallas:
[Il-VAT] dovuta jew mħallsa fir-rig[w]ard ta' oġġetti jew servizzi pprovduti jew li għandhom ikunu pprovduti lilu minn persuna taxxabbli oħra;
[…]"
7 L-Artikolu 20 tas-Sitt Direttiva jistipula:
"It-tnaqqis inizzjali għandu jkun aġġustat b'mod konformi mal-proċeduri stabbiliti mill-Istati Membri b'mod partikolari::
a) fejn it-tnaqqis jkun ogħla jew inqas minn dak li għalih l-persuna taxxabbli hi ntitolata;
b) fejn wara li jsir il-prospett xi tibdil isir fil-fatturi użati biex jiddeterminaw l-ammont li għandu jitnaqqas, b'mod partikolari fejn ix-xirjiet huma kanċellati jew roħs fil-prezz hu miksub[…]
Fil-każ ta' oġġetti kapitali, l-aġġustment għandu jkun mifrux fuq ħames snin inkluż dik meta l-oġġetti jkunu akkwistati jew fabbrikati. L-aġġustament annwali għandu jsir biss fir-rigward ta' wieħed minn ħamsa tat-taxxa imposta fuq l-oġġetti. L-aġġustament għandu jsir fuq bażi tal-varjazzjonijet fit-tnaqqis intitolat fis-snin konsekwenti b' relazzjoni għal dik is-sena meta l-oġġetti kienu akkwistati jew fabbrikati.
Permezz ta' deroga mis-sub-paragrafu preċedenti, Stati Membri jistgħu jibbażaw l-aġġustament fuq perjodu ta' ħames snin sħaħ li jibdew miż-żmien meta l-oġġetti huma użati għall-ewwel darba.
Fil-każ ta' proprjetà immobbli akkwistata bħala oġġetti kapitali l-perjodu ta' l-aġġustament jista' jkun estiż sa 20 sena.
Fil-każ ta' provvista matul il-perjodu ta' l-aġġustament l-oġġetti kapitali għandhom jkunu meqjusa bħala li huma xorta kienu applikati għall-użu tan-negozju minn persuna taxxabbli sa l-iskadenza tal-perjodu ta' l-aġġustament. It-tali attivitajiet kummerċjali huma preżunti li kienu kompletament intaxxati f'każi meta l-wasla ta' l-imsemmija oġġetti hi ntaxxata; huma huma preżunti li jkunu kompletament eżenti meta l-wasla hi eżentata. L-aġġustament għandu jsir darba biss għall-perjodu sħiħ ta l-aġġustament li għad irid jiġi kopert.
[…]"
Il-leġiżlazzjoni nazzjonali
8 L-Artikolu 3(9a)(1) tal-liġi dwar it-taxxa fuq id-dħul mill-bejgħ (Umsatzsteuergesetz, BGBl. 1993, I, p. 565, iktar 'il quddiem l-"UStG") iqis bħala provvista ta' servizzi bi ħlas l-użu minn persuna taxxabbli ta' oġġett li jifforma parti mill-assi ta' negozju għall-finijiet li huma estranji għal dan, meta dan l-oġġett jagħti lok għal dritt ta' tnaqqis parzjali jew komplet ta' l-input tax imħallsa.
9 L-ammont taxxabbli għall-provvista msemmija fl-imsemmi Artikolu 3(9a)(1) huwa definit fl-Artikolu 10 ta' l-UStG. Fil-verżjoni tiegħu fis-seħħ sat-30 ta' Ġunju 2004, l-imsemmi Artikolu 10 kien jipprovdi li l-ammont taxxabbli għal din il-provvista huwa magħmul mill-ispejjeż li jkunu saru għall-eżekuzzjoni ta' dawn l-attivitajiet, meta dawn ikunu taw lok għad-dritt għal tnaqqis parzjali jew komplet ta' l-inputtax imħallsa".
10 Fil-verżjoni tiegħu li daħal fis-seħħ fl-1 ta' Lulju 2004, l-Artikolu 10(4)(2) ta' l-UStG jipprovdi:
"4. L-ammont taxxabbli huwa magħmul […] mill-ammont ta' spejjeż li jkunu saru għall-eżekuzzjoni ta' dawn l-attivitajiet, meta dawn jagħtu lok għad-dritt għal tnaqqis parzjali jew komplet ta' l-input tax imħallsa. Dawn l-ispejjeż jinkludu wkoll l-ispejjeż għax-xiri jew il-fabbrikazzjoni ta' oġġett kapitali meta dan jifforma parti mill-assi tan-negozju u jiġi użat sabiex jiġu pprovduti dawn is-servizzi l-oħra. Fejn l-ispejjeż ta' xiri jew tal-fabbrikazzjoni jkunu ta' mill-inqas 500 EUR, dawn iridu jiġu maqsuma uniformement fuq perijodu ta' żmien li jikkorrispondi għall-perjodu ta' aġġustament applikabbli għall-oġġett kapitali, kif imsemmi fl-Artikolu 15a."
