EU tax law WEB

Available languages

Taxonomy tags

Info

Referral date: 01-06-2010
Show case reference
Opinion date: 26-05-2011
Ruling date: 28-07-2011
AG: Bot

References in this case

References to this case

Highlight in text

Kawża C-274/10

Il-Kummissjoni Ewropea

Ir-Repubblika tal-Ungerija

“Nuqqas ta’ Stat li jwettaq obbligu — Tassazzjoni — VAT — Direttiva 2006/112/KE — Dritt għal tnaqqis — Metodi ta’ eżerċizzju — Artikolu 183 — Leġiżlazzjoni nazzjonali li tippermetti r-rimbors tal-eċċess tal-VAT biss meta dan jeċċedi l-ammont tat-taxxa tal-input li tirriżulta minn operazzjonijiet li jkunu għadhom ma tawx lok għal ħlas”

Sommarju tas-sentenza

Dispożizzjonijiet fiskali — Armonizzazzjoni tal-liġijiet — Taxxi fuq id-dħul mill-bejgħ — Sistema komuni ta’ taxxa fuq il-valur miżjud — Tnaqqis tat-taxxa tal-input imħallsa — Ħlas lura tal-eċċess

(Direttiva tal-Kunsill 2006/112, Artikolu 183)

Jonqos milli jwettaq l-obbligi tiegħu taħt id-Direttiva 2006/112/KE dwar is-sistema komuni ta’ taxxa fuq il-valur miżjud, Stat Membru li jobbliga lill-persuni taxxabbli li d-dikjarazzjoni fiskali tagħhom turi eċċess, fis-sens tal-Artikolu 183 ta’ din id-direttiva, waqt perijodu taxxabbli partikolari, jittrasferixxu dan l-eċċess totalment jew parzjalment għall-perijodu taxxabbli li jmiss jekk dawn ma ħallsux it-totalità tal-akkwisti korrispondenti lill-fornitur tagħhom, bil-konsegwenza li, permezz ta’ dan l-obbligu, ċerti persuni taxxabbli li d-dikjarazzjoni fiskali tagħhom turi sistematikament eċċessi huma marbuta jittrasferixxu iktar minn darba dan l-eċċess għall-perijodu taxxabbli li jmiss.

Fil-fatt, skont is-sistema stabbilita bid-Direttiva 2006/112, l-impożizzjoni tat-taxxa fuq il-valur miżjud kif ukoll l-oriġini u l-eżerċizzju tad-dritt għal tnaqqis huma, bħala regola ġenerali, indipendenti mill-fatt li l-prezz dovut, taxxa fuq il-valur miżjud inkluża, għal operazzjoni tħallasx diġà jew le. Barra minn hekk, skont din l-istess direttiva, l-oriġini tad-dritt għal tnaqqis huwa suġġett biss f’ċerti każijiet partikolari espressament imsemmija f’din id-direttiva għall-kundizzjoni li l-prezz dovut għall-operazzjoni li minnha tirriżulta t-taxxa li tista’ titnaqqas ikun diġà tħallas. Bl-eċċezzjoni ta’ dawn il-każijiet partikolari, dan id-dritt għal tnaqqis jeżisti indipendentement minn din il-kundizzjoni. Issa, il-fatt li r-rimbors tal-eċċess tat-taxxa fuq il-valur miżjud li tista’ titnaqqas jiġi suġġett għal din il-kundizzjoni, liema rimbors jikkostitwixxi għaldaqstant l-istadju ta’ wara l-oriġini ta’ dan id-dritt, jista’ jkollu l-istess effetti fuq id-dritt għal tnaqqis bħall-applikazzjoni tal-istess kundizzjoni meta jqum dan id-dritt. Għaldaqstant, dan huwa tali li jippreġudika l-effett utli ta’ dan id-dritt għal tnaqqis. Għaldaqstant, il-ħlas tal-prezz dovut għall-operazzjoni li minnha tirriżulta t-taxxa fuq il-valur miżjud li tista’ titnaqqas ma jistax jikkostitwixxi kundizzjoni, skont l-Artikolu 183 tad-Direttiva 2006/112, li l-Istati Membri jistgħu jistabbilixxu għar-rimbors tal-eċċess tat-taxxa li tista’ titnaqqas.

(ara l-punti 48, 52, 53, 56 u d-dispożittiv)

SENTENZA TAL-QORTI TAL-ĠUSTIZZJA (It-Tielet Awla)

28 ta’ Lulju 2011 (*)

“Nuqqas ta’ Stat li jwettaq obbligu – Tassazzjoni – VAT – Direttiva 2006/112/KE – Dritt għal tnaqqis – Metodi ta’ eżerċizzju – Artikolu 183 – Leġiżlazzjoni nazzjonali li tippermetti r-rimbors tal-eċċess tal-VAT biss meta dan jeċċedi l-ammont tat-taxxa tal-input li tirriżulta minn operazzjonijiet li jkunu għadhom ma tawx lok għal ħlas”

Fil-Kawża C-274/10,

li għandha bħala suġġett rikors għal nuqqas ta’ twettiq ta’ obbligu skont l-Artikolu 258 TFUE, ippreżentat fl-1 ta’ Ġunju 2010,

Il-Kummissjoni Ewropea, irrappreżentata minn D. Triantafyllou, B. Simon u K. Talabér-Ritz, bħala aġenti, b’indirizz għan-notifika fil-Lussemburgu,

rikorrenti,

Ir-Repubblika tal-Ungerija, irrappreżentata minn M. Fehér, K. Szíjjártó u G. Koós, bħala aġenti, assistiti minn K. Magony, szakértő,

konvenuta,

IL-QORTI TAL-ĠUSTIZZJA (It-Tielet Awla),

komposta minn K. Lenaerts, President tal-Awla, D. Šváby, R. Silva de Lapuerta, E. Juhász u T. von Danwitz (Relatur), Imħallfin,

