SENTENZA TAL-QORTI TAL-ĠUSTIZZJA (It-Tielet Awla)
17 ta’ Jannar 2013 (*)
“Nuqqas ta’ Stat li jwettaq obbligu — Taxxa fuq il-valur miżjud — Direttiva 2006/112/KE– Applikazzjoni ta’ rata mnaqqsa — Artikoli 96 u 98(2) — Anness III, punti 3 u 4 — ‘Prodotti farmaċewtiċi ta’ tip normalment użati għall-kura tas-saħħa, għall-prevenzjoni tal-mard u bħala trattament għal skopijiet mediċi u veterinarji’ — ‘Tagħmir mediku, għajnuniet u strumenti oħra normalment maħsuba biex itaffu jew [sabiex] jikkuraw id-diżabilità, għall-użu esklussiv u personali tal-persuni b’diżabilità’”
Fil-Kawża C-360/11,
li għandha bħala suġġett rikors għal nuqqas ta’ twettiq ta’ obbligu skont l-Artikolu 258 TFUE, imressaq fit-8 ta’ Lulju 2011,
Il-Kummissjoni Ewropea, irrappreżentata minn L. Lozano Palacios, bħala aġent, b’indirizz għan-notifika fil-Lussemburgu,
rikorrenti,
vs
Ir-Renju ta’ Spanja, irrappreżentat minn S. Centeno Huerta, bħala aġent,
konvenut,
IL-QORTI TAL-ĠUSTIZZJA (It-Tielet Awla),
komposta minn M. Ilešič (Relatur), President ta’ Awla, E. Jarašiūnas u A.Ó Caoimh, Imħallfin,
Avukat Ġenerali: N. Jääskinen,
Reġistratur: A. Calot Escobar,
wara li semgħet il-konklużjonijiet tal-Avukat Ġenerali, ippreżentati fis-seduta tal-25 ta’ Ottubru 2012,
tagħti l-preżenti
Sentenza
1 Permezz tar-rikors tagħha, il-Kummissjoni Ewropea titlob lill-Qorti tal-Ġustizzja tikkonstata li, billi applika rata mnaqqsa tat-taxxa fuq il-valur miżjud (iktar ’il quddiem il-“VAT”)
– għas-sustanzi mediċinali li jistgħu jintużaw abitwalment u b’mod xieraq fil-produzzjoni ta’ prodotti mediċinali;
– għall-mezzi mediċi, materjal, apparat u strumenti li, ikkunsidrati oġġettivament, jistgħu jintużaw biss sabiex jiġu pprevenuti, dijanjostikati, trattati, imtaffija jew imfejqa mard jew kundizzjonijiet mediċi relatati mal-bnedmin jew mal-annimali, iżda li ma humiex normalment intiżi sabiex itaffu u jikkuraw diżabbiltajiet u li huma rriżervati għall-użu personali u esklużiv tal-persuni b’diżabbiltà;
– għall-apparat u għall-aċċessorji li jistgħu jintużaw essenzjalment jew prinċipalment sabiex itaffu diżabbiltajiet fiżiċi tal-annimali;
– u, fl-aħħar nett, għall-apparat u għall-aċċessorji essenzjalment jew prinċipalment użati sabiex itaffu diżabbiltajiet tal-bniedem, iżda li ma humiex irriżervati għall-użu personali u esklużiv tal-persuni b’diżabbiltà,
ir-Renju ta’ Spanja naqas milli jwettaq l-obbligi tiegħu skont l-Artikolu 98 tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud (ĠU L 347, p. 1), moqri flimkien mal-Anness III ta’ din id-direttiva.
Il-kuntest ġuridiku
Id-dritt tal-Unjoni
2 L-Artikolu 96 tad-Direttiva 2006/112 jipprovdi:
“L-Istati Membri għandhom japplikaw rata standard ta’ VAT, li għandha tiġi ffissata minn kull Stat Membru bħala persentaġġ ta’ l-ammont taxxabbli u li għandha tkun l-istess għall-provvista ta’ merkanzija u għall-provvista ta’ servizzi.”
3 L-Artikolu 97(1) tad-Direttiva 2006/112 jipprovdi, “[m]ill-1 ta’ Jannar 2006 sal- 31 ta’ Diċembru 2010, ir-rata standard ma tistax tkun inqas minn 15 %”.
4 L-Artikolu 98 ta’ din id-direttiva huwa miktub kif ġej:
“1. L-Istati Membri jistgħu japplikaw jew rata mnaqqsa waħda jew żewġ rati mnaqqsa.
2. Ir-rati mnaqqsa għandhom japplikaw biss għall-provvisti ta’ merkanzija jew servizzi fil-kategoriji stabbiliti fl-Anness III.
[...]
3. Meta jkunu qed japplikaw ir-rati mnaqqsa previsti fil-paragrafu 1 għal kategoriji ta’ merkanzija, l-Istati Membri jistgħu jużaw in-Nomenklatura Magħquda sabiex jistabbilixxu eżattament kemm hi koperta l-kategorija kkonċernata.”
5 L-Artikolu 99(1) ta’ din id-direttiva jipprovdi:
“Ir-rati mnaqqsa għandhom jiġu ffissati bħala persentaġġ ta’ l-ammont taxxabbli, li ma jistax ikun inqas minn 5 %.”
6 Skont l-ewwel subparagrafu tal-Artikolu 114(1) tal-istess direttiva:
“L-Istati Membri li fl-1 ta’ Jannar 1993, kienu obbligati li jżidu r-rata standard tagħhom fis-seħħ fl-1 ta’ Jannar 1991 b’iżjed minn 2 % jistgħu japplikaw rata mnaqqsa iktar baxxa mill-minimu stabbilit fl-Artikolu 99 għall-provvista ta’ merkanzija u servizzi fil-kategoriji stabbiliti fl-Anness III.”
7 L-Anness III, intitolat “Lista ta’ provvisti ta’ merkanzija u servizzi li għalihom jistgħu japplikaw ir-rati mnaqqsa msemmija fl-Artikolu 98” isemmi, fil-punti 3 u 4 tiegħu, dan li ġej:
“3) prodotti farmaċewtiċi ta’ tip normalment użati għall-kura tas-saħħa, għall-prevenzjoni tal-mard u bħala trattament għal skopijiet mediċi u veterinarji, inklużi prodotti użati għall-kontraċezzjoni u għall-protezzjoni sanitarja;
4) tagħmir mediku, għajnuniet u strumenti oħra normalment maħsuba biex itaffu jew [sabiex] jikkuraw id-diżabilità, għall-użu esklużiv u personali tal-persuni b’diżabilità, inkluża t-tiswija ta’ din il-merkanzija, u l-provvista ta’ siġġijiet tat-tfal tal-karrozza;”Id-dritt nazzjonali
8 Il-paragrafu 1(5) u (6) tal-ewwel taqsima tal-Artikolu 91 tal-liġi 37/1992 tat-28 ta’ Diċembru 1992 (BOE Nru 312, tad-29 ta’ Diċembru 1992, p. 44247, iktar ’il quddiem il-“liġi dwar il-VAT”), fil-verżjoni tagħha applikabbli f’dan il-każ, jipprevedi l-applikazzjoni ta’ rata mnaqqsa ta’ VAT għal 8 % fuq il-kunsinni, ix-xiri intra-Komunitarju u l-importazzjonijiet tal-oġġetti li ġejjin:
“5. Mediċini għal użu veterinarju kif ukoll sustanzi mediċinali li jistgħu jintużaw abitwalment u b’mod xieraq fil-produzzjoni tagħhom.
