Available languages

Taxonomy tags

Info

References in this case

References to this case

Share

Highlight in text

Go

SENTENZA TAL-QORTI TAL-ĠUSTIZZJA (It-Tielet Awla)

18 ta’ Ottubru 2012 (*)

“Tassazzjoni — VAT — Dritt għal tnaqqis — Kontribut in natura — Twaqqigħ ta’ proprjetàjiet immobbli — Bini ġdid — Aġġustament”

Fil-Kawża C-234/11,

li għandha bħala suġġett talba għal deċiżjoni preliminari skont l-Artikolu 267 TFUE mressqa mill-Administrativen sad Varna (il-Bulgarija), permezz ta’ deċiżjoni tat-3 ta’ Mejju 2011, li waslet fil-Qorti tal-Ġustizzja fis-16 ta’ Mejju 2011, fil-proċedura

TETS Haskovo AD

vs

Direktor na Direktsia “Obzhalvane i upravlenie na izpalnenieto” — Varna pri Tsentralno upravlenie na Natsionalnata agentsia za prihodite,

IL-QORTI TAL-ĠUSTIZZJA (It-Tielet Awla),

komposta minn Viċi R. Silva de Lapuerta (Relatur), li qed jaġixxi bħala president tat-Tielet Awla, K. Lenaerts, E. Juhász, T. von Danwitz, u D. Sváby, Imħallfin,

Avukat Ġenerali: J. Kokott,

Reġistratur: K. Sztranc-Sławiczek, Amministratur

wara li rat il-proċedura bil-miktub u wara s-seduta tal-10 ta’ Mejju 2012,

wara li kkunsidrat l-osservazzjonijiet ippreżentati:

–        għal TETS Haskovo AD, minn M. Dimitrov, avukat,

–        għad-Direktor na Direktsia «Obzhalvane i upravlenie na izpalnenieto» — Varna pri Tsentralno upravlenie na Natsionalnata agentsia za prihodite, minn S. Avramov,

–        għall-Gvern Bulgaru, minn Y. Atanasov u T. Ivanov, bħala aġenti,

–        għall-Kummissjoni Ewropea, minn C. Soulay u D. Roussanov, bħala aġenti,

wara li semgħet il-konklużjonijiet tal-Avukat Ġenerali, ippreżentati fis-seduta tal-14 ta’ Ġunju 2012,

tagħti l-preżenti

Sentenza

1        It-talba għal deċiżjoni preliminari tirrigwarda l-interpretazzjoni tal-Artikolu 185 tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud (ĠU L 347, p. 1, iktar ’il quddiem id-“Direttiva”).

2        Din it-talba tressqet fil-kuntest ta’ kawża bejn TETS Haskovo AD (iktar ’il quddiem “TETS Haskovo”) u d-Direktor na Direktsia “Obzhalvane i upravlenie na izpalnenieto” — Varna pri Tsentralno upravlenie na Natsionalnata agentsia za prihodite (Direttur tad-Direttorat “Appelli u Compliance Management” għall-belt ta’ Varna, tal-amministrazzjoni ċentrali tal-Aġenzija nazzjonali tad-dħul, iktar ’il quddiem id-“Direktor”), fir-rigward tal-aġġustament ta’ tnaqqis ta’ taxxa fuq il-valur miżjud (iktar ’il quddiem il-“VAT”).

 Id-dritt tal-Unjoni

3        It-tieni subparagrafu tal-Artikolu 1(2) tad-Direttiva jipprovdi:

“Fuq kull transazzjoni, il-VAT, kalkulata fuq il-prezz tal-merkanzija jew tas-servizzi bir-rata applikabbli għat-tali merkanzija jew servizzi, għandha tkun imposta wara t-tnaqqis ta’ l-ammont tal-VAT li qed jinġarr direttament mid-diversi komponenti tal-prezz”

4        L-Artikolu 168 tad-Direttiva jipprovdi:

“Sakemm il-merkanzija u s-servizzi jintużaw għall-iskopijiet tat-transazzjonijiet taxxabbli ta’ persuna taxxabbli, il-persuna taxxabbli għandha tkun intitolata, fl-Istat Membru li fih twettaq dawn it-transazzjonijiet, li tnaqqas mll-VAT li għandha tħallas dan li ġej:

a)      il-VAT dovuta jew imħallsa f’dak l-Istat Membru rigward provvisti li sarulha ta’ merkanzija jew servizzi, li twettqu jew li għad iridu jitwettqu minn persuna taxxabli oħra;

[...]”

