EU tax law WEB Marcandi Limited „Madbid” - C-544/16

–

għal Marcandi Ltd, minn J. Brinsmead-Stockham, barrister, C. Van Zyl, solicitor, u A. Brown, avukat,

–

għall-Gvern tar-Renju Unit, minn D. Robertson u Z. Lavery, bħala aġenti, assistiti minn P. Mantle, barrister,

–

għall-Kummissjoni Ewropea, minn R. Lyal u L. Lozano Palacios, bħala aġenti,

1

It-talba għal deċiżjoni preliminari tirrigwarda l-interpretazzjoni tal-Artikolu 2(1), tal-Artikoli 14, 24, 62, 63, 65 u 73 kif ukoll tal-Artikolu 79(b) tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (ĠU 2006, L 347, p. 1, iktar ’il quddiem id-“Direttiva dwar il-VAT”).

2

Din it-talba tressqet fil-kuntest ta’ kawża bejn Marcandi Ltd, li taġixxi bl-isem kummerċjali “Madbid”, u l-Commissioners for Her Majesty’s Revenue and Customs (l-Amministrazzjoni Fiskali u Doganali, ir-Renju Unit) (iktar ’il quddiem l-“amministrazzjoni fiskali” dwar is-sistema ta’ taxxa fuq il-valur miżjud (VAT) applikabbli għall-bejgħ ta’ “krediti” li jippermettu li wieħed jipparteċipa f’irkantijiet online.

3

Skont l-Artikolu 2(1) tad-Direttiva dwar il-VAT:

“It-transazzjonijiet li ġejjin għandhom ikunu soġġetti għall-VAT:

[…]

[…]”

4

L-Artikolu 14(1) ta’ din id-direttiva jiddefinixxi l-provvista ta’ oġġetti bħala “it-trasferiment tad-dritt ta’ sid li jiddisponi minn proprjetà tanġibbli”.

5

Skont l-Artikolu 24(1) tal-imsemmija direttiva:

“‘Provvista ta’ servizzi’ għandha tfisser kwalunkwe operazzjoni li ma tikkostitwix provvista ta’ merkanzija.”

6

L-Artikolu 62 tal-istess direttiva jiddisponi:

“Għall-finijiet ta’ din id-Direttiva:

7

L-Artikolu 63 tad-Direttiva dwar il-VAT jipprevedi li:

“Għandu jkun hemm avveniment li jagħti lok għal ħlas u l-VAT għandha tiġi imposta meta l-merkanzija jew is–servizzi huma pprovduti.”

8

L-Artikolu 65 ta’ din id-direttiva huwa fformulat kif ġej:

“Meta ħlas jrid isir akkont qabel ma l–merkanzija jew is-servizzi jiġu pprovduti, il-VAT għandha tiġi imposta meta jiġi riċevut il–ħlas u fuq l–ammont riċevut.”

9

L-Artikolu 73 tal-imsemmija direttiva jipprevedi:

“Fir-rigward tal-provvista ta’ merkanzija jew servizzi, minbarra kif imsemmi fl-Artikoli 74 sa 77, l-ammont taxxabbli għandu jinkludi dak kollu li jikkostitwixxi ħlas miksub jew li għandu jinkiseb mill-fornitur, għall-provvista, mill-konsumatur jew parti terza, inklużi s-sussidji marbuta direttament mal-prezz tal-provvista.”

10

L-Artikolu 79 tal-istess direttiva jipprovdi:

“L-ammont taxxabbli m’għandux jinkludi l-fatturi li ġejjin:

[…]

[…]”

11

Marcandi hija kumpannija stabbilita fir-Renju Unit li teżerċita attivitajiet ta’ bejgħ online taħt l-isem kummerċjali Madbid (iktar ’il quddiem “Madbid”). Il-maġġoranza tal-oġġetti mibjugħa minn Madbid huma prodotti msejħa “high tech”, bħal telefowns ċellulari, tablets, kompjuters u televisions. Xi drabi Madbid tbigħ oġġetti ta’ valur ogħla, bħal karozzi.

12

Is-sit internet ta’ Madbid jagħmilha possibbli għall-utenti tiegħu li jixtru oġġetti mibjugħa minn Madbid jew għal prezz fiss, mill-ħanut online, jew inkella permezz ta’ rkantijiet online.

13

Matul il-perijodu kkonċernat mill-kawża prinċipali, Madbid kienet irreġistrata bħala persuna taxxabbli suġġetta għall-VAT fir-Renju Unit kif ukoll f’diversi Stati Membri oħra, b’mod partikolari l-Ġermanja.

14

Skont il-klawżola 1.2 tal-kundizzjonijiet ġenerali tagħha, Madbid “topera sit ta’ bejgħ bl-irkant bi ħlas għall-parteċipazzjoni fl-irkant”. L-utenti li jixtiequ jipparteċipaw fl-irkantijiet organizzati minn Madbid huma meħtieġa jakkwistaw mingħandha, bi ħlas, “krediti”, li huma meħtieġa sabiex wieħed jagħmel offerta u dawn ma jistgħux jintużaw għal skopijiet oħra. B’mod partikolari, dawn il-“krediti” ma jistgħux jintużaw sabiex wieħed jixtri l-oġġetti mibjugħa fil-ħanut online. Lanqas ma jistgħu jinbidlu fi flus.

