Available languages

Taxonomy tags

Info

References in this case

References to this case

Share

Highlight in text

Go

KONKLUŻJONIJIET TAL-AVUKAT ĠENERALI

SHARPSTON

ippreżentati fl-20 ta’ Novembru 2008 1(1)

Kawża C-302/07

J D Wetherspoon PLC

vs

The Commissioners for Her Majesty’s Revenue & Customs

(talba għal deċiżjoni preliminari mressqa mill-VAT and Duties Tribunal [Londra])

“Arrotondament ta’ ammonti ta’ VAT”





1.        Hi x’inhi r-rata ta’ VAT imposta fuq tranżazzjonijiet, se jkun hemm każijiet fejn l-ammont dovut se jinkludi frazzjoni tal-iżgħar unità ta’ valuta użata biex isir ħlas. F’każijiet bħal dawn se jqum il-bżonn li jkun hemm arrotondament, u dan jista’ jkun meħtieġ li jiġi rregolat.

2.        Fis-sentenza Koninklijke Ahold (2), bi tweġiba għaż-żewġ domandi mill-Hoge Raad tal-Pajjiżi l-Baxxi (Qorti Suprema), il-Qorti tal-Ġustizzja ddeċidiet essenzjalment li, sakemm jiġu osservati l-prinċipji tan-newtralità u tal-proporzjonalità fiskali, huma l-Istati Membri li għandhom jirregolaw tali arrotondament, u d-dritt Komunitarju ma jobbligahomx li jippermettu persuni taxxabbli li jagħmlu arrotondament għal kull artiklu pprovdut.

3.        Din it-talba għal deċiżjoni preliminari mill-VAT and Duties Tribunal, Londra, tagħmel żewġ domandi simili għal dawk li ġew imwieġba reċentement f’Koninklijke Ahold, flimkien ma’ żewġ domandi oħra ta’ natura iktar dettaljata. F’dawn, din tistaqsi l-ewwel jekk id-dritt Komunitarju jeħtieġx li jsir arrotondament f’xi livell partikolari (bħal pereżempju għal kull artiklu pprovdut, jew għal kull tranżazzjoni, jew f’xi livell ieħor). It-tieni, dan jitlob kjarifika dwar l-effetti tal-prinċipji tat-trattament ugwali u newtralità fiskali, b’referenza għal konċessjoni nazzjonali li tippermetti ċerti negozjanti jarrotondaw ’l isfel l-ammonti tal-VAT.

 Dritt Komunitarju rilevanti

4.        Il-perijodu rilevanti għall-proċeduri prinċipali jestendi mill-2004 sal-2006. Għal din ir-raġuni, id-dritt Komunitarju applikabbli jinsab fl-Ewwel u s-Sitt Direttiva tal-VAT (3). Jien iċċitajt id-dispożizzjonijiet rilevanti f’punti 3 sa 12 tal-konklużjonijiet tiegħi fil-kawża Koninklijke Ahold, li qed nagħmel referenza għaliha. Madankollu huwa utli li nerġa’ nirreferi għalihom.

5.        Skont l-ewwel u t-tieni paragrafi tal-Artikolu 2 tal-Ewwel Direttiva tal-VAT il-prinċipju tas-sistema komuni tat-taxxa fuq il-valur miżjud jinvolvi l-applikazzjoni għal prodotti u servizzi ta’ taxxa ġenerali fuq il-konsum li tkun eżattament proporzjonali għall-prezz tagħhom, hu x’inhu n-numru ta’ tranżazzjonijet li jkunu saru waqt il-proċess ta’ produzzjoni u distribuzzjoni. Il-VAT bir-rata applikabbli tkun imposta fuq kull tranżazzjoni wara t-tnaqqis tal-ammont tal-valur miżjud li qed jinġarr direttament mid-diversi komponenti tal-prezz.

6.        L-Artikolu 2(1) tas-Sitt Direttiva tal-VAT jipprovdi li l-provvista ta’ prodotti u servizzi bi ħlas, minn persuna taxxabbli li taġixxi bħala tali, għandha tkun soġġetta għall-VAT.