5        L-Artikolu 184 tad-Direttiva jipprovdi li t-tnaqqis inizjali għandu jiġi aġġustat fejn dan ikun ogħla jew inqas minn dak li għalih il-persuna taxxabbli kienet intitolata.

6        L-Artikolu 185 tad-Direttiva jipprovdi:

“1.      L-aġġustament għandu, b’mod partikolari, isir fejn, wara li ssir id-denunzja tal-VAT, isir xi tibdil fil-fatturi użati biex jiddeterminaw l-ammont li għandu jitnaqqas, per eżempju fejn ix-xirjiet huma kkanċellati jew hu miksub roħs fil-prezzijiet.

2.      Bħala deroga mill-paragrafu 1, m’għandu jsir l-ebda aġġustament fil-każ ta’ transazzjonijiet li jibqgħu totalment jew parzjalment mhux imħallsa jew fil-każ ta’ distruzzjoni, telf jew serq tal-proprjetà li ġie ppruvat jew ikkonfermat kif imiss, jew fil-każ ta’ merkanzija riżervata għall-iskop ta’ għoti ta’ rigali ta’ valur żgħir jew ta’ l-għoti ta’ kampjuni, […].

Madanakollu, fil-każ ta’ transazzjonijiet li jibqgħu totalment jew parzjalment mhux imħallsa jew fil-każ ta’ serq, l-Istati Membri jistgħu jeħtieġu li jsir aġġustament.”

7        L-Artikolu 186 tad-Direttiva jipprovdi li l-Istati Membri għandhom jistabbilixxu r-regoli dettaljati għall-applikazzjoni tal-Artikoli 184 u 185 tagħha.

 Id-dritt Bulgaru

8        Il-liġi dwar it-taxxa fuq id-dħul mill-bejgħ (Zakon za danak varhu dobavenata stoynost, DV Nru 63, tal-4 ta’ Awwissu 2006, iktar ’il quddiem iz-“ZDDS”), daħlet fis-seħħ mill-1 ta’ Jannar 2007.

9        L-Artikolu 5 taz-ZDDS jipprovdi:

“Proprjetà, fis-sens ta’ din il-liġi, tfisser kull proprjetà mobbli jew immobbli, u tinkludi l-enerġija elettrika, il-gass, l-ilma, is-sħana jew il-ksieħ u l-oġġetti simili, kif ukoll is-software standard.”

10      L-Artikolu 6(1) taz-ZDDS jipprovdi:

“Il-kunsinna ta’ proprjetà fis-sens ta’ din il-liġi tinkludi t-trasferiment tad-dritt ta’ proprjetà jew ta’ drittijiet in rem oħra fuq il-proprjetà.”

11      Skont l-Artikolu 10 taz-ZDDS:

“(1)      Ebda kunsinna ta’ proprjetà jew provvista ta’ servizzi ma għandha titqies li seħħet meta l-kunsinna jew il-provvista lill-persuna li favuriha jsir it-trasferiment tkun suġġetta għat-trasformazzjoni, mill-persuna li tkun qiegħda tagħmel it-trasferiment jew li tkun qiegħda tagħmel il-kontribut, li tirriżulta minn:

[...]

3.      kontribut in natura lil kumpannija kummerċjali.

(2)      Fil-każijiet previsti fil-paragrafu preċedenti, il-persuna li tirċievi l-proprjetà u s-servizzi tikseb is-suċċessjoni legali tad-drittijiet u tal-obbligi kollha rilevanti skont din il-liġi, b’mod partikolari d-dritt għat-tnaqqis tal-VAT tal-input imħallsa kif ukoll l-obbligu tal-aġġustament tat-tnaqqis tal-VAT tal-output imħallsa.

[...]”