Avukat Ġenerali: Y. Bot,

Reġistratur: B. Fülöp, Amministratur,

wara li rat il-proċedura bil-miktub u wara s-seduta tal-14 ta’ April 2011,

wara li semgħet il-konklużjonijiet tal-Avukat Ġenerali, ippreżentati fis-seduta tas-26 ta’ Mejju 2011,

tagħti l-preżenti

Sentenza

1 Permezz tar-rikors tagħha l-Kummissjoni Ewropea titlob lill-Qorti tal-Ġustizzja tikkonstata li:

– billi obbligat lill-persuni taxxabbli li d-dikjarazzjoni fiskali tagħhom turi “eċċess” fis-sens tal-Artikolu 183 tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud (ĠU L 347, p. 1), waqt perijodu taxxabbli partikolari, jittrasferixxu dan l-eċċess totalment jew parzjalment għall-perijodu taxxabbli li jmiss, jekk dawn ma ħallsux it-totalità tal-akkwisti korrispondenti lill-fornitur tagħhom, u

– minħabba l-fatt li permezz ta’ dan l-obbligu, ċerti persuni taxxabbli li d-dikjarazzjoni fiskali tagħhom turi sistematikament “eċċess”, huma marbuta jittrasferixxu iktar minn darba dan l-eċċess għall-perijodu taxxabbli li jmiss,

ir-Repubblika tal-Ungerija naqset milli twettaq l-obbligi taħt id-Direttiva 2006/112.

Il-kuntest ġuridiku

Il-leġiżlazzjoni tal-Unjoni

2 Skont l-Artikolu 62 tad-Direttiva 2006/112:

“Għall-finijiet ta’ din id-Direttiva

(1) ‛Avveniment li jagħti lok għal ħlas’ għandha tfisser okkorrenza li permezz tagħha l-kondizzjonijet legali meħtieġa biex tiġi imposta l-VAT huma sodisfatti;

(2) Il-VAT għandha tiġi "imposta" meta l-awtorità tat-taxxa ssir intitolata bil-liġi, f’mument partikolari, biex tiġbor it-taxxa mill-persuna soġġetta li tħallasha, għalkemm iż-żmien għall-ħlas jista’ jkun pospost.”

3 L-Artikolu 63 ta’ din id-direttiva jipprovdi li għandu jkun hemm avveniment li jagħti lok għal ħlas u t-taxxa għandha tiġi imposta meta l-merkanzija jew is-servizzi huma pprovduti.

4 L-Artikolu 66 ta’ din id-direttiva jipprovdi:

“Bħala deroga mill-Artikoli 63, 64 u 65, l-Istati Membri jistgħu jipprovdu li l-VAT għandha tiġi imposta, fir-rigward ta’ ċerti transazzjonijiet jew ċerti kategoriji ta’ persuni taxxabbli f’wieħed miż-żminijiet li ġejjin:

a) mhux iktar tard miż-żmien tal-ħruġ tal-fattura;

b) mhux iktar tard miż-żmien meta jiġi riċevut il-ħlas;

[...]”

5 L-Artikolu 90 tad-Direttiva 2006/112 jipprovdi:

“1. Fil-każ ta’ kanċellazzjoni, ċaħda jew nuqqas ta’ pagament totali jew parzjali, jew fejn il-prezz hu mnaqqas wara li l-provvista tkun saret, l-ammont taxxabbli għandu jiġi ridott għaldaqstant skond kondizzjonijet li jiġu stabbiliti mill-Istati Membri.

2. Fil-każ ta’ nuqqas ta’ ħlas totali jew parzjali, l-Istati Membri jistgħu jidderogaw mill-paragrafu 1.”

6 Skont l-Artikolu 167 tad-Direttiva 2006/112, li jinsab fil-Kapitolu 1 intitolat “Oriġini u skop tad-dritt ta’ tnaqqis” tat-Titolu X, intitolat “Tnaqqis” ta’ din id-direttiva, “[d]ritt ta’ tnaqqis iseħħ fil-ħin meta t-taxxa mnaqqsa tiġi imposta”.

7 Permezz tad-Direttiva tal-Kunsill 2010/45/UE, tat-13 ta’ Lulju 2010, li temenda d-Direttiva 2006/112 (ĠU L 189, p. 1), li għandha tiġi trasposta sa mhux iktar tard mill-31 ta’ Diċembru 2010, l-Artikolu 167a ġie inkluż fid-Direttiva 2006/112, li l-ewwel paragrafu tiegħu jipprovdi kif ġej:

“L-Istati Membri jistgħu jipprovdu fi skema fakultattiva li d-dritt għat-tnaqqis ta’ persuna taxxabbli li [t-taxxa fuq il-valur miżjud (iktar ‘ilquddiem il-“VAT”)] tagħha ssir dovuta unikament f’konformità mal-Artikolu 66(b) għandu jiġi pospost sakemm il-VAT fuq il-merkanzija jew is-servizzi pprovduti titħallas lill-fornitur tagħha.”

8 L-Artikolu 168 tad-Direttiva 2006/112 jipprovdi:

“Sakemm il-merkanzija u s-servizzi jintużaw għall-iskopijiet tat-transazzjonijiet taxxabbli ta’ persuna taxxabbli, il-persuna taxxabbli għandha tkun intitolata, fl-Istat Membru li fih twettaq dawn it-transazzjonijiet, li tnaqqas mill-VAT li għandha tħallas dan li ġej:

a) il-VAT dovuta jew imħallsa f’dak l-Istat Membru rigward provvisti li sarulha ta’ merkanzija jew servizzi, li twettqu jew li għad iridu jitwettqu minn persuna taxxabli oħra;

[...]”.

9 L-Artikolu 178 tad-Direttiva 2006/112, li jinsab fil-Kapitolu 4, intitolat “Regoli li jirregolaw l-eżerċizzju tad-dritt ta’ tnaqqis”, tat-Titolu X ta’ din id-direttiva, jipprovdi:

“Biex teżerċita d-dritt ta’ tnaqqis, persuna taxxabbli għandha tissodisfa l-kondizzjonijiet li ġejjin:

a) għall-finijiet ta’ tnaqqis skond l-Artikolu 168(a), fir-rigward tal-provvista ta’ merkanzija jew servizzi, hi għandha jkollha fattura imħejjija skond l-Artikoli 220 sa 236 u l-Artikoli 238, 239 u 240;

[...]”.

