Edizzjoni Provviżorja
SENTENZA TAL-QORTI TAL-ĠUSTIZZJA (Il‑Ħames Awla)
28 ta’ Frar 2018 (*)
“Rinviju għal deċiżjoni preliminari – Direttiva 2006/112/KE – Taxxa fuq il-valur miżjud (VAT) – Artikolu 131 – Artikolu 146(1)(b) –Artikolu 147 –Eżenzjonijiet fuq l-esportazzjoni – Artikolu 273 –Leġiżlazzjoni ta’ Stat Membru li tissuġġetta l-benefiċċju tal-eżenzjoni kemm għall-fatt li twettaq dħul mill-bejgħ għal ammont minimu, kemm għall-fatt li ġie konkluż kuntratt ma’ operatur awtorizzat li jwettaq ir-rimbors tal-VAT lill-vjaġġaturi”
Fil-Kawża C‑307/16,
li għandha bħala suġġett talba għal deċiżjoni preliminari skont l-Artikolu 267 TFUE, imressqa min-Naczelny Sąd Administracyjny (il-Qorti Amministrattiva Suprema, il-Polonja), permezz ta’ deċiżjoni tas-27 ta’ Jannar 2016, li waslet fil-Qorti tal-Ġustizzja fit-30 ta’ Mejju 2016, fil-proċedura
Stanisław Pieńkowski
vs
Dyrektor Izby Skarbowej w Lublinie,
IL-QORTI TAL-ĠUSTIZZJA (Il‑Ħames Awla),
komposta minn J. L. da Cruz Vilaça, President tal-Awla, E. Levits, A. Borg Barthet (Relatur), M. Berger u F. Biltgen, Imħallfin,
Avukat Ġenerali: Yves Bot,
Reġistratur: A. Calot Escobar,
wara li rat il-proċedura bil-miktub,
wara li kkunsidrat l-osservazzjonijiet ippreżentati:
– għall-Gvern Pollakk, minn B. Majczyna, bħala aġent,
– għall-Kummissjoni Ewropea, minn K. Herrmann u M. Owsiany-Hornung, bħala aġenti,
wara li semgħet il-konklużjonijiet tal-Avukat Ġenerali, ippreżentati fis-seduta tas-7 ta’ Settembru 2017,
tagħti l-preżenti
Sentenza
1 It-talba għal deċiżjoni preliminari tirrigwarda l-interpretazzjoni tal-Artikolu 131, tal-Artikolu 146(1)(b) kif ukoll tal-Artikoli 147 u 273 tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (ĠU 2006, L 347, p. 1, iktar ’il quddiem id-“Direttiva tal-VAT”).
2 Din it-talba tressqet fil-kuntest ta’ tilwima bejn Stanisław Pieńkowski u d-Dyrektor Izby Skarbowej w Lublinie (id-Direttur tal-Kamra tat-Taxxa ta’ Lublinie, il‑Polonja) rigward l-eżenzjoni mit-taxxa fuq il-valur miżjud (VAT) fuq kunsinni ta’ oġġetti mibgħuta ’l barra mill-Unjoni Ewropea fil-bagalji personali ta’ vjaġġaturi.
Il-kuntest ġuridiku
Id-dritt tal-Unjoni
3 Skont l-Artikolu 14(1) tad-Direttiva tal-VAT:
“‘Provvista ta’ merkanzija’ għandha tfisser it-trasferiment tad-dritt ta’ sid li jiddisponi minn proprjetà tanġibbli.”
4 L-Artikolu 131 tad-Direttiva tal-VAT jipprovdi:
“L-eżenzjonijiet ipprovduti fil-Kapitoli 2 sa 9 [tat-Titolu IX tad-Direttiva tal-VAT] għandhom japplikaw mingħajr preġudizzju għal disposizzjonijet oħrajn tal-Komunità skond kondizzjonijiet li l-Istati Membri għandhom jistabilixxu għall-finijiet li jiżguraw l-applikazzjoni korretta u ċara ta’ dawk l-eżenzjonijet u tal-prevenzjoni ta’ kawlunkwe evażjoni, evitar jew abbuż possibbli.”
