5.5.2014 |
MT |
Il-Ġurnal Uffiċjali tal-Unjoni Ewropea |
C 135/26 |
Rikors ippreżentat fl-10 ta’ Marzu 2014 – Il-Kummissjoni Ewropea vs Ir-Renju tal-Isvezja
(Kawża C-114/14)
2014/C 135/31
Lingwa tal-kawża: l-Isvediż
Partijiet
Rikorrenti: Il-Kummissjoni Ewropea (rappreżentanti: J. Enegren u L. Lozano Palacios, bħala aġenti)
Konvenut: Ir-Renju tal-Isvezja
Talbiet tar-rikorrenti
— |
tikkonstatata li, billi ma eżentax il-provvisti ta’ servizzi postali magħmula mis-servizzi postali pubbliċi, u l-provvista ta’ oġġetti inċidentali għal dawn il-provvisti, u meta ma eżentax il-provvisti, għall-valur nominali tagħhom, ta’ bolli tal-posta validi għall-pustaġġ fit-territorju nazzjonali, ir-Renju tal-Isvezja naqas milli jwettaq l-obbligi tiegħu taħt l-Artikoli 132(1)(a) u 135(1)(h) tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud (1). |
— |
tikkundanna lir-Renju tal-Isvezja għall-ispejjeż. |
Motivi u argumenti prinċipali
Il-Kummissjoni Ewropea ppreżentat rikors kontra r-Renju tal-Isvezja skont l-Artikolu 258 TFUE għall-motivi li ġejjin.
L-Artikolu 132(1)(a) tad-Direttiva 2006/112 jipprovdi li l-Istati Membri għandhom jeżentaw il-provvisti ta’ servizzi u l-provvisti ta’ oġġetti inċidentali għal dawn il-provvisti magħmula mis-servizzi postali pubbliċi.
L-Artikolu 135(1)(h) tad-Direttiva 2006/112 jipprovdi li l-Istati Membri għandhom jeżentaw il-provvisti, għall-valur nominali tagħhom, ta’ bolli tal-posta validi għall-pustaġġ.
Ir-Renju tal-Isvezja afda lil Posten AB bl-obbligi ta’ servizz universali li jikkorrispondu għal offerta ta’ servizzi postali ta’ kwalità ddeterminata pprovduti b’mod permanenti fil-punti kollha tat-territorju bi prezzijiet raġonevoli għall-utenti kollha, skont l-Artikolu 3 tad-Direttiva tal-Parlament Ewropew u tal-Kunsill 97/67/KE, tal-15 ta’ Diċembru 1997, dwar regoli komuni għall-iżvilupp tas-suq intern tas-servizzi postali tal-Komunità u t-titjib fil-kwalità tas-servizz (2).
Il-Kummissjoni tikkunsidra li Posten AB, peress li hija nkarigata mill-obbligi ta’ servizz universali msemmija fl-Artikolu 3 tad-Direttiva 97/67, tikkostitwixxi servizz pubbliku skont l-Artikolu 132 tad-Direttiva 2006/112.
Ir-Renju tal-Isvezja naqas milli jeżenta l-provvisti ta’ servizzi postali pprovduti minn Posten AB kif ukoll il-provvisti, għall-valur nominali tagħhom, ta’ bolli tal-posta validi għall-pustaġġ fit-territorju nazzjonali.
(1) ĠU L 347, p. 1.
(2) ĠU Edizzjoni Speċjali bil-Malti, Kapitolu 6, Vol. 3, p. 71.