7.        Skont l-Artikolu 10(1) u (2), fatt taxxabbli huwa l-fatt li permezz tiegħu l-kundizzjonijiet legali meħtieġa biex tiġi imposta t-taxxa huma sodisfatti, jiġifieri meta l-awtorità tat-taxxa ssir intitolata sabiex tiġbor it-taxxa mill-persuna soġġetta għaliha, minkejja li ż-żmien tal-ħlas jista’ jiġi ddifferit. Dan jiġri bħala prinċipju meta ssir il-konsenja ta’ prodotti jew il-provvista ta’ servizzi.

8.        L-Artikolu 11A jistabbilixxi r-regola ġenerali li l-ammont taxxabbli huwa, essenzjalment, dak kollu li jikkostitwixxi ħlas lill-fornitur, kemm jekk mill-konsumatur jew minn kwalunkwe sors ieħor.

9.        L-Artikolu 12(3)(a) jipprovdi li r-rata standard ta’ VAT għandha tiġi stabbilita minn kull Stat Membru bħala perċentwali tal-ammont taxxabbli, ta’ mhux inqas minn 15 %, u li l-Istati Membri jistgħu japplikaw waħda jew żewġ rati mnaqqsa.

10.      L-Artikolu 17(1) u (2) jagħti lill-persuni taxxabbli d-dritt li jnaqqsu mill-ammont tat-taxxa li huma għandhom iħallsu l-ammont tal-VAT imħallas għall-prodotti użati għall-iskopijiet tat-tranżazzjonijiet taxxabbli tagħhom. Skont l-Artikolu 18(1)(a), fir-rigward tad-dritt li tnaqqas, il-persuna taxxabbli trid iżomm fattura, miktuba b’mod konformi mal-Artikolu 22(3).

11.      L-Artikolu 22(3)(a) jobbliga lill-persuni taxxabbli jiżguraw li fattura tiġi maħruġa fir-rigward ta’ kull provvista taxxabbli li jagħmlu lil persuna taxxabbli oħra jew lil persuna legali li mhijiex taxxabbli (għalhekk, impliċitament, dan ir-rekwiżit ma jeżistix fir-rigward ta’ provvisti magħmula lil konsumaturi finali li huma persuni naturali), u l-Artikolu 22(3)(b) jirrikjedi li dik il-fattura tinkludi, fost informazzjoni oħra, l-ammont taxxabbli, ir-rata ta’ VAT applikabbli, l-ammont ta’ VAT pagabbli u l-isem u l-indirizz sħiħ tal-klijent. Madankollu l-Artikolu 22(9)(d), jippermetti Stati Membri li jipprovdu li ċerti fatturi, partikolarment dawk għal somom iżgħar, m’hemmx għalfejn li jkun fihom l-informazzjoni kollha rikjesta normalment; madankollu dawn għandhom jindikaw, “it-taxxa dovuta jew l-informazzjoni meħtieġa biex tiġi kkalkolata”.

12.      L-Artikolu 22(5) jirrikjedi li kull persuna taxxabbli tħallas l-ammont nett ta’ VAT (fi kliem ieħor, taxxa fuq il-bejgħ wara li titnaqqas it-taxxa fuq ix-xiri) meta tissottometti d-denunzja regolari għal kull perijodu ta’ taxxa.

13.      Wieħed jista’ jsemmi wkoll id-Direttiva 98/6/KE (4), li għandha l-għan li tistipula indikazzjoni tal-prezz tal-bejgħ u l-prezz għal kull unità ta’ kejl ta’ prodotti offruti min-negozjanti lill-konsumaturi sabiex titjieb l-informazzjoni lill-konsumatur u tiffaċilita l-paragun tal-prezzijiet (l-Artikolu 1). L-Artikolu 2(a) jiddefinixxi “l-prezz tal-bejgħ” bħala l-prezz finali għal unità tal-prodott, jew kwantità mogħtija tal-prodott, li jinkludi l-VAT u t-taxxi l-oħra kollha, u (e) “konsumatur” għandha tfisser kull persuna naturali li tixtri prodott għall-għanijiet li mhumiex fl-isfera tal-attività kummerċjali jew professjonali tagħha. L-Artikolu 3(1) jirrikjedi li l-prezz tal-bejgħ jiġi indikat għall-prodotti kollha offruti minn kummerċjanti lill-konsumaturi.