5 Fil-Kapitolu 6, intitolat “Eżenzjonijiet fuq l-esportazzjoni”, tat-Titolu IX tal-imsemmija direttiva, l-Artikolu 146 tagħha jipprovdi, fil-paragrafu 1(b) tiegħu:
“1. L-Istati Membri għandhom jeżentaw it-transazzjonijiet li ġejjin:
[...]
b) il-provvista ta’ merkanzija mibgħuta jew ittrasportata lejn destinazzjoni barra mill-Komunità minn jew għan-nom ta’ konsumatur li mhux stabbilit fit-territorju tagħhom, bl-eċċezzjoni ta’ merkanzija ttrasportata mill-konsumatur innifsu għall-armar, l-għoti tal-karburant u l-provviżjoni tad-dgħajjes tad-divertiment u t’ajruplani privati jew kwalunkwe mezz tat-trasport ieħor għall-użu privat.”
6 L-Artikolu 147 tal-imsemmija direttiva jipprevedi:
“1. Fejn il-provvista ta’ merkanzija msemmija fil-punt (b) ta’ l-Artikolu 146(1) tirrigwarda merkanzija li ser tinġarr fil-bagalja personali tal-vjaġġaturi, l–eżenzjoni għandha tapplika biss jekk jiġu sodisfatti l-kondizzjonijiet li ġejjin:
a) il-vjaġġatur mhuwiex stabbilit fi ħdan il-Komunità;
b) il-merkanzija hija ttrasportata barra mill-Komunità qabel l-aħħar tat-tielet xahar wara dak li fih tkun saret il-provvista;
ċ) il-valur totali tal-provvista, inkluża l-VAT, huwa aktar minn EUR 175 jew l-ekwivalenti f’valuta nazzjonali, stabbilit kull sena permezz ta’ l-applikazzjoni tar-rata tal-kambju eżistenti fl-ewwel ġurnata tax-xogħol ta’ Ottobru b’effett mill-1 ta’ Jannar tas-sena ta’ wara.
Madankollu, l-Istati Membri jistgħu jeżentaw provvista b’ valur totali ta’ inqas mill-ammont speċifikat fil-punt (ċ) ta’ l-ewwel subparagrafu.
2. Għall-finijiet tal-paragrafu 1, ‘vjaġġatur mhux stabbililt fi ħdan il–Komunità’ għandha tfisser vjaġġatur li l–indirizz permanenti jew ir–residenza abitwali tiegħu mhux qiegħda fil–Komunità. F’dak il-każ ‘indirizz permanenti jew residenza abitwali’ tfisser il-post imnizzel bħala tali f’passaport, karta ta’ l-identità, jew dokument ieħor ta’ l-identità mill-Istat Membru li fit-territorju tiegħu l-provvista tkun qed issir.
Prova ta’ esportazzjoni għandha tkun fornuta permezz tal-fattura jew dokument ieħor floku, iffirmat mill-uffiċċju tad-dwana ta’ ħruġ mill-Komunità.
Kull Stat Membru għandu jibgħat lill-Kummissjoni kampjuni tat-timbri li jużaw għall-approvazzjoni msemmija fit-tieni subparagrafu. Il–Kummissjoni għandha tgħaddi din l-informazzjoni lill-awtorjitajiet tat-taxxa ta’ l-Istati Membri l-oħrajn.”
7 Skont l-Artikolu 273 tal-istess direttiva:
“L-Istati Membri jistgħu jimponu obbligi oħrajn li jidhrulhom meħtieġa biex jiżguraw il-ġbir korrett ta’ VAT u biex ma ssirx frodi, soġġett għall-ħtieġa ta’ trattament indaqs bejn transazzjonijiet domestiċi u transazzjonijiet li jsiru bejn Stati Membri minn persuni taxxabbli u sakemm dawn l-obbligi, fin-negozju bejn Stati Membri, ma jagħtux lok għal formalitajiet konnessi mal-qsim ta’ fruntieri.
L-għażla skont l-ewwel paragrafu ma tistax tintuża biex timponi obbligi tal-fatturazzjoni addizzjonali aktar minn dawk stabbiliti fil-Kapitolu 3.”