15

Kull waħda mill-paġni tas-sit internet ta’ Madbid fiha buttuna li tippermetti lill-utent jaċċedi għal paġna fejn jinbiegħu l-“krediti”. Meta jkunu nxtraw, dawn jidhru bħala kreditu fil-kont tal-utent. Kull “kreditu” huwa identifikat b’kodiċi uniku u jingħata valur monetarju li jikkorrispondi għall-ammont imħallas mill-utent. Kultant jiġu allokati “krediti bla ħlas” lill-utenti. Dawn huma ta’ valur ta’ 0.00 lira sterlina (GBP), u jippermettu biss lill-utenti jipparteċipaw fl-irkantijiet organizzati minn Madbid. Dawn il-“krediti bla ħlas” jiskadu wara perijodu ta’ 30 jum, filwaqt li l-“krediti” mħallsa huma validi għal 180 jum.

16

Għal kull irkant, ikun hemm prezz inizjali ta’ 0.00 GBP, u l-għadd bil-kontra (countdown) jiġi ssettjat fuq il-ħin massimu permess sabiex isiru l-offerti, li ġeneralment ikun ta’ minuta. Għal kull offerta ġdida, l-għadd bil-kontra jerġa’ jibda għaddej bl-istess tul ta’ żmien bħal dak stabbilit fil-bidu. Għal kull bejgħ, numru definit ta’ “krediti”, ta’ bejn 1 u 8, ikun meħtieġ sabiex isiru l-offerti u l-utent, billi jikklikkja l-buttuna “offerta”, juża dan in-numru ta’ “krediti”. L-offerta hekk imwettqa mill-utent tkun ta’ GBP 0.01 ogħla mill-offerta preċedenti u ssir l-ogħla offerta għall-bejgħ ikkonċernat. Il-prezz tal-bejgħ muri tal-oġġett ukoll jiżdied b’GBP 0.01.

17

L-utent li jirbaħ irkant għandu d-dritt li jixtri l-oġġett għall-prezz li bih intrebaħ, flimkien mal-ispiża postali u amministrattiva. Il-valur tal-“krediti” użati sabiex isiru l-offerti matul it-tali rkant jiġi eżawrit u ma huwiex, għaldaqstant, imnaqqas mill-prezz tal-oġġett mirbuħ. Sakemm l-oġġett ma jkunx għadu ntbagħatlu, l-utent għandu d-dritt li jikkanċella l-ordni tiegħu. Jekk ikun il-każ, huwa għandu jiġi rimborsat il-prezz li bih huwa jkun rebaħ l-irkant.

18

Barra minn hekk, funzjoni “Ixtri Issa” tippermetti lill-utent jixtri oġġett identiku għal dak li huwa s-suġġett tal-bejgħ bl-irkant li jkun qed jipparteċipa fih, għal prezz li, matul dan l-irkant, jonqos bl-ekwivalenti tal-“krediti” li huwa jkun uża sabiex jagħmel l-offerti fil-kuntest ta’ dan l-irkant. L-utent li jixtri oġġett permezz tal-funzjoni “Ixtri Issa” matul irkant ma jistgħux jibqgħu jagħmlu offerti f’dan l-irkant.

19

Fl-aħħar nett, il-funzjoni “Skont Miksub” tippermetti lill-utent li ma rebaħx l-irkant u li lanqas ma uża l-funzjoni “Ixtri Issa” jikseb skont li jista’ juża iktar tard, waqt ix-xiri ta’ oġġett disponibbli fil-ħanut online ta’ Madbid. Tali “Skont Miksub”, li l-ammont tiegħu jikkorrispondi għall-ekwivalenti tal-“krediti” li jkunu ppermettew lill-utent jagħmel offerti fil-kuntest tal-imsemmi rkant, jiskadi fi tmiem terminu ta’ 365 jum.

20

Jekk l-utent li għamel xirja permezz tal-funzjonijiet “Skont Miksub” jew “Ixtri Issa” iħassar l-ordni tiegħu, huwa jibbenefika minn rimbors tal-ammont li jkun ħallas għall-oġġetti inkwistjoni, bl-esklużjoni tal-ekwivalenti tal-“krediti” li ġew ikkunsidrati biex inħadem il-prezz finali li għalih inbiegħulu l-oġġetti.

21

F’deċiżjoni tad-9 ta’ Diċembru 2013, l-amministrazzjoni fiskali qieset li l-ammont imħallas mill-klijenti ta’ Madbid bi skambju għal “krediti” kien jirrappreżenta l-korrispettiv ta’ provvista ta’ servizzi mwettqa fir-Renju Unit, jiġifieri l-għoti tad-dritt ta’ parteċipazzjoni fl-irkantijiet online organizzati minn Madbid.