11 L-Artikolu 15a ta' l-UStG jikkonċerna l-aġġustament tat-tnaqqis. Il-paragrafu 1 tiegħu jipprovdi:
"Meta xi fatturi meħuda in kunsiderazzjoni għad-determinazzjoni ta' l-ammont tat-tnaqqis inizjali jinbidlu fi żmien ħames snin mill-mument li jintuża għall-ewwel darba dan l-oġġett kapitali, kull sena kalendarja li tikkorrispondi għal dawn il-bidliet għandha tiġi kkumpensata permezz ta' aġġustament tat-tnaqqis tat-taxxi imputabbli għall-ispejjeż ta' xiri u fabbrikazzjoni. Fir-rigward ta' l-immobbli, inklużi l-komponenti essenzjali tagħhom, ta' l-aġġustamenti rregolati mid-dispożizzjonijiet tad-dritt ċivili dwar l-immobbli u tal-bini fuq art ta' ħaddieħor, għandu japplika terminu ta' għaxar snin minflok terminu ta' ħames snin."
12 L-Artikolu 7(4)(2)(a) tal-liġi dwar it-taxxa fuq id-dħul (Einkommensteuergesetz) tipprovdi, għall-bini li huma użati għall-abitazzjoni u nxtraw wara l-1 ta' Jannar 1925, li "r-rati ta' ammortizzar applikabbli għall-bini sa' l-ammortizzar komplet tagħhom hija ta': […] 2 % fis-sena".
Il-fatti li wasslu għall-kawża prinċipli u d-domanda preliminari
13 Matul is-sena 2003, il-Hausgemeinschaft Jörg und Stefanie Wollny, il-komunità domestika komposta mis-Sinjur u Sinjura Wollny (iktar il-quddiem il-"komunità domestika "), bniet immobbli li hi żiedet ma' l-assi tan-negozju tagħha. Dan l-immobbli kien jinkludi l-akkomodazzjoni privata taż-żewġ membri ta' l-imsemmija komunità kif ukoll l-uffiċini ta' uffiċċju fiskali mikri lil wieħed mill-imsemmija membri. Il-parti mikrija kienet tikkorrispondi għal 20.33% ta' l-immobbli. Din il-kirja hija suġġetta għall-VAT.
14 Fid-dikjarazzjonijiet provviżorji tagħhom tal-VAT għax-xahar ta' Diċembru 2003, kif ukoll għax-xhur minn Jannar sa Marzu 2004 , il-komunità domestika naqqset il-VAT kollha li ġiet fatturata fuq l-ispejjeż tal-bini ta' l-immobbli. Billi bbażat ruħha fuq ir-rata ta' ammortizzar ta' immobbli hekk kif stabbilita mill-Artikolu 7(4)(2)(a), ta' l-EStG, hi kkunsidrat li l-ammont taxxabbli għall-użu privat ta' 79.67 % ta' l-immobbli jikkorrispondi għall-ammont mensili li huwa ta' 1/12 tat-2% ta' l-ispejjeż tal-bini li relattivi għal din il-parti użata għal skop privat.
15 Il-Finanzamt Landshut, billi bbażat ruħha fuq ittra tal-Bundesministerium für Finanzen (Ministeru tal-Finanzi Ġermaniż) tat-13 ta' April 2004 (BStBl. I 2004, p. 468), ikkunsidrat li l-ammont taxxabbli kellu jiġi ddeterminat permezz ta' referenza għat-tul tal-perijodu ta' aġġustament tat-tnaqqis fir-rigward tal-VAT, previst fl-Artikolu 15a ta' l-UStG, jiġifieri għaxar snin. Hi għaldaqstant ikkoreġiet il-kalkolu tal-komunità domestika u ffissat l-ammont taxxabbli mensili tal-VAT abbażi ta' l-użu privat ta' parti mill-immobbli għal 1/12 ta' l-10% ta' l-ispejjeż tal-bini relattivi għal din il-parti.
16 Billi l-Finanzamt Landshut ċaħdet l-ilmenti ppreżentati mill-komunità domestika kontra l-istimi provviżorji tat-taxxa maħruġa konformement mal-kalkolu msemmi fil-punt preċedenti, din ippreżentat rikors quddiem il-Finanzgericht München.
