Available languages

Taxonomy tags

Info

References in this case

References to this case

Share

Highlight in text

Go

SENTENZA TAL-QORTI TAL-ĠUSTIZZJA (it-Tielet Awla)

8 ta' Diċembru 2005(*)

"Sitt Direttiva VAT – Artikolu 13(B)(c) – Eżenzjonijiet – Eżenzjoni tal-provvista ta' oġġetti li ma tawx lok għal dritt ta’ tnaqqis – Bejgħ mill-ġdid minn kumpannija ta' leasing ta' vetturi użati mixtrija – Artikolu 26a – Arranġamenti speċjali dwar bejgħ ta' oġġetti użati"

Fil-kawża C-280/04,

li għandha bħala suġġett talba għal deċiżjoni preliminari skond l-Artikolu 234 KE, imressqa minn Vestre Landsret (id-Danimarka), permezz ta' deċiżjoni tal-25 ta' Ġunju 2004, li waslet fil-Qorti tal-Ġustizzja fid-29 ta' Ġunju 2004, fil-proċedimenti

Jyske Finans A/S

vs

Skatteministeriet

fil-preżenza ta':

Nordania Finans A/S,

BG Factoring A/S,

IL-QORTI TAL-ĠUSTIZZJA (it-Tielet Awla),

komposta minn A. Rosas, President ta' Awla, J. Malenovský, (Relatur), J.-P. Puissochet, S. von Bahr u U. Lõhmus, Imħallfin,

Avukat Ġenerali: L.A. Geelhoed,

Reġistratur: H. von Holstein, Assistent Reġistratur,

wara li rat il-proċedura bil-miktub u wara s-seduta tas-7 ta' Lulju 2005,

wara li rat is-sottomissjonijiet ippreżentati bil-miktub:

–       għal Jyske Finans A/S, minn E. Malberg, advokat,

–       għal Nordania Finans A/S u BG Factoring A/S, minn H. Severin Hansen u T. K. Kristjansson Plesner, advokaterne,

–       għall-Gvern Daniż, minn J. Molde, bħala aġent, assistit minn P. Biering, advokat,

–       għal Gvern Grieg, minn I. Pouli u V. Kyriazopoulos, bħala aġenti,

–       għal Gvern Pollakk, minn J. Pietras, bħala aġent,

–       għall-Kummissjoni tal-Komunitajiet Ewropej, minn L. Ström van Lier u T. Fich, bħala aġenti,

wara li semgħet il-konklużjonijiet ta' l-Avukat Ġenerali, ippreżentati fis-seduta tat-22 ta' Settembru 2005,

tagħti l-preżenti

Sentenza

1       It-talba għal deċiżjoni preliminari tirrigwarda l-interpretazzjoni ta' l-Artikolu 13(B)(c) u 26a(A)(e) tas-Sitt Direttiva tal-Kunsill tas-17 ta' Mejju, 1977, fuq l-armonizzazzjoni tal-liġijiet ta' l-Istati Membri dwar taxxi fuq id-dħul mill-bejgħ – Sistema komuni ta' taxxa fuq il-valur miżjud: bażi uniformi ta' stima (77/388/KEE) (ĠU L 145, p.1), kif emendata bid-Direttiva tal-Kunsill 94/5/KE, ta' l-14 ta' Frar 1994 (ĠU L 60, p. 16, iktar 'il quddiem is-"Sitt Direttiva").

2       Din it-talba ġiet ippreżentata fil-kuntest ta' kawża bejn il-kumpannija Jyske Finans A/S (iktar 'il quddiem "Jyske Finans") u Skatteministeriet (Ministeru tat-Taxxi u Sisa Daniż) dwar it-taxxa fuq il-valur miżjud (iktar 'il quddiem il-"VAT") li l-imsemmija kumpannija ġiet mitluba tħallas minħabba l-operazzjonijiet tagħha ta' bejgħ mill-ġdid ta' vetturi użati mixtrija.

 Il-kuntest ġuridiku

 Il-leġiżlazzjoni Komunitarja

3       Skond l-Artikolu 2(1) tas-Sitt Direttiva, il-provvista ta' oġġetti magħmula bi ħlas minn persuna taxxabbli li taġixxi bħala tali hija suġġetta għall-VAT.

4       L-Artikolu 11(A)(1)(a) ta' l-imsemmija Direttiva jiddetermina l-ammont taxxabbli, fir-rigward ta' provvisti ta' oġġetti, bħala dak kollu li jikkostitwixxi l-korrispettiv li nkiseb jew irid jinkiseb mill-fornitur mingħand ix-xerrej, il-klijent jew terz.