 Dispożizzjonijiet rilevanti tar-Renju Unit

14.      Skont ir-Regolamenti tal-1995 dwar it-Taxxa fuq il-Valur Miżjud (iktar ’il quddiem, ir-“Regolamenti tal-VAT”), huwa biss jekk il-klijent huwa persuna taxxabbli oħra (5) li l-kummerċjanti kollha rreġistrati għall-VAT iridu jipprovdu fattura tal-VAT għal provvisti taxxabbli. Il-kummerċjanti kollha rreġistrati għall-VAT madankollu jistgħu joħorġu fattura tal-VAT lill-klijenti kollha jekk ikunu jixtiequ hekk. Fattura sħiħa tal-VAT għandha tinkludi numru ta’ dettalji, inklużi l-isem u l-indirizz tal-klijent (6). Tista’ tinħareġ “fattura tal-VAT inqas dettaljata” għal ammonti li jinkludu l-VAT sa GBP 100; mhux meħtieġ li dawn il-fatturi jindikaw id-dettalji tal-klijent imma jridu juru, għal kull rata applikabbli, “l-ammont gross pagabbli inkluża l-VAT, u r-rata tal-VAT applikabbli” (7).

15.      Il-Commissioners for Her Majesty’s Revenue & Customs (iktar ’il quddiem, “l-HMRC”) ippubblikaw Gwida tal-VAT (Avviż 700) għal persuni taxxabbli. Il-paragrafi 17.5 u 17.6 għandhom x’jaqsmu mal-arrotondament, u jaqraw kif ġej:

“17.5 Kalkolu ta’ VAT fuq fatturi – arrotondament ta’ ammonti

Nota: Il-konċessjoni f’dan il-paragrafu li tnaqqas ammonti sal-eqreb numru sħiħ hija maħsuba għal kummerċjanti bil-fattura u tapplika biss fejn il-VAT imposta fuq klijenti u l-VAT imħallsa lid-Dwana u Sisa hija l-istess. Bħala regola ġenerali, il-konċessjoni li jsir arrotondament mhijiex adattata għal bejjiegħa bl-imnut, li għandhom jagħmlu referenza għall-paragrafu 17.6.

Inti tista’ tarrotonda ’l isfel il-VAT pagabbli fuq il-prodotti u s-servizzi kollha murija fuq fattura tal-VAT sal-eqreb penny. Inti tista’ tinjora kwalunkwe frazzjoni ta’ penny.

17.5.1 Kalkolu bbażat fuq linji ta’ prodotti jew servizzi

Jekk tixtieq taħdem il-VAT separatament għal linja ta’ prodotti jew servizzi li huma nklużi ma’ prodotti jew servizzi oħrajn fl-istess fattura, inti għandek tikkalkola l-ammonti separati ta’ VAT billi:

–        tarrotonda sal-eqreb 0.1p – pereżempju, 86.76p jiġi arrotondat ’l isfel għal 86.7p; jew

–        tarrotonda sal-eqreb 1p jew 0.5p – pereżempju, 86.76p jiġi arrotondat għal 87p.

Tiddeċidi x’tiddeċidi, trid tkun konsistenti.

L-ammont totali finali ta’ VAT pagabbli jista’ jiġi arrotondat sal-eqreb penny sħiħ.

17.6 Kalkolu ta’ VAT minn bejjiegħa bl-imnut

Il-parti l-kbira tal-bejjiegħa bl-imnut jikkontjaw għall-VAT billi jużaw skemi ta’ bejgħ bl-imnut. Jekk dak huwa l-mod kif tikkontja għal VAT, dal-paragrafu ma jaffettwakx.

Il-bejjiegħa bl-imnut iktar ma jmur qegħdin jużaw teknoloġija sofistikata biex tiġi identifikata il-VAT dovuta fuq kull transazzjoni u joħorġu fattura. Jekk inti ma tużax skema ta’ bejgħ bl-imnut imma minflok tikkalkola l-VAT fil-livell ta’ linja [(8)] jew fattura inti m’għandekx tarrotonda ċ-ċifra tal-VAT ’l isfel. Madankollu, inti tista’ tarrotonda kull kalkolazzjoni ta’ VAT”.