12      Minbarra l-każijiet ta’ bdil tal-bażi taxxabbli u ta’ bdil tat-tip ta’ kunsinna, l-aġġustamenti tal-eżerċizzju tad-dritt għal tnaqqis huma rregolati mill-Artikolu 79 taz-ZDDS, li jipprovdi:

“[...]

(3)      Fil-każ tad-distruzzjoni, tal-konstatazzjoni tal-assenza jew l-abbandun ta’ proprjetà, jew fil-każ li jkun hemm bdil fl-assenjazzjoni tagħhom b’tali mod li ma jkunx iktar possibbli li l-VAT tal-input titnaqqas, kull persuna taxxabbli li tkun, parzjalment jew kompletament, naqqset il-VAT tal-input fuq proprjetà prodotta, mixtrija, miksuba, jew importata, għandha ddaħħal fil-kontijiet taxxa ta’ ammont ekwivalenti għal dak tal-VAT imnaqqsa abbażi tat-taxxa tal-input imħallsa, taxxa li għal ħlas tagħha huwa xorta waħda huwa responsabbli.

(4)      L-aġġustament [...] isir u jiġi kkonstatat permezz ta’ proċess verbali matul il-perijodu li matulu jkun feġġew l-kundizzjonijiet għal tali aġġustament.

[...]

(6)      [...] il-persuna taxxabbli hija responsabbli għal ħlas ta’ taxxa għall-proprjetà jew għas-servizzi li huma beni ta’ investiment skont il-liġi dwar it-taxxa fuq il-kumpanniji [...]”

13      Il-limiti għall-aġġustamenti huma previsti fl-Artikolu 80(2) taz-ZDDS skont it-termini li ġejjin:

“L-aġġustamenti msemmija fl-Artikolu 79(3) ma għandhomx isiru f’każijiet ta’:

1.      distruzzjoni, għajbien jew deterjorament ikkawżat minn forza maġġuri, l-istess bħal fil-każ ta’ distruzzjoni ta’ prodotti suġġetti għas-sisa u li huma s-suġġett ta’ investigazzjoni amministrattiva skont il-liġi fuq id-dazji tas-sisa u l-imħażen fiskali;

2.      distruzzjoni, għajbien jew deterjorament kkawżati minn ħsarat jew inċidenti li l-persuna kkonċernata tista’ tipprova li ma seħħewx kaġun ta’ nuqqas tagħha;

[...]

4.      nuqqas tekniku fil-limiti tat-tolleranza previsti, iddefiniti mid-dokumentazzjoni teknika dwar kull proċedura jew attività;

5.      deterjorament minħabba l-qbiż tad-data tal-iskadenza, iddefinit skont ir-rekwiżiti legali;

6.      deterjorament ta’ assi materjali immobbli fis-sens tal-liġi tal-kontabbiltà, meta l-valur tagħhom imniżżel fil-karta tal-bilanċ huwa inqas minn 10 % tal-prezz tax-xiri tagħhom.

[...]”

 Il-kawża prinċipali u d-domandi preliminari

14      L-attività prinċipali ta’ TETS Haskovo hija l-ġenerazzjoni tal-elettriku kif ukoll it-trasport u d-distribuzzjoni tas-sħana. Hija topera ċentrali termoelettrika li tinsab f’Haskovo (il-Bulgarija).

15      Fit-2 ta’ April 2008, Finans inzhenering AD (iktar ’il quddiem “Finans inzhenering”) xtrat kumpless immobbiljari mingħand il-Komun ta’ Haskovo li b’mod partikolari kien jinkludi tliet binjiet intiżi għall-ġenerazzjoni tal-enerġija (torri tat-tkessieħ, ċumnija u bini tal-ġenerazzjoni). Dan ix-xiri kien suġġett għall-VAT.

16      Fl-4 ta’ Lulju 2008, TETS Haskovo kienet is-suġġett ta’ żieda fil-kapital azzjonarju tagħha permezz ta’ kontribut in natura kompost minn dan il-kumpless immobiljari li kien proprjetà ta’ Finans inzhenering, li kien inxtara mingħand il-Komun ta’ Haskovo.