10 L-Artikolu 179 ta’ din id-direttiva jipprovdi:

“Il-persuna taxxabbli għandha teffettwa t-tnaqqis billi tnaqqas mill-ammont totalii tal-VAT dovuta għal perjodu partikolari ta’ taxxa l-ammont totali ta’ VAT li fir-rigward tagħha, matul l-istess perjodu, id-dritt li tnaqqas irriżulta u hu eżerċitat skont l-Artikolu 178.

Madanakollu, l-Istati Membi jistgħu jeħtieġu li persuni taxxabbli li jwettqu transazzjonijiet okkażjonali, kif definiti fl-Artikolu 12, jeżerċitaw id-dritt tagħhom ta’ tnaqqis fil-ħin tal-provvista biss.”

11 Skont l-Artikolu 183 tad-Direttiva 2006/112, li huwa fformulat fi kliem essenzjalment identiku għal dak tal-Artikolu 18(4) tas-Sitt Direttiva tal-Kunsill 77/388/KEE, tas-17 ta’ Mejju 1977, fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ – Sistema komuni għat-taxxa fuq il-valur miżjud: bażi uniformi (ĠU Edizzjoni Speċjali bil-Malti, Kapitolu 9, Vol. 1, p. 23):

“Fejn, għal perjodu partikolari ta’ taxxa, l-ammont ta’ tnaqqis jeċċedi l-ammont tal-VAT dovuta, l-Istati Membri jistgħu, skont il-kondizzjonijet li huma għandhom jiddeterminaw, jew jagħmlu rifużjoni jew imexxu l-eċċess ‘ilquddiem għall-perjodu li jmiss.

Madankollu, l-Istati Membri jistgħu jirrifjutaw li jagħmlu rifużjoni jew li jmexxu ’il quddiem jekk l-ammont ta’ l-eċċess hu insinifikanti.”

12 L-Artikolu 184 tad-Direttiva 2006/112, li jinsab fil-Kapitolu 5, intitolat “Aġġustament tat-tnaqqis”, tat-Titolu X ta’ din id-direttiva, jippreċiża:

“It-tnaqqis inizjali għandu jiġi aġġustat fejn dan ikun ogħla jew inqas minn dak li għalih il-persuna taxxabbli kienet intitolata.”

13 Skont l-Artikolu 185, li jinsab f’dan l-istess kapitolu ta’ din id-direttiva:

“1. L-aġġustament għandu, b’mod partikolari, isir fejn, wara li ssir id-denunzja tal-VAT, isir xi tibdil fil-fatturi użati biex jiddeterminaw l-ammont li għandu jitnaqqas, per eżempju fejn ix-xirjiet huma kkanċellati jew hu miksub roħs fil-prezzijiet.

2. Bħala deroga mill-paragrafu 1, m’għandu jsir l-ebda aġġustament fil-każ ta’ transazzjonijiet li jibqgħu totalment jew parzjalment mhux imħallsa jew fil-każ ta’ distruzzjoni, telf jew serq tal-proprjetà li ġie ppruvat jew ikkonfermat kif imiss, jew fil-każ ta’ merkanzija riżervata għall-iskop ta’ għoti ta’ rigali ta’ valur żgħir jew ta’ l-għoti ta’ kampjuni, kif speċifikat fl-Artikolu 16.

Madanakollu, fil-każ ta’ transazzjonijiet li jibqgħu totalment jew parzjalment mhux imħallsa jew fil-każ ta’ serq, l-Istati Membri jistgħu jeħtieġu li jsir aġġustament.”

Il-leġiżlazzjoni nazzjonali

14 L-Artikolu 55(1) tal-Liġi CXXVII tal-2007 dwar it-taxxa fuq il-valur miżjud (az általános forgalmi adóról szóló 2007. évi CXXVII. törvény) [Magyar Közlöny 2007/155 (XI. 16.), iktar ’il quddiem il-“liġi dwar il-VAT”] jipprovdi:

“It-twettiq tal-fatt li permezz tiegħu sseħħ oġġettivament l-operazzjoni li tiġġenera t-taxxa (iktar ’il quddiem ir-“realizzazzjoni”) jagħti lok għall-impożizzjoni tat-taxxa.”

15 Skont l-Artikolu 56 tal-liġi dwar il-VAT, “it-taxxa dovuta tiġi kkonstatata fil-mument tar-realizzazzjoni, sakemm dik il-liġi ma tipprovdix mod ieħor”.

16 L-Artikolu 119(1) ta’ din il-liġi jipprovdi:

“Sakemm il-liġi ma tipprovdix mod ieħor, id-dritt għal tnaqqis tat-taxxa joriġina meta jkollha tiġi stabbilita t-taxxa dovuta li tikkorrispondi għat-taxxa tal-input kkalkolata (Artikolu 120).”

17 L-Artikolu 131 tal-liġi dwar il-VAT jipprovdi:

“(1) Il-persuna taxxabbli rreġistrata għall-finijiet tal-VAT fit-territorju nazzjonali tista’ tnaqqas mill-ammont totali tat-taxxa dovuta għal perijodu taxxabbli l-ammont tat-taxxa tal-input li tista’ titnaqqas li tkun oriġinat matul l-istess perijodu taxxabbli jew matul perijodu jew perijodi preċedenti.

(2) Jekk id-differenza stabbilita b’mod konformi mal-paragrafu 1 tkun negattiva, il-persuna taxxabbli rreġistrata għall-finijiet tal-VAT fit-territorju nazzjonali tista’:

a) tikkunsidra dik id-differenza, matul il-perijodu taxxabbli segwenti, bħala element li jnaqqas l-ammont totali tat-taxxa dovuta minnha b’mod konformi mal-paragrafu 1 għal dak il-perijodu taxxabbli, jew

b) titlob ir-rimbors tad-differenza mingħand l-awtoritajiet fiskali tal-Istat skont il-kundizzjonijiet u l-proċeduri ddefiniti fl-Artikolu 186.”