17 Din il-qorti tikkunsidra li s-soluzzjoni tal-kawża pendenti quddiemha tiddependi mid-determinazzjoni ta' l-ammont taxxabbli li huwa relatat ma' l-użu privat ta' immobbli li, kollu kemm hu, huwa parti mill-assi tan-negozju tal-komunità domestika. Peress li tosserva li l-Artikolu 11A(1)(c) tas-Sitt Direttiva ma jiddefinixxix il-kunċett ta' "l-ispejjeż kollha", hi tistaqsi dwar it-tifsira li għandha tingħata lil dan il-kunċett.
18 F'dan ir-rigward hi tosserva li s-sentenzi tal-Qorti tal-Ġustizzja tas-26 ta' Settembru 1996, Enkler (C‑230/94, Ġabra p. I‑4517), u tat-8 ta' Mejju 2003, Seeling (C‑269/00, Ġabra p. I‑4101, punt 54), jinkludu xi elementi li jistgħu jiffavorixxu t-teżi tar-rikorrenti u oħrajn li jistgħu jiffavorixxu dik ta' l-amministrazzjoni fiskali Ġermaniża.
19 F'dawn iċ-ċirkustanzi, il-Finanzgericht München iddeċidiet li tissospendi l-proċedimenti u li tagħmel lill-Qorti tal-Ġustizzja d-domanda għal deċiżjoni preliminari li ġejja:
""Kif għandu jiġi interpretat il-kunċett ta' 'spejjeż kollha' li jinsab fl-Artikolu 11A(1)(c), tas-[Sitt Direttiva]? L-ispejjeż kollha magħmula għall-akkomodazzjoni użata għal raġunijiet privati f'immobbli li jifforma parti, kollu kemm hu, mill-assi tan-negozju, jinkludu wkoll (minbarra l-ispejjeż kurrenti), l-ammortizzar annwali għad-deprezzament tal-bini, iddeterminat skond ir-regoli nazzjonali applikabbli u/jew il-proporzjon annwali ta' l-ispejjeż għax-xiri jew kostruzzjoni li jagħtu lok għad-dritt għal tnaqqis ikkalkulat b'referenza għall-perijodu nazzjonali ta' aġġustament tat-tnaqqis?"
Fuq id-domanda preliminari
20 Għandu jiġi mfakkar, l-ewwel nett, li, skond l-istruttura tas-sistema stabbilita mis-Sitt Direttiva, l-inputtax fuq il-beni jew servizzi użati minn persuna taxxabbli għall-finijiet tat-tranżazzjonijiet taxxabbli tiegħu tista' tiġi mnaqqsa. It-tnaqqis ta' l-input tax huwa marbut mal-ġbir ta' l-output tax. Safejn l-oġġetti jew is-servizzi huma użati għall-finijiet ta' tranżazzjonijiet li huma ntaxxati bħala outputs, għandu jsir tnaqqis ta' l-input tax fuqhom sabiex jiġi evitat intaxxar doppju. Min-naħa l-oħra, meta l-beni jew servizzi akkwistati minn persuna taxxabbli huma użati għall-finijiet ta' tranżazzjonijiet eżenti jew li ma jaqgħux taħt il-kamp ta' applikazzjoni tal-VAT, ma jkun hemm la l-ġbir ta' output tax u lanqas tnaqqis ta' input tax (ara s-sentenza tat-30 ta' Marzu 2006, Uudenkaupungin kaupunki, C‑184/04, li għadha ma ġietx ippubblikata fil-Ġabra, punt 24).
21 Fil-każ ta' użu ta' beni kapitali kemm għal skop professjonali kif ukoll privat, l-interessat għandu l-għażla, għall-iskopijiet ta' VAT, jew li jinkludi dan il-beni fl-intier tiegħu fil-patrimonju ta' l-impriża tiegħu, jew li jżommu fl-intier tiegħu fil-patrimonju privat tiegħu u b'hekk jeskludih kompletament mis-sistema tal-VAT, jew ukoll li jinkludih fl-impriża tiegħu biss safejn jintuża effettivament għal skopijiet professjonali (sentenza ta' l-14 ta' Lulju 2005, Charles u Charles-Tijmens, C‑434/03, Ġabra p. I‑7037, punt 23).
22 Jekk il-persuna taxxabbli tagħżel li titratta l-beni kapitali użati kemm professjonalment u privatament bħala beni ta' l-impriża, l-input VAT dovuta fuq ix-xiri ta' dawn il-beni hija bħala regola mnaqqsa kompletament u immedjatament (sentenzi ċċitati iktar 'il fuq Seeling, punt 41, kif ukoll Charles-Tijmens, punt 24).