16.      Dak l-avviż ma jagħtix tifsira ta’ “kummerċjanti tal-fattura”. Madankollu, l-Artikolu 12 tal-Manwali HMRC V1-24A, “Dokumentazzjoni ta’ kummerċjant” (li jinkludi gwida għall-impjegati tal-HMRC imma li hija liberament aċċessibbli għall-pubbliku), tagħti indikazzjonijiet ta’ x’inhu mifhum bid-distinzjoni bejn kummerċjanti tal-fattura u bejjiegħa bl-imnut.

17.      L-Artikolu 12.1 ta’ dan il-manwal jistipula li, meta jiġi interpretat il-paragrafu 17.5 tal-Avviż 700, “hu importanti li wieħed jinnota li hu fil-kuntest tar-regoli għal kummerċjanti tal-fattura li l-arrotondament huwa fiskalment newtru. Dan minħabba li normalment se jeffettwa kemm t-taxxa fuq il-bejgħ tal-fornitur u t-taxxa fuq ix-xiri tal-klijent. Dan ifisser li meta kummerċjant tal-fattura jikkalkola l-VAT fuq valuri netti, l-ammont impost u pagabbli mill-klijent jista’ jiġi arrotondat”.

18.      L-Artikolu 12.2 tal-manwal jistipula, inter alia:

“Pakketti sofistikati ta’ ikkontjar jippermettu l-possibbiltà li tiġi identifikata l-VAT fil-livell tal-linja u/jew li jiġu pprovduti fatturi […].

Bħala regola ġenerali l-konċessjoni li jsir arrotondament mhijiex adattata għal bejjiegħa bl-imnut. Dan għaliex l-effett ta’ arrotondament ’l isfel tal-VAT imposta fuq il-konsumatur finali huwa li ma titnaqqasx il-VAT pagabbli (li hija l-frazzjoni tal-VAT immoltiplikat bil-prezz) imma biss li titnaqqas it-taxxa ikkontjata għal HMRC.

Il-parti l-kbira tal-bejjiegħa bl-imnut jikkontjaw għall-VAT billi jużaw skemi ta’ bejgħ bl-imnut. Il-problema ta’ arrotondament tinħoloq biss għal bejjiegħa bl-imnut li s-sistemi ta’ ikkontjar tagħhom jippermettulhom jiddentifikaw it-taxxa fil-livell tal-linja u li jinħarġu fatturi […].

[…]

Jekk bejjiegħ bl-imnut ġenwinament jistabbilixxi prezzijiet bil-VAT-eskluża – biex b’hekk il-VAT imposta fuq il-konsumatur u l-VAT kkontjata għal HMRC huma l-istess – il-konċessjoni eżistenti tal-arrotondament tista’ tkun addatata. Meta tiġi kkunsidrata sistema bħal din, inti għandek teżamina kif il-prezzijiet attwalment jiġu stabbiliti. Jekk il-bejjiegħ bl-imnut ġenwinament jasal għal prezz tal-bejgħ li jinkludi t-taxxa billi jibda b’valur nett li jiġi espress f’pennies sħaħ, imbagħad il-konċessjoni eżistenti tista’ tkun adattata […].”

19.      Skont id-digriet ta’ rinviju, il-parti l-kbira tal-bejjiegħa bl-imnut fir-Renju Unit għandhom ftehim individwali mal-HMRC dwar kif jikkalkolaw il-VAT tagħhom (“skema ta’ bejgħ bl-imnut” kif imsemmija fil-Gwida u Manwali tal-VAT V1-24A). Fi ftehim bħal dan, l-HMRC tkun ippreparata tħalli l-arrotondament aritmetiku sal-eqreb penny sħiħ sal-livell tal-linja jew tal-basket tax-xiri. Madankollu l-Artikolu 12.3 tal-Manwali V1-24A jistipula li, “jekk kummerċjant jipproponi metodu alternattiv ta’ arrotondament sal-eqreb penny sħiħ dan għandu jiġi kkunsidrat u awtorizzat jekk jipproduċi riżultat aċċettabbli u raġonevoli.”

 Fatti, proċedura u d-domandi preliminari

20.      J D Wetherspoon PLC (iktar ’il quddiem, “J D Wetherspoon”) topera ’l fuq minn 670 pub ġewwa r-Renju Unit. Il-parti l-kbira tal-bejgħ tagħha huwa bejgħ bl-imnut ta’ ikel u xorb lil konsumaturi finali.