18 L-Artikolu 186 ta’ din il-liġi jipprovdi:

“(1) Ir-rimbors tal-ammont tad-differenza negattiva stabbilita b’mod konformi mal-Artikolu 131(1) - ikkoreġut b’mod konformi mal-paragrafu 2 - jista’ jintalab l-iktar kmieni sa mid-data ta’ skadenza ffissata fil-liġi XCII tal-2003 [dwar is-sistema tat-taxxa (az adózás rendjéről szóló 2003. évi XCII. törvény)], jekk

a) il-persuna taxxabbli rreġistrata għall-finijiet tal-VAT fit-territorju nazzjonali tagħmel it-talba lill-awtoritajiet fiskali fil-mument meta tippreżenta d-dikjarazzjoni tagħha b’mod konformi mal-Artikolu 184;

[...]

2. Meta l-persuna taxxabbli rreġistrata għall-finijiet tal-VAT fit-territorju nazzjonali li tipproċedi b’mod konformi mal-paragrafu 1(a), ma tħallasx immedjatament, qabel l-iskadenza msemmija fil-paragrafu 1, l-ammont, li jinkludi wkoll taxxa, li jikkorrispondi għall-operazzjoni li tikkostitwixxi l-bażi ġuridika tar-riperkussjoni tat-taxxa, jew jekk id-debitu tagħha ma jitneħħiex b’mod ieħor qabel dik id-data, għandu jitnaqqas it-total tat-taxxa tal-input, espress f’valur assolut, mid-differenza negattiva kkonstatata b’mod konformi mal-Artikolu 131(1), sal-massimu ta’ dan l-ammont.

3. L-Artikolu 131(2)(a) japplika għas-somma li tnaqqas, b’applikazzjoni tal-paragrafu 2, l-ammont espress f’valur assolut tad-differenza negattiva kkonstatata b’mod konformi mal-Artikolu 131(1), sal-massimu ta’ dan l-ammont. [...]”

19 Mill-Artikolu 37(1) tal-liġi XCII tal-2003, dwar is-sistema tat-tassazzjoni, li kliem tiegħu jipprovdi kif ġej, jirriżulta li din l-iskadenza tikkorrispondi għall-iskadenza tat-terminu għall-ħlas tat-taxxa:

“It-taxxa għandha tiġi mħallsa fid-data indikata fl-anness tal-liġi jew fil-liġi nfisha (skadenza) […]”

20 Skont il-punt 2(a) tal-Parti I tal-Anness II ta’ din il-liġi:

“Il-persuna taxxabbli suġġetta għall-[VAT] għandha tħallas l-ammont nett dovut tal-[VAT]

– f’każ ta’ dikjarazzjonijiet fiskali ta’ kull xahar qabel l-20 tax-xahar ta’ wara x-xahar kurrenti,

– f’każ ta’ dikjarazzjonijiet fiskali trimestrali qabel l-20 tax-xahar ta’ wara t-trimestru,

– f’każ ta’ dikjarazzjonijiet fiskali annwali qabel il-25 ta’ Frar tas-sena ta’ wara s-sena fiskali,

u tista’ titlob ir-rimbors sa mill-istess data.”

Il-proċedura prekontenzjuża

21 Billi kienet tqis li l-leġiżlazzjoni nazzjonali li tobbliga lill-persuni taxxabbli jittrasferixxu l-eċċess skont l-Artikolu 183 tad-Direttiva 2006/112 għall-perijodu taxxabbli li jmiss, sa fejn dan l-eċċess jinkludi ammont ta’ VAT tal-input li tirriżulta minn operazzjonijiet li għalihom il-persuna taxxabbli kkonċernata tkun għadha ma ħallsitx il-prezz, kienet tikser din id-direttiva, il-Kummissjoni ddeċidiet li tibda l-proċedura prevista fl-Artikolu 226 KE u fil-21 ta’ Marzu 2007 bagħtet ittra ta’ intimazzjoni lir-Repubblika tal-Ungerija.

22 Dan l-Istat Membru wieġeb għal din l-intimazzjoni permezz ta’ ittra tat-30 ta’ Mejju 2007 li fiha huwa kkontesta kull ksur tad-dritt tal-Unjoni.

23 Peress li, wara din it-tweġiba, hija kienet baqgħet tqis li r-Repubblika tal-Ungerija ma kinitx osservat l-obbligi tagħha taħt id-Direttiva 2006/112, fit-8 ta’ Ottubru 2009, il-Kummissjoni bagħtet opinjoni motivata fejn stiednet lil dan l-Istat Membru jieħu l-miżuri neċessarji sabiex jikkonforma ruħu magħhom fi żmien xahrejn mid-data li fiha jirċievi din l-opinjoni.

24 Peress li r-Repubblika tal-Ungerija wieġbet għal din l-opinjoni motivata permezz ta’ ittra tas-16 ta’ Diċembru 2009 fejn invokat nuqqas ta’ ksur tad-dritt tal-Unjoni, il-Kummissjoni ddeċidiet li tippreżenta dan ir-rikors.

Fuq ir-rikors

L-argumenti tal-partijiet

25 Il-Kummissjoni ssostni li l-Artikolu 186(2) tal-liġi dwar il-VAT huwa kuntrarju għad-dritt tal-Unjoni sa fejn dan jeskludi r-rimbors tal-eċċess tal-VAT tal-input li jista’ jitnaqqas mill-VAT tal-output sakemm il-VAT tal-input tirriżulta minn operazzjonijiet li għalihom ikun għadu ma tħallasx il-prezz dovut, bil-VAT inkluża.

26 Il-Kummissjoni tallega li, skont l-Artikoli 62 u 63 tad-Direttiva 2006/112, il-VAT tal-output issir dovuta fil-mument tal-kunsinna tal-oġġetti jew tal-provvista tas-servizzi, indipendentement mill-ħlas tal-prezz dovut għall-operazzjoni kkonċernata. Fornitur ta’ oġġetti jew ta’ servizzi b’hekk ikun obbligat iħallas il-VAT lit-Teżor Pubbliku, anki jekk ikun għadu ma tħallasx mill-klijenti tiegħu qabel it-tmiem tal-perijodu taxxabbli. Peress li, f’tali sitwazzjoni, l-Artikolu 186(2) tal-liġi Ungeriża dwar il-VAT jimpedixxi lill-klijent milli jitlob ir-rimbors tal-VAT li tikkorrispondi għall-operazzjoni inkwistjoni, is-sistema tal-VAT hija żbilanċjata.