23 Madankollu, skond is-subparagrafu(a) ta' l-ewwel inċiż, ta' l-Artikolu 6(2) tas-sitt Direttiva, fejn l-oġġett inkluż fl-assi tan-negozju jagħti d-dritt għal tnaqqis komplet jew parzjali ta' l-input VAT imħallsa, l-użu tiegħu għall-bżonnijiet privati tal-persuna taxxabbli jew tal-persunal tiegħu jew għal użu barra mill-impriża tiegħu, huwa assimilat għal servizzi pprovduti bi ħlas. Dan l-użu, li għalhekk jikkostitwixxi tranżazzjoni taxxabbli skond l-Artikolu 17(2) ta' l-istess Direttiva huwa, b'mod konformi ma' l-Artikolu 11A(1)(c) tagħha, intaxxat fuq il-bażi ta' l-ammont ta' l-ispejjeż sostnuti għat-twettiq tas-servizzi pprovduti (sentenza Charles u Charles-Tijmens, iċċitata iktar 'il fuq, punt 25).
24 B'konsegwenza ta' dan, persuna taxxabbli li tagħżel li tikkunsidra l-bini kollu bħala li jifforma parti mill-assi tan-negozju tagħha u wara tuża partijiet minn dak il-bini għall-bżonnijiet privati tagħha, minn naħa għandha d-dritt tnaqqas l-input VAT imħallsa fuq l-ispejjeż kollha tal-kostruzzjoni ta' l-imsemmi bini u, min-naħa l-oħra l-obbligu korrispondenti li tħallas il-VAT fuq l-ispejjeż kollha li jkunu saru sabiex isir tali użu (sentenza Seeling, iċċitata iktar 'il fuq, punt 43).
25 Id-domanda magħmula mill-qorti tar-rinviju hija intiża, f'dan il-kuntest, sabiex jiġi magħruf kif għandu jiġi interpretat il-kunċett ta' "l-ispejjeż kollha [għall-]provvediment [provvista] tas-servizzi" skond l-Artikolu 11A(1)(c) tas-Sitt Direttiva. L-imsemmija qorti essenzjalment tistaqsi lilha nfisha jekk dan l-ammont jridx jiġi ddeterminat b'referenza għar-regoli nazzjonali applikabbli għall-ammortizzar minħabba d-deprezzament ta' l-immobbli jew skond it-tul tal-perijodu ta' aġġustament tat-tnaqqis fil-kuntest tal-VAT, kif stabbilit mid-dritt nazzjonali skond l-Artikolu 20 tas-Sitt Direttiva.
26 Il-kunċett in kwistjoni jiffigura f'dispożizzjoni tad-dritt Komunitarju li ma tirreferix għal-liġi ta' l-Istati Membri sabiex jiġu ddeterminati t-tifsira u l-portata tiegħu. Minn dan isegwi li l-interpretazzjoni ta' dan il-kunċett fil-ġeneralità tiegħu ma jistax jitħalla għad-diskrezzjoni ta' kull Stat Membru (ara, f'dan is-sens, is-sentenza ta' l-1 ta' Frar 1977, Verbond van Nederlandse Ondernemingen, 51/76, Ġabra p. 113, punti 10 u 11).
27 B'mod ġenerali, dan il-kunċett jikkorrispondi għall-ispejjeż marbuta ma' l-oġġett stess (ara s-sentenza Enkler, iċċitati iktar 'il fuq, punt 36). Dan jinkludi l-ispejjeż, bħall-ispejjeż tax-xiri jew tal-kostruzzjoni ta' l-imsemmi oġġett, li jagħtu lok għad-dritt għat-tnaqqis tal-VAT, u li mingħajrhom l-użu privat in kwistjoni ma setax iseħħ.
28 Madankollu, peress li s-Sitt Direttiva ma fhijiex l-indikazzjonijiet neċessarji għal definizzjoni uniformi u preċiża tar-regoli għad-definizzjoni ta' ammont ta' l-ispejjeż ikkonċernati, għandu jiġi ammess li l-Istat Membri għandhom ċertu marġini ta' diskrezzjoni f'dak li jikkonċerna dawn ir-regoli, sakemm huma ma jittraskurawx il-finalità u l-pożizzjoni tad-dispożizzjoni in kwistjoni fl-istruttura tas-Sitt Direttiva (ara, f'dan is-sens, is-sentenza Verbond van Nederlandse Ondernemingen, iċċitata iktar 'il fuq, punti 16 u 17).
29 Għaldaqstant, f'dan il-każ, għandu jiġi eżaminat jekk ir-referenza magħmula mil-leġiżlazzjoni nazzjonali, sabiex jiġi determinat l-ammont ta' l-imsemmija spejjeż, għat-tul tal-perijodu ta' aġġustament tat-tnaqqis stabbilit konformement ma' l-Artikolu 20 tas-Sitt Direttiva hijiex kompattibbli mal-finalità ta' l-Artikolu 11A(1)(c), ta' l-imsemmija Direttiva u l-pożizzjoni tiegħu fl-istruttura tagħha.