21.      Hi turi il-prezz tal-bejgħ bl-imnut tal-prodotti tagħha lill-klijenti tagħha bil-VAT inkluża. Hi ma toħroġx fatturi tal-VAT sħaħ lil klijenti, imma tipprovdi rċevuti li jikkwalifikaw bħala fatturi tal-VAT inqas iddettaljati għal ikel u xarbiet sħan, u għal xarbiet oħra meta rikjesti mill-klijent.

22.      Sal-2004, J D Wetherspoon kienet tikkontja għall-VAT billi tidentifika r-responsabbiltà għal ħlas tal-VAT ta’ kull bejgħ u kienet tikkalkola l-VAT pagabbli fil-livell ta’ basket tax-xiri. Din ikkalkolat il-VAT pagabbli fuq kull tranżazzjoni bir-rata standard ta’ 7/47 (9) tal-ammont totali dovut u arrotondati aritmetikament sal-eqreb penny. Dawk l-ammonti ta’ VAT fl-aħħar tal-ġurnata ġew magħdudin flimkien għal kull pub u dawn saru l-VAT pagabbli lil HMRC fid-dikjarazzjoni perjodika tal-VAT.

23.      Minn dakinhar, J D Wetherspoon ikkalkolat u arrotondat ’l isfel il-VAT sal-eqreb wieħed minn għaxra ta’ penny fil-livell tal-linja separatament għal kull prodott identifikat. Hi imbagħad tiġbor dawk l-ammonti ta’ VAT u tarrotonda ’l isfel it-total sal-inqas penny fil-livell ta’ basket tax-xiri.

24.      L-HMRC irrifjutat li tippermetti lil J D Wetherspoon li tarrotonda ’l isfel il-VAT pagabbli fuq kull tranżazzjoni. J D Wetherspoon appellat kontra dan ir-rifjut u kontra żewġ avviżi ta’ stima maħruġa konformi miegħu.

25.      Il-VAT and Duties Tribunal, li qed tisma’ l-appell, tosserva li la l-Komunità u lanqas il-leġiżlazzjoni nazzjonali ma jispeċifikaw il-metodu ta’ arrotondament fejn l-applikazzjoni tar-rata normali tipproduċi ammont ta’ VAT li jinkludi frazzjoni tal-iktar unità żgħira tal-valuta. L-għażliet huma li jsir arrotondament ’l isfel, jew li jsir arrotondament b’mod aritmetiku. Il-leġiżlazzjoni lanqas ma tispeċifika f’liema punt l-arrotondament għandu jsir. Fejn l-istess klijent jixtri fl-istess ħin numru ta’ artikli ta’ prodotti, huwa possibbli li wieħed jagħmel arrotondament:

(a)      fil-“livell ta’ artiklu”, għal kull artiklu ta’ kull prodott f’kull tranżazzjoni;

(b)      fil-“livell ta’ linja”, għal kull prodott, meta iktar minn artiklu wieħed ta’ dak il-prodott jinxtara fl-istess tranżazzjoni;

(ċ)      fil-“livell ta’ provvista”, għal kull provvista, fejn tranżazzjoni waħda tinkludi numru ta’ provvisti separati għal skopijiet ta’ VAT;

(d)      fil-“livell ta’ basket tax-xiri”, fit-tranżazzjoni totali ma’ kull klijent;

(e)      fil-livell ta’ “perijodu ta’ ikkontjar ta’ VAT”, billi żżid flimkien l-ammonti kollha ta’ VAT irċevuti għal prodotti bir-rata standard mibjugħin matul il-perijodu u imbagħad jiġi arrotondat it-total; jew

(f)      f’xi livell ieħor, bħal pereżempju d-dħul gross ta’ kuljum ta’ kull ħanut jew għal ħwienet kollha tal-kummerċjant.

26.      Għalhekk il-qorti tar-rinviju qed titlob li tingħata deċiżjoni preliminari dwar id-domandi li ġejjin:

“(1)      L-arrotondament ta’ ammonti ta’ VAT huwa rregolat biss mil-liġi nazzjonali, jew mid-dritt Komunitarju? B’mod partikolari, l-ewwel u t-tieni paragrafi tal-Artikolu 2 tal-Ewwel Direttiva u l-Artikoli 11A(l)(a) u/jew 12(3)(a) u/jew l-Artikolu 22(3)(b), (fil-verżjoni tal-1 ta’ Jannar 2004) tas-Sitt Direttiva jikkonfermaw li l-arrotondament huwa rregolat mid-dritt Komunitarju?