27 Din l-esklużjoni tar-rimbors tal-eċċess tal-VAT li tista’ titnaqqas timponi piż fuq l-operaturi kkonċernati peress li d-dewmien fil-ħlas mill-Istat tal-kreditu tal-persuna taxxabbli li titlob rimbors inaqqas temporanjament il-valur tal-beni li għandha din il-persuna taxxabbli, u b’hekk inaqqas b’mod partikolari l-ammont tal-likwidità tagħha.

28 Barra minn hekk, il-Kummissjoni tenfasizza li l-leġiżlazzjoni nazzjonali inkwistjoni ma fiha ebda limitazzjoni temporali fir-rigward tat-trasferiment tal-eċċess tal-VAT. Għalhekk huwa possibbli l-persuna taxxabbli jkollha titrasferixxi diversi drabi tali eċċess. Mill-kliem tal-ewwel paragrafu tal-Artikolu 183 tad-Direttiva 2006/112 jirriżulta li l-eċċess għandu jiġi rrimborsat l-iktar tard matul it-tieni perijodu taxxabbli wara l-oriġini tiegħu.

29 Il-Kummissjoni ssostni wkoll li dan l-artikolu jipprevedi biss li l-Istati Membri jistgħu jiddefinixxu r-regoli proċedurali li jirregolaw ir-rimbors tal-eċċess tal-VAT li tista’ titnaqqas sabiex dawn ir-regoli jinserixxu ruħhom korrettament fid-diversi dispożizzjonijiet leġiżlattivi li jirregolaw il-proċedura amministrattiva. Min-naħa l-oħra, dan l-artikolu ma jippermettix li dan ir-rimbors jiġi ristrett permezz ta’ kundizzjonijiet dwar il-mertu. Issa, l-leġiżlazzjoni nazzjonali inkwistjoni ma tistabbilixxix regoli formali, iżda limiti materjali għar-rimbors tal-VAT.

30 Ir-Repubblika tal-Ungerija hija tal-fehma li l-kundizzjoni prevista fl-Artikolu 186(2) tal-liġi dwar il-VAT għall-kisba tar-rimbors ta’ eċċess tal-VAT li tista’ titnaqqas, jiġifieri il-ħlas tal-prezz dovut għall-operazzjoni li minnha tirriżulta l-VAT li tista’ titnaqqas, la tikser il-prinċipju ta’ newtralità fiskali u lanqas l-Artikolu 183 tad-Direttiva 2006/112, li b’mod ċar jagħti kompetenza lill-Istati Membri biex jiddefinixxu l-kundizzjonijiet ta’ dan ir-rimbors.

31 Dan l-Istat Membru jallega li l-posponiment tar-rimbors tal-eċċess tal-VAT li tista’ titnaqqas li jirriżulta mill-Artikolu 186(2) tal-liġi dwar il-VAT ma jirrappreżentax piż għall-persuna taxxabbli li jmur kontra l-prinċipju ta’ newtralità fiskali. Fil-fatt, “piż tal-VAT” għandu jinftiehem biss bħala piż definittiv, jiġifieri sitwazzjoni fejn il-persuna taxxabbli trid tħallas il-VAT mingħajr ma tibbenefika minn dritt għal tnaqqis. Min-naħa l-oħra, il-piż tal-VAT li jintrefa’ provviżorjament jikkostitwixxi biss piż ta’ finanzjament jew ta’ likwidità, li jaffettwa biss temporanjament is-sitwazzjoni finanzjarja tal-operatur ikkonċernat u li ma jmurx kontra l-prinċipju ta’ newtralità fiskali. Ir-Repubblika tal-Ungerija tenfasizza, f’dan ir-rigward, li s-sistema komuni tal-VAT tinkludi regoli li jġiegħlu lill-persuni taxxabbli jħallsu l-ammont ta’ din it-taxxa temporanjament.

32 Barra minn hekk, il-kundizzjoni imposta għar-rimbors inkwistjoni ma tpoġġix lill-persuna taxxabbli f’riskju finanzjarju, peress li din tal-aħħar tkun għadha ma ħallsitx id-dejn tagħha. Fir-realtà, il-piż jintrefa’ biss mill-bejjiegħ u dan jirriżulta mir-regoli tad-dritt tal-Unjoni, b’mod partikoli mill-Artikoli 62 u 63 tad-Direttiva 2006/112. Peress li dan il-piż huwa kompatibbli mal-prinċipju ta’ newtralità fiskali, l-allegat piż li jirriżulta mil-leġiżlazzjoni nazzjonali inkwistjoni għall-akkwirent jew għal min jirċievi ma jistax jitqies bħala inammissibbli.

33 Din il-leġiżlazzjoni nazzjonali hija intiża sabiex tinnewtralizza l-vantaġġ li minnu jibbenefika l-akkwirent jew min jirċievi servizzi li jista’ japprofitta mir-rimbors tat-taxxa fuq tranżazzjoni li ma tatx lok għal ħlas, jew li forsi qatt ma tkun is-suġġett ta’ ħlas, sabiex itejjeb is-sitwazzjoni ta’ likwidità tiegħu, u b’mod partikolari sabiex iħallas lill-fornituri tiegħu. Min-naħa l-oħra, fil-fehma tal-Kummissjoni, l-Istat jagħti self b’xejn lill-persuni taxxabbli, mill-baġit tiegħu stess, b’mod partikolari meta l-perijodu taxxabbli tal-fornitur ikun itwal minn dak ta’ min jirċievi.

34 Barra minn hekk, l-interpretazzjoni tal-prinċipju ta’ newtralità fiskali mogħtija mill-Kummissjoni tirrestrinġi b’mod mhux ġustifikat is-setgħa diskrezzjonali mogħtija lill-Istati Membri mill-Artikolu 183 tad-Direttiva 2006/112 u twassal biex jintilef is-sens ta’ dan l-artikolu.

