Available languages

Taxonomy tags

Info

References in this case

Share

Highlight in text

Go

Edizzjoni Provviżorja

SENTENZA TAL-QORTI TAL-ĠUSTIZZJA (L-Ewwel Awla)

14 ta’ Marzu 2019 (*)

“Rinviju għal deċiżjoni preliminari – Tassazzjoni – Sistema komuni tat-taxxa fuq il-valur miżjud – Direttiva 2006/112/KE – Artikolu 132(1)(i) u (j) – Eżenzjoni, favur ċerti attivitajiet ta’ interess ġenerali – Edukazzjoni skolastika jew universitarja – Kunċett – Kors tas-sewqan tal-karozzi mogħti minn skola tas-sewqan”

Fil-Kawża C-449/17,

li għandha bħala suġġett talba għal deċiżjoni preliminari skont l-Artikolu 267 TFUE, imressqa mill-Bundesfinanzhof (il-Qorti Federali tal-Finanzi, il-Ġermanja), permezz ta’ deċiżjoni tas-16 ta’ Marzu 2017, li waslet fil-Qorti tal-Ġustizzja fis-26 ta’ Lulju 2017, fil-proċedura

A & G Fahrschul-Akademie GmbH

vs

Finanzamt Wolfenbüttel,

IL-QORTI TAL-ĠUSTIZZJA (L-Ewwel Awla),

komposta minn R. Silva de Lapuerta, Viċi Presidente tal-Qorti tal-Ġustizzja, li qed taġixxi bħala President tal-Ewwel Awla, A. Arabadjiev, E. Regan (Relatur), C. G. Fernlund u S. Rodin, Imħallfin,

Avukat Ġenerali: M. Szpunar,

Reġistratur: M. Aleksejev, Kap ta’ Unità,

wara li rat il-proċedura bil-miktub u wara s-seduta tal-20 ta’ Ġunju 2018,

wara li kkunsidrat l-osservazzjonijiet ippreżentati:

–        għal A & G Fahrschul-Akademie GmbH, minn D. Hippke, Steuerberater, u A. Hüttl, Rechtsanwälte,

–        għall-Gvern Ġermaniż, minn T. Henze u R. Kaniltz bħala aġent,

–        għall-Gvern Spanjol, minn S. Jiménez García, bħala aġent,

–        għall-Gvern Taljan, minn G. Palmieri, bħala aġent, assistita minn F. Urbani Neri, avvocato dello Stato,

–        għall-Gvern Awstrijak, minn G. Eberhard, bħala aġent,

–        għall-Gvern Portugiż, minn L. Inez Fernandes, M. Figueiredo u R. Campos Laires, bħala aġenti,

–        għall-Gvern Finlandiż, minn S. Hartikainen, bħala aġent,

–        għall-Kummissjoni Ewropea, minn R. Lyal u B.-R. Killmann, bħala aġenti,

wara li semgħet il-konklużjonijiet tal-Avukat Ġenerali, ippreżentati fis-seduta tat-3 ta’ Ottubru 2018,

tagħti l-preżenti

Sentenza

1        It-talba għal deċiżjoni preliminari tirrigwarda l-interpretazzjoni tal-Artikolu 132(1)(i) u (j) tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud (ĠU 2006, L 347, p. 1).

2        Din it-talba ġiet ippreżentata fil-kuntest ta’ kawża bejn A & G Fahrschul-Akademie GmbH (iktar ’il quddiem “A & G”) u l-Finanzamt Wolfenbüttel (l-Uffiċċju tat-Taxxa ta’ Wolfenbüttel, il-Ġermanja, iktar ’il quddiem l-“Uffiċċju tat-Taxxa”) fir-rigward tar-rifjut ta’ dan tal-aħħar li jeżenta mit-taxxa fuq il-valur miżjud (VAT) għal servizzi ta’ tagħlim tas-sewqan pprovduti minn A & G, sabiex tinkiseb liċenzja tas-sewqan għall-vetturi tal-kategoriji B u C1, imsemmija fl-Artikolu 4(4) tad-Direttiva 2006/126/KE tal-Parlament Ewropew u tal-Kunsill, tal-20 ta’ Diċembru 2006, dwar il-Liċenzji tas-Sewqan (ĠU 2006, L 403, p. 18).