5       L-Artikolu 13(B) ta' l-istess Direttiva jipprovdi:

"Mingħajr preġudizzju għal disposizzjonijet oħra tal-Komunità, l-Istati Membri għandhom jeżentaw li ġej taħt il-kondizzjonijiet li huma għandhom jistabilixxu għall-iskopijiet biex jassiguraw l-applikazzjoni korretta u ċara ta' l-eżenzjonijet u tal-prevenzjoni ta' kwalunkwe eżenzjoni possibbli, evitar u abbuż:

[…]

c)      provvisti [...] ta' oġġetti li [fuq] l-akkwist jew produzzjoni tagħhom, bis-saħħa ta' Artikolu 17(6), it-taxxa fuq il-valur miżjud ma setgħetx titnaqqas;

[…]"

6       Skond l-Artikolu 17(6) tas-Sitt Direttiva:

"Qabel perjodu ta' erba' snin ta' l-inqas ikunu għaddew mid-data tad-dħul fis-seħħ ta' din id-Direttiva, il-Kunsill, [li] jaġixxi unanimament fuq proposta mill-Kummissjoni, għandu jiddeċiedi liema nefqa m'għandiex tkun eleġġibli għal tnaqqis tat-taxxa fuq il-valur miżjud. […]

Sa kemm ir-regoli ta' fuq jidħlu fis-seħħ, Stati Membri jistgħu iżommu l-esklużjonijiet kollha pprovduti taħt il-liġijiet nazzjonali meta din id-Direttiva tidħol fis-seħħ."

7       L-Artikolu 26a tas-Sitt Direttiva, miżjud bl-Artikolu 1(3) tad-Direttiva 94/5, jistabbilixxi arranġamenti speċjali tal-VAT applikabbli għall-oġġetti użati, xogħlijiet ta' l-arti, oġġetti tal-kollezzjoni u antikitajiet. Skond dan l-Artikolu 26a, il-provvista ta' l-imsemmija oġġetti magħmula minn negozjant taxxabbli tiġi ntaxxata biss fuq il-marġni ta' profitt, jiġifieri d-differenza bejn il-prezz tal-bejgħ mitlub min-negozjant taxxabbli għall-affarijiet mibjugħa u l-prezz tax-xiri.

8       Kif jirriżulta mit-tielet u l-ħames premessi tad-Direttiva 94/5, dawn l-arranġamenti speċjali huma intiżi biex jiġu evitati t-taxxa doppja u t-tgħawwiġ tal-kompetizzjoni bejn persuni taxxabbli.

9       In-negozjant taxxabbli huwa definit, skond l-Artikolu 26a(A)(e) tas-Sitt Direttiva, bħala "persuna taxxabbli li, fil-kors ta' l-attività ekonomika tagħha, tixtri jew takkwista għall-għanijiet tal-impriża tagħha, jew timporta bil-għan li terġa' tbiegħhom, oġġetti wżati".

 Il-leġiżlazzjoni nazzjonali

10     L-Artikolu 8(1) tal-Liġi fuq il-VAT (momslov), kif emendata bil-Liġi Nru 375, tat-18 ta' Mejju 1994, u l-Liġi ta' emenda Nru 1114, tal-21 ta' Diċembru 1994 (iktar 'il quddiem il-"Liġi fuq il-VAT"), tiddisponi:

"Il-provvista taħt titolu oneruż tinkludi l-bejgħ ta' attiv tal-kumpannija fil-każ fejn l-operatur għandu dritt għal tnaqqis, parzjali jew totali, b'mod partikulari fil-mument ta' l-akkwist jew tal-produzzjoni ta' element ta' l-attiv."

11     Skond l-Artikolu 13(2) tal-Liġi fuq il-VAT:

"Il-provvista ta' oġġetti li jkunu ġew utilizzati biss fil-kuntest ta' impriża eżenti mill-VAT skond il-paragrafu 1 ta' dan l-Artikolu, jew ta' oġġetti li l-akkwist jew l-użu tagħhom ġew esklużi mid-dritt għal tnaqqis bl-applikazzjoni tal-Kapitolu 9, hija eżenti mill-VAT".

12     Fil-Kapitolu 9 ta' l-imsemmija liġi, il-punt 7 ta' l-Artikolu 42(1) jiddisponi li l-impriżi ma jistgħux inaqqsu t-taxxa fuq l-input fuq "l-akkwist u l-użu ta' vetturi bil-mutur intiżi biex iġorru massimu ta' 9 persuni, bla ħsara għad-dispożizzjonijiet tal-paragrafi 4, 6 u 7".

13     Skond l-paragrafu 6 ta' l-imsemmi Artikolu 42:

"L-impriżi li jinnegozjaw jew jikru vetturi bil-mutur, jew li jmexxu skola tas-sewqan, jistgħu, minkejja d-dispożizzjonijiet tal-punt 7 tal-paragrafu 1, inaqqsu t-taxxa fuq l-akkwisti […] intiżi għal dawn l-attivitajiet."

14     Il-Kapitolu 17 ta' l-istess liġi tittrasponi d-dispożizzjonijiet tad-Direttiva 94/5 dwar l-arranġamenti speċjali applikabbli, b'mod partikulari, għall-oġġetti użati.