35 Ir-Repubblika tal-Ungerija ssostni li l-leġiżlazzjoni tagħha ma taffettwax il-possibilità, għal persuna taxxabbli, li tirkupra l-ammont totali tal-VAT permezz ta’ ħlas bi flus u fi żmien raġonevoli, jekk ikun ġie ffissat terminu raġonevoli għall-ħlas tat-tranżazzjoni. Il-Qorti tal-Ġustizzja rrikonoxxiet li l-Istati Membri għandhom ċerta diskrezzjoni fir-rigward tal-iffissar taż-żmien għar-rimbors tal-eċċess tal-VAT li tista’ titnaqqas.

36 Fir-rigward tan-nuqqas ta’ limitazzjoni temporali tat-trasferiment tal-eċċess tal-VAT għall-perijodu tat-taxxa segwenti, ir-Repubblika tal-Ungerija ssostni li la t-test tad-Direttiva 2006/112 u lanqas il-preambolu tagħha ma jindikaw li l-eċċess tal-VAT jista’ jiġi ttrasferit darba biss għall-perijodu tat-taxxa segwenti. Barra minn hekk, it-twettiq tal-kundizzjoni ta’ ħlas stipulata mil-leġiżlazzjoni inkwistjoni jiddependi mir-rieda tal-persuna taxxabbli kkonċernata.

Evalwazzjoni tal-Qorti tal-Ġustizzja

37 Il-Kummissjoni essenzjalment takkuża lir-Repubblika tal-Ungerija li eċċediet il-limiti tal-libertà li l-Istati Membri għandhom skont l-Artikolu 183 tad-Direttiva 2006/112 billi tipprevedi li r-rimbors huwa eskluż meta l-persuna taxxabbli ma tkunx għadha ħallset il-prezz, inkluża l-VAT, dovut għall-operazzjoni li tagħti lok għall-VAT li tista’ titnaqqas.

38 Dan l-Artikolu 183 jipprevedi li, meta, għal perijodu taxxabbli, l-ammont tat-tnaqqis jeċċedi dak tal-VAT dovuta, l-Istati Membri jistgħu, skont il-kundizzjonijet li huma għandhom jiddeterminaw, jew jittrasferixxu l-eċċess għall-perijodu sussegwenti jew jirrimborsawh.

39 Mill-kliem stess ta’ dan l-artikolu u, b’mod partikolari, mill-kliem “skond il-kondizzjonijet li huma għandhom jiddeterminaw”jirriżulta li l-Istati Membri għanhdom ċerta libertà fid-determinazzjoni tal-kundizzjonijiet għar-rimbors tal-eċċess tal-VAT (ara s-sentenzi tal-25 ta’ Ottubru 2001, Il-Kummissjoni vs L-Italja, C-78/00, Ġabra p. I-8195, punt 32 ; tal-10 ta’ Lulju 2008, Sosnowska, C-25/07, Ġabra p. I-5129, punt 17, u tat-12 ta’ Mejju 2011, Enel Maritsa Iztok 3, C-107/10, p. I-000, punti 33 u 64).

40 Madankollu, dan il-fatt waħdu ma jippermettix li jiġi konkluż li l-Artikolu 183 tad-Direttiva 2006/112 għandu jiġi interpretat fis-sens li l-kundizzjonijiet stabbiliti mill-Istati Membri għar-rimbors tal-eċċess tal-VAT ma huma suġġetti għal ebda stħarriġ fir-rigward tad-dritt tal-Unjoni (ara, f’dan is-sens, is-sentenzi tal-21 ta’ Jannar 2010, Alstom Power Hydro, C-472/08, p. I-623, punt 15, u Enel Maritsa Iztok 3 iċċitata iktar ’il fuq, punt 28).

41 Fil-fatt għandu jiġi eżaminat sa fejn l-Artikolu 183 tad-Direttiva 2006/112, interpretat fid-dawl tal-kuntest u tal-prinċipji ġenerali li jirregolaw il-qasam tal-VAT, jinkludi regoli speċifiċi li għandhom jiġu osservati mill-Istati Membri meta jimplementaw id-dritt għar-rimbors tal-eċċess tal-VAT (ara s-sentenza Enel Maritsa Iztok 3, iċċitata iktar ’il fuq, punt 30).

42 F’dan ir-rigward, fl-ewwel lok, għandu jiġi rrilevat li minn ġurisprudenza stabbilita jirriżulta li d-dritt tal-persuni taxxabbli li jnaqqsu l-VAT tal-input dovuta jew imħallsa għall-oġġetti akkwistati u għas-servizzi rċevuti minnhom mill-VAT li huma għandhom iħallsu jikkostitwixxi prinċipju fundamentali tas-sistema komuni tal-VAT stabbilita mil-leġiżlazzjoni tal-Unjoni (ara, b’mod partikolari, is-sentenzi ċċitati iktar ’il fuq Il-Kummissjoni vs L-Italja, punt 28; Sosnowska, punt 14, u Enel Maritsa Iztok 3, punt 31).

43 Kif sostniet ripetutament il-Qorti tal-Ġustizzja, dan id-dritt għal tnaqqis jifforma parti integrali mill-mekkaniżmu tal-VAT u, bħala regola ġenerali, ma jistax jiġi limitat. B’mod partikolari, dan id-dritt għandu jiġi eżerċitat immedjatament fuq it-taxxi tal-input kollha mħallsa fuq l-operazzjonijiet imwettqa (ara, b’mod partikolari, is-sentenzi tas-6 ta’ Lulju 1995, BP Soupergaz, C-62/93, Ġabra p. I-1883, punt 18; tat-30 ta’ Settembru 2010, Uszodaépítő, C-392/09, p. I-8791, punt 34, u Enel Maritsa Iztok 3, iċċitata iktar ’il fuq, punt 32).