Id-dritt Pollakk
8 L-Artikolu 126(1) tal-ustawa o podatku od towarów i usług (il-Liġi dwar it-Taxxa fuq l-Oġġetti u fuq is-Servizzi) tal-11 ta’ Marzu 2004 (Dz. U. ta’ 2011, Nru 177, intestatura 1054), fil-verżjoni tagħha applikabbli għall-fatti fil-kawża prinċipali (iktar ’il quddiem il-“Liġi dwar il-VAT”) jipprovdi:
“Il-persuni fiżiċi li d-domiċilju tagħhom ma jkunx jinsab fit-territorju tal-Unjoni Ewropea, iktar ’il quddiem ikklassifikati bħala ‘vjaġġaturi’, għandhom id-dritt għar-rimbors tat-taxxa mħallsa waqt ix-xiri, fit-territorju nazzjonali, ta’ oġġetti li huma jkunu esportaw intatti barra mit-territorju tal-Unjoni Ewropea fil-bagalji personali tagħhom, bla ħsara għad-dispożizzjonijiet tal-paragrafu 3 u tal-Artikoli 127 u 128.”
9 L-Artikolu 127 tal-Liġi dwar il-VAT jipprovdi:
“1. Ir-rimbors tat-taxxa msemmi fl-Artikolu 126(1) japplika meta l-oġġetti jkunu nxtraw mingħand persuni taxxabbli, iktar ’il quddiem ikklassifikati bħala ‘bejjiegħa’, li:
1) huma rreġistrati bħala persuni suġġetti għat-taxxa, u
2) jużaw cash registers sabiex jirreġistraw id-dħul mill-bejgħ u l-ammont tat-taxxa dovuta, u
3) ikunu kkonkludew kuntratti b’rabta mar-rimbors tat-taxxa ma’ mill-inqas wieħed mill-operaturi msemmija fil-paragrafu 8.
[...]
5. Ir-rimbors tat-taxxa lill-vjaġġatur isir fi zloty [Pollakki] (PLN) mill-bejjiegħ jew fil-punti ta’ rimbors tal-VAT mill-operaturi li l-attività tagħhom tirrigwarda r-rimbors tat-taxxa msemmi fl-Artikolu 126(1).
6. Il-bejjiegħa msemmija fil-paragrafu 5 jistgħu jwettqu r-rimbors imsemmi fl-Artikolu 126(1) sakemm id-dħul mill-bejgħ tagħhom tas-sena fiskali preċedenti kien ogħla minn PLN 400 000 u sakemm iwettqu r-rimbors tat-taxxa biss għal oġġetti li jkunu nxtraw minn vjaġġatur mingħand dan il-bejjiegħ.
[...]
8. L-operaturi msemmija fil-paragrafu 5, li ma humiex bejjiegħa, jistgħu jipproċedu għar-rimbors previst fl-Artikolu 126(1), bil-kundizzjoni li dawn l-operaturi:
1) jkunu persuni taxxabbli rreġistrati sa minn perijodu ta’ mill-inqas 12-il xahar qabel it-talba għal attestazzjoni msemmija fil-punt 6;
2) ikunu informaw bil-miktub id-direttur tal-amministrazzjoni fiskali bl-intenzjoni tagħhom li jeżerċitaw attività li għandha bħala skop ir-rimbors tat-taxxa lill-vjaġġaturi;
3) ma kienx hemm, f’perijodu ta’ mill-inqas 12-il xahar qabel it-talba għal attestazzjoni prevista l-punt 6, arretrati ta’ taxxi li d-dħul tagħhom huwa assenjat lill-baġit tal-Istat u lanqas arretrati ta’ kontribuzzjonijiet tas-sigurtà soċjali;
4) ikunu kkonkludew kuntratti mal-bejjiegħa msemmija fil-paragrafu 1 dwar ir-rimbors tat-taxxa;
5) ikunu ħallsu lill-amministrazzjoni fiskali garanzija ta’ PLN 5 miljun fil-forma ta’:
a) depożitu fi flus kontanti,
b) garanziji bankarji,
ċ) bonds tat-Teżor b’maturità ta’ mhux iktar minn tliet snin;
6) ikunu kisbu mill-Ministru kompetenti fil-qasam ta’ finanzi pubbliċi attestazzjoni li tikkonferma l-osservanza tal-kundizzjonijiet kollha previsti fil-punti 1 sa 5.”