6. Strumenti u aċċessorji, inklużi nuċċalijiet b’lentijiet korrettivi u lentijiet tal-kuntatt, li meqjusa oġġettivament, jistgħu jiġu użati essenzjalment jew primarjament biex itaffu diżabbiltà fiżika fi bnedmin u f’annimali, inkluż limitazzjonijiet fil-mobbiltà u fl-abbiltajiet komunikattivi tagħhom.
Il-mezzi mediċi, il-materjal, apparat u strumenti ma jistgħux jiġu oġġettivament użati ħlief sabex jiġu pprevenuti, dijanjostikati, trattati, imtaffija jew jiġu mfejqa mard jew kundizzjonijiet mediċi relatati mal-bnedmin jew mal-annimali.
Ma humiex inklużi f’din il-kategorija prodotti kożmetiċi u prodotti ta’ iġjene personali esklużi assorbenti, tampuni u panty liners”
9 Skont il-paragrafu 1(3) tat-tieni taqsima tal-Artikolu 91 tal-liġi dawr il-VAT, rata “imnaqqsa sostanzjalment” ta’ VAT, prevista fl-Artikolu 114(1) tad-Direttiva 2006/112, li hija ta’ 4 % fil-każ tar-Renju ta’ Spanja, hija applikabbli għall-kunsinni, għax-xiri intra-Komunitarju u għall-importazzjonijiet tal-oġġetti li ġejjin:
“Il-prodotti mediċinali għall-użu mill-bniedem, kif ukoll is-sustanzi mediċinali, il-forom farmaċewtiċi u l-prodotti intermedjarji li jistgħu jintużaw abitwalment u b’mod xieraq fil-produzzjoni tagħhom.”
Il-proċedura prekontenzjuża
10 B’ittra ta’ intimazzjoni tat-22 ta’ Marzu 2010, Il-Kummissjoni infurmat lir-Renju ta’ Spanja li hija kkunsidrat li l-applikazzjoni tas-sistema tar-rati ta’ VAT imnaqqsa, imsemmija fil-paragrafu 1(5) u (6) tal-ewwel sezzzjoni tal-Artikolu 91 u fil-paragrafu 1(3) tat-tieni sezzjoni tal-Artikolu 91 tal-liġi dwar il-VAT, kienet tikkostitwixxi nuqqas ta’ twettiq tal-obbligi li jirriżultaw mid-Direttiva 2006/112.
11 Fit-tweġiba tiegħu tat-28 ta’ Mejju 2010, ir-Renju ta’ Spanja sostna li l-applikazzjoni ta’ rata ta’ VAT imnaqqsa għall-oġġetti msemmija minn dawn id-dispożizzjonijiet tal-liġi dwar il-VAT kienet permessa mill-punti 3 u 4 tal-Anness III tad-Direttiva 2006/112 u kienet, għaldaqstant, konformi magħha.
12 Insostenn ta’ din it-talba, ir-Renju ta’ Spanja l-ewwel nett invoka n-neċessità li jiġi interpretat il-kunċett ta’ “prodotti farmaċewtiċi” fis-sens tal-punt 3 ta’ dan l-Anness III, skont id-definizzjoni ta’ prodott farmaċewtiku applikabbli fl-ordinament ġuridiku nazzjonali, li jinkludi mhux biss il-prodotti mediċinali, iżda wkoll l-istrumenti u l-mezzi mediċi. Sussegwentement, sostna li, il-prodotti finali, il-formuli maġistrali, il-formuli tal-uffiċju, is-sustanzi attivi u l-forom farmaċewtiċi, kif iddefiniti mil-leġiżlazzjoni nazzjonali, kellhom jiġu kkunsidrati bħala “prodotti farmaċewtiċi” fis-sens tal-punt 3 ta’ dan l-anness. Fl-aħħar nett, ir-Renju ta’ Spanja sostna li l-kunċett ta’ persuna “b’diżabbiltà”, fis-sens tal-punt 4 ta’ dan l-istess anness kellu jinkludi, skont il-linji gwida tal-Organizzazzjoni Dinjija tas-Saħħa fil-qasam, bħala li jirreferi għal kull persuna milquta minn marda li tikkawża diżabbiltà.
13 Peress li ma kinitx konvinta minn din it-tweġiba, il-Kummissjoni ħarġet, fil-25 ta’ Novembru 2010, opinjoni motivata fejn stiednet lir-Renju ta’ Spanja sabiex jieħu l-miżuri xierqa sabiex jikkonforma ruħu ma’ din l-opinjoni f’terminu ta’ xahrejn li kien jiddekorri minn meta jirċeviha.
14 B’ittra tal-31 ta’ Jannar 2011, l-awtoritajiet Spanjoli tennew il-pożizzjoni tagħhom li d-dispożizzjonijiet nazzjonali inkwistjoni huma konformi mad-dispożizzjonijiet tad-Direttiva 2006/112.
15 Peress li ma kinitx sodisfatta b’din it-tweġiba, il-Kummissjoni ddeċidiet li tippreżenta dan ir-rikors.
Fuq ir-rikors
Kunsiderazzjonijiet preliminari
16 L-ewwel nett, għandu jiġi eżaminat l-argument tar-Renju ta’ Spanja li l-kategoriji ta’ oġġetti u ta’ servizzi msemmija fl-Anness III tad-Direttiva 2006/112 ma humiex iddefiniti b’mod biżżejjed ċar sabiex jiġġustifikaw il-preżentata ta’ rikors għal nuqqas ta’ twettiq ta’ obbligu u li, għaldaqstant, l-interpretazzjoni restrittiva tal-punti 3 u 4 ta’ dan l-anness, li saret mill-Kummissjoni, ma għandhiex tkun privileġġata meta pparagunata ma’ interpretazzjonijiet possibbli oħra bbażati, b’mod partikolari, fuq id-dritt nazzjonali.
17 Skont il-Kummissjoni, min-naħa l-oħra, id-dispożizzjonijiet ta’ dan l-anness huma biżżejjed preċiżi u, skont prinċipji ta’ uniformità u ta’ ugwaljanza, għandhom jiġu interpretati b’mod awtonomu u uniformi fil-livell tal-Unjoni. Hija tindika, barra minn hekk, li r-Renju ta’ Spanja kien ġie infurmat biżżejjed dwar il-portata tal-obbligi tiegħu bl-opinjoni motivata tal-Kummissjoni.
18 Minn ġurisprudenza stabbilita tal-Qorti tal-Ġustizzja jirriżulta, li d-dispożizzjonijiet li għandhom in-natura ta’ deroga bħala prinċipju għandhom jiġu interpretati b’mod strett (ara, b’mod partikolari, is-sentenzi tat-12 ta’ Diċembru 1995, Oude Luttikhuis et, C-399/93, Ġabra p. I-4515, punt 23; tat-18 ta’ Jannar 2001, Il-Kummissjoni vs Spanja, C-83/99, Ġabra p. I-445, punt 19, kif ukoll tat-3 ta’ Marzu 2011, Il-Kummissjoni vs Il-Pajjiżi l-Baxxi, C-41/09, Ġabra p. I-831, punt 58).