30 L-għan ta' din l-aħħar dispożizzjoni huwa dak li tiddefinixxi l-ammont taxxabbli ta' użu privat – jew, b'mod aktar ġenerali, ta' użu għal finijiet li huma estranji għan-negozju – ta' oġġett li jifforma parti mill-assi ta' l-imsemmi negozju, u dan minħabba li s-subparagrafu (a) ta' l-ewwel inċiż ta' l-Artikolu 6(2) ta' l-imsemmija Direttiva jassimila tali użu ma' provvista ta' servizz bi ħlas, li konsegwentement huwa suġġett għall-VAT.
31 Il-finalità ta' din l-assimilazzjoni hija dik li tostakola lil persuna taxxabbli li setgħet tnaqqas il-VAT fuq ix-xiri jew fuq il-kostruzzjoni ta' oġġett li jifforma parti mill-assi ta' negozju tagħha, milli taħrab milli tħallas din it-taxxa meta hi tuża dan l-oġġett jew parti minnu għal finijiet privati (ara s-sentenza tas-27 ta' Ġunju 1989, Kühne, 50/88, Ġabra p. 1925, punt 8).
32 Kif sostna l-Gvern Ġermaniż u, waqt is-seduta, il-Gvern tar-Renju Unit, permezz ta' dan il-mekkaniżmu hemm l-intenzjoni li, minn naħa, jiġi assigurat trattament ugwali bejn il-persuna taxxabbli u l-konsumatur finali, billi l-ewwel waħda tiġi mwaqqfa milli tapprofitta ruħha minn vantaġġ li mhijiex intitolata għalih meta mqabbla mat-tieni, li jixtri l-oġġett u jħallas il-VAT fuqu (ara f'dan ir-rigward is-sentenzi Enkler, iċċitati iktar 'il fuq, punti 33 u 35, kif ukoll ta' l-20 ta' Jannar 2005, Hotel Scandic Gåsabäck, C‑412/03, Ġabra p. I‑743, punt 23).
33 Min-naħa l-oħra l-għan huwa li, konformement mal-loġika tas-sistema stabbilita mis-Sitt Direttiva (ara l-punt 20 ta' din is-sentenza), tiġi ggarantita l-korrispondenza bejn it-tnaqqis ta' l-input VAT u l-ġbir ta' l-imsemmija output tax (ara, f'dan is-sens, il-konklużjonijiet ta' l-Avukat Ġenerali Jacobs fil-kawża Charles u Charles-Tijmens, iċċitata iktar 'il fuq, punt 60).
34 Minkejja li l-kamp ta' applikazzjoni tagħha ma jaqbilx kompletament ma' dak tas-subparagrafu (a) ta' l-ewwel inċiż ta' l-Artikolu 6(2) tas-Sitt Direttiva, is-sistema ta' aġġustament tat-tnaqqis stabbilita mill-Artikolu 20 ta' l-imsemmija Direttiva tapplika, bħall-imsemmija dispożizzjoni, għal sitwazzjonijiet fejn oġġett li l-użu tiegħu jagħti lok għad-dritt għat-tnaqqis jiġi sussegwentement allokat għal użu li ma jagħtix lok għad-dritt tat-tnaqqis (ara s-sentenza Uudenkaupungin kaupunki, iċċitata iktar 'il fuq, punt 30). Kif osserva l-Avukat Ġenerali fil-punt 98 tal-konklużjonijiet tiegħu, kemm l-Artikolu 6(2) kif ukoll l-Artikolu 20 tas-Sitt Direttiva jirrigwardaw sitwazzjonijiet li fihom oġġett huwa użat fl-istess ħin kemm għal finijiet professjonali kif ukoll għal finijiet privati.
35 Barra minn hekk, il-finalità tas-sistema ta' aġġustament hija simili għal dik ta' l-impożizzjoni tal-VAT fil-każ ta' użu privat ta' oġġett kapitali. Fil-fatt, minn naħa din hija intiża sabiex jiġi evitat li jingħata vantaġġ ekonomiku inġustifikat lill-persuna suġġetta għat-taxxa meta mqabbla mal-konsumatur finali, billi din tiġi kostretta tħallas ammonti li jikkorrispondu għal tnaqqis li m'għandhiex dritt għalih (ara f'dan ir-rigward, is-sentenzi tad-29 ta' April 2004, Gemeente Leusden u Holin Groep, C‑487/01 u C‑7/02, Ġabra p. I‑5337, punt 90, kif ukoll Uudenkaupungin kaupunki, iċċitata iktar 'il fuq, punt 30).