22

Madbid ippreżentat rikors kontra din id-deċiżjoni quddiem il-First-tier Tribunal (Tax Chamber) (il-Qorti tal-Ewwel Istanza (Awla Fiskali), ir-Renju Unit) billi sostniet li l-ħruġ ta’ “krediti” għall-benefiċċju tal-klijenti tagħha ma jikkostitwixxix provvista ta’ servizzi, iżda sempliċi “operazzjoni minn qabel”, fis-sens tas-sentenza tas-16 ta’ Diċembru 2010, MacDonald Resorts (C-270/09, EU:C:2010:780, punt 24). Minn dan Madbid tiddeduċi li hija suġġetta għall-VAT mhux minħabba l-ħruġ tal-“krediti” għall-benefiċċju tal-klijenti tagħha, iżda biss minħabba l-provvisti ta’ oġġetti. Il-korrispettiv ta’ dawn il-provvisti tinkludi kemm il-prezz imħallas mill-klijent għall-oġġett li jkun akkwista kif ukoll l-ekwivalenti tal-“krediti” użati waqt ix-xiri ta’ dan l-oġġett. Sussidjarjament, Madbid sostniet quddiem il-qorti tar-rinviju li, jekk din kellha tiddeċiedi li l-ħruġ ta’ “krediti” jikkostitwixxi provvista ta’ servizzi, għandu jiġi kkunsidrat li tali provvista ma hijiex ipprovduta bi ħlas għall-finijiet tal-Artikolu 2(1)(ċ) u tal-Artikolu 73 tad-Direttiva dwar il-VAT.

23

L-amministrazzjoni fiskali sostniet quddiem l-imsemmija qorti li, meta Madbid toħroġ “krediti” lill-utenti tagħha, hija tagħtihom id-dritt, li l-utent jista’ jibbenefika minnu immedjatament, li jipparteċipaw fl-irkantijiet online li torganizza. Din hija provvista ta’ servizzi. Barra minn hekk, il-funzjonijiet “Ixtri Issa” u “Skont Miksub” jikkostitwixxu mekkaniżmi promozzjonali li permezz tagħhom Madbid tagħti roħs, fis-sens tal-Artikolu 79(b) tad-Direttiva dwar il-VAT, fuq il-prezz tal-bejgħ tal-oġġetti tagħha.

24

Barra minn hekk, il-qorti tar-rinviju tindika li, f’deċiżjoni tad-9 ta’ Lulju 2014, il-Finanzamt Hannover-Nord (l-amministrazzjoni fiskali ta’ Hannover-Nord, il-Ġermanja) qieset li l-bejgħ ta’ “krediti” minn Madbid la kien jikkostitwixxi provvista ta’ oġġetti u lanqas provvista ta’ servizzi għall-finijiet tal-VAT. Skont din l-amministrazzjoni, Madbid hija obbligata tħallas il-VAT fil-Ġermanja għall-provvisti ta’ oġġetti li hija twettaq lil utenti stabbiliti f’dan l-Istat Membru. Il-korrispettiv ta’ dawn il-provvisti ta’ oġġetti jinkludi mhux biss il-prezz imħallas mill-klijent għall-oġġett akkwistat, jiġifieri l-prezz li bih il-prodott intrebaħ, il-prezz li jirriżulta mill-użu tal-funzjoni “Ixtri Issa” jew il-prezz wara t-tnaqqis tar-“Skont Miksub”, iżda wkoll il-valur tal-“krediti” użati għall-finijiet tal-akkwist ta’ dan l-oġġett, jiġifieri l-valur tal-“krediti” li ppermetta li jintrebaħ l-irkant jew li jiġi ġġenerat tnaqqis tal-prezz permezz tal-funzjoni “Ixtri Issa” jew “Skont Miksub”. Fir-rigward tal-utenti li jkunu xtraw “krediti” u li jkunu pparteċipaw f’irkant mingħajr ma rebħuh, l-amministrazzjoni fiskali ta’ Hannover-Nord tqis li provvista ta’ servizzi tkun twettqet għall-benefiċċju tagħhom biss jekk dawn ma jkunu wettqu l-ebda xiri bl-użu tal-ekwivalenti tal-“krediti” li jkunu ppermettewlhom li jagħmlu l-offerti tagħhom. Il-korrispettiv ta’ din il-provvista ta’ servizzi, suġġett għall-VAT fir-Renju Unit, jikkorrispondi għall-valur tal-imsemmija “krediti”.

25

F’dawn iċ-ċirkustanzi, il-First-tier Tribunal (Tax Chamber) (il-Qorti tal-Ewwel Istanza (Awla Fiskali)), iddeċidiet li tissospendi l-proċeduri quddiemha u li tagħmel id-domandi preliminari li ġejjin lill-Qorti tal-Ġustizzja:

u liema rilevanza għandu fuq din il-kwistjoni l-prinċipju ta’ newtralità fiskali?”