15     F'dan il-Kapitolu 17, l-Artikolu 69(1) jiddisponi:

"L-impriżi li, bil-għan li jerġgħu jbiegħu, jixtru, b'mod partikulari, oġġetti użati, xogħlijiet ta' l-arti, oġġetti tal-kollezzjoni jew antikitajiet, jistgħu, fil-każ ta' bejgħ mill-ġdid, iħallsu t-taxxa fuq il-merkanzija kkonċernata skond ir-regoli previsti f'dan il-Kapitolu."

 Il-kawża prinċipali u d-domanda preliminari

16     Jyske Finans teżerċita attività ta' leasing ta' vetturi bil-mutur. Għall-eżerċizzju ta' din l-attività, hija takkwista kemm vetturi ġodda, kif ukoll vetturi użati. Għal dawn ta' l-aħħar, l-akkwist isir mingħajr il-possibiltà li titnaqqas il-VAT kompriża fil-prezz, billi l-bejjiegħa ma setgħux, skond il-leġiżlazzjoni nazzjonali, jiddikjaraw il-VAT fuq il-prezz tal-vettura.

17     Bejn l-1 ta' Jannar 1999 u l-31 ta' Marzu 2001, Jyske Finans, fit-tmiem tal-leasing, biegħet mill-ġdid 145 vettura li kienu ġew akkwistati bħala vetturi użati. F'Mejju 2001, l-awtoritajiet fiskali Daniżi talbuha tħallas il-VAT, li skond huma, kienet dovuta fuq dan il-bejgħ, fl-ammont ta' 2 236 413 DKK (jiġifieri madwar 299 500 EUR).

18     Jyske Finans ikkontestat dan id-debitu quddiem il-Vestre Landsret billi sostniet li l-ħlas min-naħa tagħha kien ser iwassal għal impożizzjoni doppja ta' VAT, peress li hi ma setgħetx tgawdi mid-dritt ta' tnaqqis fir-rigward tal-VAT li tibqa' inkluża fil-prezz tax-xiri tal-vetturi użati u li ma tiġix iddikjarata. Hija sostniet li d-deċiżjoni ta' l-awtoritajiet fiskali ma kelliex bażi legali fil-Liġi fuq il-VAT u li kienet tmur kontra s-Sitt Direttiva. Il-kumpanniji Nordania Finans A/S u BG Factoring A/S intervenew f'din il-kawża sabiex isostnu lil Jyske Finans.

19     Il-Vestre Landsret ikkunsidrat li l-kawża prinċipali tirrigwarda, minn naħa waħda, il-kwistjoni jekk l-obbligu tal-ħlas tat-taxxa kienx imur kontra l-Artikolu 13(B)(c) tas-Sitt Direttiva u, min-naħa l-oħra, il-kwistjoni jekk Jyske Finans kellhiex id-dritt li tgawdi minn arranġamenti speċjali tat-taxxa, fuq il-marġni, tal-bejgħ ta' oġġetti użati, previsti fl-Artikolu 26a ta' l-istess Direttiva. Hija qieset li l-eżitu tal-kawża prinċipali kien jiddependi fuq l-interpretazzjoni li kellha tingħata lil dawn iż-żewġ dispożizzjonijiet ta' l-imsemmija Direttiva. F'dawn iċ-ċirkustanzi, il-Vestre Landsret iddeċidiet li tissospendi l-proċedimenti u tressaq quddiem il-Qorti tal-Ġustizzja d-domandi preliminari li ġejjin:

"1)      L-Artikolu 13(B)(c), tas-Sitt Direttiva […], meta jittieħed flimkien ma' l-Artikoli 2(1) u 11(A)(1)(a), għandu jiġi interpretat fis-sens li dawn id-dispożizzjonijiet jipprojbixxu lil Stat Membru milli jżomm fis-seħħ stat ta' dritt li joħroġ mil-Liġi fuq il-VAT tiegħu, li skontu, b'differenza minn bejjiegħa ta' vetturi użati u operaturi ekonomiċi oħra li jbiegħu vetturi użati, persuna taxxabbli li fil-biċċa l-kbira tkun daħħlet oġġetti ta' investiment fl-attiv professjonali tagħha hija suġġetta għal VAT fuq il-bejgħ ta' dawn l-oġġetti ta' investiment, anke meta l-oġġett ikun ġie akkwistat mingħand persuni taxxabbli li ma jkunux iddikjarawx it-taxxa dovuta fuq il-prezz ta' l-oġġetti, b'mod li d-dritt ta' tnaqqis tat-taxxa kien eskluż fil-mument ta' l-akkwist ta' l-oġġett?

2)       L-Artikolu 26a[…](A)(e) tas-Sitt Direttiva […] għandu jiġi interpretat fis-sens li l-kunċett ta' 'negozjant taxxabbli' jinkludi biss il-persuni li l-attività prinċipali tagħhom tikkonsisti fix-xiri u l-bejgħ ta' vetturi użati meta dawn l-oġġetti użati huma akkwistati bil-għan li jiġi akkwistat profitt meta jerġgħu jinbiegħu, liema għan ikun l-għan uniku jew prinċipali […] ta' l-akkwist, jew dan il-kunċett jinkludi wkoll persuni li jerġgħu jbiegħu dawn l-oġġetti b'mod normali wara li tispiċċa l-kirja bħala element aċċessorju ta' l-attività ekonomika sħiħa ċċentrata fuq il-leasing, fiċ-ċirkustanzi deskritti hawn fuq?"