44 Fit-tieni lok, għandu jiġi mfakkar li l-eżistenza nnifisha tad-dritt għal tnaqqis taqa’ taħt l-Artikoli 167 sa 172 tad-Direttiva 2006/112, li jinsabu fil-Kapitolu tagħha intitolat “Oriġini u skop tad-dritt ta’ tnaqqis”, filwaqt li l-Artikoli 178 sa 183 ta’ din id-direttiva jikkonċernaw biss il-kundizzjonijiet għall-eżerċizzju ta’ dan id-dritt (ara, f’dan is-sens, is-sentenzi tat-8 ta’ Novembru 2001, Il-Kummissjoni vs Il-Pajjiżi l-Baxxi, C-338/98, Ġabra p. I-8265, punt 71, u tad-29 ta’ April 2004, Terra Baubedarf-Handel, C-152/02, Ġabra p. I-5583, punt 30).

45 Fir-rigward tal-possibbiltà, skont l-Artikolu 183 tad-Direttiva 2006/112, li jiġi pprovdut li l-eċċess tal-VAT jiġi ttrasferit għall-perijodu taxxabbli segwenti jew li jiġi rrimborsat, il-Qorti tal-Ġustizzja ppreċiżat li l-kundizzjonijiet stabbiliti mill-Istati Membri f’dan ir-rigward ma jistgħux jippreġudikaw il-prinċipju ta’ newtralità fiskali billi jġiegħlu l-persuna taxxabbli terfa’ b’mod sħiħ jew parzjali l-piż ta’ din it-taxxa. B’mod partikolari, dawn il-kundizzjonijiet għandhom jippermettu lill-persuna taxxabbli tirkupra, taħt kundizzjonijiet xierqa, il-kreditu kollu li jirriżulta minn dan l-eċċess ta’ VAT, li jimplika li r-rimbors isir, f’perijodu raġonevoli, permezz ta’ ħlas fi flus jew b’mod ekwivalenti u li, f’kull każ, il-metodu ta’ rimbors adottat ma għandu jinvolvi l-ebda riskju finanzjarju għall-persuna taxxabbli (ara s-sentenzi ċċitati iktar ’il fuq Il-Kummissjoni vs L-Italja, punti 33 u 34, u Sosnowka, punt 17, kif ukoll Enel Maritsa Iztok 3, punti 33 u 64).

46 Fit-tielet lok, fir-rigward tal-importanza mogħtija lill-ħlas tal-operazzjonijiet li minnhom tirriżulta l-VAT fis-sistema stabbilita mid-Direttiva 2006/112, għandu jiġi mfakkar li, skont l-Artikolu 63 ta’ din tal-aħħar, il-VAT għandha tiġi imposta meta l-oġġetti jew is-servizzi huma pprovduti, jiġifieri mat-twettiq tal-operazzjoni inkwistjoni, independentement mill-kwistjoni dwar jekk il-ħlas dovut għal din l-operazzjoni diġà tħallasx. Għaldaqstant, il-VAT hija dovuta lit-Teżor Pubbliku mill-fornitur ta’ oġġett jew ta’ servizz, anki jekk huwa jkun għadu ma rċeviex, mill-klijent tiegħu, il-ħlas li jikkorrispondi għall-operazzjoni mwettqa.

47 Bl-istess mod, l-Artikolu 67 tad-Direttiva 2006/112 jipprovdi li d-dritt għal tnaqqis għandu joriġina fil-mument li fih it-taxxa li tista titnaqqas issir dovuta, li huwa l-każ, skont l-imsemmi Artikolu 63, meta l-operazzjoni twettqet, independentement minn jekk sarx il-ħlas tal-prezz dovut għal din l-operazzjoni. Barra minn hekk, huwa espressament indikat fl-Artikolu 168(a) ta’ din id-direttiva li d-dritt għat-tnaqqis tat-taxxa tal-input li tibbenefika minnu l-persuna taxxabbli jikkonċerna mhux biss il-VAT li hija ħallset, iżda wkoll il-VAT dovuta. Mill-kliem tal-Artikolu 179 ta’ din id-direttiva jirriżulta wkoll li d-drtt għal tnaqqis għandu jiġi eżerċitat, bħala regola ġenerali, billi jitnaqqas mill-ammont tat-taxxa dovuta għal perijodu taxxabbli l-ammont tal-VAT li fir-rigward tagħha oriġina dritt għal tnaqqis matul l-istess perijodu (ara, f’dan is-sens, is-sentenza tat-8 ta’ Mejju 2008, Ecotrade, C-95/07 u C-96/07, Ġabra p. I-3457, punt 41).

48 Minn dan jirriżulta li, skont is-sistema stabbilita bid-Direttiva 2006/112, l-impożizzjoni tal-VAT kif ukoll l-oriġini u l-eżerċizzju tad-dritt għal tnaqqis huma, bħala regola ġenerali, indipendenti mill-fatt li l-prezz dovut, VAT inkluża, għal operazzjoni tħallasx diġà jew le.

49 Din l-analiżi hija kkonfermata minn dispożizzjonijiet oħra ta’ din id-direttiva, li skonthom il-ħlas effettiv tal-prezz jista’ jaffettwa l-impożizzjoni jew it-tnaqqis tal-VAT biss f’ċirkustanzi partikolari espressament imsemmija f’din id-direttiva.

50 Għaldaqstant, l-Artikolu 66(b) tad-Direttiva 2006/112 jippermetti lill-Istati Membri jipprovdu, b’deroga mill-Artikolu 63 ta’ din id-direttiva, li t-taxxa għandha tiġi imposta, għal ċerti operazzjonijiet jew għal ċerti kategoriji ta’ persuni taxxabbli, mhux iktar tard miż-żmien meta jiġi riċevut il-ħlas. Issa, ir-Repubblika tal-Ungerija ma sostnietx li hija għamlet użu minn din il-possibbiltà.