Il-kawża prinċipali u d-domanda preliminari
10 S. Pieńkowski huwa imprenditur suġġett għall-VAT li jeżerċita attività fil-qasam tal-kummerċ, b’mod partikolari tagħmir ta’ telekomunikazzjonijiet, u juża cash register sabiex jirreġistra d-dħul mill-bejgħ u l-ammont tat-taxxa dovuta. Fil-kuntest tal-attività ekonomika tiegħu, S. Pieńkowski jbigħ merkanzija b’mod partikolari lil vjaġġaturi li jirrisjedu barra mit-territorju tal-Unjoni.
11 L-Urzędu Skarbowego w Białej Podlaskiej (l-Amministrazzjoni tat-Taxxa ta’ Biała Podlaska, il-Polonja), informat lil S. Pieńkowski li huwa kien jaqa’ taħt il-klassifikazzjoni bħala “bejjiegħ” fis-sens tal-Artikolu 127(1) tal-Liġi dwar il-VAT. Din l-awtorità qieset ukoll li mid-dikjarazzjonijiet tal-VAT tiegħu kien jirriżulta li d-dħul mill-bejgħ nett iġġenerat minn din il-persuna taxxabbli fid-dawl tal-bejgħ imwettaq kien jammonta għal PLN 283 695 (madwar EUR 68 288) għas-sena fiskali 2009 u għal PLN 238 429 (madwar EUR 57 392) għas-sena fiskali 2010. Barra minn hekk, din qieset li S. Pieńkowski ma kien ipprovdielha ebda informazzjoni fir-rigward tal-konklużjoni ta’ kuntratt ma’ operatur awtorizzat sabiex jirrimborsa l-VAT, iżda kien wettaq personalment jew bl-intermedju ta’ impjegat ir-rimborsi ta’ din it-taxxa lill-vjaġġaturi.
12 F’dawn iċ-ċirkustanzi, l-Amministrazzjoni Fiskali ta’ Biała Podlaska qieset li S. Pieńkowski, minħabba l-ammont tad-dħul mill-bejgħ magħmul, ma kienx awtorizzat jipproċedi personalment jew bl-intermedju ta’ impjegat għar-rimborsi tal-VAT lill-vjaġġaturi, jew li japplika għalihom rata ta’ VAT nulla għall-perijodi ta’ taxxa tas-snin 2010 u 2011.
13 S. Pieńkowski kkontesta din id-deċiżjoni quddiem il-Wojewódzki Sąd Administracyjny w Lublinie (il-Qorti Amministrattiva Provinċjali ta’ Lublinie, il-Polonja).
14 Il-Wojewódzki Sąd Administracyjny w Lublinie (il-Qorti Amministrattiva Provinċjali ta’ Lublinie), filwaqt li bbażat ruħha fuq id-dispożizzjonijiet li jirregolaw il-proċedura ta’ rimbors tat-taxxa lill-vjaġġaturi, kif previsti fl-Artikoli 126 sa 129 tal-Liġi dwar il-VAT u fl-Artikolu 131, fl-Artikolu 146(1) kif ukoll fl-Artikoli 147 u 273 tad-Direttiva tal-VAT, iddeċidiet li, fir-rigward tal-kontenut ta’ dawn id-dispożizzjonijiet, S. Pieńkowski ma setax validament jafferma li d-dispożizzjonijiet tal-Liġi dwar il-VAT ma kinux konformi mad-Direttiva tal-VAT, sa fejn dawn kienu jissuġġettaw il-possibbiltà għall-bejjiegħ li jirrimborsa l-VAT lill-vjaġġaturi għat-twettiq, minnu, ta’ dħul mill-bejgħ ogħla minn PLN 400 000 (madwar EUR 96 284 ) skont is-sena fiskali preċedenti.
15 Fil-fatt, din il-qorti ddeċidiet li l-ammont minimu ta’ dħul mill-bejgħ hekk stabbilit ma kellux sempliċement natura informattiva u formali, iżda kien jikkostitwixxi kundizzjoni materjali li minnha jiddependi l-prinċipju stess ta’ rimbors tat-taxxa direttament mill-bejjiegħ. Għalhekk din l-istess qorti kkunsidrat, kuntrarjament għal dak li sostna S. Pieńkowski, li dan il-limitu minimu ta’ PLN 400 000 (madwar EUR 96 284) ma setax jiġi kklassifikat bħala “ostakolu amministrattiv” għall-applikazzjoni ta’ rata ta’ VAT nulla.
