27.8.2011 |
MT |
Il-Ġurnal Uffiċjali tal-Unjoni Ewropea |
C 252/19 |
Rikors ippreżentat fl-14 ta’ Ġunju 2011 — Il-Kummissjoni Ewropea vs Ir-Repubblika Franċiża
(Kawża C-296/11)
2011/C 252/36
Lingwa tal-kawża: il-Franċiż
Partijiet
Rikorrenti: Il-Kummissjoni Ewropea (rappreżentanti: C. Soulay u L. Lozano Palacios, aġenti)
Konvenuta: Ir-Repubblika Franċiża
Talbiet tar-rikorrenti
— |
tikkonstata li, billi applikat is-sistema partikolari tal-aġenziji tal-ivvjaġġar għal servizzi mogħtija lil persuni minbarra l-vjaġġatur (b’mod partikolari lil aġenziji oħra tal-ivvjaġġar), ir-Repubblika Franċiża naqset milli twettaq l-obbligi tagħha taħt l-Artikoli 306 sa 310 tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud (1); |
— |
tikkundanna lir-Repubblika Franċiża għall-ispejjeż. |
Motivi u argumenti prinċipali
Il-Kummissjoni tqajjem motiv uniku insostenn tar-rikors tagħha bbażat fuq l-applikazzjoni żbaljata tas-sistema partikolari tal-aġenziji tal-ivvjaġġar għal servizzi mogħtija lil persuni minbarra l-vjaġġatur. F’dan ir-rigward, hija tosserva li din is-sistema hija applikabbli biss meta s-servizz ta’ vjaġġar jinbiegħ lill-vjaġġatur. Min-naħa l-oħra, ma huwiex applikabbli għas-servizzi pprovduti mill-aġenziji tal-ivvjaġġar lil aġenziji tal-ivvjaġġar oħra jew lil organizzaturi ta’ ġiti turistiċi. Fid-dawl tar-redazzjoni tad-dispożizzjonijiet tal-kodiċi ġenerali tat-taxxi li jirreferu għall-kelma “klijent” pjuttost milli għall-kelma “vjaġġatur”, il-konvenuta tuża approċċ ibbażat fuq il-“klijent” u b’hekk tapplika s-sistema partikolari tal-aġenziji tal-ivvjaġġar b’mod estensiv.
Barra minn hekk, il-Kummissjoni tiċħad l-argument difiż mill-awtoritajiet Franċiżi li jgħid li l-leġiżlazzjoni Franċiża tippermetti li jintlaħqu aħjar l-għanijiet tas-sistema partikolari, jiġifieri s-semplifikazzjoni tal-formalitajiet amministrattivi tal-aġenziji tal-ivvjaġġar u l-allokazzjoni tad-dħul ta’ VAT lill-Istat Membru li fih seħħ il-konsum finali ta’ kull servizz individwali.
(1) ĠU L 347, p. 1.