(2)      B’mod partikolari:

(i)      Id-dritt Komunitarju jipprekludi l-applikazzjoni ta’ liġi nazzjonali jew prattika tal-awtorità fiskali nazzjonali li tirrikjedi l-arrotondament ta’ ammont partikolari ta’ VAT kull meta l-frazzjoni tal-iżgħar unità tal-valuta inkwistjoni tkun ta’ jew iktar minn 0.50 (pereżempju, 0.5 pence għandu jiġi arrotondat ’il fuq għall-eqreb penny sħiħ)?

(ii)      Id-dritt Komunitarju jirrikjedi li l-persuna taxxabbli tiġi awtorizzata tarrotonda ’l isfel kull ammont ta’ VAT li jkun jinkludi frazzjoni tal-iżgħar unità tal-valuta li tkun teżisti?

(3)      F’bejgħ li jkun jinkludi l-VAT, f’liema livell id-dritt Komunitarju jirrikjedi li jsir arrotondament għall-iskop li tiġi kkalkolata l-VAT dovuta: fil-livell ta’ kull artiklu individwali, kull linja ta’ prodotti, kull provvista (jekk iktar minn provvista waħda hija inkluża fl-istess basket tax-xiri), kull tranżazzjoni/total tal-basket tax-xiri, għal kull perijodu ta’ ikkontjar tal-VAT jew xi livell ieħor?

(4)      Ir-risposta għal dawn id-domandi hija effettwata mill-prinċipji tad-dritt Komunitarju ta’ trattament ugwali u newtralità fiskali, b’mod partikolari b’referenza għall-eżistenza fir-Renju Unit, ta’ konċessjoni min-naħa tal-awtoritajiet fiskali rilevanti li tippermetti lil ċerti negozjanti biss li jarrotondaw l-ammonti ta’ VAT li għandu jsir ikkontjar għalihom?”

27.      Ġew ippreżentati osservazzjonijiet bil-miktub minn J D Wetherspoon, mill-Gvernijiet tal-Greċja, tal-Pajjiżi l-Baxxi u tar-Renju Unit u mill-Kummissjoni. J D Wetherspoon, ir-Renju Unit u l-Kummissjoni għamlu trattazzjoni waqt is-seduta.

 Evalwazzjoni

 L-ewwel domanda

28.      L-ewwel domanda – dwar jekk l-arrotondament ta’ ammonti ta’ VAT huwiex irregolat bil-liġi nazzjonali jew bid-dritt Komunitarju – ġiet, essenzjalment imwieġba mill-Qorti tal-Ġustizzja fis-sentenza Koninklijke Ahold.

29.      Fil-punti 24 sa 33 ta’ dik is-sentenza, il-Qorti tal-Ġustizzja ddeċidiet li d-Direttivi tal-VAT ma fihom ebda regola espliċita li għandha x’taqsam ma’ arrotondament ta’ ammonti ta’ VAT; li b’mod partikolari l-Artikoli 11A(1)(a) u 22(3)(b) tas-Sitt Direttiva, ma jistipulaw ebda regola espressa jew metodu speċifiku ta’ arrotondament; u li għal din ir-raġuni, fin-nuqqas ta’ xi leġiżlazzjoni tal-Komunità, huma s-sistemi legali tal-Istati Membri li għandhom jiddeterminaw dawn ir-regoli jew metodi. Madankollu, din speċifikat ukoll li meta l-Istati Membri jistabbilixxu jew jaċċettaw metodu partikolari ta’ arrotondament, huma obbligati li josservaw il-prinċipji li jirregolaw is-sistema komuni ta’ VAT, bħal dawk tan-newtralità u proporzjonalità fiskali (10).