16 S. Pieńkowski ppreżenta appell ta’ kassazzjoni quddiem in-Naczelny Sąd Administracyjny (il-Qorti Amministrattiva Suprema, il-Polonja) billi qajjem, b’mod partikolari, l-inkompatibbiltà tad-dispożizzjonijiet tal-Liġi dwar il-VAT ma’ dawk tad-Direttiva tal-VAT u mal-prinċipji ta’ proporzjonalità u ta’ newtralità fiskali.
17 Il-qorti tar-rinviju tirrileva li, kuntrarjament għall-Artikolu 127(6) tal-Liġi dwar il-VAT, id-dispożizzjonijiet tad-Direttiva tal-VAT ma jipprevedux kundizzjoni li teħtieġ li l-persuna taxxabbli tkun wettqet, matul is-sena fiskali preċedenti, dħul mill-bejgħ ta’ ċertu ammont sabiex tkun tista’ tiġi applikata l-eżenzjoni minn VAT fuq l-oġġetti li jinġarru fil-bagalji personali tal-vjaġġaturi.
18 Fil-fehma tagħha, b’mod partikolari, l-Artikolu 131 tad-Direttiva tal-VAT ma jidhirx li jista’ jservi bħala bażi għall-istabbiliment tal-kundizzjoni prevista fl-Artikolu 127(6) tal-Liġi dwar il-VAT.
19 Din il-qorti ssostni wkoll li l-kundizzjonijiet ta’ applikazzjoni ta’ din l-eżenzjoni, kif iddefiniti fl-Artikoli 146 u 147 tad-Direttiva tal-VAT, jikkonċernaw ix-xerrej u mhux il-bejjiegħ, kuntrarjament għas-sitwazzjoni prevista fl-Artikolu 127(6) tal-Liġi dwar il-VAT.
20 Minbarra dan, din il-qorti tqis li, kuntrarjament għall-pożizzjoni adottata mill-Wojewódzki Sąd Administracyjny w Lublinie (il-Qorti Amministrattiva Provinċjali ta’ Lublinie), il-kundizzjoni intiża għat-twettiq ta’ dħul mill-bejgħ għal ammont minimu waqt is-sena fiskali preċedenti ma tistax tiġi kkunsidrata, fid-dawl tad-dispożizzjonijiet tad-Direttiva tal-VAT, bħala kundizzjoni materjali tal-eżenzjoni, fl-assenza ta’ kwalunkwe bażi legali fil-formulazzjoni tal-Artikoli 146 u 147 tad-Direttiva tal-VAT, li jiġġustifikaw l-introduzzjoni ta’ tali kundizzjoni.
21 Il-qorti tar-rinviju tfakkar ukoll li mill-Artikolu 273 tad-Direttiva tal-VAT jirriżulta li l-Istati Membri jistgħu jipprevedu obbligi oħra li huma jqisu neċessarji sabiex jiżguraw il-ġbir eżatt tal-VAT u sabiex tiġi evitata l-frodi. Madankollu, din tal-aħħar tistaqsi jekk il-fatt għal Stat Membru li jistabbilixxi rekwiżit intiż għat-twettiq ta’ dħul mill-bejgħ għal ammont minimu ta’ PLN 400 000 (madwar EUR 96 284) jissodisfax l-għanijiet ta’ dan l-artikolu.
22 F’dawn iċ-ċirkustanzi, in-Naczelny Sąd Administracyjny (il-Qorti Amministrattiva Suprema) iddeċidiet li tissospendi l-proċeduri u li tagħmel id-domanda preliminari li ġejja lill-Qorti tal-Ġustizzja:
“L-Artikolu 146(1)(b), l-Artikolu 147 kif ukoll l-Artikolu 131 u l-Artikolu 273 tad-Direttiva [tal-VAT] għandhom jiġu interpretati fis-sens li jipprekludu dispożizzjonijiet nazzjonali li jeskludu l-applikazzjoni tal-eżenzjoni fil-każ ta’ persuna taxxabbli li ma tissodisfax il-kundizzjoni li teżiġi li din tkun laħqet limitu minimu ta’ dħul mill-bejgħ matul is-sena fiskali preċedenti, u li lanqas ma tkun ikkonkludiet kuntratt ma’ operatur intitolat biex iwettaq ir-rimborsi tal-VAT lill-vjaġġaturi?”