 Fuq id-domandi preliminari

 Fuq l-ewwel domanda

20     Bl-ewwel domanda tagħha, il-qorti tar-rinviju sostanzjalment tistaqsi jekk id-dispożizzjonijiet ta' l-Artikolu 13(B)(c) tas-Sitt Direttiva għandhomx jiġu interpretati fis-sens li l-eżenzjoni mill-VAT prevista minnhom fir-rigward tal-provvista ta' oġġetti li l-akkwist tagħhom kien eskluż mid-dritt ta' tnaqqis skond l-Artikolu 17(6) ta' l-imsemmija Direttiva tipprojbixxi lil leġiżlazzjoni nazzjonali milli tassoġġetta għall-VAT l-operazzjonijiet li permezz tagħhom persuna taxxabbli terġa' tbiegħ, wara li tkun użathom għan-negozju tagħha, oġġetti li l-akkwist tagħhom mingħand persuni taxxabbli li ma setgħux jiddikjaraw il-VAT ma tax lok, minħabba f'hekk, għal dritt ta' tnaqqis.

21     Preliminarjament, għandu jiġi mfakkar li l-kliem użat sabiex jispjega l-eżenzjonijiet previsti fl-Artikolu 13 tas-Sitt Direttiva għandu jiġi interpretat strettament, peress li dawn l-eżenzjonijiet jikkostitwixxu derogazzjonijiet għall-prinċipju ġenerali li, in konformità ma' l-Artikolu 2 ta' l-imsemmija Direttiva, igħid li l-VAT tinġabar fuq kull provvista ta' oġġetti jew servizzi magħmula b'titolu oneruż minn persuna taxxabbli li taġixxi bħali tali (ara, b'mod partikolari, is-sentenzi ta' l-20 ta' Novembru 2003, Taksatorringen, C-8/01, Ġabra p. I-13711, punt 36, u tat-3 ta' Marzu 2005, Fonden Marselisborg Lystbådehavn, C-428/02, Ġabra p. I-1527, punt 29).

22     Għandu wkoll jiġi mfakkar li, skond l-Artikolu 17(6) tas-Sitt Direttiva, l-Istati Membri huma awtorizzati li jżommu l-leġiżlazzjoni tagħhom dwar l-esklużjoni mid-dritt ta' tnaqqis li tkun teżisti fid-data meta l-imsemmija Direttiva tidħol fis-seħħ, sakemm il-Kunsill jadotta d-dispożizzjonijiet previsti f'dan l-Artikolu (ara s-sentenza ta' l-14 ta' Ġunju 2001, il-Kummissjoni vs Franza, C-345/99, Ġabra p. I-4493, punt 19).

23     Billi ebda waħda mill-proposti ppreżentati mill-Kummissjoni lill-Kunsill bis-saħħa ta' l-ewwel paragrafu ta' l-Artikolu 17(6) tas-Sitt Direttiva ma ġiet adottata mill-Kunsill, l-Istati Membri jistgħu jżommu l-leġiżlazzjoni tagħhom dwar l-esklużjoni mid-dritt ta' tnaqqis tal-VAT sakemm il-leġiżlatur Komunitarju jistabbilixxi sistema Komunitarja ta' l-esklużjonijiet u b'hekk iwettaq l-armonizzazzjoni progressiva tal-leġiżlazzjoni nazzjonali fil-qasam tal-VAT (sentenza il-Kummissjoni vs Franza, iċċitata iktar 'il fuq, punt 20). Għalhekk sa llum, id-dritt Komunitarju ma jinkludi ebda dispożizzjoni li telenka l-ispejjeż li huma esklużi mid-dritt ta' tnaqqis tal-VAT.

24     Għalhekk, l-eżenzjoni prevista fid-dispożizzjonijiet ta' l-Artikolu 13(B)(c) tas-Sitt Direttiva tista' tapplika biss għall-provvista ta' oġġetti li l-akkwist tagħhom ġie eskluż mid-dritt ta' tnaqqis skond il-leġiżlazzjoni nazzjonali. F'dan ir-rigward, it-termini ta' dan l-Artikolu ma jistgħu jiġu interpretati b'ebda mod ieħor li jippermetti li jiġi evitat li persuna taxxabbli, li ma tistax tgawdi minn tali esklużjoni, issib ruħha f'sitwazzjoni ta' taxxa doppja.