30.      Fil-każ preżenti, minbarra l-Artikoli 11A(1)(a) u 22(3)(b) tas-Sitt Direttiva, il-qorti tar-rinviju ssemmi l-ewwel żewġ paragrafi tal-Artikolu 2 tal-Ewwel Direttiva, li jistabbilixxi l-prinċipji tas-sistema tal-VAT, b’mod partikolari dak tat-taxxa eżattament proporzjonali għall-prezz, u l-Artikolu 12(3)(a) tas-Sitt Direttiva, li jeħtieġ li r-rati tal-VAT jiġu ffissati bħala perċentwali tal-ammont taxxabbli. Huwa ċar li l-ebda waħda minn dawk id-dispożizzjonijiet ma tistipula xi regola jew metodu speċifiku dwar arrotondament ta’ ammonti ta’ VAT, imma t-tnejn li huma jesprimu l-prinċipju ta’ proporzjonalità li l-Istati Membri jridu josservaw, kif ġie deċiż mill-Qorti tal-Ġustizzja fis-sentenza Koninklijke Ahold.

 It-tieni domanda

31.      Il-VAT and Duties Tribunal essenzjalment tistaqsi, meta l-ammonti ta’ VAT jinkludu frazzjoni tal-iżgħar unità ta’ valuta disponibbli, jekk id-dritt Komunitarju (i) jipprekludix kwalunkwe regola jew prattika li teħtieġ persuni taxxabbli li japplikaw arrotondament aritmetiku ’l isfel jew ’il fuq, jew (ii) jeħtieġx li huma jitħallew jarrotondaw sistematikament.

32.      Fil-punti 34 sa 43 tas-sentenza tagħha Koninklijke Ahold, il-Qorti tal-Ġustizzja waslet għall-fehma li d-dritt Komunitarju, b’mod partikolari d-dispożizzjonijiet tal-Ewwel u s-Sitt Direttivi u l-prinċipji tan-newtralità fiskali u ta’ proporzjonalità, ma fihom l-ebda obbligu speċifiku fuq l-Istati Membri li jawtorizzaw lill-persuni taxxabbli li jarrotondaw l-ammont tal-VAT ’l isfel għal kull artiklu.

33.      Il-Qorti tal-Ġustizzja nnotat, b’mod partikolari, li n-newtralità fiskali ma tinvolvi l-ebda ħtieġa fir-rigward tal-applikazzjoni ta’ metodu partikolari ta’ arrotondament kemm-il darba l-ammont miġbur mill-awtorità fiskali bħala VAT jikkorrispondi b’mod preċiż għall-ammont iddikjarat bħala VAT fuq l-irċevuta u mħallas mill-konsumatur finali lill-persuna taxxabbli (11), u li, filwaqt li l-prinċipju ta’ proporzjonalità jeħtieġ li kull ammont arrotondat jikkorrispondi l-eqreb possibbli għall-ammont iddeterminat bir-rata applikabbli, dan għandu jiġi rrikonċiljat mal-ħtieġa prattika għat-tħaddim effettiv ta’ sistema bbażata fuq id-dikjarazzjoni tat-taxxa ta’ persuni taxxabbli (12). Kien ċar li iktar minn metodu wieħed – u b’mod partikolari l-arrotondament aritmetiku – seta’ jissodisfa dawk il-ħtiġijiet (13).

34.      Id-deċiżjoni li l-Istati Membri mhumiex meħtieġa jippermettu persuni taxxabbli li jarrotondaw ’l isfel l-ammonti ta’ VAT għal kull artiklu twieġeb fil-biċċa l-kbira l-parti (ii) tat-tieni domanda tal-qorti nazzjonali fil-kawża preżenti, u tweġiba għal parti (i) ta’ dik id-domanda tista’ tiġi mnissla mill-osservazzjoni fis-sens li l-metodu aritmetiku huwa konsistenti mal-ħtiġiet tad-dritt Komunitarju. Huwa veru li t-tieni domanda f’Koninklijke Ahold kienet tikkonċerna biss arrotondament fil-livell ta’ artiklu, filwaqt li fil-kawża preżenti dan mhuwiex limitat għal dak il-livell. Madankollu, ir-raġunament tal-Qorti tal-Ġustizzja bl-ebda mod mhuwa speċifiku għal-livell li fih l-arrotondament jiġi applikat.

 It-tielet domanda

35.      Il-livell ta’ arrotondament meħtieġ – jekk ikun il-każ – huwa s-suġġett tat-tielet domanda preliminari f’din il-kawża.