17      Id-dipartiment tad-dħul tad-Direttorat territorjali tal-Aġenzija Nazzjonali tad-dħul pubbliku tal-belt ta’ Varna kkunsidra li t-tranżazzjoni ta’ kontribut imwettqa minn Finans inzhenering ma kinitx tikkostitwixxi kunsinna ta’ proprjetà, peress li din il-kumpannija kienet ittrasferiet grupp ta’ immobbli li kien jikkorrispondi għall-assi kollha.

18      Fid-29 ta’ Lulju 2009, TETS Haskovo kisbet permess għall-bini fil-kuntest ta’ proġett ta’ modernizzazjoni taċ-ċentrali termoelettrika ta’ Haskovo, li kien jimplika t-twaqqigħ ta’ parti mill-proprjetà immobbli kkontribwita fil-kapital ta’ din l-impriża minn Finans inzhenering, jiġifieri torri ta’ tkessiħ, ċumnija u bini tal-ġenerazzjoni. Ix-xogħol ta’ twaqqigħ, li seħħ bejn l-1 ta’ Jannar u t-28 ta’ Frar 2010, twettaq minn kumpannija oħra. L-iskart metalliku li rriżulta minn dan it-twaqqigħ inbiegħ u dan il-bejgħ ta’ lok għal tranżazzjonijiet suġġetti għal VAT.

19      Matul April 2010, TETS Haskovo kienet suġġetta għal investigazzjoni fiskali għall-perijodu mill-1 ta’ Novembru 2009 sat-28 ta’ Frar 2010. F’dan il-kuntest ġie kkonstatat li l-immobbli kkonċernati, qabel ma ġew ikkontribwiti fil-kapital ta’ TETS Haskovo, kienu nxtraw minn Finans inzhenering, li kienet diġà naqqset l-ammont tal-VAT imħallsa meta ġie ffinallizzat dan il-bejgħ.

20      Fid-dawl ta’ dawn il-konstatazzjonijiet u fid-dawl, b’mod partikolari, tal-fatt li parti mill-bini inkwistjoni fil-kawża prinċipali kien twaqqa’, id-dipartiment tad-dħul tad-Direttorat territorjali tal-Aġenzija Nazzjonali tad-dħul pubbliku tal-belt ta’ Varna kkunsidra li r-rekwiżiti meħtieġa sabiex ikun hemm aġġustament tal-VAT imnaqqsa, abbażi tat-taxxa tal-input imħallsa, minn Finans inzhenering, kienu sodisfatti.

21      Permezz ta’ kont tat-taxxa tad-19 ta’ Lulju 2010, l-imsemmi dipartiment ikkunsidra li TETS Haskovo, fil-kwalità tagħha ta’ suċċessur legali tad-drittijiet u tal-obbligi ta’ Finans inzhenering, kienet responsabbli għal-ħlas tas-somma ta’ BGN 1 268 581, abbażi tal-aġġustament tat-tnaqqis tal-VAT imwettaq minn din l-aħħar kumpannija, u għal ħlas ta’ interessi fuq din is-somma, li kienu jammontaw għal BGN 45 606.

22      Dan il-kont tat-taxxa rettifikattiv kien is-suġġett ta’ rikors quddiem id-Direktor fejn TETS Haskovo sostniet li ma kienx hemm lok li jsir aġġustament, sa fejn l-għan tat-twaqqigħ tal-bini kkonċernat kien li dan il-bini jiġi ssostitwit minn bini ġdid li kellu jservi sabiex jitwettqu tranżazzjonijiet taxxabbli. Fl-1 ta’ Diċembru 2010 id-Direktor ċaħad ir-rikors.

23      Wara dan TETS Haskovo appellat minn din id-deċiżjoni quddiem l-Administrativen sad Varna.

24      Din il-qorti tesponi li l-leġiżlazzjoni nazzjonali tagħmel distinzjoni bejn id-distruzzjoni volontarja ta’ assi u distruzzjoni li l-kawża tagħha tkun esterna, fejn il-persuna taxxabbli hija eżentata mill-aġġustament biss fit-tieni każ. F’dawn iċ-ċirkustanzi, l’Administrativen sad Varna ddeċidiet li tissospendi l-proċeduri u li tagħmel lill-Qorti tal-Ġustizzja d-domandi preliminari li ġejjin:

“1)      Kif għandu jiġi interpretat il-kunċett ta’ “distruzzjoni tal-proprjetà” fis-sens tal-Artikolu 185(2) tad-Direttiva […], u l-motivi u/jew il-kundizzjonijiet ta’ eżekuzzjoni tad-distruzzjoni huma rilevanti għall-finijiet tal-aġġustament tat-taxxa tal-input fuq il-VAT imnaqqsa meta tinxtara l-proprjetà?