19 Il-Qorti tal-Ġustizzja ddeċidiet ukoll diversi drabi li jirriżulta mir-rekwiżiti kemm tal-applikazzjoni uniformi tad-dritt tal-Unjoni kif ukoll mill-prinċipju ta’ ugwaljanza li l-kliem ta’ dispożizzjoni tad-dritt tal-Unjoni li ma tagħmel l-ebda riferiment espliċitu għal-liġi tal-Istati Membri bl-iskop li jiġu stabbiliti t-tifsira u l-portata tagħha normalment għandhom jingħataw interpretazzjoni awtonoma u uniformi fl-Unjoni Ewropea kollha (ara s-sentenza tal-21 ta’ Diċembru 2011, Ziolkowski u Szeja, C-424/10 u C-425/10, Ġabra p. I-14035, punt 32 kif ukoll il-ġurisprudenza ċċitata).
20 Jirriżulta mill-kunsiderazzjonijiet li jippreċedu li, hekk kif sostniet il-Kummissjoni, id-dispożizzjonijiet tad-dritt tal-Unjoni li jippermettu l-applikazzjoni ta’ rata mnaqqsa ta’ VAT għandhom, inkwantu huwa possibbilment rikonoxxut lill-Istati Membri b’deroga għall-prinċipju li jgħid li r-rata normali hija applikabbli, jiġu interpretati b’mod strett. Minbarra dan, peress illi l-punti 3 u 4 tal-Anness III tad-Direttiva 2006/112 ma jinkludu ebda riferiment espliċitu għad-dritt tal-Istati Membri, huma għandhom jiġu interpretati b’mod awtonomu u uniformi fl-Unjoni kollha.
21 Kuntrarjament għal dak li jsostni r-Renju ta’ Spanja, dawn il-konstatazzjonijiet ma humiex preklużi minħabba ċ-ċirkustanza li dawn il-punti jelenkaw kategoriji ġenereli ta’ oġġetti li huma sussegwentement l-Istati Membri li għandhom jippreċiżaw fil-kuntest tal-leġiżlazzjonijiet nazzjonali tagħhom.
22 F’dan ir-rigward, huwa biżżejjed li jiġi indikat, hekk kif l-Avukat Ġenerali rrileva fil-punt 25 tal-konklużjonijiet tiegħu, li l-Istati Membri għandhom l-obbligu li josservaw, meta huma jippreċiżaw il-kategoriji partikolari tal-oġġetti li għalihom tapplika rata mnaqqsa ta’ VAT, il-linji tal-kategoriji ddefiniti f’dawn il-punti, kif interpretati mill-Qorti tal-Ġustizzja.
Fuq l-ewwel ilment, ibbażat fuq l-applikazzjoni ta’ rata mnaqqsa ta’ VAT għas-sustanzi mediċinali li jistgħu jintużaw abitwalment u b’mod xieraq fil-produzzjoni ta’ prodotti mediċinali
Fuq il-portata tal-ewwel ilment
– L-argumenti tal-partijiet
23 Kemm fir-risposta tiegħu kif ukoll fil-kontroreplika tiegħu, ir-Renju ta’ Spanja jikkontesta l-argument tal-Kummissjoni li jikkonċerna l-“prodotti intermedjarji” msemmija fil-paragrafu 1(3) tat-tieni sezzjoni tal-Artikolu 91 tal-liġi dwar il-VAT.
24 Fil-fehma tiegħu, l-ewwel ilment tal-Kummissjoni, kif iddefinit fil-proċedura prekontenzjuża u indikat fl-ilmenti tar-rikors, jirrigwarda biss is-sustanzi mediċinali, bl-esklużjoni ta’ dawn il-“prodotti mediċinali”.
25 Il-Kummissjoni tikkontesta l-affermazzjonijiet imressqa mir-Renju ta’ Spanja fir-risposta u fil-kontroreplika tagħha f’dak li jikkonċerna l-“prodotti intermedjarji”, u tikkonferma li hija tikkontesta l-applikazzjoni ta’ rata mnaqqsa ta’ VAT għal dawn il-prodotti.
– Il-kunsiderazzjonijiet tal-Qorti tal-Ġustizzja
26 Għandu jitfakkar li mill-Artikolu 120(c) tar-Regoli tal-Proċedura tal-Qorti tal-Ġustizzja u mill-ġurisprudenza relatata miegħu jirriżulta li kull rikors promotur għandu jindika s-suġġett tal-kawża u sunt tal-motivi mressqa, u li din l-indikazzjoni għandha tkun ċara u preċiża biżżejjed li tippermetti lill-konvenut li jipprepara d-difiża tiegħu u lill-Qorti tal-Ġustizzja li teżerċita l-istħarriġ tagħha. Minn dan jirriżulta li l-punti essenzjali ta’ fatt u ta’ liġi li fuqhom huwa bbażat rikors, għandhom jirriżultaw b’mod koerenti u li jinftiehem mit-test tar-rikors stess, u li t-talbiet ta’ dan tal-aħħar għandhom ikunu fformulati b’mod mhux ekwivoku sabiex jiġi evitat li l-Qorti tal-Ġustizzja tiddeċidi ultra petita jew tonqos milli tiddeċiedi dwar l-ilment (ara s-sentenza tal-14 ta’ Jannar 2010, Il-Kummissjoni vs Ir-Repubblika Ċeka, C-343/08, Ġabra p. I-275, punt 26 u l-ġurisprudenza ċċitata).
27 F’dan il-każ, għandu jiġi kkonstatat li, jekk il-Kummissjoni ssemmi diversi drabi l-“prodotti intermedjarji” fl-ittra ta’ intimazzjoni tagħha, fl-opinjoni motivata taghha u fir-rikors tagħha, hija ma ssemmix dawn il-prodotti la fid-dikjarazzjonijiet tal-ilmenti u lanqas fit-talbiet tagħha.
28 Isegwi li l-ewwel ilment ta’ dan ir-rikors għandu jinftiehem fis-sens li l-Kummissjoni takkuża lir-Renju ta’ Spanja li japplika rata mnaqqsa ta’ VAT unikament għas-sustanzi mediċinali li jistgħu jintużaw abitwalment u b’mod xieraq fil-produzzjoni ta’ prodotti mediċinali.
Fuq il-mertu
– L-argumenti tal-partijiet
29 Permezz tal-ewwel ilment tagħha, il-Kummissjoni tqis li l-applikazzjoni ta’ rati mnaqqsa ta’ VAT għas-sustanzi mediċinali li jistgħu jintużaw abitwalment u b’mod xieraq fil-produzzjoni ta’ prodotti mediċinali, prevista fl-ewwel paragrafu (5) tal-ewwel sezzjoni tal-Artikolu 91 u fil-paragrafu (1)(3) tat-tieni sezzjoni tal-Aritkolu 91 tal-liġi dwar il-VAT, tmur kontra d-Direttiva 2006/112.
30 F’dan ir-rigward, hija ssostni li l-punt 3 tal-Anness III ta’ din id-direttiva jippermetti lill-Istati Membri li japplikaw rata mnaqqsa ta’ VAT għall-oġġetti li jissodisfaw ċerti kundizzjonijiet, jiġifieri, minn naħa, li għandhom ikunu “prodotti farmaċewtiċi” u, min-naħa l-oħra, li dawn il-prodotti għandhom ikunu “normalment użati għall-kura tas-saħħa, għall-prevenzjoni tal-mard u bħala trattament għal skopijiet mediċi u veterinarji”.