25     Jekk leġiżlazzjoni nazzjonali, bħal dik prevista fil-kawża prinċipali, tipprovdi li l-impriżi li għandhom bħala attività l-kiri ta' vetturi bil-mutur jistgħu jnaqqsu t-taxxa fuq l-akkwisti intiżi għal din l-attività, minn dan jirriżulta li l-akkwist ta' vettura, minn impriża ta' din ix-xorta, mhuwiex eskluż, fis-sens ta' l-Artikolu 13(B)(c) tas-Sitt Direttiva, mid-dritt ta' tnaqqis skond l-Artikolu 17(6) ta' l-imsemmija Direttiva. Il-bejgħ mill-ġdid ta' din il-vettura għalhekk m'għandux jiġi kkunsidrat bħala wieħed mill-provvisti li jibbenefikaw mill-eżenzjoni prevista fl-imsemmi Artikolu 13(B)(c). Iċ-ċirkustanza li akkwist bħal dan ma tax lok għal dritt ta' tnaqqis minħabba l-fatt li, bħal fil-kawża prinċipali, dan l-akkwist sar mingħand bejjiegħa li huma stess ma setgħux, skond il-leġiżlazzjoni nazzjonali, inaqqsu t-taxxa fuq l-input fuq ix-xiri tagħhom ta' vetturi u għaldaqstant ma ddikjarawx il-VAT fuq l-output, m'għandhiex inċidenza fuq il-kwalifikazzjoni ta' dan l-akkwist għall-applikazzjoni ta' l-istess Artikolu 13.

26     F'dawn iċ-ċirkustanzi, it-tweġiba għall-ewwel domanda għandha tkun li d-dispożizzjonijiet ta' l-Artikolu 13(B)(c) tas-Sitt Direttiva għandhom jiġu interpretati fis-sens li ma jipprojbixxux lil leġiżlazzjoni nazzjonali milli tassoġġetta għall-VAT l-operazzjonijiet li permezz tagħhom persuna taxxabbli terġa' tbiegħ, wara li tkun użathom għan-negozju tagħha, oġġetti li l-akkwist tagħhom ma kienx eskluż mid-dritt ta' tnaqqis skond l-Artikolu 17(6) ta' l-imsemmija Direttiva, anki meta l-imsemmi akkwist li jkun sar mingħand persuni taxxabbli li ma setgħux jiddikjaraw il-VAT ma tax lok, minħabba f'hekk, għal dritt ta' tnaqqis.

 Fuq it-tieni domanda

27     Bit-tieni domanda tagħha, il-qorti tar-rinviju sostanzjalment tistaqsi jekk persuna taxxabbli li, fl-eżerċizzju normali ta' l-attivitajiet tagħha, terġa' tbiegħ vetturi li hija tkun akkwistat bħala vetturi użati bil-għan li tużahom għall-attività tagħha ta' leasing tistax tiġi kkunsidrata bħala "negozjant taxxabbli" fis-sens ta' l-Artikolu 26a tas-Sitt Direttiva.

28     Dan l-Artikolu, li ġej mid-Direttiva 94/5, jistabbilixxi arranġamenti speċjali ta' taxxa fuq il-marġni ta' profitt li jagħmel in-negozjant taxxabbli fl-okkażjoni tal-provvista ta' l-oġġetti użati, xogħlijiet ta' l-arti, oġġetti tal-kollezzjoni u antikitajiet.

29     Għandu jiġi mfakkar li d-dispożizzjonijiet ta' l-Artikolu 26a(A)(e) tas-Sitt Direttiva jiddefinixxu n-negozjant taxxabbli bħala l-persuna taxxabbli li, fil-kors ta' l-attività ekonomika tagħha, tixtri jew takkwista għall-għanijiet tal-impriża tagħha, jew timporta bil-għan li terġa' tbiegħhom, oġġetti użati, xogħlijiet ta' l-arti, oġġetti tal-kollezzjoni jew antikitajiet.

30     Diversi verżjonijiet tas-Sitt Direttiva, kompriża l-verżjoni Ingliża, jistgħu jagħtu x'jifhem li l-espressjoni "bil-għan li terġa' tbiegħhom" tirreferi biss għall-verb "timporta" li jinsab immedjatament qabilha. Għaldaqstant jista' jingħad li, għall-operazzjonijiet ta' akkwist, li huma l-uniċi operazzjonijiet in kwistjoni fil-kawża prinċipali, it-test tas-Sitt Direttiva ma jesiġix li, sabiex taqa' fid-definizzjoni ta' negozjant taxxabbli, il-persuna kkonċernata kellu, fil-mument ta' l-akkwist ta' l-oġġett użat, l-għan li jerġa' jbiegħu. F'dawn iċ-ċirkustanzi, xejn ma jippermetti li tiġi eskluża mill-ambitu ta' din id-definizzjoni impriża ta' leasing li, bħal Jyske Finans, tixtri oġġetti użati, fil-kuntest ta' l-attività ekonomika tagħha.