Fuq id-domanda preliminari
23 Permezz tad-domanda tagħha, il-qorti tar-rinviju essenzjalment tistaqsi jekk l-Artikolu 131, l-Artikolu 146(1)(b) kif ukoll l-Artikoli 147 u 273 tad-Direttiva tal-VAT għandhomx jiġu interpretati fis-sens li jipprekludu leġiżlazzjoni nazzjonali li, fil-kuntest ta’ kunsinna għall-esportazzjoni ta’ oġġetti li ser jinġarru fil-bagalji personali ta’ vjaġġaturi, il-bejjiegħ suġġett għat-taxxa għandu jkun għamel dħul mill-bejgħ għal ammont minimu matul is-sens fiskali preċedenti, jew dan tal-aħħar għandu jkun ikkonkluda kuntratt ma’ operatur awtorizzat sabiex jipproċedi għar-rimborsi ta’ VAT lill-vjaġġaturi, meta unikament in-nuqqas ta’ osservanza ta’ dawn il-kundizzjonijiet għandu bħala konsegwenza li jiġi miċħud definittivament mill-eżenzjoni ta’ din il-kunsinna.
24 Għandu jiġi rrilevat li, skont l-Artikolu 146(1)(b) tad-Direttiva tal-VAT, l-Istati Membri jeżentaw il-kunsinni ta’ oġġetti mibgħuta jew ittrasportati mix-xerrej jew f’ismu barra mill-Unjoni. Din id-dispożizzjoni għandha tinqara flimkien mal-Artikolu 14(1) tal-imsemmija direttiva, skont liema “[p]rovvista ta’ merkanzija” tfisser it-trasferiment tad-dritt ta’ proprjetarju li jiddisponi minn proprjetà tanġibbli.
25 Minn dawn id-dispożizzjonijiet, u, b’mod partikolari, mit-terminu “mibgħuta” użat fl-Artikolu 146(1)(b) jirriżulta li l-esportazzjoni ta’ oġġetti sseħħ u li l-eżenzjoni tal-kunsinna għall-esportazzjoni hija applikabbli meta d-dritt li wieħed jiddisponi minn dan l-oġġett bħala proprjetarju jkun ġie trażmess lix-xerrej, li l-fornitur jistabbilixxi li dan l-oġġett intbagħat jew ġie ttrasportat barra mill-Unjoni u li, wara din l-ispedizzjoni jew dan it-trasport, l-oġġett ikun fiżikament telaq mit-territorju tal-Unjoni (sentenza tad-19 ta’ Diċembru 2013, BDV Hungary Trading, C‑563/12, EU:C:2013:854, punt 24 u l-ġurisprudenza ċċitata).
26 Fil-kawża prinċipali, huwa paċifiku li seħħew kunsinni ta’ oġġetti fis-sens tal-Artikolu 14 tad-Direttiva VAT u li l-oġġetti kkonċernati mit-tranżazzjonijiet inkwistjoni fil-kawża prinċipali kienu fiżikament telqu mit-territorju tal-Unjoni billi ġew ittrasportati fil-bagalji personali ta’ vjaġġaturi.
27 Madankollu, meta l-kunsinna prevista fl-Artikolu 146(1)(b) tad-Direttiva tal-VAT tirrigwarda oġġetti li ser jinġarru fil-bagalji personali ta’ vjaġġaturi, l-eżenzjoni tapplika biss meta ċerti kundizzjonijiet addizzjonali, previsti fl-Artikolu 147 ta’ din id-direttiva, huma ssodisfatti.
28 F’dan ir-rigward, mid-deċiżjoni tar-rinviju jirriżulta li, fil-kawża prinċipali, il-kundizzjonijiet previsti fl-Artikolu 146(1)(b) u fl-Artikolu 147 tad-Direttiva tal-VAT huma effettivament issodisfatti.
29 Issa, għandu jiġi kkonstatat li l-formulazzjoni kemm tal-Artikolu 146(1)(b) kif ukoll tal-Artikolu 147 tad-Direttiva tal-VAT ma tipprevedix kundizzjoni fejn il-persuna taxxabbli għandha tkun għamlet dħul mill-bejgħ għal ammont minimu matul is-sena fiskali preċedenti jew, jekk din il-kundizzjoni ma hijiex issodisfatta, għandha tkun ikkonkludiet kuntratt ma’ operatur awtorizzat li jirrimborsa l-VAT sabiex l-eżenzjoni fuq l-esportazzjoni prevista f’dan l-Artikolu 146(1)(b) tkun applikabbli.