26

Permezz tal-ewwel domanda tagħha, il-qorti tar-rinviju essenzjalment tistaqsi jekk il-ħruġ ta’ “krediti”, bħal dawk inkwistjoni fil-kawża prinċipali, bħala korrispettiv għal ħlas jikkostitwixxix “provvista ta’ servizzi bi ħlas” fis-sens tal-Artikolu 2(1)(ċ) tad-Direttiva dwar il-VAT, jew jekk dan għandux jiġi kkunsidrat bħala “operazzjoni minn qabel” għall-provvista ta’ oġġetti, fis-sens tal-punt 24 tas-sentenza tas-16 ta’ Diċembru 2010, MacDonald Resorts (C-270/09, EU:C:2010:780).

27

Għandu jitfakkar li f’dik il-kawża l-Qorti tal-Ġustizzja ddeċidiet li l-akkwist ta’ drittijiet kuntrattwali, imsejħa “drittijiet għal punti”, li jippermettu li wieħed jirċievi punti li jistgħu jiġu kkonvertiti, b’mod partikolari, fid-dritt li wieħed jokkupa temporanjament akkomodazzjoni fil-kumplessi turistiċi tal-fornitur tas-servizzi ma kinitx operazzjoni suġġetta għall-VAT, iżda operazzjoni mwettqa minn qabel sabiex wieħed ikun jista’ jitlob dritt ta’ użu temporanju ta’ residenza, akkomodazzjoni f’lukanda jew servizz ieħor. Il-Qorti tal-Ġustizzja fil-fatt ikkunsidrat li x-xiri ta’ “drittijiet għal punti” ma kienx għan fih innifsu għall-klijent sal-punt fejn dan tal-aħħar ikkonkluda l-kuntratt inizjali mhux bl-intenzjoni li jiġbor il-punti, iżda biex juża temporanjament residenza jew jikseb servizzi oħra magħżula sussegwentement (sentenza tas-16 ta’ Diċembru 2010, MacDonald Resorts, C-270/09, EU:C:2010:780, punti 24 u 32).

28

Minn dan hija kkonkludiet li l-provvista proprja li għaliha “drittijiet għal punti” kienu akkwistati kien is-servizz li jikkonsisti fit-tqegħid għad-dispożizzjoni tal-parteċipanti ta’ din l-iskema d-diversi korrispettivi possibbli li setgħu jinkisbu permezz tal-punti li jirriżultaw minn dawn id-drittijiet (sentenza tas-16 ta’ Diċembru 2010, MacDonald Resorts, C-270/09, EU:C:2010:780, punt 27).

29

Fil-kawża prinċipali, huwa paċifiku li l-“krediti” jippermettu biss li wieħed jagħmel offerta f’irkantijiet organizzati minn Madbid. Għalhekk, l-utent li jixtri “krediti” jagħmel dan neċessarjament bl-intenzjoni li jkun jista’ jipparteċipa fl-imsemmija rkantijiet.

30

Issa, għall-utenti, dan is-servizz huwa ta’ interess awtonomu fil-konfront tax-xiri ta’ oġġetti fil-ħanut online ta’ Madbid (ara, f’dan is-sens, is-sentenza tat-2 ta’ Diċembru 2010, Everything Everywhere, C-276/09, EU:C:2010:730, punt 27). Fil-fatt, kif irrileva l-Avukat Ġenerali fil-punt 39 tal-konklużjonijiet tiegħu, il-parteċipazzjoni f’irkantijiet organizzati minn Madbid tagħti lill-utenti opportunità sabiex jixtru oġġetti bi prezz inferjuri mill-valur tas-suq tagħhom.

31

Peress li, madankollu, il-“krediti” maħruġa minn Madbid ma jistgħux iservu ta’ ħlas għall-finijiet tax-xiri ta’ oġġetti mibjugħa fil-ħanut online tagħha; peress li, kif jirriżulta mill-punt 30 ta’ din is-sentenza, sa mill-akkwist tagħhom, dawn il-“krediti” huma identifikati bħala li jirrappreżentaw il-korrispettiv tal-opportunità mogħtija lill-utenti li jakkwistaw bi prezzijiet inferjuri mill-valur tas-suq tagħhom u peress li l-“krediti” użati sabiex wieħed jipparteċipa f’irkant ma humiex imnaqqsa mill-prezz tax-xiri stabbilit permezz ta’ rkant, il-ħruġ tagħhom ma jistax jiġi kkwalifikat bħala “operazzjoni minn qabel” għall-provvista ta’ oġġett, fis-sens tal-punt 24 tas-sentenza tas-16 ta’ Diċembru 2010, MacDonalds Resorts (C-270/09, EU:C:2010:780).

32

Għalhekk, id-dritt irrikonoxxut lill-utenti li jkunu kisbu dawn il-“krediti” sabiex jipparteċipaw fl-irkantijiet organizzati minn Madbid jikkostitwixxi fih innifsu provvista ta’ servizzi sħiħa li ma tistax titħawwad mal-provvista ta’ oġġetti li tista’ tintervjeni fit-tmiem tal-imsemmi bejgħ.