31     F'dan ir-rigward, għandu jiġi mfakkar li, skond ġurisprudenza stabbilita, id-dispożizzjonijiet Komunitarji għandhom jiġu interpretati u applikati b'mod uniformi fid-dawl tal-verżjonijiet eżistenti fil-lingwi kollha tal-Komunità (ara f'dan is-sens, b'mod partikolari, is-sentenzi tal-5 ta' Diċembru 1967, Van der Vecht, 19/67, Ġabra p. 445, 456; tas-17 ta' Lulju 1997, Ferriere Nord vs il-Kummissjoni, C-219/95 P, Ġabra p. I-4411, punt 15, u tad-29 ta' April 2004, Björnekulla Fruktindustrier, C-371/02, Ġabra p. I-5791, punt 16). F'każ ta' diverġenza bejn id-diversi verżjonijiet lingwistiċi ta' test Komunitarju, id-dispożizzjoni in kwistjoni għandha tiġi interpretata fid-dawl ta' l-istruttura ġenerali u tal-għan tal-leġiżlazzjoni li din id-dispożizzjoni tifforma parti minnha (sentenzi tad-9 ta' Marzu 2000, EKW u Wein & Co, C-437/97, Ġabra p. I-1157, punt 42, u ta' l-1 ta' April 2004, Borgmann, C-1/02, Ġabra p. I-3219, punt 25).

32     Mit-tieni, mit-tielet u mill-ħames premessi tad-Direttiva 94/5 jirriżulta li l-leġiżlatur Komunitarju kien qiegħed ifittex li jwettaq ċerta armonizzazzjoni tas-sistemi differenti ħafna li dak iż-żmien kienu fis-seħħ fl-Istati Membri fil-qasam tat-taxxa fuq l-oġġetti użati, ix-xogħlijiet ta' l-arti, l-oġġetti tal-kollezzjoni jew l-antikitajiet, bil-għan li jiġu evitati t-taxxa doppja u t-tgħawwiġ tal-kompetizzjoni, kemm fi ħdan l-imsemmija Stati Membri kif ukoll fir-relazzjonijiet ta' bejniethom. F'dawn iċ-ċirkustanzi, l-interpretazzjoni ta' l-espressjoni "bil-għan li terġa' tbiegħhom" b'mod li tirreferi biss għall-operazzjonijiet ta' importazzjoni tmur kontra l-għan ġenerali hekk stabbilit mill-leġiżlatur Komunitarju li jwaqqaf sistema uniformi fil-qasam ta' l-oġġetti użati, tax-xogħlijiet ta' l-arti, ta' l-oġġetti tal-kollezzjoni jew ta' l-antikitajiet. Konsegwentement, l-imsemmija espressjoni għandha tiġi kkunsidrata bħala li tirreferi wkoll għall-operazzjonijiet ta' akkwist jew użu għall-bżonnijiet ta' l-impriża.

33     Għalhekk għandu jiġi determinat jekk is-Sitt Direttiva, meta tirreferi għan-negozjant taxxabbli li jixtri oġġetti użati "bil-għan li [j]erġa' [j]biegħhom", tkoprix biss il-persuna taxxabbli li tillimita ruħha li tagħmel, wara l-akkwist, operazzjonijiet ta' natura essenzjalment teknika ta' preparazzjoni tal-vetturi bil-għan li tipproċedi direttament u immedjatament għall-bejgħ mill-ġdid ta' dawn il-vetturi, jew inkella tkoprix ukoll persuna taxxabbli li teżerċita attività ta' kiri ta' vetturi qabel ma tipproċedi għall-bejgħ mill-ġdid tagħhom. Fil-fatt, attività ta' kiri bħal din hija, fir-rigward ta' l-għan tagħha, indipendenti mill-operazzjoni ta' bejgħ mill-ġdid, li jista' jkun li sseħħ biss wara li jgħaddi żmien twil, jew anki li ma sseħħ qatt minħabba fir-riskji inerenti fil-kiri tal-vetturi, bħalma huma t-tkagħbir u l-qerda tagħhom. Fi kliem ieħor, għandu jiġi determinat jekk id-definizzjoni ta' negozjant taxxabbli tkoprix ukoll is-sitwazzjoni, bħal dik tal-kawża prinċipali, li fiha, għall-persuna taxxabbli, il-bejgħ mill-ġdid fil-fatt mhuwiex l-għan prinċipali fil-mument ta' l-operazzjoni ta' akkwist ta' l-oġġett użat, imma huwa biss l-għan sekondarju tagħha, aċċessorju għal dak tal-kiri.

34     Għandu jiġi mfakkar li, sabiex tiġi ddeterminata l-portata ta' dispożizzjoni tad-dritt Komunitarju, għandhom jittieħdu in kunsiderazzjoni, fl-istess ħin, it-termini, il-kuntest u l-għanijiet tagħha (sentenzi tal-15 ta' Ottubru 1992, Tenuta il Bosco, C-162/91, Ġabra p. I-5279, punt 11; tas-16 ta' Jannar 2003, Maierhofer, C-315/00, Ġabra p. I-563, punt 27, u tal-15 ta' Lulju 2004, Harbs, C-321/02, Ġabra p. I-7101, punt 28).