 Il-kuntest ġuridiku

 Id-dritt tal-Unjoni

 Id-Direttiva 2006/112

3        It-Titolu IX tad-Direttiva 2006/112 huwa intitolat “Eżenzjonijiet”. Dan it-titolu jinkludi, b’mod partikolari, il-Kapitolu 2 intitolat “Eżenzjonijet għal ċertu attivitajiet fl-interess pubbliku”, li fih jinsab l-Artikolu 132 li jipprovdi, fil-paragrafu 1 tiegħu, li l-Istati Membri għandhom jeżentaw mit-taxxa t-tranżazzjonijiet segwenti:

“[...]

i)      il-provvista ta’ edukazzjoni tat-tfal jew taż-żgħażagħ, edukazzjoni skolastika jew universitarja, taħriġ vokazzjonali jew taħriġ mill-ġdid, inkluża l-provvista ta’ servizzi u ta’ merkanzija li hija relatata mill-qrib magħhom, minn korpi [organi] regolati mid-dritt pubbliku li jkollhom dan bħala l-għan tagħhom jew minn organizzazzjonijiet [organi] oħrajn rikonoxxuti mill-Istat Membru konċernat bħala li għandhom [għanijiet] simili;

j)      tagħlim mogħti privatament minn għalliema u li jkopri edukazzjoni skolastika jew;

[...]”

 Id-Direttiva 2006/126

4        Il-premessa 8 tad-Direttiva 2006/126 tipprovdi:

“Għall-finijiet tas-sigurtà fit-toroq, għandhom jiġu stabbiliti r-rekwiżiti minimi għall-ħruġ ta’ liċenzja tas-sewqan. Hemm il-ħtieġa li jiġu armonizzati l-istandards għat-testijiet tas-sewqan u għall-ħruġ tal-liċenzji. Għal dan il-għan, għandhom jiġu definiti l-kompetenza, il-ħiliet u l-komportament konnessi mas-sewqan tal-vetturi, it-test tas-sewqan għandu jkun ibbażat fuq dawn il-kunċetti u għandhom jiġu definiti mill-ġdid l-istandards minimi tal-kapaċità fiżika u mentali sabiex jinsaqu tali vetturi.”

5        L-Artikolu 4 ta’ din id-direttiva jipprevedi:

“1.      Il-liċenzja tas-sewqan prevista fl-Artikolu 1 għandha tawtorizza s-sewqan ta’ vetturi b’mutur fil-kategoriji definiti aktar ’l isfel. Hija tista’ tinħareġ mill-età minima indikata għal kull kategorija. ‘Vettura b’mutur’ tfisser kwalunkwe vettura, barra vettura li timxi fuq linji ta’ ferrovija, bi propulsjoni awtonoma li timxi fuq it-triq permezz tal-qawwa tagħha stess.

[...]

4.      Vetturi bil-mutur:

[...]

b)      Kategorija B:

vetturi bil-mutur b’massa massima awtorizzata li ma taqbiżx 3 500 kg u proġettati u mibnija għat-trasport ta’ mhux aktar minn tmien passiġġieri minbarra s-sewwieq; il-vetturi bil-mutur f'din il-kategorija jistgħu jiġu kombinati ma’ karru ta’ massa massima awtorizzata li ma taqbiżx 750 kg.

[...]

d)      Kategorija C1:

vetturi bil-mutur diversi minn dawk tal-Kategoriji D 1 jew D, li l-massa massima awtorizzata tagħhom taqbeż 3 500 kg, iżda ma taqbizx 7 500 kg u li jkunu proġettati u mibnija għat-trasport ta’ mhux aktar minn tmien passiġġieri minbarra s-sewwieq; il-vetturi bil-mutur f’din il-kategorija jistgħu jiġu kombinati ma’ karru ta’ massa massima awtorizzata li ma taqbiżx 750 kg;

[...]”