2)      It-twaqqigħ debitament ipprovat tal-proprjetà ta’ impriża bl-uniku għan li jinbena ieħor ġdid, iktar modern, bl-istess skop, għandu jiġi interpretat bħala “tibdil fil-fatturi użati biex jiddeterminaw l-ammont li għandu jitnaqqas” fis-sens tal-Artikolu 185(1) tad-Direttiva […]?

3)      L-Artikolu 185(2) tad-Direttiva […] għandu jiġi interpretat fis-sens li jippermetti lill-Istati Membri li jipprovdu għal aġġustamenti f’każ ta’ distruzzjoni ta’ proprjetà meta l-akkwist ta’ din tal-aħħar ma jkunx ta lok għal ħlas jew ikun ta lok għal ħlas parzjali?

4)      L-Artikolu 185(1) u (2) tad-Direttiva […] għandu jiġi interpretat fis-sens li jipprekludi leġiżlazzjoni nazzjonali, bħall-Artikoli 79(3) u 80(2)(1) [taz-ZDDS], li tipprovdi aġġustament tat-taxxa tal-input fuq il-VAT imnaqqsa f’każ ta’ distruzzjoni ta’ proprjetà li għaliha l-ammont prinċipali u l-VAT iffatturati tħallsu fl-intier tagħhom, u li tissuġġetta n-nuqqas ta’ aġġustament tat-taxxa tal-input fuq il-VAT għal kundizzjoni oħra minbarra l-ħlas?

5)      L-Artikolu 185(2) tad-Direttiva […] għandu jiġi interpretat fis-sens li jeskludi l-possibbiltà li tiġi aġġustata t-taxxa tal-input fuq il-VAT diġà mnaqqsa fil-każ ta’ twaqqigħ ta’ bini, bl-uniku skop li jinbena minflok bini ġdid iktar modern, li għandu l-istess skop u li jiġġenera qligħ li jagħti d-dritt għat-tnaqqis tat-taxxa tal-input fuq il-VAT?”

 Fuq id-domandi preliminari

 Fuq it-tieni domanda

25      Permezz tat-tieni domanda tagħha, li għandha tkun l-ewwel waħda li tingħata risposta, il-qorti tar-rinviju essenzjalment tistaqsi jekk l-Artikolu 185(1) tad-Direttiva għandux jiġi interpretat fis-sens li twaqqigħ, bħal dak inkwistjoni fil-kawża prinċipali, ta’ diversi binjiet intiżi għal ġenerazzjoni tal-enerġija u s-sostituzzjoni tagħhom b’bini iktar modern li għandu l-istess għan, jikkostitwixxix tibdil fil-fatturi użati biex jiġi ddeterminat l-ammont tat-tnaqqis tal-VAT effettwat abbażi tat-taxxa tal-input imħallsa, li seħħ wara li saret id-dikjarazzjoni tal-VAT, u, li għalhekk iġib miegħu obbligu ta’ aġġustament tal-imsemmi tnaqqis.

26      Sabiex tingħata risposta għal din id-domanda, għandu preliminarjament jiġi osservat li huma l-Artikoli 184 sa 186 tad-Direttiva li jikkostitwixxu s-sistema applikabbli f’dak li jirrigwarda l-eventwali tnissil ta’ dritt tal-amministrazzjoni tat-taxxa li teżiġi aġġustament min-naħa ta’ persuna taxxabbli, inkluż f’dak li jirrigwarda l-aġġustament ta’ tnaqqis fir-rigward ta’ beni ta’ investiment.