31 Skont il-Kummissjoni, is-sustanzi mediċinali ma humiex prodotti lesti u, għaldaqstant, ma jistgħux jiġu kkunsidrati bħala prodotti “normalment użati għall-kura tas-saħħa, għall-prevenzjoni tal-mard u bħala trattament għal skopijiet mediċi u veterinarji”.
32 Din il-konklużjoni hija kkorroborata mill-kunsiderazzjoni li, jekk il-leġiżlatur tal-Unjoni kien xtaq jinkludi, f’punt tal-Anness III tad-Direttiva 2006/112, mhux biss il-prodotti lesti, iżda wkoll dawk użati għall-produzzjoni ta’ dawn il-prodotti, huwa kien ikun indika dan speċifikament.
33 Il-Kummissjoni tirreferi, minbarra dan, għad-definizzjonijiet li jinsabu fid-Direttiva 2001/83/KE tal-Parlament Ewropew u tal-Kunsill, tas-6 ta’ Novembru 2001, dwar il-kodiċi tal-Komunità li għandu x’jaqsam ma’ prodotti mediċinali għall-użu mill-bniedem (ĠU Edizzjoni Speċjali bil-Malti, Kapitolu 13, Vol. 27, p. 69). Minn din id-direttiva jirriżulta li l-formoli maġistrali u l-formoli uffiċjali huma prodotti farmaċewtiċi proċessati, filwaqt li s-sustanzi attivi, iddefiniti bħala kull sustanza li tagħmel parti mill-kompożizzjoni ta’ prodott mediċinali, ma humiex prodotti lesti ddestinati għall-konsum mill-bniedem jew mill-annimali.
34 Min-naħa l-oħra, ir-Renju ta’ Spanja jsostni li s-sustanzi mediċinali huma “prodotti farmaċewtiċi” fis-sens tal-punt 3 tal-Anness III tad-Direttiva 2006/112.
35 Dan jikkunsidra li, fl-assenza ta’ definizzjoni tal-kunċett ta’ “prodotti farmaċewtiċi” fil-livell tal-Unjoni, l-Istati Membri jistgħu japplikaw id-definizzjonijiet eżistenti fl-ordinamenti ġuridiċi nazzjonali tagħhom. Issa, f’diversi liġijiet nazzjonali, dan il-kunċett huwa fil-parti l-kbira ddefinit bħala li jinkludi wkoll is-sustanzi mediċinali.
36 Ir-Renju ta’ Spanja jsostni, minbarra dan, li ċerti sustanzi mediċinali jistgħu jiġu kkummerċjalizzati bħala prodotti lesti, mingħajr ma jkun neċessarju li jitħalltu ma’ sustanzi oħra.
37 Fir-replika tagħha, il-Kummissjoni tammetti li, meta huma kkummerċjalizzati bħala prodotti farmaċewtiċi lesti, fid-dawl tal-użu dirett tagħhom mill-konsumatur, ma hemmx inkonvenzjoni li rata ta’ VAT mnaqqsa tiġi applikata għas-sustanzi mediċinali. Hija tfakkar f’dan ir-rigward il-ġurisprudenza tal-Qorti tal-Ġustizzja li l-applikazzjoni ta’ rata mnaqqsa ta’ VAT, fil-każ ta’ oġġett li jista’ jintuża b’modi differenti, hija suġġetta, għal kull tranżazzjoni ta’ kunsinna, għall-użu konkret li għalih dan l-oġġett huwa ddestinat mix-xerrej tiegħu (sentenza Il-Kummissjoni vs Il-Pajjiżi l-Baxxi, iċċitata iktar ’il fuq, punt 65).
– Il-kunsiderazzjonijiet tal-Qorti tal-Ġustizzja
38 Il-partijiet jikkontestaw l-interpretazzjoni li għandha tingħata għall-kunċett ta’ “prodotti farmaċewtiċi ta’ tip normalment użati għall-kura tas-saħħa, għall-prevenzjoni tal-mard u bħala trattament għal skopijiet mediċi u veterinarji” fis-sens tal-punt 3 tal-Anness III tad-Direttiva 2006/112. Għandu jiġi ċċarat jekk dan il-kunċett jistax jinkludi sustanzi mediċinali li jistgħu jintużaw abitwalment u b’mod xieraq fil-produzzjoni ta’ prodotti mediċinali.
39 F’dan ir-rigward, għandu jiġi rrilevat, hekk kif il-Kummissjoni sostniet fir-rikors tagħha, li dan il-punt 3 jippermetti li tiġi applikata rata mnaqqsa ta’ VAT għall-oġġetti li jissodisfaw żewġ kundizzjonijiet. Dawn għandhom ikunu, minn naħa, “prodotti farmaċewtiċi” u, min-naħa l-oħra, dawn il-prodotti għandhom ikunu “normalment użati għall-kura tas-saħħa, għall-prevenzjoni tal-mard u bħala trattament għal skopijiet mediċi u veterinarji”.
40 Il-Kummissjoni tipproponi li jiġi kkunsidrat li l-kunċett ta’ “prodotti mediċinali” fis-sens ta’ dan l-Anness III huwa paragunabbli ma’ dak ta’ “prodott mediċinali” li jinsab fl-Artikolu 1 tad-Direttiva 2001/83.
41 Għandu jiġi osservat, madankollu, hekk kif l-Avukat Ġenerali rrileva fil-punti 33 sa 35 tal-konklużjonijiet tiegħu, li jeżistu differenzi sinjifikattivi bejn dawn iż-żewġ kunċetti.
42 L-ewwel nett, għandu jiġi kkonstatat li l-parti l-kbira tal-verżjonijiet lingwistiċi tad-Direttiva 2001/83 u tal-Anness III tad-Direttiva 2006/112 jirrikorru għal termini differenti fir-rigward ta’ dawn il-kunċetti. Għalhekk, fil-verżjoni fil-lingwa Ingliża ta’ dawn iż-żewġ atti, il-kunċetti ta’ “prodott mediċinali” u ta’ “prodott farmaċewtiku” huma rispettivament indikati mill-espressjonijiet “medicinal product” u “pharmaceutical product”. L-istess japplika, b’mod partikolari, fil-verżjonijiet fil-lingwa Spanjola (“medicamento” u “producto farmacéutico”), Litwan (“vaistai” u “farmacijos gaminiai”), il-Pollakk (“produkt leczniczy” u “produkty farmaceutyczne”), ir-Rumen (“medicament” u “produsele farmaceutice”), is-Sloven (“zdravilo” u “farmacevtski izdelki”) kif ukoll Svediż (“läkemedel” u “farmaceutiska produkter”). Sussegwentement, jidher ċar li l-għanijiet segwiti mill-Anness III tad-Direttiva 2006/112 huma differenti minn dawk tad-Direttiva 2001/3, sa fejn din tal-aħħar hija intiża sabiex tarmonizza l-kundizzjonijiet ta’ tqegħid fis-suq tal-prodotti mediċinali għall-użu mill-bniedem. Fl-aħħar nett, huwa importanti li jitfakkar li, filwaqt li d-Direttiva 2001/83 tapplika esklużivament għall-prodotti mediċinali għall-użu mill-bniedem, il-punt 3 tal-Anness III jkopri wkoll l-użu veterinarju.