 Id-dritt Ġermaniż

6        Skont il-punt 21 tal-Artikolu 4 tal-Umsatzsteuergesetz (il-Liġi dwar it-Taxxa fuq id-Dħul mill-Bejgħ, iktar ’il quddiem l-“UStG”), fil-verżjoni tagħha ppubblikata fil-21 ta’ Frar 2005 (BGBl. 2005 I, p. 386), fost it-tranżazzjonijiet li jaqgħu taħt il-punt 1 tal-Artikolu 1(1) ta’ din il-liġi, huma eżentati:

“a)      is-servizzi li jsegwu direttament għan skolastiku jew edukattiv li huma pprovduti minn skejjel privati jew stabbilimenti oħra ta’ taħriġ ġenerali jew vokazzjonali,

aa)      jekk jiġu approvati mill-Istat abbażi tal-Artikolu 7(4) tal-Grundgesetz (il-Liġi Fundamentali) jew awtorizzati abbażi tal-leġiżlazzjoni tal-Land, jew

bb)      jekk l-awtorità kompetenti tal-Land tiċċertifika li jkunu qed iwasslu b’mod regolari għal professjoni jew għal eżami quddiem persuna ġuridika rregolata mid-dritt pubbliku,

b)      is-servizzi ta’ tagħlim li jsegwu direttament għan skolastiku jew edukattiv li huma pprovduti minn għalliema indipendenti

aa)      fl-istabbilimenti ta’ tagħlim superjuri fis-sens tal-Artikoli 1 u 70 tal-Hochschulrahmengesetz (il-Liġi Qafas dwar l-Istabbilimenti ta’ Tagħlim Superjuri) u fl-iskejjel pubbliċi ta’ taħriġ ġenerali jew vokazzjonali, jew

bb)      fl-iskejjel privati u stabbilimenti oħra ta’ taħriġ ġenerali jew vokazzjonali, sa fejn jissodisfaw il-kundizzjonijiet indikati fis-subparagrafu (a);

[...]”

7        L-Artikolu 6 tal-Verordnung über die Zulassung von Personen zum Straßenverkehr (ir-Regolament dwar l-Awtorizzazzjoni ta’ Persuni għas-Sewqan fit-toroq), fil-verżjoni tagħha tat-13 ta’ Diċembru 2010 (BGBl. 2010 I, p. 1980), jipprevedi:

“(1)      Il-liċenzja tas-sewqan hija maħruġa għall-kategoriji li ġejjin:

[...]

Kategorija B: [l-Artikolu 4(4)(b) tad-Direttiva 2006/126]

[...]

Kategorija C1: [l-Artikolu 4(4)(d) tad-Direttiva 2006/126]

[...]”

 Il-kawża prinċipali u d-domandi preliminari

8        A & G topera skejjel tas-sewqan, fil-forma ġuridika ta’ kumpannija b’responsabbiltà limitata. Fil-fatturi li kellha, hija ma speċifikatx b’mod separat l-ammont dovut ta’ VAT. L-ewwel nett, hija ddikjarat li, għas-sena fiskali 2010 (iktar ’il quddiem il-“perijodu rilevanti”), dħul mill-bejgħ taxxabbli. Iċ-Ċentru tat-Taxxi meta straħ fuq id-dikjarazzjoni tal-VAT ta’ A & G.

9        Permezz ta’ ittra tat-22 ta’ Diċembru 2014, A & G talbet li l-ammont dovut minn din il-kumpannija bħala VAT li għandu jitnaqqas għal żero, ħaġa li l-Uffiċċju tat-Taxxa rrifjuta li jagħmel. L-ilment u r-rikors ta’ A&G kontra din id-deċiżjoni taċ-Ċentru tat-Taxxa ġew miċħudin. Il-Finanzgericht (il-Qorti tal-Finanzi, il-Ġermanja) ikkunsidrat, b’mod partikolari, li A&G ma setgħetx tinvoka l-benefiċċju tal-eżenzjoni msemmija fl-Artikolu 132(1)(j) tad-Direttiva 2006/112. Fil-fatt, is-servizzi pprovduti minn A&G, li jipprovdu taħriġ teoriku u tagħlim prattiku tas-sewqan, ma jaqgħux taħt il-kunċett ta’ “edukazzjoni skolastika jew universitarja”, fis-sens ta’ din id-dispożizzjoni, peress li, abbażi ta’ rakkomandazzjoni dwar l-edukazzjoni fit-toroq fl-iskejjel fis-seħħ matul il-perijodu inkwistjoni, it-tagħlim prattiku tas-sewqan ma huwiex komponent la meħtieġ u lanqas imfittex minn dan it-tip ta’ tagħlim.