33

Din il-konklużjoni tapplika iktar u iktar meta l-utent ta’ “krediti” jakkwista oġġett billi jattiva l-għażliet “Ixtri Issa” jew “Skont Miksub”, peress li jekk huwa jkun għamel użu mis-servizz li l-“krediti” miksuba jippermettulu jwettaq, ix-xiri mwettaq permezz tal-attivazzjoni ta’ dawn l-għażliet ikun jirrappreżenta operazzjoni indipendenti minn dan is-servizz ipprovdut inkambju għax-xiri tal-“krediti”.

34

Madbid madankollu tissottometti li jekk il-ħruġ ta’ “krediti” kellu jitqies bħala provvista ta’ servizzi, dik il-provvista ma ssirx bi ħlas.

35

F’dan ir-rigward, għandu jitfakkar li, skont l-Artikolu 2(1) tad-Direttiva dwar il-VAT, huma suġġetti għall-VAT il-provvisti ta’ servizzi magħmula “bi ħlas” fit-territorju ta’ Stat Membru minn persuna taxxabbli li taġixxi bħala tali.

36

Skont ġurisprudenza stabbilita, provvista ta’ servizzi titwettaq “bi ħlas”, fis-sens ta’ din id-dispożizzjoni, biss jekk bejn min iwettaq din il-provvista u l-benefiċjarju jkun hemm relazzjoni ġuridika li matulha jkun hemm skambju ta’ servizzi reċiproċi, fejn il-kumpens riċevut minn min jagħmel din il-provvista jkun jikkostitwixxi l-korrispettiv effettiv tas-servizz ipprovdut lill-benefiċjarju (sentenzi tas-16 ta’ Diċembru 2010, MacDonald Resorts, C-270/09, EU:C:2010:780, punt 16 u l-ġurisprudenza ċċitata, kif ukoll tal-20 ta’ Ġunju 2013, Newey, C-653/11, EU:C:2013:409, punt 40).

37

Il-Qorti tal-Ġustizzja ddeċidiet li dan ikun il-każ jekk tkun teżisti rabta diretta bejn is-servizz mogħti u l-valur ekwivalenti riċevut, billi s-somom imħallsa jikkostitwixxu korrispettiv effettiv għal servizz identifikabbli pprovdut fil-kuntest ta’ tali relazzjoni legali (sentenzi tat-3 ta’ Marzu 1994, Tolsma, C-16/93, EU:C:1994:80, punti 13 u 14; tas-16 ta’ Diċembru 2010, Macdonald Resorts, C-270/09, EU:C:2010:780, punti 16 u 26, kif ukoll tal-10 ta’ Novembru 2016, Baštová, C-432/15, EU:C:2016:855, punt 28).

38

Fil-kawża prinċipali, mill-klawżola 1.2 tal-kundizzjonijiet ġenerali ta’ Madbid jirriżulta li din tal-aħħar “topera sit ta’ irkantijiet bi ħlas għall-parteċipazzjoni fl-irkantijiet”.

39

L-utenti li jixtiequ jipparteċipaw fl-irkantijiet organizzati minn Madbid fil-fatt huma obbligati jakkwistaw “krediti” mingħandha bi ħlas. Dawn il-“krediti” huma meħtieġa biex isiru l-offerti f’irkant u ma jistgħux jintużaw għal skopijiet oħra. In-numru ta’ “krediti” meħtieġa biex isiru l-offerti f’irkant tvarja skont l-irkant. Meta utent jagħmel offerta, il-“krediti” tiegħu jiġu ddebitati b’dak in-numru, u l-prezz tal-oġġett irkantat jiżdied b’GBP 0.01. L-utent li jirbaħ irkant għandu d-dritt li jixtri l-oġġett għall-prezz li bih intrebaħ, flimkien mal-ispiża postali u amministrattiva. Il-valur tal-“krediti” minfuqa biex wieħed jagħmel l-offerti matul dan il-bejgħ jiġi madankollu eżawrit. Fl-aħħar nett, meta l-utent li jkun rebaħ dan l-irkant jixtri l-oġġett irkantat u sussegwentement jikkanċella x-xiri tiegħu, ikun biss l-ammont tal-prezz li bih il-prodott ġie mogħti lilu li jkollu jiġi rrimborsat lilu, eskluż il-valur tal-“krediti” li huwa jkun uża biex jagħmel l-offerti tiegħu.

40

Dawn l-elementi jindikaw li l-ħlas inkambju miġbur minn Madbid għall-“krediti” li hija toħroġ jikkostitwixxi l-korrispettiv effettiv tas-servizz li tipprovdi lill-utenti tagħha, li jikkonsisti fl-għoti tad-dritt li jipparteċipaw fl-irkantijiet li torganizza.