43 F’dawn iċ-ċirkustanzi, kuntrarjament għal dak li ssostni l-Kummissjoni, għandu jiġi kkonstatat li l-kunċett ta’ “prodott farmaċewtiku” fis-sens ta’ dan il-punt 3, filwaqt li jinkludi l-kunċett ta’ “prodott mediċinali” fis-sens tad-Direttiva 2001/83, għandu jiġi interpretat bħala li għandu tifsira iktar wiesgħa minnu.
44 Din l-interpretazzjoni hija barra minn hekk konformi mal-kunċett ta’ “prodott farmaċewtiku”, użat fil-Kapitolu 30 tan-Nomenklatura Magħquda li jinsab fl-Anness I tar-Regolament tal-Kunsill (KEE) Nru 2658/89, tat-23 ta’ Jannar 1987, dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (ĠU Edizzjoni Speċjali bil-Malti, Kapitolu 2, Vol. 2, p. 382), kif emendat bir-Regolament (UE) Nru 1238/2010 tal-Parlament Ewropew u tal-Kunsill, tal-15 ta’ Diċembru 2000 (ĠU L 348, p. 36), li jsemmi bħala prodotti farmaċewtiċi mhux biss il-prodotti mediċinali, iżda wkoll preparazzjonijiet oħra u artikoli farmaċewtiċi, bħall-materjal tessili artab, drappijiet tal-pezza, strixxi u l-artikoli li jixxiebhu.
45 Minbarra dan, l-aħħar sentenza tal-punt 3 tal-Anness III tad-Direttiva 2006/112 tagħmel riferiment għal oġġetti li ma jistgħux jiġu inklużi fil-kunċett ta’ “prodott mediċinali” fis-sens tad-Direttiva 2001/83, bħall-“prodotti użati għall-kontraċezzjoni u għall-protezzjoni sanitarja”.
46 Xorta jibqa’ l-fatt li, jagħmlu parti mill-kategorija msemmija f’dan il-punt 3, l-oġġetti li għandhom ikunu “normalment użati għall-kura tas-saħħa, għall-prevenzjoni tal-mard u bħala trattament għal skopijiet mediċi u veterinarji”.
47 Minn dawn il-kunsiderazzjonijiet jirriżulta li dan il-punt 3 jirreferi biss għall-prodotti lesti, li jistgħu jintużaw direttament mill-konsumatur finali, bl-esklużjoni ta’ prodotti li jistgħu jintużaw fil-produzzjoni tal-prodotti mediċinali, li normalment għandhom jiġu pproċessati ulterjorment.
48 Din l-interpretazzjoni hija kkorroborata mill-għan tal-Anness III tad-Direttiva 2006/112, li huwa li jagħmel inqas oneruż, u għalhekk iktar aċċessibbli għall-konsumatur finali, li jbati b’mod definittiv il-VAT, ċerti oġġetti li huma kkunsidrati bħala partikolarment neċessarji.
49 Fl-aħħar nett, hekk kif l-Avukat Ġenerali sostna fil-punt 39 tal-konklużjonijiet tiegħu, fil-każijiet fejn sustanza mediċinali tista’ tiġi kkummerċjalizzata bħala prodott lest, mingħajr ma jkollha titħallat ma’ sustanzi oħra, u li hija, konsegwentement, tista’ tintuża direttament mill-konsumatur finali “għall-kura tas-saħħa, għall-prevenzjoni tal-mard u bħala trattament għal skopijiet mediċi u veterinarji”, ma hemmx raġuni sabiex rata mnaqqsa ta’ VAT ma tkunx applikata għaliha.
50 Fid-dawl ta’ dak li ntqal hawn fuq, għandu jiġi kkonstatat li l-punt 3 tal-Anness III tad-Direttiva 2006/112 jippermetti l-applikazzjoni ta’ rata mnaqqsa ta’ VAT għas-sustanzi mediċinali sa fejn huma jistgħu jintużaw biss direttament mill-konsumatur finali għall-kura tas-saħħa, għall-prevenzjoni tal-mard u bħala trattament għal skopijiet mediċi u veterinarji
51 F’dawn iċ-ċirksutanzi, hemm lok li l-ewwel ilment tal-Kummissjoni jiġi kkunsidrat bħala fondat.
Fuq it-tieni lment ibbażat fuq l-applikazzjoni ta’ rata mnaqqsa ta’ VAT għall-mezzi mediċi, għall-materjal, għat-tagħmir u għall-apparat li oġġettivament jistgħu jintużaw biss għall-prevenzjoni, id-dijanjostika, il-kura, it-taffija u l-kura tal-mard jew kundizzjonijiet mediċi fil-bniedem jew fl-annimali
L-argumenti tal-partijiet
52 Il-Kummissjoni tikkunsidra li l-applikazzjoni ta’ rata mnaqqsa ta’ VAT għall-mezzi mediċi, materjal, għat-tagħmmir u għall-apparat li ma jistgħux oġġettivament jintużaw għall-prevenzjoni, dijanjostika, trattament, taffija jew kura tal-mard tal-bniedem jew l-annimali, prevista fil-paragrafu 1(6)(2) tal-ewwel sezzjoni tal-Artikolu 91 tal-liġi dwar il-VAT, tmur kontra d-Direttiva 2006/112.
53 Minn naħa, l-applikazzjoni, skont din id-dispożizzjoni nazzjonali, ta’ rata mnaqqsa ta’ VAT għat-tagħmir mediku użat għad-dijanjostika u għat-trattament veterinarju, ma hijiex konformi mal-punt 4 tal-Anness III tad-Direttiva 2006/112, li jirreferi biss għat-tagħmir, strumenti oħra u apparat għal użu esklużivament tal-bniedem.
54 Min-naħa l-oħra, il-punt 3 ta’ dan l-anness ma huwiex applikabbli. Fil-fatt, il-kunċett ta’ “prodotti farmaċewtiċi” fis-sens ta’ din id-dispożizzjoni għandu jinftiehem bħala sinonimu ma’ dak ta’ “prodott mediċinali” fis-sens tad-Direttiva 2001/83. Għalhekk, dawn il-mezzi, dan l-apparat, dan il-materjal u dan it-tagħmir għal użu ġenerali ma jistgħux jaqgħu taħt dan il-kunċett ta’ “prodotti farmaċewtiċi”.
55 Min-naħa l-oħra, ir-Renju ta’ Spanja jqis li l-oġġetti msemmija fil-paragrafu 1(6)(2) tal-ewwel sezzjoni tal-Artikolu 91 tal-liġi dwar il-VAT jidħlu fil-kamp ta’ applikazzjoni tal-punt 3 ta’ dan l-anness.
56 Dan isostni li l-kategorija msemmija fil-punt 3 tinkludi mhux biss il-prodotti mediċinali, iżda wkoll il-mezzi mediċi. Huwa jsostni, insostenn ta’ din l-interpretazzjoni, li l-Artikolu 168 TFUE jirreferi kemm għall-prodotti mediċinali kif ukoll għall-mezzi għal użu mediku u li, għaldaqstant, l-istess protezzjoni għandha tingħata għal dawn iż-żewġ kategoriji ta’ oġġetti, miġbura taħt it-termini ta’ “prodotti farmaċewtiċi”.