30 Minbarra dan, il-kundizzjonijiet previsti fl-Artikolu 147 tad-Direttiva tal-VAT jikkonċernaw unikament ix-xerrejja tal-oġġetti inkwistjoni u ma jirreferux għall-bejjiegħa ta’ dawn l-oġġetti.
31 Isegwi li l-applikazzjoni tal-Artikolu 146(1)(b) u tal-Artikolu 147 tad-Direttiva tal-VAT ma tistax tiddependi mill-osservanza tal-kundizzjonijiet stabbiliti mil-leġiżlazzjoni nazzjonali inkwistjoni fil-kawża prinċipali, fejn in-nuqqas ta’ osservanza tagħha jkollu bħala konsegwenza li jċaħħad definittivament il-persuna taxxabbli mill-eżenzjoni fuq l-esportazzjoni.
32 Ċertament, hekk kif jirriżulta mill-Artikolu 131 tad-Direttiva tal-VAT, l-eżenzjonijiet previsti fil-Kapitoli 2 sa 9 tat-Titolu IX ta’ din id-direttiva, li l-Artikoli 146 u 147 tagħha jagħmlu parti minnu, japplikaw fil-kundizzjonijiet li l-Istati Membri jistabbilixxu sabiex jiżguraw l-applikazzjoni korretta u sempliċi ta’ dawn l-eżenzjonijiet u li jkun hemm prevenzjoni ta’ kull frodi, kull evażjoni u kull abbuż eventwali. Minbarra dan, l-Artikolu 273 tad-Direttiva tal-VAT jipprovdi li l-Istati Membri jistgħu jipprevedu obbligi oħra li huma jqisu neċessarji sabiex jiżguraw il-ġbir eżatt tal-VAT u sabiex tiġi evitata l-frodi.
33 F’dan ir-rigward, il-Qorti tal-Ġustizzja diġà ddeċidiet li, fl-eżerċizzju tas-setgħat li jagħtuhom l-imsemmija Artikolu 131 u 273, l-Istati Membri għandhom josservaw il-prinċipji ġenerali tad-dritt, li jagħmlu parti mill-ordinament ġuridiku tal-Unjoni, li fosthom hemm, b’mod partikolari, il-prinċipji ta’ ċertezza legali, ta’ proporzjonalità u ta’ protezzjoni tal-aspettattivi leġittimi (sentenza tad-19 ta’ Diċembru 2013, BDV Hungary Trading, C‑563/12, EU:C:2013:854, punt 29 u l-ġurisprudenza ċċitata).
34 B’mod partikolari, fir-rigward tal-prinċipju ta’ proporzjonalità, il-Qorti tal-Ġustizzja diġà ddeċidiet li, skont dan il-prinċipju, l-Istati Membri għandhom jirrikorru għal mezzi li, filwaqt li jippermettu li jintlaħaq effiċjentement l-għan li għandu jintlaħaq mid-dritt intern, jippreġudikaw mill-inqas possibbli l-għanijiet u l-prinċipji stabbiliti mil-leġiżlazzjoni tal-Unjoni inkwistjoni (sentenza tad-19 ta’ Diċembru 2013, BDV Hungary Trading, C‑563/12, EU:C:2013:854, punt 30 u l-ġurisprudenza ċċitata).
35 F’dan il-każ, minn naħa, skont il-Gvern Pollakk, il-leġiżlazzjoni nazzjonali inkwistjoni fil-kawża prinċipali għandha prinċipalment bħala għan li timminimizza r-riskji ta’ evażjoni u ta’ frodi fiskali marbuta ma’ applikazzjoni żbaljata tal-eżenzjoni prevista fl-Artikolu 146(1)(b) tad-Direttiva tal-VAT.
36 Min-naħa l-oħra, skont l-indikazzjonijiet ipprovduti mill-qorti tar-rinviju, il-kundizzjoni dwar l-obbligu għall-persuna taxxabbli li tkun għamlet dħul mill-bejgħ għal ammont minimu waqt is-sena fiskali preċedenti, ma għandhiex natura assoluta sa fejn din tal-aħħar għandha l-possibbiltà li tibbenefika mill-eżenzjoni, jekk dan l-ammont minimu ma jintlaħaqx, billi jiġi konkluż kuntratt ma’ operatur awtorizzat sabiex jipproċedi għar-rimborsi tal-VAT lill-vjaġġaturi.