10      A & G tikkontesta din id-deċiżjoni tal-Finanzgericht (il-Qorti tal-Finanzi) fil-kuntest tar-rikors tagħha fi proċedura ta’ “Reviżjoni” quddiem il-qorti tar-rinviju, il-Bundesfinanzhof (il-Qorti Federali tal-Finanzi, il-Ġermanja). Għal dan il-għan, hija ssostni, b’mod partikolari, li l-għan imfittex mil-leġiżlatur nazzjonali għat-tagħlim tas-sewqan tal-karozzi fl-iskejjel tas-sewqan huwa li tħarreġ l-utenti tat-triq sabiex ikunu responsabbli.

11      Barra minn hekk, it-tagħlim prattiku tas-sewqan mogħti minn skejjel tas-sewqan u t-traineeships tas-sigurtà fit-toroq, organizzati, fost l-oħrajn, mill-Allgemeiner Deutscher Automobil-Club (il-Klabb tal-Karozzi Ġermaniż) kellhom l-istess għanijiet. Għaldaqstant, huwa kuntrarju għall-prinċipju ta’ newtralità li jkun hemm issuġġettar għal trattament fiskali differenti ta’ dawn il-benefiċċji simili.

12      Il-Qorti tar-rinviju tindika li, skont id-dritt nazzjonali, is-servizzi pprovduti minn A & G ma humiex eżenti, peress li din ma tkunx tissodisfa l-kundizzjonijiet stabbiliti fil-punt 21 tal-Artikolu 4(a) jew (b) tal-Liġi dwar it-Taxxa fuq id-Dħul mill-Bejgħ. Madankollu, hija tqis li A&G jista’ jinvoka l-benefiċċju tal-Artikolu 132(1)(i) jew (j) tad-Direttiva 2006/112.

13      F’dan ir-rigward, il-qorti tar-rinviju tidher li tqis li l-attività tar-rikorrenti fil-kawża prinċipali taqa’ taħt il-kunċett ta’ “edukazzjoni skolastika jew universitarja”, fis-sens ta’ l-Artikolu 132(1)(i) u (j) tad-Direttiva 2006/112.

14      Min-naħa l-oħra, hija għandha dubju dwar jekk A & G tissodisfax il-kriterji l-oħra stabbiliti f’dawn id-dispożizzjonijiet, peress li ma huwiex ċert li din tista’ titqies bħala “organizzazzjoni oħra ddefinita mill-Istat ikkonċernat bħala li għandha għanijiet simili” għall-korpi rregolati mid-dritt pubbliku, fis-sens tal-Artikolu 132(1)(i) ta’ din id-direttiva lanqas li l-attivitajiet tiegħu jistgħu jiġu kkunsidrati bħala data, personali, minn għalliema u li jkopri l-edukazzjoni skolastika jew universitarja, fis-sens tal-Artikolu 132(1)(j) tal-imsemmija direttiva.

15      F’dawn iċ-ċirkustanzi, il-Bundesfinanzhof (il-Qorti Federali tal-Finanzi) iddeċidiet li tissospendi l-proċeduri u li tagħmel lill-Qorti tal-Ġustizzja d-domandi:

“1)      Il-kunċett ta’ edukazzjoni skolastika jew universitarja previst fl-Artikolu 132(1)(i) u (j) tad-Direttiva [2006/112] ikopri t-taħriġ mogħti minn skola tas-sewqan sabiex tinkiseb liċenzja tas-sewqan tal-kategorija B u tal-kategorija C1?