41

Din il-konklużjoni ma hijiex ikkonfutata miċ-ċirkustanza li, permezz tal-funzjoni “Skont Miksub”, l-utenti li ma jirbħux l-irkant jaraw il-valur ekwivalenti tal-“krediti” tagħhom ikkonvertit fi skont li jista’ jintuża iktar tard, waqt l-akkwist ta’ oġġett disponibbli fil-ħanut online ta’ Madbid.

42

Bl-istess mod, huwa irrilevanti f’dan ir-rigward il-fatt li l-utent li jkun għafas fuq il-buttuna “Ixtri Issa” għandu l-opportunità li jixtri oġġett identiku għal dak li huwa s-suġġett tal-irkant bi prezz imnaqqas sal-ammont ekwivalenti tal-“krediti” li huwa jkun uża biex jagħmel l-offerti tiegħu fil-kuntest ta’ dan l-irkant.

43

Fil-fatt, minn naħa, huwa biss il-valur tal-“krediti” li qabel kienu ntużaw sabiex isiru l-offerti li jista’ jiġi mnaqqas mill-prezz tal-oġġetti mixtrija permezz tal-funzjonijiet “Ixtri Issa” u “Skont Miksub”.

44

Min-naħa l-oħra, l-utent li jiddeċiedi li jikkanċella xiri mwettaq permezz tal-funzjonijiet “Ixtri Issa” jew “Skont Miksub” għandu jiġi rrimborsat biss il-prezz tieħu wara t-tnaqqis, miżjud bl-ispejjeż tal-kunsinna, u eskluż l-ekwivalenti tal-“krediti” li ġew ikkunsidrati fil-kalkolu tal-prezz li ħallas għall-oġġetti.

45

Għalhekk, l-argumentazzjoni ta’ Madbid, li tgħid li l-ħruġ ta’ “krediti” jirrappreżenta d-dritt għall-utent li jixtri oġġetti għall-ammont ekwivalenti ta’ dawn il-“krediti”, ma tikkorrispondix għar-realtà ekonomika u kummerċjali, li tikkostitwixxi kriterju fundamentali għall-applikazzjoni tas-sistema komuni tal-VAT (sentenza tal-20 ta’ Ġunju 2013, Newey, C-653/11, EU:C:2013:409, punt 42 u l-ġurisprudenza ċċitata).

46

Mill-kunsiderazzjonijiet preċedenti jirriżulta li l-ħlas li tirċievi Madbid inkambju għall-“krediti” li hija toħroġ jirrappreżenta l-korrispettiv effettiv tas-servizz li l-għoti tad-dritt li wieħed jipparteċipa l-irkantijiet organizzati minnha jikkostitwixxi, li huwa distint mill-provvista ta’ oġġett akkwistat fuq is-sit tagħha.

47

F’dan ir-rigward, għandu jiġi ppreċiżat li, fil-kawża prinċipali, l-utenti jistgħu jixtru l-oġġetti mibjugħa fil-ħanut online ta’ Madbid billi jħallsu x-xiri tagħhom permezz tal-kard ta’ kreditu jew ta’ debitu, jiġifieri mingħajr ma wieħed jipparteċipa fl-irkantijiet li hija torganizza. Barra minn hekk, kwalunkwe parteċipazzjoni f’irkant organizzat minn Madbid ma jwassalx neċessarjament għal provvista ta’ oġġetti, jew minħabba li l-utent li jkun rebaħ dan l-irkant jagħżel li ma jixtrix l-oġġett li jkun rebaħ fl-irkant, jew minħabba li, peress li ma jkunx rebaħ dan u lanqas ma jkun għamel użu mill-funzjoni “Ixtri Issa”, huwa jikseb skont li ma jużax immedjatament.

48

Minn dan isegwi li, kif irrileva l-Avukat Ġenerali fil-punt 58 tal-konklużjonijiet tiegħu, il-ħruġ ta’ “krediti” u l-provvista ta’ oġġetti, sa fejn dawn ma jikkostitwixxux provvista ekonomika waħda indiviżibbli, ma jistgħux jiġu kkwalifikati bħala provvista waħda. Għall-istess raġunijiet, u b’kunsiderazzjoni tar-regola li tgħid li kull tranżazzjoni għandha tiġi kkunsidrata bħala separata u indipendenti mill-oħra, il-ħruġ ta’ “krediti” u l-provvista ta’ oġġetti lanqas ma jistgħu jiġu kklassifikati bħala aċċessorji ta’ xulxin.

49

Fid-dawl tal-kunsiderazzjonijiet kollha preċedenti, hemm lok li r-risposta għall-ewwel domanda tkun li l-Artikolu 2(1)(ċ) tad-Direttiva dwar il-VAT għandu jiġi interpretat fis-sens li l-ħruġ ta’ “krediti”, bħal dawk inkwistjoni fil-kawża prinċipali, li jippermettu lill-klijenti ta’ operatur li jagħmlu offerti fl-irkantijiet organizzati minn dan tal-aħħar, jikkostitwixxi provvista ta’ servizzi bi ħlas li l-korrispettiv tagħha huwa l-ammont imħallas inkambju għall-imsemmija “krediti”.