35     Huwa veru li s-sistema ta' taxxa fuq il-marġni ta' profitt magħmul min-negozjant taxxabbli fl-okkażjoni tal-provvista ta' oġġetti użati, ta' xogħlijiet ta' l-arti, ta' oġġetti tal-kollezzjoni jew ta' antikitajiet tikkostitwixxi sistema speċjali tal-VAT, li tidderoga mis-sistema ġenerali tas-Sitt Direttiva, li, bħas-sistemi speċjali l-oħra previsti fl-Artikoli 24, 25 u 26 ta' l-imsemmija Direttiva, għandha tiġi applikata biss safejn huwa neċessarju sabiex jintlaħaq l-għan tagħha (għall-applikazzjoni tas-sistema prevista fl-Artikolu 26 u ta' dik prevista fl-Artikolu 25, rispettivament, ara s-sentenzi tat-22 ta' Ottubru 1998, Madgett u Baldwin, C-308/96 u C-94/97, Ġabra p. I-6229, punt 34, u Harbs, iċċitata iktar 'il fuq, punt 27).

36     Madankollu, jibqa' l-fatt li l-interpretazzjoni tat-termini użati fid-dispożizzjonijiet ta' l-Artikolu 26a tas-Sitt Direttiva għandha tkun konformi ma' l-għanijiet li s-sistema speċjali stabbilita minn dan l-Artikolu tfittex li tilħaq u għandha tirrispetta r-rekwiżiti tal-prinċipju tan-newtralità fiskali inerenti fis-sistema komuni tal-VAT.

37     F'dan ir-rigward, għandu jiġi rilevat li it-tielet u l-ħames premessi tad-Direttiva 94/5 jesprimu l-intenzjoni tal-leġiżlatur Komunitarju li jiġu evitati t-taxxa doppja u t-tgħawwiġ tal-kompetizzjoni (ara s-sentenza ta' l-1 ta' April 2004, Stenholmen, C-320/02, Ġabra p. I-3509, punt 25).

38     Issa t-tassazzjoni, fuq il-prezz kollu tal-bejgħ, tal-provvista ta' vettura minn impriża ta' leasing li tkun akkwistatha bħala vettura użata, meta, fil-mument ta' dan l-akkwist, din l-impriża ma setgħetx tnaqqas il-VAT li jibqa' inkluż fil-prezz tax-xiri, tipperikola li twassal għal taxxa doppja.

39     Barra minn hekk, il-prinċipju tan-newtralità fiskali li fuqu, b'mod partikulari, tistrieħ is-sistema komuni tal-VAT stabbilita mis-Sitt Direttiva ma tippermettix li operaturi ekonomiċi li jagħmlu l-istess operazzjonijiet ikunu ttrattati b'mod differenti għal dak li jirrigwarda l-ġbir tal-VAT (ara s-sentenza tas-16 ta' Settembru 2004, Cimber Air, C-382/02, Ġabra p. I-8379, punti 23 u 24).

40     Fis-suq tal-bejgħ tal-vetturi użati, it-tassazzjoni fuq il-prezz kollu tal-bejgħ tal-provvista magħmula mill-impriżi tal-leasing toħloq tgħawwiġ tal-kompetizzjoni bi ħsara ta' dawn ta' l-aħħar u favur, b'mod partikulari, l-impriżi li jinnegożjaw fil-vetturi użati li jibbenefikaw mis-sistema ta' taxxa fuq il-marġni ta' profitt. Fil-fatt, sabiex tiġi sodisfatta l-aspettattiva leġittima tax-xerrejja li jħallsu l-istess prezz għal vetturi ta' kwalità ekwivalenti, kemm jekk mibjugħa minn impriża li tinnegozja fil-vetturi użati kemm jekk mibjugħa minn impriża ta' leasing, din ta' l-aħħar ma tistax raġonevolment tittrasferixxi fuq dan il-prezz l-ammont tal-VAT dovut minnha, bil-konsegwenza li l-marġni ta' profitt tagħha jonqos b'dan l-ammont.

41     B'hekk, l-applikazzjoni tas-sistema prevista fl-Artikolu 26a tas-Sitt Direttiva għall-impriżi ta' leasing li joperaw fl-imsemmija kundizzjonijiet tippermetti, preċiżament, li jintlaħaq l-għan stabbilit mill-leġiżlatur Komunitarju meta adotta din is-sistema, jiġifieri li jiġu evitati t-taxxa doppja u t-tgħawwiġ tal-kompetizzjoni fil-qasam ta' l-oġġetti użati.

42     F'dawn iċ-ċirkustanzi, ikkunsidrati l-għanijiet ta' l-Artikolu 26a tas-Sitt Direttiva, dan l-Artikolu għandu jiġi interpretat fis-sens li ma jeskludix mill-kategorija tan-negozjanti taxxabbli l-impriża ta' leasing ta' vetturi użati, billi l-bejgħ mill-ġdid tagħhom jagħmel parti mill-eżerċizzju normali ta' l-attività tagħhom u billi l-għan tal-bejgħ mill-ġdid huwa preżenti fil-mument ta' l-akkwist, minkejja li l-attività tagħha ta' bejgħ mill-ġdid hija ta' natura sekondarja meta mqabbla ma' dik tal-kiri.