27      Għandu jitfakkar, barra minn hekk, li s-sistema ta’ tnaqqis stabbilita mid-Direttiva hija intiża li teħles kompletament lin-negozjant mill-piż tal-VAT dovuta jew imħallsa fil-kuntest tal-attivitajiet ekonomiċi tiegħu kollha. Għalhekk, is-sistema komuni tal-VAT tfittex li tiggarantixxi n-newtralità perfetta fir-rigward tat-tariffa fiskali tal-attivitajiet ekonomiċi kollha, ikunu liema jkunu l-għanijiet jew ir-riżultati tagħhom, bil-kundizzjoni li l-imsemmija attivitajiet ikunu, bħala prinċipju, huma stess suġġetti għall-VAT (ara s-sentenza tat-22 ta’ Marzu 2012, Klub, C-153/11, punt 35 u l-ġurisprudenza ċċitata).

28      Mill-Artikolu 168 tad-Direttiva jirriżulta li, sa fejn il-persuna taxxabbli, li taġixxi inkwantu tali fil-mument meta tixtri beni, tuża l-beni għall-bżonnijiet tat-tranżazzjonijiet taxxabbli tagħha, hija awtorizzata li tnaqqas il-VAT dovuta jew imħallsa għal dan il-beni. Dan id-dritt għal tnaqqis jitnissel jew meta t-taxxa li għandha titnaqqas issir dovuta, jew inkella meta ssir il-kunsinna tal-beni (ara s-sentenza Klub, iċċitata iktar ’il fuq, punt 36 u l-ġurisprudenza ċċitata).

29      F’dak li jirrigwarda l-eventwali effett li ġrajjiet li seħħew wara tnaqqis jista’ jkollhom fuq l-imsemmi tnaqqis, mill-ġurisprudenza jirriżulta li l-użu li jsir mill-beni jew mis-servizz, jew li huwa previst għalihom, jiddetermina l-ammont tat-tnaqqis inizjali li għandha dritt għalih il-persuna taxxabbli u l-ammont tal-eventwali aġġustamenti matul il-perijodi ta’ wara, li għandhom isiru skont il-kundizzjonijiet previsti fl-Artikoli 185 sa 187 tad-Direttiva (ara, f’dan is-sens, is-sentenzi tal-15 ta’ Diċembru 2005, Centralan Property, C-63/04, Ġabra p. I-11087, punt 54 u l-ġurisprudenza ċċitata).

30      Fil-fatt, il-mekkaniżmu ta’ aġġustament previst mill-imsemmija Artikoli tad-Direttiva jifforma parti integrali mis-sistema tat-tnaqqis tal-VAT stabbilita minn din id-direttiva.

31      F’dan ir-rigward, għandu jiġi enfasizzat li r-regoli previsti mid-Direttiva fil-qasam ta’ aġġustamenti għandhom l-għan li jżidu l-preċiżjoni tat-tnaqqis sabiex tiġi garantita n-newtralità tal-VAT, b’mod li t-tranżazzjonijiet li jkunu saru fil-fażi ta’ qabel jkomplu jagħtu lok għad-dritt ta’ tnaqqis sakemm iservu biex jipprovdu servizzi suġġetti għal tali taxxa. Permezz tal-imsemmija regoli, din id-Direttiva għalhekk għandha l-għan li tistabbilixxi relazzjoni stretta u diretta bejn id-dritt għat-tnaqqis tal-VAT tal-input imħallsa u l-użu tal-proprjetà u tas-servizzi kkonċernati għal tranżazzjonijiet suġġetti għat-taxxa tal-output (ara s-sentenza Centralan Property, iċċitata iktar ’il-fuq, punt 57).

32      F’dak li jirrigwarda t-tnissil ta’ eventwali obbligu ta’ aġġustament tat-tnaqqis tal-VAT magħmul abbażi tat-taxxa tal-input imħallsa, l-Artikolu 185(1) tad-Direttiva jistabbilixxi l-prinċipju li jgħid li tali aġġustament għandu b’mod partikolari jsir meta bdil fil-fatturi użati biex jiġi ddeterminat l-ammont tal-imsemmi tnaqqis ikun seħħ wara li tkun saret id-dikjarazzjoni tal-VAT.