50

Permezz tat-tieni domanda tagħha, il-qorti tar-rinviju essenzjalment tistaqsi jekk l-Artikolu 73 tad-Direttiva dwar il-VAT għandux jiġi interpretat fis-sens li l-valur tal-“krediti” użati biex isiru l-offerti huwiex inkluż fil-korrispettiv riċevut mill-persuna taxxabbli inkambju għall-provvisti ta’ oġġetti mwettqa minnha għall-benefiċċju tal-utenti rebbieħa ta’ rkant li organizzat jew għall-benefiċċju ta’ dawk li xtraw oġġett permezz tal-funzjonijiet “Ixtri Issa” jew “Skont Miksub”.

51

Skont l-Artikolu 73 tad-Direttiva dwar il-VAT, l-ammont taxxabbli fir-rigward tal-provvista ta’ oġġetti jew il-provvista ta’ servizzi, li jsiru b’titolu oneruż, huwa kkostitwit minn “dak kollu li jikkostitwixxi ħlas miksub jew li għandu jinkiseb mill-fornitur, għall-provvista, mill-konsumatur jew parti terza”.

52

F’dan ir-rigward, jeħtieġ li qabelxejn jitfakkar li, kif jirriżulta mir-risposta għall-ewwel domanda, il-ħlas magħmul minn utent inkambju għall-“krediti” maħruġa minn Madbid jirrappreżenta l-korrispettiv tal-għoti tad-dritt ta’ parteċipazzjoni fl-irkantijiet li torganizza.

53

Issa, kif jenfasizza l-Avukat Ġenerali fil-punt 79 tal-konklużjonijiet tiegħu, l-ammont imħallas bħala korrispettiv ta’ operazzjoni ma jistax jikkostitwixxi l-korrispettiv ta’ operazzjoni oħra, u lanqas ħlas akkont fuq il-ħlas tal-korrispettiv ta’ operazzjoni oħra.

54

Għalhekk għandu jiġi indikat, bħala risposta għal domanda tal-qorti tar-rinviju, li l-ħlas imwettaq minn utent inkambju għal “krediti” ma jistax jiġi kkwalifikat bħala ħlas akkont imħallas qabel il-provvista ta’ oġġetti, fis-sens tal-Artikolu 65 tad-Direttiva dwar il-VAT.

55

Barra minn hekk, il-korrispettiv għall-provvista ta’ oġġett mogħti waqt irkant ma jistax jinkludi s-somma mħallsa inkambju għall-ħruġ ta’ “krediti” użati fil-kuntest ta’ dan il-bejgħ, iżda jinkludi biss il-prezz li bih il-prodott ġie mogħti kif ukoll l-ispiża postali u amministrattiva.

56

Fl-aħħar nett, l-imsemmija somma lanqas ma tista’ tiġi inkluża fil-korrispettiv tal-provvista sussegwenti ta’ oġġetti mixtrija permezz tal-funzjonijiet “Ixtri Issa” jew “Skont Miksub”.

57

Kif irrileva l-Avukat Ġenerali fil-punt 92 tal-konklużjonijiet tiegħu, il-valur tal-“krediti” użati sabiex isiru l-offerti, li jitnaqqas mill-prezz inizjali li jirriżulta mill-użu tal-funzjoni “Ixtri Issa” jew mill-prezz muri fil-ħanut online, għandu jitqies bħala tnaqqis fil-prezz tal-oġġetti mixtrijin bl-użu tal-funzjonijiet “Ixtri Issa” jew “Skont Miksub”. Għalhekk, skont l-Artikolu 79(b) tad-Direttiva dwar il-VAT, il-valur ta’ dawn il-“krediti” ma jistax jagħmel parti mill-ammont taxxabbli għall-provvista tal-oġġetti.

58

Dan huwa l-każ anki meta, fil-kuntest tax-xiri ta’ oġġetti permezz tal-funzjonijiet “Ixtri Issa” jew “Skont Miksub”, il-valur tal-“krediti” minfuqa sabiex isiru offerti jkopri t-totalità tal-prezz inizjali li jirriżulta mill-użu tal-funzjoni “Ixtri Issa” jew tal-prezz indikat fil-ħanut online.

59

Fil-fatt, kif osserva l-Avukat Ġenerali fil-punt 102 tal-konklużjonijiet tiegħu, l-oġġetti akkwistati f’tali każ, kuntrarjament għall-kawża inkwistjoni fis-sentenza tas-27 ta’ April 1999, Kuwait Petroleum (C-48/97, EU:C:1999:203), ma jistgħux jiġu kkunsidrati bħala li kienu s-suġġett ta’ trasferiment mingħajr ħlas, peress li huma pprovduti inkambju għal korrispettiv identifikabbli, jiġifieri, rispettivament, il-prezz inizjali li jirriżulta mill-użu tal-funzjoni “Ixtri Issa” jew il-prezz indikat fil-ħanut online.