51 Barra minn hekk, l-Artikolu 66(b) tad-Direttiva 2006/112 ġie kkompletat, matul is-sena 2010, jiġifieri wara l-preżentata ta’ dan ir-rikors, bl-inklużjoni, f’din id-direttiva tal-Artikolu 167a, li skontu l-Istati Membri jistgħu jipprovdu, fil-kuntest ta’ skema fakultattiva, li d-dritt għal tnaqqis tal-persuni taxxabbli li l-VAT tagħhom issir dovuta biss skont l-imsemmi Artikolu 66(b) għandu jiġi pospost sakemm it-taxxa fuq l-oġġetti jew fuq is-servizzi pprovduti titħallas lill-fornitur tal-oġġetti jew tas-servizzi

52 Minn qari ta’ dawn id-dispożizzjonijiet kollha flimkien jirriżulta li, skont id-Direttiva 2006/112, l-oriġini tad-dritt għal tnaqqis huwa suġġett biss f’ċerti każijiet partikolari espressament imsemmija f’din id-direttiva għall-kundizzjoni li l-prezz dovut għall-operazzjoni li minnha tirriżulta l-VAT li tista’ titnaqqas ikun diġà tħallas. Bl-eċċezzjoni ta’ dawn il-każijiet partikolari, dan id-dritt għal tnaqqis jeżisti indipendentement minn din il-kundizzjoni. Issa, il-fatt li r-rimbors tal-eċċess tal-VAT li tista’ titnaqqas jiġi suġġett għal din il-kundizzjoni, liema rimbors jikkostitwixxi għaldaqstant l-istadju ta’ wara l-oriġini ta’ dan id-dritt, jista’ jkollu l-istess effetti fuq id-dritt għal tnaqqis bħall-applikazzjoni tal-istess kundizzjoni meta jqum dan id-dritt. Għaldaqstant, dan huwa tali li jippreġudika l-effett utli ta’ dan id-dritt għal tnaqqis.

53 Għaldaqstant, il-ħlas tal-prezz dovut għall-operazzjoni li minnha tirriżulta l-VAT li tista’ titnaqqas ma jistax jikkostitwixxi kundizzjoni, skont l-Artikolu 183 tad-Direttiva 2006/112, li l-Istati Membri jistgħu jistabbilixxu għar-rimbors tal-eċċess tal-VAT li tista’ titnaqqas.

54 Mill-kunsiderazzjonijiet kollha preċedenti jirriżulta li l-Artikolu 183 tad-Direttiva 2006/112 ma jippermettix lill-Istati Membri jimponu fuq l-eżerċizzju tad-dritt għar-rimbors ta’ eċċess tal-VAT li tista’ titnaqqas kundizzjoni dwar il-ħlas tal-ammont dovut għall-operazzjoni inkwistjoni. Għaldaqstant, billi eskludiet ir-rimbors ta’ eċċess ta’ VAT, meta l-prezz dovut, VAT inkluża, għall-operazzjoni li minnha tirriżulta l-VAT li tista’ titnaqqas ikun għadu ma tħallasx, ir-Repubblika tal-Ungerija eċċediet il-limiti tal-libertà li l-Istati Membri għandhom skont l-Artikolu 183.

55 Barra minn hekk, għandu jiġi rrilevat li din l-esklużjoni tar-rimbors ta’ tali eċċess ta’ VAT twassal sabiex ċerti persuni taxxabbli, li d-dikjarazzjoni fiskali tagħhom turi sistematikament eċċessi, huma obbligati jittrasferixxu iktar minn darba dan l-eċċess għall-perijodu taxxabbli li jmiss. F’dan ir-rigward, hemm lok li jiġi mfakkar li trasferiment ta’ eċċess ta’ VAT għal diversi perijodi taxxabbli segwenti għal dak li fih dan l-eċċess jirriżulta ma huwiex neċessarjament inkompatibbli mal-ewwel paragrafu tal-Artikolu 183 tad-Direttiva 2006/112 (ara, f’dan is-sens, is-sentenza Enel Maritsa Iztok 3, iċċitata iktar ’il fuq, punt 49).Madankollu, peress li l-leġiżlazzjoni inkwistjoni tipprovdi għal perijodi taxxabbli ta’ tul ta’ bejn xhar u sena, din tista’ twassal sabiex ċerti persuni taxxabbli ma jiksbux, minħabba t-trasferiment ripetut ta’ eċċess, rimbors ta’ dan tal-aħħar fi żmien raġonevoli.

56 Għaldaqstant hemm lok li jiġi kkonstatat li,

– billi obbligat lill-persuni taxxabbli li d-dikjarazzjoni fiskali tagħhom turi eċċess fis-sens tal-Artikolu 183 tad-Direttiva 2006/112, waqt perijodu taxxabbli partikolari, jittrasferixxu dan l-eċċess totalment jew parzjalment għall-perijodu taxxabbli li jmiss, jekk dawn ma ħallsux it-totalità tal-akkwisti korrispondenti lill-fornitur tagħhom, u

ir-Repubblika tal-Ungerija naqset milli twettaq l-obbligi tagħha taħt din id-direttiva.

Fuq l-ispejjeż

57 Skont l-Artikolu 69(2), tar-Regoli tal-Proċedura, il-parti li titlef għandha tbati l-ispejjeż, jekk dawn ikunu ntalbu. Peress li Ir-Repubblika tal-Ungerija tilfet, hemm lok li hija tiġi kkundannata għall-ispejjeż kif mitlub mill-Kummissjoni.

Għal dawn il-motivi, Il-Qorti tal-Ġustizzja (It-Tielet Awla) taqta’ u tiddeċiedi:

1) Ir-Repubblika tal-Ungerija,

– billi obbligat lill-persuni taxxabbli li d-dikjarazzjoni fiskali tagħhom turi “eċċess” fis-sens tal-Artikolu 183 tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud, waqt perijodu taxxabbli partikolari, jittrasferixxu dan l-eċċess totalment jew parzjalment għall-perijodu taxxabbli li jmiss, jekk dawn ma ħallsux it-totalità tal-akkwisti korrispondenti lill-fornitur tagħhom, u

naqset milli twettaq l-obbligi tagħha taħt din id-direttiva.

2) Ir-Repubblika tal-Awstrija hija kkundannata għall-ispejjeż.

Firem

* Lingwa tal-kawża: l-Ungeriż.

Opinion
Topics
References in this case
References to this case
Info