57 Minbarra dan, tali interpretazzjoni ma ċċaħħadx lill-punt 4 tal-Anness III tad-Direttiva 2006/112 mis-sens tiegħu. Il-mezzi mediċi msemmija f’dan il-punt, “maħsuba biex itaffu jew [sabiex] jikkuraw id-diżabilità, għall-użu esklużiv u personali tal-persuni b’diżabilità” huma maħsuba għal użu speċifiku. Għalhekk ma jkunx kontradittorju li jiġi kkunsidrat li l-kunċett ta’ “prodott farmaċewtiku” fis-sens tal-punt 3 ta’ dan l-anness jinkludi mhux biss il-prodotti mediċinali, iżda wkoll il-mezzi mediċi li ma humiex maħsuba għal użu speċifiku iżda li huma “normalment użati għall-kura tas-saħħa, għall-prevenzjoni tal-mard u bħala trattament għal skopijiet mediċi u veterinarji”.
Il-kunsiderazzjonijiet tal-Qorti tal-Ġustizzja
58 Il-Kummissjoni takkuża lir-Renju ta’ Spanja li applikat rata mnaqqsa ta’ VAT għall-kategorija tal-oġġetti li jikkonsistu f’mezzi mediċi, materjal, tagħmir u apparat “li ma jistgħux oġġettivament jintużaw ħlief għall-prevenzjoni, dijanjostika, trattament, taffija jew kura tal-mard jew tal-kundizzjonijiet mediċi tal-bniedem jew tal-annimali”.
59 Hekk kif il-Kummissjoni sostniet, il-punt 4 tal-Anness III tad-Direttiva 2006/112 ma jippermettix li tiġi applikata rata mnaqqsa ta’ VAT għal din il-kategorija ta’ oġġetti peress li, minn naħa, ma jkoprix il-mezzi mediċi, il-materjal, it-tagħmir u l-apparat għal użu ġenerali, u, min-naħa l-oħra, jirreferi biss għall-użu mill-bniedem, bl-esklużjoni tal-użu veterinarju.
60 Għalhekk, sabiex tiġi evalwata l-fondatezza tat-tieni lment tal-Kummissjoni, għandu jiġi analizzat jekk l-oġġetti msemmija fil-paragrafu 1(6)(2) tal-ewwel sezzjoni tal-Artikolu 91 tal-liġi dwar il-VAT jistgħux jiġu kkunsidrati bħala “prodotti farmaċewtiċi” fis-sens tal-punt 3 ta’ dan l-Anness III.
61 F’dan ir-rigward, hemm lok li jitfakkar li, hekk kif ġie kkonstatat fil-punt 43 ta’ din is-sentenza, il-kunċett ta’ “prodott farmaċewtiku” fis-sens ta’ din id-dispożizzjoni, filwaqt li jinkludi l-kunċett ta’ “prodott mediċinali” fis-sens tad-Direttiva 2001/83, għandu jiġi interpretat bħala li għandu sens iktar wiesa’ minn dak tal-aħħar.
62 Fid-dawl ta’ dan kollu, l-argument tar-Renju ta’ Spanja, li l-kunċett ta’ “prodott farmaċewtiku” jista’ jinkludi kull mezz, apparat, materjal jew tagħmir mediku għal użu ġenerali, ma jistax jiġi aċċettat.
63 Fil-fatt, mhux biss il-kategoriji msemmija fl-Anness III tad-Direttiva 2006/112 għandhom jiġu interpretati b’mod strett peress illi d-dispożizzjoni ta’ dritt tal-Unjoni inkwistjoni għandha n-natura ta’ miżura ta’ deroga, skont il-ġurisprudenza mfakkra fil-punt 18 ta’ din is-sentenza, iżda l-kunċetti użati f’dan l-anness għandhom jiġu interpretati skont is-sens abitwali tat-termini inkwistjoni. Issa, għandu jiġi kkonstatat li, fir-rigward tas-sens abitwali, fil-lingwa kurrenti, tal-kunċett ta’ “prodott farmaċewtiku”, kull mezz, tagħmir, apparat jew materjal għal użu mediku jew veterinarju ma jistax jiġi kkunsidrat bħala li jaqa’ taħt dan il-kunċett.
64 Din l-interpretazzjoni hija kkorroborata mill-istruttura ġenerali tal-Anness III tad-Direttiva 2006/112, u b’mod partikolari miċ-ċirkustanza li, fil-punt 4 ta’ dan l-anness, mezzi mediċi b’użu speċifiku huma speċifikament imsemmija. Fil-fatt, hekk kif il-Kummissjoni osservat, din id-dispożizzjoni ma tagħmilx sens jekk il-punt 3 ta’ dan l-anness kellu jiġi interpretat bħala li jippermetti l-applikazzjoni ta’ rata mnaqqsa ta’ VAT għal kull mezz jew apparat mediku, indipendentement mill-użu li għalih huwa ddestinat.
65 Barra minn hekk, hemm lok li jitfakkar li, hekk kif ġie rrilevat fil-punt 48 ta’ din is-sentenza, l-għan tal-applikazzjoni tar-rati mnaqqsa ta’ VAT huwa b’mod partikolari li jnaqqas l-ispiża għall-konsumatur finali ta’ ċerti oġġetti essenzjali. Issa, l-ispiża tal-mezzi, tal-apparat, tal-materjal kif ukoll tat-tagħmir mediku u veterinarji huma rarament sostnuti direttament mill-konsumatur finali, peress illi dawn il-prodtti jintużaw prinċipalment minn professjonisti tas-settur tas-saħħa għall-provvista ta’ servizzi, li jistgħu, huma stess, jiġu eżentati mill-VAT skont l-Artikolu 132 tad-Direttiva 2006/112.
66 Tali interpretazzjoni ma hijiex, minbarra dan, inkompatibbli mal-Artikolu 168 TFUE. F’dan ir-rigward, huwa biżżejjed li jiġi kkonstatat li, jekk huwa veru li dan l-artikolu jirreferi, fil-raba’ subparagrafu tiegħu taħt (ċ), għall-prodotti mediċinali u l-mezzi għal użu mediku, l-għan segwit minn din id-dispożizzjoni, jiġifieri l-istabbiliment tar-regoli għolja ta’ kwalità u ta’ sigurtà, ivarjaw sostanzjalment minn dak imsemmi fl-Anness III tad-Direttiva 2006/112, kif espost iktar ’il fuq.
67 Minn dawn il-kunsiderazzjonijiet li jippreċedu jirriżulta li la l-punt 4 u lanqas il-punt 3 ta’ dan l-anness ma jippermettu li tiġi applikata rata mnaqqsa ta’ VAT għall-“mezzi mediċi, għall-materjal, għat-tagħmir u apparat li ma jistgħux oġġettivament jintużaw ħlief għall-prevenzjoni, dijanjostika, trattament, allevajament jew kura tal-mard jew tal-kundizzjonijiet mediċi tal-bniedem jew tal-annimali”.