60

Fid-dawl tal-kunsiderazzjonijiet preċedenti, hemm lok li r-risposta għat-tieni domanda tkun li l-Artikolu 73 tad-Direttiva dwar il-VAT għandu jiġi interpretat fis-sens li, f’ċirkustanzi bħal dawk fil-kawża prinċipali, il-valur tal-“krediti” użati biex wieħed jagħmel offerti ma huwiex inkluż fil-korrispettiv riċevut mill-persuna taxxabbli inkambju għall-provvisti ta’ oġġetti mwettqa minnha għall-benefiċċju tal-utenti li jkunu rebħu rkant li organizzat jew għall-benefiċċju ta’ dawk li jkunu wettqu x-xiri tagħhom permezz tal-funzjonijiet “Ixtri Issa” jew “Skont Miksub”.

61

Permezz tat-tielet domanda tagħha, il-qorti tar-rinviju essenzjalment tistaqsi jekk, meta żewġ Stati Membri jittrattaw b’mod differenti l-istess operazzjoni għall-finijiet tal-VAT, il-qrati ta’ kull wieħed minn dawn l-Istati Membri, meta jinterpretaw id-dispożizzjonijiet rilevanti tad-dritt tal-Unjoni u tad-dritt nazzjonali, humiex obbligati jieħdu inkunsiderazzjoni l-ħtieġa li tiġi evitata tassazzjoni doppja jew nontassazzjoni doppja tal-operazzjoni fir-rigward, b’mod partikolari, tal-prinċipju ta’ newtralità fiskali.

62

F’dan ir-rigward, għandu jitfakkar li l-Artikolu 267 TFUE jistabbilixxi mekkaniżmu ta’ rinviju għal deċiżjoni preliminari intiż preċiżament sabiex jipprevjeni d-diverġenzi fl-interpretazzjoni tad-dritt tal-Unjoni li l-qrati nazzjonali għandhom japplikaw (ara, f’dan is-sens, is-sentenza tal-21 ta’ Lulju 2011, Kelly, C-104/10, EU:C:2011:506, punt 60 u l-ġurisprudenza ċċitata).

63

Fil-fatt, l-Artikolu 267 TFUE jagħti lill-qrati nazzjonali l-fakultà u, skont il-każ, jimponi fuqhom l-obbligu ta’ rinviju għal deċiżjoni preliminari, skont jekk id-deċiżjonijiet tagħhom jistgħux, jew le, ikunu s-suġġett ta’ rimedju ġudizzjarju skont id-dritt nazzjonali, peress li jikkunsidraw li kawża pendenti quddiemhom tqajjem kwistjonijiet ta’ interpretazzjoni tad-dispożizzjonijiet tad-dritt tal-Unjoni li jeħtieġu deċiżjoni min-naħa tagħhom (ara, f’dan is-sens, is-sentenza tal-21 ta’ Lulju 2011, Kelly, C-104/10, EU:C:2011:506, punt 61 u l-ġurisprudenza ċċitata).

64

Għaldaqstant, meta jikkonstataw li l-istess operazzjoni hija suġġetta għal trattament fiskali differenti fi Stat Membru ieħor, il-qrati ta’ Stat Membru li quddiemhom titressaq tilwima li tqajjem kwistjonijiet ta’ interpretazzjoni tad-dispożizzjonijiet tad-dritt tal-Unjoni li jeħtieġu deċiżjoni min-naħa tagħhom għandhom il-possibbiltà, u saħansitra l-obbligu, li jadixxu lill-Qorti tal-Ġustizzja b’talba għal deċiżjoni preliminari.

65

Barra minn hekk, għandu jiġi ppreċiżat li l-eżistenza, fi Stat Membru wieħed jew f’diversi Stati Membri oħra, ta’ approċċi differenti minn dik li tipprevali fl-Istat Membru kkonċernat ma tistax, fi kwalunkwe każ, twassal il-qrati ta’ dan l-Istat tal-aħħar sabiex jinterpretaw b’mod żbaljat id-dispożizzjonijiet tad-Direttiva dwar il-VAT.

66

Fid-dawl tal-kunsiderazzjonijiet preċedenti, ir-risposta għat-tielet domanda għandha tkun li, meta jinterpretaw id-dispożizzjonijiet rilevanti tad-dritt tal-Unjoni u tad-dritt nazzjonali, il-qrati ta’ Stat Membru li jikkonstataw li l-istess operazzjoni hija suġġetta, fi Stat Membru ieħor, għal trattament differenti għall-finijiet tal-VAT għandhom il-fakultà, u saħansitra l-obbligu, skont jekk id-deċiżjonijiet tagħhom jistgħux, jew le, ikunu suġġetti għal rimedju ġudizzjarju taħt il-liġi nazzjonali, jadixxu lill-Qorti tal-Ġustizzja b’talba għal deċiżjoni preliminari.

67

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (Il-Ħames Awla) taqta’ u tiddeċiedi:

Firem