2)      Fil-każ li l-ewwel domanda tingħata risposta fl-affermattiv, ir-rikonoxximent tar-rikorrenti [fil-kawża prinċipali] bħala organizzazzjoni li għandha għanijiet simili, fis-sens tal-Artikolu 132(1)(i) tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud, jista’ jirriżulta mid-dispożizzjonijiet legali dwar l-eżami għall-għalliema tas-sewqan u dwar l-għoti ta’ liċenzja bħala għalliema tas-sewqan jew bħala skola tas-sewqan, previsti fil-Gesetz über das Fahrlehrerwesen (il-Liġi dwar il-kwalifika tal-għalliema tas-sewqan) tal-25 ta’ Awwissu 1969 (Bundesgestzblatt I 1969, 1336), kif l-aħħar emendata bil-Liġi tat-28 ta’ Novembru 2016 (Bundesgesetzblatt I 2016, 2722, Fahrlehrergesetz (il-Liġi dwar l-għalliema tas-sewqan)), kif ukoll mill-interess pubbliku li l-istudenti ta’ skola ta’ sewqan jingħataw taħriġ li jiżgura li jsiru utenti tat-triq li ma jkunux ta’ perikolu, li jkunu responsabbli u li jkunu konxji tal-ambjent?

3)      Fil-każ li t-tieni domanda tingħata risposta fin-negattiv, Il-kunċett ta’ ‘għalliem li jagħti tagħlim privatament’, previst fl-Artikolu 132(1)(j) tad-Direttiva [2006/112] jirrikjedi li l-persuna taxxabbli tkun imprenditur individwali?

4)      Fil-każ li t-tieni u t-tielet domandi jingħataw risposta fin-negattiv, Sabiex għalliem jitqies li huwa ‘għalliem li jagħti tagħlim privatament’, fis-sens tal-Artikolu 132(1)(j) tad-Direttiva [2006/112], huwa biżżejjed li dan jaġixxi f’ismu stess u taħt ir-responsabbiltà tiegħu stess, jew il-karatteristika ta’ ‘privatament’ timplika kundizzjonijiet oħra?”

 Fuq id-domandi preliminari

 Fuq l-ewwel domanda

16      Permezz tal-ewwel domanda tagħha, il-qorti tar-rinviju tistaqsi, essenzjalment, il-kunċett ta’ “edukazzjoni skolastika jew universitarja” fis-sens tal-Artikolu 132(1)(i) u (j) tad-Direttiva 2006/112, għandha tiġi interpretata fis-sens li hija ma tkoprix tagħlim tas-sewqan mogħti minn skejjel tas-sewqan, bħal dik inkwistjoni fil-kawża prinċipali, bil-għan li jinkisbu liċenzji tas-sewqan għall-vetturi tal-kategoriji B u C1 imsemmija fl-Artikolu 4(4) tad-Direttiva 2006/126.

17      L-Artikolu 132 tad-Direttiva 2006/112 jipprevedi eżenzjonijiet li, kif jindika t-titolu tal-kapitolu li jaqa’ taħtu dan l-artikolu, għandhom bħala għan li jiffavorixxu ċerti attivitajiet ta’ interess ġenerali. Madankollu, dawn l-eżenzjonijiet ma jikkonċernawx l-attivitajiet ta’ interess ġenerali kollha, iżda biss dawk li huma elenkati u deskritti b’mod iddettaljat (is-sentenza tal-4 ta’ Mejju 2017, Brockenhurst College, C-699/15, EU:C:2017:344, punt 22 u l-ġurisprudenza ċċitata).

18      Skont il-ġurisprudenza tal-Qorti tal-Ġustizzja, l-imsemmija eżenzjonijiet jikkostitwixxu kunċetti awtonomi tad-dritt tal-Unjoni li għandhom bħala għan li jevitaw diverġenzi fl-applikazzjoni tas-sistema tal-VAT minn Stat Membru għal ieħor (ara, f’dan is-sens, is-sentenza tas-26 ta’ Ottubru 2017, The English Bridge Union, C-90/16, EU:C:2017:814, punt 17 u l-ġurisprudenza ċċitata).