37 Madankollu, għandu jiġi rrilevat, f’dan ir-rigward, li n-nuqqas ta’ osservanza ta’ din il-kundizzjoni jwassal għar-rifjut tal-eżenzjoni fuq l-esportazzjoni minkejja li l-kundizzjonijiet biex jittieħed benefiċċju minnha previsti fl-Artikolu 146(1)(b) u fl-Artikolu 147 tad-Direttiva tal-VAT huma ssodisfatti.
38 Issa, il-Qorti tal-Ġustizzja ddeċidiet li, f’sitwazzjoni fejn il-kundizzjonijiet tal-eżenzjoni fuq l-esportazzjoni previsti fl-Artikolu 146(1)(b) tad-Direttiva tal-VAT, b’mod partikolari l-ħruġ tal-oġġetti kkonċernati mit-territorju doganali tal-Unjoni, huma stabbiliti, ebda VAT ma hija dovuta fir-rigward ta’ tali kunsinna. F’tali ċirkustanzi, bħala prinċipju, ma jeżistix iktar riskju ta’ frodi fiskali jew ta’ telf fiskali li jista’ jiġġustifika t-tassazzjoni tat-tranżazzjoni kkonċernata (sentenza tad-19 ta’ Diċembru 2013, BDV Hungary Trading, C‑563/12, EU:C:2013:854, punt 40).
39 Għalhekk, hemm lok li jiġi kkonstatat li leġiżlazzjoni bħal dik inkwistjoni fil-kawża prinċipali ma hijiex neċessarja sabiex jintlaħaq l-għan ta’ prevenzjoni tal-evażjoni u tal-frodi fiskali.
40 Fid-dawl tal-kunsiderazzjonijet preċedenti, id-domanda magħmula għandha tiġi risposta li l-Artikolu 131, l-Artikolu 146(1)(b), kif ukoll l-Artikoli 147 u 273 tad-Direttiva tal-VAT għandhom jiġu interpretati fis-sens li jipprekludu leġiżlazzjoni nazzjonali li, fil-kuntest ta’ kunsinna għall-esportazzjoni ta’ oġġetti li ser jinġarru fil-bagalji personali ta’ vjaġġaturi, il-bejjiegħ suġġett għat-taxxa għandu jkun għamel dħul mill-bejgħ għal ammont minimu matul is-sens fiskali preċedenti, jew dan tal-aħħar għandu jkun ikkonkluda kuntratt ma’ operatur awtorizzat sabiex jipproċedi għar-rimborsi ta’ VAT lill-vjaġġaturi, meta unikament in-nuqqas ta’ osservanza ta’ dawn il-kundizzjonijiet għandu bħala konsegwenza li jiġi miċħud definittivament mill-eżenzjoni ta’ din il-kunsinna.
Fuq l-ispejjeż
41 Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.
Għal dawn il-motivi, Il‑Qorti tal-Ġustizzja (Il‑Ħames Awla) taqta’ u tiddeċiedi:
L-Artikolu 131, l-Artikolu 146(1)(b), kif ukoll l-Artikoli 147 u 273 tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud, għandhom jiġu interpretati fis-sens li jipprekludu leġiżlazzjoni nazzjonali li, fil-kuntest ta’ kunsinna għall-esportazzjoni ta’ oġġetti li ser jinġarru fil-bagalji personali ta’ vjaġġaturi, il-bejjiegħ suġġett għat-taxxa għandu jkun għamel dħul mill-bejgħ għal ammont minimu matul is-sens fiskali preċedenti, jew dan tal-aħħar għandu jkun ikkonkluda kuntratt ma’ operatur awtorizzat sabiex jipproċedi għar-rimborsi ta’ taxxa fuq il-valur miżjud lill-vjaġġaturi, meta unikament in-nuqqas ta’ osservanza ta’ dawn il-kundizzjonijiet għandu bħala konsegwenza li jiġi miċħud definittivament mill-eżenzjoni ta’ din il-kunsinna.
Firem
* Lingwa tal-kawża: il‑Pollakk.