68 F’dawn iċ-ċirkustanzi, hemm lok li t-tieni lment tal-Kummissjoni jiġi kkunsidrat bħala fondat.
Fuq it-tielet ilment ibbażat fuq l-applikazzjoni ta’ rata mnaqqsa ta’ VAT għall-oġġetti użati sabiex jiġu imtaffija d-diżabbiltajiet fiżiċi tal-annimali
L-argumenti tal-partijiet
69 Il-Kummissjoni ssostni li l-applikazzjoni ta’ rata mnaqqsa ta’ VAT għall-oġġetti użati sabiex jiġu imtaffija diżabbiltajiet fiżiċi tal-annimali, prevista fil-paragrafu 1(6)(1) tal-ewwel sezzjoni tal-Artikolu 91 tal-liġi dwar il-VAT, tmur kontra d-Direttiva 2006/112. Hekk kif l-argumenti mressqa mill-Kummissjoni fil-kuntest tal-ewwel żewġ ilmenti juru, la l-punt 3 tal-Anness III tad-Direttiva 2006/112 — limitat għall-prodotti farmaċewtiċi stricto sensu —, u lanqas il-punt 4 tagħha — limitat għall-użu mill-bniedem tal-oġġetti msemmija — ma jawtorizzaw l-applikazzjoni ta’ dawn l-oġġetti għal tali rata.
70 Fir-risposta tiegħu, ir-Renju ta’ Spanja jirreferi għat-tweġibiet magħmula matul il-fażijiet differenti tal-proċedura prekontenzjuża, li fihom huwa sostna, essenzjalment, li l-punt 3 ta’ dan l-anness jinkludi l-mezzi u l-apparat mediku u veterinarju.
Il-kunsiderazzjonijiet tal-Qorti tal-Ġustizzja
71 Sabiex tiġi evalwata l-fondatezza tat-tielet ilment tal-Kummissjoni, għandu jiġi rrilevat, minn naħa, hekk kif ġie espost fil-punti 61 sa 67 ta’ din is-sentenza, li l-kunċett ta’ “prodott farmaċewtiku” fis-sens tal-punt 3 tal-Anness III tad-Direttiva 2006/112 ma jistax jiġi interpretat fis-sens li jinkludi l-apparat kif ukoll il-mezzi mediċi u veterinarji.
72 Isegwi li din id-dispożizzjoni ma tippermettix li tiġi applikata rata mnaqqsa ta’ VAT għall-apparat u għall-aċċessorji li jistgħu jintużaw sabiex itaffu diżabbiltajiet fiżiċi tal-annimali.
73 Min-naħa l-oħra, jirriżulta ċar mit-termini tal-punt 4 ta’ dan l-anness li din id-dispożizzjoni tirreferi biss għat-tagħmir mediku, l-istrumenti l-oħra u l-apparat l-ieħor normalment iddestinati sabiex itaffu jew jitrattaw diżabbiltajiet tal-bnedmin. Fil-fatt, huwa magħruf li t-terminu “b’diżbabbiltà”, użat fit-tieni sentenza ta’ din id-dispożizzjoni, jirreferi mhux għall-annimali milquta minn diżabbiltà fiżika, iżda unikament għall-persuni.
74 Minbarra dan, hekk kif il-Kummissjoni sostniet ġustament, hemm lok li jiġi kkunsidrat li, jekk il-leġiżlatur tal-Unjoni kien xtaq jinkludi l-parti veterinarja fil-kategorija ta’ oġġetti msemmija fil-punt 4 ta’ dan l-anness, huwa kien isemmiha espressament, bħal huwa b’mod partikolari l-każ tal-punt 3 tiegħu.
75 Isegwi li la l-punt 4 tal-Anness III tad-Direttiva 2006/112 u lanqas il-punt 3 tagħha ma jippermettu li tiġi applikata rata mnaqqsa ta’ VAT għall-apparat u għall-aċċessorji li jistgħu jintużaw sabiex itaffu disabbiltajiet fiżiċi tal-annimali.
76 F’dawn il-kundizzjonijiet, it-tielet ilment tal-Kummissjoni għandu jiġi kkunsidrat bħala fondat.
Fuq ir-raba’ lment ibbażat fuq l-applikazzjoni ta’ rata mnaqqsa ta’ VAT għall-apparat jew għall-aċċessorji essenzjalment jew prinċipalment użati sabiex itaffu diżabbiltajiet tal-bniedem, iżda li ma humiex użati għall-użu personali u esklużiv tal-persuni b’diżabbiltà
L-argumenti tal-partijiet
77 Il-Kummissjoni ssostni li l-applikazzjoni ta’ rata mnaqqsa ta’ VAT għall-apparat u għall-aċċessorji essenzjalment jew prinċipalment użati sabiex itaffu diżabbiltajiet tal-bniedem, iżda li ma humiex irriżervati għall-użu personali u esklużiv tal-persuni b’diżabbiltà, prevista fil-pargrafu 1(6)(1) tal-ewwel sezzjoni tal-Artikolu 91 tal-liġi dwar il-VAT, tmur kontra d-Direttiva 2006/112.
78 Hija tosserva, f’dan ir-rigward, li l-punt 4 tal-Anness III tad-Direttiva 2006/112 jippermetti lill-Istati Membri li japplikaw rata mnaqqsa ta’ VAT għall-oġġetti li jissodisfaw ċerti kundizzjonijiet. Minn naħa, dawn l-oġġetti għandhom ikunu jistgħu jiġu kkunsidrati bħala “tagħmir mediku, għajnuniet u strumenti oħra” u, min-naħa l-oħra, huma għandhom ikunu “normalment maħsuba biex itaffu jew [sabiex] jikkuraw id-diżabilità, għall-użu esklusżiv u personali tal-persuni b’diżabilità”.
79 Għaldaqstant, dan il-punt 4 ma jinkludix it-tagħmir mediku għal użu ġenerali, iżda unikament dak iddestinat għall-użu “esklussiv u personali tal-persuni b’diżabilità”. Din l-interpretazzjoni hija barra minn hekk ikkorroborata mil-linji gwida adottati fi ħdan il-kumitat tal-VAT.
80 Fid-dawl ta’ dawn il-kunsiderazzjonijiet, il-Kummissjoni tqis li, peress illi l-liġi dwar il-VAT tapplika rata ta’ VAT imnaqqsa għall-apparat jew għall-aċċessorji “essenzjalment jew prinċipalment użati sabiex itaffu d-diżabbiltà”, il-kamp ta’ applikazzjoni tagħha jaqbeż dak awtorizzat mid-Direttiva 2006/112.
81 Il-Kummissjoni tikkunsidra, minbarra dan, li r-Renju ta’ Spanja ta, fit-tweġiba tiegħu għall-ittra ta’ intimazzjoni, sens eċċessivament wiesa’ għall-kunċett ta’ “diżabbiltà”, fejn ikkunsidra dan il-kunċett bħala sinonimu ta’ “marda”.
82 Ir-Renju ta’ Spanja jikkontesta l-interpretazzjoni tal-kunċett ta’ “diżabbiltà” propost mill-Kummissjoni. Huwa jsostni li, fl-assenza ta’ definizzjoni uniformi ta’ dan il-kunċett fil-livell tal-Unjoni, huwa neċessarju li jiġu applikati l-kunċetti l-iktar reċenti stabbiliti mill-Organizzazzjoni Dinjija tas-Saħħa. Issa, meta jiġu applikati dawn il-kunċetti, għandha tiġi kkunsidrata bħala persuna b’diżabbiltà, kull persuna milquta minn marda li toħloq invalidità. Tali definizzjoni tippermetti għalhekk li jiġu kkunsidrati l-persuni milquta minn mard bħall-AIDS, il-kanċer jew l-insuffiċjenza renali bħala persuni b’diżabbiltà, u b’hekk tipprevjeni d-diskriminazzjonijiet li l-persuni milquta minn dan il-mard jistgħu jsofru minnhom. Din l-interpretazzjoni ma tistax tkun differenti mill-fatt biss li f’dan il-każ qed jiġi ttrattat il-qasam fiskali.