19      It-termini użati sabiex jindikaw l-imsemmija eżenzjonijiet għandhom jiġu interpretati b’mod strett, peress li dawn jikkostitwixxu derogi għall-prinċipju ġenerali, li jirriżulta mill-Artikolu 2 tad-Direttiva 2006/112, li jipprevedi li l-VAT tinġabar fuq kull provvista ta’ servizz imwettqa bi ħlas minn persuna taxxabbli. Madankollu, din ir-regola ta’ interpretazzjoni stretta ma tfissirx li t-termini użati għad-definizzjoni tal-eżenzjonijiet imsemmija fl-imsemmi Artikolu 132 għandhom jiġu interpretati b’mod li dawn jiġu mċaħħda mill-effett tagħhom (is-sentenza tal-4 ta’ Mejju 2017, Brockenhurst College, C-699/15, EU:C:2017:344, punt 23 u l-ġurisprudenza ċċitata).

20      Għandu jitfakkar li l-Artikolu 132(1)(i) u (j) tal-imsemmija direttiva ma jinkludi ebda kunċett ta’ “edukazzjoni skolastika jew universitarja”.

21      Madankollu, il-Qorti tal-Ġustizzja kkunsidrat li, minn naħa, it-trasferiment ta’ għarfien u ta’ kompetenzi bejn għalliem u l-istudenti huwa element partikolarment importanti tal-attività edukattiva (is-sentenza tal-14 ta’ Ġunju 2007, Horizon College, C-434/05, EU:C:2007:343, punt 18).

22      Min-naħa l-oħra hija speċifikat li l-kunċett ta’ “edukazzjoni skolastika u universitarja”, fis-sens tad-Direttiva 2006/112, ma huwiex limitat biss għat-tagħlim li jwassal għal eżamijiet sabiex tinkiseb kwalifika jew li jippermetti li jinkiseb taħriġ sabiex titwettaq attività professjonali, iżda jinkludi attivitajiet oħra li t-tagħlim tagħhom jingħata ġewwa skejjel jew universitajiet sabiex jiġu żviluppati l-konoxxenzi u l-kapaċitajiet tal-istudenti, sakemm dawn l-attivitajiet ma jkollhomx natura purament rikreattiva (is-sentenza tat-28 ta’ Jannar 2010, Eulitz, C-473/08, EU:C:2010:47, punt 29 u l-ġurisprudenza ċċitata).

23      F’dan ir-rigward, għandu jiġi osservat, kif osserva l-Avukat Ġenerali fil-punt 35 tal-konklużjonijiet tiegħu, li skont din il-ġurisprudenza stabbilita, attivitajiet li ma humiex purament rikreazzjonali jistgħu jaqgħu taħt il-kunċett ta’ “edukazzjoni skolastika u universitarja”, jekk l-istruzzjoni tkun ipprovduta fl-iskejjel jew universitajiet.

24      B’hekk, il-kunċett ta’ “edukazzjoni skolastika u universitarja” fis-sens tal-Artikolu 132(1)(i) u (j) tad-Direttiva 2006/112, ikopri attivitajiet li huma distinti kemm minħabba n-natura tagħhom stess u kif ukoll minħabba l-kuntest li fih jiġu eżerċitati (ara, f’dan is-sens, is-sentenza tal-14 ta’ Ġunju 2007, Horizon College, C-434/05, EU:C:2007:343, punt 20).

25      Minn dan jirriżulta li, kif irrileva l-Avukat Ġenerali fil-punti 13 sa 17 tal-konklużjonijiet tiegħu, permezz ta’ dan il-kunċett, il-leġiżlatur tal-Unjoni ried ikopri ċertu tip ta’ sistema ta’ edukazzjoni li huwa komuni għall-Istati Membri kollha, indipendentement mill-karatteristiċi speċifiċi ta’ kull sistema nazzjonali.

26      Għaldaqstant, il-kunċett ta’ “edukazzjoni skolastika u universitarja” għall-finijiet tas-sistema tal-VAT, tirreferi, b’mod ġenerali, għal sistema integrata ta’ trasferiment ta’ għarfien u kompetenza dwar firxa wiesgħa u ddiversifikata ta’ materjali, kif ukoll l-approfondiment u l-iżvilupp ta’ dan l-għarfien u dawn il-kompetenzi mill-istudenti u l-istudenti filwaqt li jipprogredixxu u jispeċjalizzaw f’livelli differenti li jikkostitwixxu din is-sistema.