36 Min-naħa l-oħra, din hija intiża sabiex tiġi ggarantita korrispondenza bejn it-tnaqqis ta' l-input tax u l-ġbir ta' l-output tax (ara l-konklużjonijiet ta' l-Avukat Ġenerali Jacobs fil-kawża Charles u Charles-Tijmens, iċċitata iktar 'il fuq, punt 60).
37 Fid-dawl ta' din il-finalità komuni, kif ukoll tar-rwol kumplimentari li għal dan il-fini assumew id-dispożizzjonijiet ta' l-Artikoli 6 u 20 fl-istruttura tas-Sitt Direttiva, meta Stat Membru jipprovdi għall-applikazzjoni, għall-finijiet tad-determinazzjoni ta' l-ammont taxxabbli għall-użu privat ta' oġġett ta' negozju, ta' regoli relatati ma' l-aġġustament tat-tnaqqis, dan ma jfissirx li hu jkun uża b'mod ħażin il-marġini ta' diskrezzjoni tiegħu.
38 Kif enfasizza l-Gvern Ġermaniż waqt is-seduta u kif irrileva l-Avukat Ġenerali fil-punt 95 tal-konklużjonijiet tiegħu, din is-soluzzjoni tikkontribwixxi wkoll sabiex tnaqqas il-vantaġġ finanzjarju li l-intaxxar frazzjonat tal-VAT jagħti lill-persuna taxxabbli li juża immobbli ta' negozju għall-finijiet privati meta mqabbel mal-konsumatur finali, li għandu jħallas il-VAT kollha meta jixtri jew jibni tali immobbli.
39 Barra minn hekk, kif enfasizzaw dan l-istess Gvern kif ukoll il-Gvern tar-Renju Unit waqt is-seduta, din is-soluzzjoni tippermetti li jiġu preklużi l-każijiet ta' konsum finali li mhuwiex intaxxat fil-każ ta' ċessjoni ta' l-immobbli mingħajr VAT fi tmiem il-perijodu ta' aġġustament tat-tnaqqis. Fil-fatt billi t-tqassim ta' l-impożizzjoni tal-VAT għall-użu privat ta' l-immobbli in kwistjoni jikkoinċidi mat-tul ta' l-imsemmi perijodu, din tiggarantixxi, f'dak li jikkonċerna dan l-użu, li jinġabar l-ammont kollu ta' din it-taxxa li jikkorrispondi għat-tnaqqis magħmul fuq l-input tax, qabel l-eventwali bejgħ mill-ġdid ta' l-immobbli, eżenti mill-VAT li jista' jseħħ wara li jgħaddi dan il-perijodu.
40 Jirriżulta minn dak li ntqal li s-soluzzjoni adottata mil-leġiżlazzjoni nazzjonali in kwistjoni hija konformi mal-finalitajiet ta' l-Artikolu 6(2) tas-Sitt Direttiva.
41 Kif osservat il-komunità domestika, il-Qorti tal-Ġustizzja, fil-punt 36 tas-sentenza Enkler, iċċitata iktar 'il fuq, għamlet referenza fil-kuntest ta' l-Artikoli 6(2) u 11 A (1)(c) għall-ispejjeż "bħalma huma dawk ta' l-ammortizzar għad-deprezzament ta' l-oġġett".
42 Madankollu, din l-indikazzjoni ma tistax tiġi interpretata, bir-riskju li tiġi interpretata ħażin il-marġini ta' diskrezzjoni li għandhom l-Istati Membri f'dan ir-rigward f'dan ir-rigward, li tfisser li dawn ta' l-aħħar m'għandhomx għażla oħra sabiex jiddeterminaw l-ammont taxxabbli għall-VAT fil-każ ta' l-użu privat ta' immobbli ta' negozju, ħlief li japplikaw ir-regoli nazzjonali dwar l-amortizzar għad-deprezzament ta' l-immobbli, bl-esklużjoni ta' kull metodu ieħor li, bħal dak adottat mil-leġiżlazzjoni nazzjonali in kwistjoni, madankollu jkun kompatibbli mal-finalità ta' l-Artikolu 6 (2) tas-Sitt Direttiva.
43 Għall-kuntrarju ta' dak li sostniet il-komunità domestika, is-sentenza Seeling, iċċitata iktar 'il fuq, lanqas ma tista' tqajjem dubji dwar din l-analiżi.