83 Ir-Renju ta’ Spanja jsostni, barra minn hekk, li huwa diffiċli li jiġu differenzjati l-mezzi mediċi sabiex jiġu ddeterminati dawk li jservu jew dawk li ma jservux f’sitwazzjonijiet ta’ diżabbiltà, fejn jinvoka mill-ġdid id-diffikultajiet li jiġi stabbilit nuqqas ta’ twettiq ta’ obbligu fuq id-dispożizzjonijiet tal-Anness III tad-Direttiva 2006/112 minħabba n-nuqqas ta’ preċiżjoni tagħhom. Dan ifakkar, fl-aħħar nett, li l-linji gwida tal-kumitat tal-VAT, li għalihom il-Kummissjoni tagħmel riferiment fir-rikors tagħha, ma għandhomx valur interpretattiv vinkolanti.
Il-kunsiderazzjonijiet tal-Qorti tal-Ġustizzja
84 Sabiex jiġi kkunsidrat ir-raba’ lment tal-Kummissjoni, għandu jiġi ddeterminat jekk il-punt 4 tal-Anness III tad-Direttiva 2006/112 jistax japplika għal apparat u għal aċċessorji li ma humiex irriżervati għall-użu personali u eskużiv tal-persuni b’diżabbiltà, iżda li huma essenzjalment jew prinċipalment użati sabiex itaffu d-diżabbiltà tagħhom.
85 F’dan ir-rigward, għandu jiġi rrilevat li jirriżulta mill-istess sens tat-termini “persunali” u “esklussiv” li jinsabu f’dan il-punt 4 li dan ma jirreferix għall-mezzi għal użu ġenerali.
86 Għalhekk, l-għan li jikkonsisti li jtaffi l-ispiża għall-konsumatur finali ta’ ċerti oġġetti essenzjali, espost fil-punt 48 ta’ din is-sentenza, ma jippermettix li tiġi ġġustifikata l-applikazzjoni ta’ rata mnaqqsa ta’ VAT għall-mezzi mediċi għal użu ġenerali użati minn sptarijiet u minn professjonisti tas-servizzi sanitarji.
87 Din il-konklużjoni ma hijiex ikkontestata mill-argument tar-Renju ta’ Spanja, li jipprovdi li ċerti mezzi u apparat jistgħu jkollhom kemm użu ġenerali kif ukoll użu personali u esklużiv mill-persuni b’diżabbiltà. F’dan ir-rigward, huwa biżżejjed li jitfakkar li l-Qorti tal-Ġustizzja diġà ddeċidiet li l-applikazzjoni ta’ rata mnaqqsa ta’ VAT, fil-każ ta’ oġġett li jista’ jintuża b’mod differenti, hija suġġetta, għal kull tranżazzjoni ta’ kunsinna, għall-użu konkret li għalih dan l-oġġett huwa ddestinat mix-xerrej tiegħu (ara, b’analoġija, is-sentenza Il-Kummissjoni vs Il-Pajjiżi l-Baxxi, iċċitata iktar ’il fuq, punt 65).
88 Isegwi li l-apparat u l-aċċessorji essenzjalment jew prinċipalment użati sabiex itaffu diżabbiltajiet tal-bniedem, iżda li ma humiex irriżervati għall-użu personali u esklużiv tal-persuni b’diżabbiltà ma tistax tiġi applikata lilhom, skont il-punt 4 tal-Anness III tad-Direttiva 2006/1112, rata mnaqqsa ta’ VAT.
89 F’dawn iċ-ċirkustanzi, ir-raba’ lment għandu jiġi kkunsidrat bħala fondat u, għaldaqstant, ir-rikors tal-Kummissjoni għandu jiġi milqugħ.
90 Fid-dawl tal-kunsiderazzjonijiet preċedenti kollha, għandu jiġi kkonstatat li, meta applika rata mnaqqsa ta’ VAT
– għas-sustanzi mediċinali li jistgħu jintużaw abitwalment u b’mod xieraq fil-produzzjoni ta’ prodotti mediċinali;
– għall-mezzi mediċi, materjal, apparat u strumenti li, ikkunsidrati oġġettivament, jistgħu jintużaw biss sabiex jiġu pprevenuti, dijanjostikati, trattati, imtaffija jew imfejqa mardiet jew kundizzjonijiet mediċi relatati mal-bnedmin jew mal-annimali, iżda li ma humiex normalment intiżi sabiex itaffu u jikkuraw diżabbiltajiet u li huma rriżervati għall-użu personali u esklużiv tal-persuni b’diżabbiltà;
– għall-apparat u għall-aċċessorji li jistgħu jintużaw essenzjalment jew prinċipalment sabiex itaffu diżabbiltajiet fiżiċi tal-annimali;
– u, fl-aħħar nett, għall-apparat u għall-aċċessorji essenzjalment jew prinċipalment użati sabiex itaffu diżabbiltajiet tal-bniedem, iżda li ma humiex irriżervati għall-użu personali u esklużiv tal-persuni b’diżabbiltà,
ir-Renju ta’ Spanja naqas milli jwettaq l-obbligi tiegħu taħt l-Artikolu 98 tad-Direttiva 2006/112, moqri flimkien mal-Anness III tagħha.
Fuq l-ispejjeż
91 Skont l-Artikolu 138(2) tar-Regoli tal-Proċedura, kull parti li titlef għandha tbati l-ispejjeż, jekk dawn ikunu ntalbu. Peress li r-Renju ta’ Spanja tilef, hemm lok li jiġi ordnat ibati l-ispejjeż, kif mitlub mill-Kummissjoni.
Għal dawn il-motivi, Il-Qorti tal-Ġustizzja (It-Tielet Awla) taqta’ u tiddeċiedi:
1) Meta applika rata mnaqqsa ta’ taxxa fuq il-valur miżjud
– għas-sustanzi mediċinali li jistgħu jintużaw abitwalment u b’mod xieraq fil-produzzjoni ta’ prodotti mediċinali;
– għall-mezzi mediċi, materjal, apparat u strumenti li, ikkunsidrati oġġettivament, jistgħu jintużaw biss sabiex jiġu pprevenuti, dijanjostikati, trattati, imtaffija jew imfejqa mardiet jew kundizzjonijiet mediċi relatati mal-bnedmin jew mal-annimali, iżda li ma humiex normalment intiżi sabiex itaffu u jikkuraw diżabbiltajiet u li huma rriżervati għall-użu personali u esklużiv tal-persuni b’diżabbiltà;
– għall-apparat u għall-aċċessorji li jistgħu jintużaw essenzjalment jew prinċipalment sabiex itaffu diżabbiltajiet fiżiċi tal-annimali;
– u, fl-aħħar nett, għall-apparat u għall-aċċessorji essenzjalment jew prinċipalment użati sabiex itaffu diżabbiltajiet tal-bniedem, iżda li ma humiex irriżervati għall-użu personali u esklużiv tal-persuni b’diżabbiltà,
ir-Renju ta’ Spanja naqas milli jwettaq l-obbligi tiegħu taħt l-Artikolu 98 tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud, moqri flimkien mal-Anness III tagħha.
2) Ir-Renju ta’ Spanja huwa kkundannat għall-ispejjeż.
Firem
* Lingwa tal-kawża: l-Ispanjol.