33      F’dawn iċ-ċirkustanzi tqum il-kwistjoni dwar jekk, f’każ bħal dak inkwistjoni fil-kawża prinċipali, fejn it-twaqqigħ ta’ proprjetà immobbli twettaq fil-kuntest tal-modernizzazjoni ta’ ċentru termika u bil-għan tat-tkomplija ta’ attivitajiet ekonomiċi intiżi għall-ġenerazzjoni tal-enerġija, għandhiex tiġi kkonstatata l-eżistenza ta’ tali bdil, fis-sens tal-Artikolu 185(1) tad-Direttiva, u konsegwentement, jekk il-prinċipju nnifsu tal-mekkaniżmu ta’ aġġustament huwiex applikabbli.

34      F’dan ir-rigward, f’sitwazzjoni bħal dik inkwistjoni fil-kawża prinċipali, is-sostituzzjoni ta’ strutturi mwiegħra b’bini iktar modern li għandu l-istess funzjoni u, konsegwentement, l-użu ta’ dawn tal-aħħar għal tranżazzjonijiet tal-output taxxabbli, bl-ebda mod ma jiksru r-rabta diretta li teżisti bejn ix-xiri tal-input tal-bini kkonċernat, minn naħa, u l-attivitajiet ekonomiċi mwettqa sussegwentement mill-persuna taxxabbli, min-naħa l-oħra. Ix-xiri tal-proprjetà immobbli inkwistjoni, u sussegwentement it-twaqqigħ tagħha biex tiġi mmodernizzata, jistgħu għalhekk jiġu kkunsidrati bħala tkomplija ta’ tranżazzjonijiet konnessi bejniethom intiżi għat-twettiq ta’ tranżazzjonijiet taxxabbli l-istess bħax-xiri ta’ proprjetà immobbli ġdida u l-użu dirett tagħha.

35      Din l-interpretazzjoni tgħodd iktar u iktar f’ċirkustanzi fejn il-bini mixtri twaqqa’ biss parzjalment, fejn bini ġdid imbena fuq l-istess artijiet mixtrija preċedentement, u fejn ċertu skart li jirriżulta mit-twaqqigħ tal-bini l-qadim inbiegħ, u dan il-bejgħ, barra minn hekk, ta lok għal tranżazzjonijiet tal-output taxxabbli.

36      F’dawn iċ-ċirkustanzi, ir-risposta għat-tieni domanda għandha tkun li l-Artikolu 185(1) tad-Direttiva għandu jiġi interpretat fis-sens li twaqqigħ, bħal dak inkwistjoni fil-kawża prinċipali, ta’ diversi binjiet intiżi għal ġenerazzjoni tal-enerġija u s-sostituzzjoni tagħhom b’bini iktar modern li għandu l-istess għan, ma jikkostitwixxix tibdil fil-fatturi użati biex jiġi ddeterminat l-ammont tat-tnaqqis tal-VAT effettwat abbażi tat-taxxa tal-input imħallsa, li seħħ wara li saret id-dikjarazzjoni tal-VAT, u, għalhekk ma jġibx miegħu obbligu ta’ aġġustament tal-imsemmi tnaqqis.

37      Fid-dawl tar-risposta mogħtija għat-tieni domanda, li teskludi l-possibbiltà ta’ aġġustament tal-elementi rilevanti fir-rigward tal-VAT f’ċirkustanzi bħal dawk tal-kawża prinċipali, ma hemmx lok li tingħata risposta għad-domandi l-oħra.

 Fuq l-ispejjeż

38      Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (It-Tielet Awla) taqta’ u tiddeċiedi:

L-Artikolu 185(1) tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud, għandu jiġi interpretat fis-sens li twaqqigħ, bħal dak inkwistjoni fil-kawża prinċipali, ta’ diversi binjiet intiżi għal ġenerazzjoni tal-enerġija u s-sostituzzjoni tagħhom b’bini iktar modern li għandu l-istess għan, ma jikkostitwixxix tibdil fil-fatturi użati biex jiġi ddeterminat l-ammont tat-tnaqqis tal-VAT effettwat abbażi tat-taxxa tal-input imħallsa, li seħħ wara li saret id-dikjarazzjoni tal-VAT, u, għalhekk ma jġibx miegħu obbligu ta’ aġġustament tal-imsemmi tnaqqis.

Firem

* Lingwa tal-kawża: il-Bulgaru.