44 Fil-kawża li tat lok għal din is-sentenza u li wkoll kienet tikkonċerna każ ta' użu mħallat ta' immobbli li jifforma parti mill-assi tan-negozju tal-persuna taxxabbli, il-Gvern Ġermaniż kien irrakkomanda li l-użu privat ta' dan l-immobbli jiġi assimilat ma' kirja ta' immobbli eżenti mill-VAT abbażi ta' l-Artikolu 13 B(b) tas-sitt Direttiva u, għaldaqstant, li ma jistax jagħti lok għad-dritt għal tnaqqis ta' l-input VAT imħallsa. Sabiex isostni t-teżi tiegħu, hu osserva b'mod partikolari li b'differenza mis-soluzzjoni li tikkonsisti f'li tippermetti t-tnaqqis tat-taxxa mħallsa fuq it-totalità ta' l-ispejjeż ta' kostruzzjoni ta' l-immobbli u li timponiha, b'mod frazzjonat, fuq l-użu privat tiegħu, is-soluzzjoni rrakkomandata minnu kienet ta' natura li tneħħi s-sitwazzjonijiet ta' konsum finali mhux intaxxat f'każ ta' bejgħ mill-ġdid ta' l-immobbli eżenti mill-VAT wara li jkun għadda l-perijodu ta' aġġustament previst fl-Artikolu 20 tas-Sitt Direttiva.
45 Madankollu, il-Qorti tal-Ġustizzja kkunsidrat li tali użu privat ma jikkostitwixxix kiri skond l-Artikolu 13B(b) tas-Sitt Direttiva (sentenza Seeling, iċċitata iktar 'il fuq punti 49 sa 52).
46 Huwa f'dan il-kuntest li fil-punt 54 tas-sentenza Seeling, iċċitata iktar 'il fuq, hi affermat li, jekk il-fatt li persuna taxxabbli tiġi awtorizzata tinkludi bini ma' l-assi kollha tan-negozju tagħha u, għaldaqstant, tnaqqas l-input VAT dovuta fuq l-ispejjeż ta' kostruzzjoni kollha, jista' jkollu bħala effett li l-konsum finali mhux ser ikun taxxabbli, minħabba li l-perijodu ta' aġġustament previst mill-Artikolu 20(2) tas-Sitt Direttiva jista' jikkoreġi biss parzjalment it-tnaqqis ta' l-input VAT imħallsa fil-mument tal-kostruzzjoni ta' bini, dan huwa r-riżultat ta' għażla deliberata tal-leġiżlatur Komunitarju u ma jippermettix interpretazzjoni estensiva ta' l-Artikolu 13B(b) ta' din id-Direttiva.
47 B'dan il-mod il-Qorti tal-Ġustizzja kkonstatat li t-tul tal-perijodu ta' aġġustament previst fl-Artikolu 20 tas-Sitt Direttiva għandu kapaċità limitata sabiex jevita l-każijiet ta' konsum finali mhux intaxxati fil-każ fejn it-tqassim ta' l-impożizzjoni tal-VAT għall-użu privat ta' immobbli ta' negozju jkun awtorizzat għal żmien itwal minn dak ta' l-imsemmi perijodu ta' aġġustament.
48 Kif osserva l-Gvern Ġermaniż u kif enfasizza l-Avukat Ġenerali fil-punt 90 tal-konklużjonijiet tiegħu, din il-konstatazzjoni m'għandhiex tinqara bħala li qed tippriva lill-Istati Membri mill-fakultà li, għad-determinazzjoni ta' l-ammont taxxabbli għal tali użu privat, jirrikorru għal metodu li, bħal dak tat-tqassim ta' l-imsemmija impożizzjoni tat-taxxa għal żmien limitat li jikkorrispondi għall-perijodu ta' aġġustament ta' tnaqqis, jippermetti li jiġu evitati safejn possibbli, fl-interessi tat-trattament ugwali bejn il-persuni taxxabbli u l-konsumaturi finali, sitwazzjonijiet ta' konsum finali mhux intaxxat fil-każ ta' ċessjoni mill-persuna taxxabbli ta' l-oġġett b'eżenzjoni mill-VAT.
49 Fl-aħħar nett, sabiex tingħata tweġiba utli lill-qorti tar-rinviju fuq punt ittrattat f'uħud mill-osservazzjonijiet bil-miktub kif ukoll waqt is-seduta, għandu jiġi ppreċiżat ukoll, kif osservaw il-Kummissjoni tal-Komunitajiet Ewropej u l-Gvern Ġermaniż u dak tar-Renju Unit, li f'każ li l-ispejjeż tax-xiri ta' l-art li fuqha jkun inbena l-immobbli li huwa parzjalment użat għal skopijiet privati kienu suġġetti għall-VAT u li, peress li din l-art tifforma parti mill-assi tan-negozju tiegħu, il-persuna suġġetta għat-taxxa tkun kisbet tnaqqis ta' din it-taxxa, l-imsemmija spejjeż iridu jiġu nklużi fl-ammont taxxabbli għall-VAT għal dan l-użu privat.