43     Barra minn hekk, għandu jiġi rilevat li l-Kummissjoni indikat waqt is-seduta pubblika li l-Istati Membri ma kinux aċċettaw il-proposta, li kienet saritilhom fil-kuntest ta' abbozz ta' "Seba' Direttiva", li jadottaw sistema komuni ta' taxxa fuq il-provvista ta' oġġetti użati li tipprovdi, dejjem sabiex tiġi evitata t-taxxa doppja, li tiġi rikostitwita l-VAT fuq oġġett użat qabel il-bejgħ mill-gdid finali tiegħu sabiex b'hekk fl-istess ħin tkun tista' titnaqqas din il-VAT u tiġi bbażata t-taxxa fuq il-prezz kollu tal-bejgħ. Minbarra dan, anki jekk wieħed jassumi, de lege ferenda, li sistema bħal din, jew xi oħra, setgħet tiggarantixxi aħjar il-ġbir tal-VAT fuq dawn il-provvisti, din ma tistax tmur kontra l-interpretazzjoni ta' l-Artikolu 26a tas-Sitt Direttiva li għandha tagħti l-Qorti tal-Ġustizzja, liema Artikolu jikkostitwixxi l-unika regola tad-dritt Komunitarju applikabbli sa llum għal din il-kawża.

44     Fid-dawl tal-kunsiderazzjonijiet preċedenti kollha, it-tweġiba għat-tieni domanada għandha tkun li l-Artikolu 26a(A)(e) tas-Sitt Direttiva għandu jiġi interpretat fis-sens li impriża li, fl-eżerċizzju normali ta' l-attività tagħha, terġa' tbiegħ vetturi li hija tkun akkwistat bħala vetturi użati bil-għan li tużahom għall-attività tagħha ta' leasing u li għaliha l-bejgħ mill-ġdid mhuwiex l-għan prinċipali fil-mument ta' l-operazzjoni ta' akkwist ta' l-oġġett użat, imma huwa biss l-għan sekondarju tagħha, aċċessorju għal dak tal-kiri, tista' tiġi kkunsidrata bħala "negozjant taxxabbli" fis-sens ta' din id-dispożizzjoni.

 Fuq l-ispejjeż

45      Peress li l-proċedura għandha, fir-rigward tal-partijiet fil-kawża prinċipali, in-natura ta' kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjonijiet ta' l-osservazzjonijiet lill-Qorti, barra dawk ta' l-imsemmija partijiet, ma jistgħux jitħallsu lura.

Għal dawn il-motivi, il-Qorti tal-Ġustizzja (it-Tielet Awla) tiddeċiedi:

1)      Id-dispożizzjonijiet ta' l-Artikolu 13(B)(c) tas-Sitt Direttiva tal-Kunsill tas-17 ta’ Mejju, 1977, fuq l-armonizzazzjoni tal-liġijiet ta' l-Istati Membri dwar taxxi fuq id-dħul mill-bejgħ – Sistema komuni ta' taxxa fuq il-valur miżjud: bażi uniformi ta' stima, kif emendata bid-Direttiva tal-Kunsill 94/5/KE, ta' l-14 ta' Frar 1994, għandhom jiġu interpretati fis-sens li ma jipprojbixxux lil leġiżlazzjoni nazzjonali milli tassoġġetta għat-taxxa fuq il-valur miżjud l-operazzjonijiet li permezz tagħhom persuna taxxabbli terġa' tbiegħ, wara li tkun uzathom għan-negozju tagħha, oġġetti li l-akkwist tagħhom ma kienx eskluż mid-dritt ta' tnaqqis skond l-Artikolu 17(6) ta' l-imsemmija Direttiva 77/388 emendata, anki meta l-imsemmi akkwist li jkun sar mingħand persuni taxxabbli li ma setgħux jiddikjaraw it-taxxa fuq il-valur miżjud ma tax lok, minħabba f'hekk, għal dritt ta' tnaqqis.

2)      L-Artikolu 26a(A)(e) tas-Sitt Direttiva 77/388, kif emendata bid-Direttiva 94/5, għandu jiġi interpretat fis-sens li impriża li, fl-eżerċizzju normali ta' l-attività tagħha, terġa' tbiegħ vetturi li hija tkun akkwistat bħala vetturi użati bil-għan li tużahom għall-attività tagħha ta' leasing u li għaliha l-bejgħ mill-ġdid mhuwiex l-għan prinċipali fil-mument ta' l-operazzjoni ta' akkwist ta' l-oġġett użat, imma huwa biss l-għan sekondarju tagħha, aċċessorju għal dak tal-kiri, tista' tiġi kkunsidrata bħala "negozjant taxxabbli" fis-sens ta' din id-dispożizzjoni.

Firem

* Lingwa tal-kawża: id-Daniż.