27      Huwa fid-dawl ta’ dawn il-kunsiderazzjonijiet li għandu jiġi eżaminat jekk it-tagħlim tas-sewqan tal-karozzi pprovdut minn skejjel tas-sewqan, bħal dik tar-rikorrenti fil-kawża prinċipali, għall-kisba ta’ liċenzji tas-sewqan għall-vetturi tal-kategoriji B u C1, imsemmija fl-Artikolu 4(4) tad-Direttiva 2006/126, jistax jaqa’ taħt il-kunċett ta’ “edukazzjoni skolastika u universitarja” fis-sens tal-Artikolu 132(1)(i) u (j) tad-Direttiva 2006/112.

28      F’dan il-każ, ir-rikorrenti fil-kawża prinċipali ssostni li tagħlim tas-sewqan li hija tipprovdi tkopri t-trażmissjoni ta’ għarfien kemm prattiku u kemm teoretiku, li huwa neċessarju għall-kisba ta’ liċenzji tas-sewqan għall-vetturi tal-kategoriji B u C1 u li l-għan ta’ tali edukazzjoni mhux purament rikreazzjonali, peress li l-pussess ta’ tali liċenzja jista’ jissodisfa, b’mod partikolari, bżonnijiet professjonali. Għalhekk, it-tagħlim mogħti għal dan il-għan jaqa’ taħt il-kunċett ta’ “edukazzjoni skolastika u universitarja”, msemmija fl-Artikolu 132(1)(i) u (j) tad-Direttiva 2006/112.

29      Issa, għandu jiġi osservat li t-tagħlim ta’ sewqan tal-karozzi fl-iskejjel tas-sewqan, bħal dik inkwistjoni fil-kawża prinċipali, jekk tabilħaqq dan jirrigwarda għarfien prattiku u teoretiku, jibqa’ tagħlim speċjalizzat li mhux ekwivalenti, minnu nnifsu, għat-trasferiment ta’ għarfien u ta’ kompetenzi dwar sett wiesa’ u divers ta’ materjali, kif ukoll għall-approfondiment u għall-iżvilupp tagħhom, li hija karatteristika ta’ edukazzjoni skolastika jew universitarja.

30      Fid-dawl tal-kunsiderazzjonijiet preċedenti, ir-risposta għall-ewwel domanda għandha tkun li l-kunċett ta’ “edukazzjoni skolastika jew universitarja” fis-sens tal-Artikolu 132(1)(i) u (j) tad-Direttiva 2006/112, għandu jiġi interpretat fis-sens li din l-edukazzjoni ma tkoprix tagħlim tas-sewqan mogħti minn skejjel tas-sewqan, bħal dik inkwistjoni fil-kawża prinċipali, bil-għan li jinkisbu liċenzji tas-sewqan għall-vetturi tal-kategoriji B u C1 imsemmija fl-Artikolu 4(4) tad-Direttiva 2006/126.

 Fuq it-tieni sa r-raba’ domandi

31      Fid-dawl tar-risposta mogħtija għall-ewwel domanda, ma hemmx lok li tingħata risposta għat-tieni u għar-raba’ domandi.

 Fuq l-ispejjeż

32      Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija din il-qorti li tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.

Għal dawn il-motivi, Il-Qorti tal-Ġustizzja (L-Ewwel Awla) taqta’ u tiddeċiedi:

Il-kunċett ta’ “edukazzjoni skolastika jew universitarja” fis-sens tal-Artikolu 132(1)(i) u (j) tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud, għandu jiġi interpretat fis-sens li din l-edukazzjoni ma tkoprix tagħlim tas-sewqan mogħti minn skejjel tas-sewqan, bħal dik inkwistjoni fil-kawża prinċipali, bil-għan li jinkisbu liċenzji tas-sewqan għall-vetturi tal-kategoriji B u C1 imsemmija fl-Artikolu 4(4) tad-Direttiva 2006/126/KE tal-Parlament Ewropew u tal-Kunsill ta’ l-20 ta’ Diċembru 2006 dwar il-Liċenzji tas-Sewqan.

Firem

*      Lingwa tal-kawża: il-Ġermaniż.