50 Fil-fatt, minn naħa, il-kunċett ta' l-ispejjeż kollha magħmula minn persuna taxxabbli għall-provvista ta' servizzi skond l-Artikolu 11A(1)(c) tas-Sitt Direttiva għandu jiġi interpretat bħala li jinkludi l-ispejjeż kollha li jkunu saru għal dan il-għan, inklużi dawk marbuta ma' l-akkwist ta' l-art, li mingħajrhom l-użu privat in kwistjoni ma setax iseħħ.
51 Min-naħa l-oħra, il-fatt li jiġu esklużi mill-ammont taxxabbli għall-VAT l-ispejjeż tax-xiri ta' l-art li jagħtu lok għad-dritt ta' tnaqqis tal-VAT iħarbat il-korrispondenza bejn it-tnaqqis ta' l-input VAT u l-ġbir ta' l-output VAT.
52 F'dan il-każ, hija l-qorti tar-rinviju li għandha tevalwa jekk ix-xiri mir-rikorrenti ta' l-art li fuqha ġie mibni l-immobbli in kwistjoni ġiex suġġett għall-VAT u jekk hi kisbitx it-tnaqqis ta' din it-taxxa.
53 Fid-dawl tal-kunsiderazzjonijiet li saru iktar 'il fuq, ir-risposta għad-domanda magħmula għandha tkun li l-Artikolu 11A(1)(c) tas-Sitt Direttiva għandu jiġi interpretat fis-sens li ma jipprekludix li l-ammont taxxabbli għall-VAT, għall-użu privat ta' parti mill-immobbli li kollu kemm hu jifforma parti mill-assi tan-negozju tal-persuna taxxabbli,tal-persuna taxxabbli jiġi ffissat għal frazzjoni ta' l-ispejjeż ta' xiri jew ta' kostruzzjoni ta' l-immobbli, skond it-tul tal-perijodu ta' aġġustament tat-tnaqqis fil-kuntest tal-VAT previst skond l-Artikolu 20 ta' l-imsemmija Direttiva. Dan l-ammont taxxabbli għandu jinkludi l-ispejjeż tax-xiri ta' l-art li fuqha jkun inbena l-immobbli meta dan ix-xiri jkun ġie suġġett għal din it-taxxa u l-persuna taxxabbli tkun kisbet it-tnaqqis tagħha.
Fuq l-ispejjeż
54 Peress li l-proċedura għandha, fir-rigward tal-partijiet fil-kawża prinċipali, in-natura ta' kwistjoni mqajma quddiem il-qorti tar-rinviju, hija din il-Qorti li tiddeċiedi fuq l-ispejjeż. L-ispejjeż sostnuti għas-sottomissjoni ta' l-osservazzjonijiet lill-Qorti, barra dawk ta' l-imsemmija partijiet, ma jistgħux jitħallsu lura.
Għal dawn il-motivi, il-Qorti tal-Ġustizzja (l-Ewwel Awla) taqta' u tiddeċiedi:
L-Artikolu 11A(1)(c) tas-Sitt Direttiva tal-Kunsill 77/388/KEE, tas-17 ta' Mejju 1977, fuq l-armonizzazzjoni tal-liġijiet ta' l-Istati Membri dwar taxxi fuq id-dħul mill-bejgħ – Sistema komuni ta' taxxa fuq il-valur miżjud: bażi uniformi ta' stima, kif emendata mid-Direttiva tal-Kunsill 95/7/KE ta' l-10 ta' April 1995, għandu jiġi interpretat fis-sens li ma jipprekludix li l-ammont taxxabbli għat-taxxa fuq il-valur miżjud, għall-użu privat ta' parti mill-immobbli li kollu kemm hu jifforma parti mill-assi tan-negozju tal-persuna taxxabbli, jiġi ffissat għal frazzjoni ta' l-ispejjeż ta' xiri jew ta' kostruzzjoni ta' l-immobbli, skond it-tul tal-perijodu ta' aġġustament tat-tnaqqis fil-kuntest tat-taxxa fuq il-valur miżjud previst skond l-Artikolu 20 ta' l-imsemmija Direttiva.
Dan l-ammont taxxabbli għandu jinkludi l-ispejjeż tax-xiri ta' l-art li fuqha jkun inbena l-immobbli meta dan ix-xiri jkun ġie suġġett għal din it-taxxa u l-persuna taxxabbli tkun kisbet it-tnaqqis tagħha.
Firem
* Lingwa tal-kawża: il-Ġermaniż.