36.      Issir il-mistoqsija b’referenza speċifika għal prezzijiet bil-VAT inkluża. Dawn il-prezzijiet jiġu ffissati mill-kummerċjant fi prezz tal-bejgħ (li, sabiex ikun pagabbli, ma jistax jinkludi frazzjoni tal-iżgħar unità ta’ valuta disponibbli) li proporzjon minnu (fir-Renju Unit, 40/47) huwa l-prezz bil-VAT eskluża u proporzjon minnu (fir-Renju Unit 7/47) huwa l-ammont ta’ VAT. F’ħafna każijiet (fir-Renju Unit, kull fejn il-prezz mhuwiex multiplu ta’ GBP 0.47), dawk il-proporzjonijiet ikunu jinvolvu frazzjoni tal-iżgħar unità ta’ valuta disponibbli. Fil-każ ta’ kummerċjanti li jitolbu dawk il-prezzijiet, id-dritt Komunitarju jeħtieġ li jsir arrotondament f’xi livell partikolari?

37.      Kif irrilevajt fil-konklużjonijiet tiegħi f’Koninklijke Ahold (14), l-arrotondament dejjem se jipproduċi żnaturament żgħir u, iktar ma jkun baxx il-livell li fih iseħħ (meta tqis l-arrotondament għal kull artiklu huwa l-iktar livell baxx u l-arrotondament għal kull dikjarazzjoni tal-VAT li hu l-ogħla), hija akbar il-possibbiltà li żnaturament miġbur flimkien se jkun sinjifikativ. Jien irrilevajt ukoll (15) li arrotondament dejjem ’il fuq jew ’l isfel se jipproduċi żnaturament ikbar, filwaqt li arrotondament aritmetiku se jtendi li jnaqqsu (b’ammonti arrotondati ‘l fuq li jikkanċellaw oħrajn li jiġu arrotondati ’l isfel), u li raffinar ieħor jista’ jtaffi anki iktar dan iż-żnaturament.

38.      It-tip ta’ żnaturament involut huwa diskrepanza bejn il-proporzjoni preċiża tal-prezz bl-imnut li tikkostitwixxi l-VAT u l-ammont ta’ VAT li l-kummerċjant jiddikjara u jikkonsenja lill-awtorità fiskali. Diskrepanzi bħal dawn imorru kontra, bħala definizzjoni, il-ħtieġa ta’ proporzjonalità. Dawn jinvolvu jew, fil-każ ta’ arrotondament ’il fuq, ħlas mill-kummerċjant lill-awtorità fiskali ta’ frazzjoni tal-profitt tiegħu minbarra l-ammont strettament dovut jew, fil-każ ta’ arrotondament ’l isfel, iż-żamma mill-kummerċjant ta’ frazzjoni tal-VAT strettament dovuta – b’hekk ukoll imur kontra l-prinċipju li l-VAT għandha tkun newtra fir-rigward ta’ persuni taxxabbli.

39.      Huwa ċar li ebda dispożizzjoni tas-Sitt Direttiva jew ta’ xi direttiva oħra tal-VAT ma tistipula xi obbligu speċifiku dwar il-livell li fih għandu jsir l-arrotondament. Madankollu, l-prinċipji tan-newtralità fiskali u ta’ proporzjonalità (bil-mod kif għandhom jinftehmu dawk il-prinċipji fil-kuntest ta’ VAT) jeħtieġu li l-iżnaturament jinżamm għal minimu. Dan jista’ jseħħ billi minn banda, jiġi użat metodu għall-arrotondament li ma jinvolvix sistematikament żnaturament f’direzzjoni waħda imma li jippermetti żnaturament li jikkanċella wieħed lill-ieħor. Mill-banda l-oħra, fil-kuntest speċifiku tat-tielet domanda tal-qorti tar-rinviju, dan jista’ jinkiseb billi jiġi applikat l-arrotondament fil-livell li jinvolvi l-inqas periklu ta’ żnaturament kumulattiv peress li jkun jinvolvi l-iżgħar numru ta’ operazzjonijiet ta’ arrotondament.

40.      L-ogħla livell possibbli huwa dak tad-dikjarazzjoni tal-VAT perjodiku (16). Safejn kummerċjanti jkunu qed ibiegħu lil konsumaturi finali u m’hemm ebda ħtieġa li tinħareġ fattura li tindika ammont speċifiku ta’ VAT, dak il-livell ta’ arrotondament ikun jidher li ma jqanqal ebda problema prattika. Kif issuġġerejt f’Koninklijke Ahold (17), irċevuta tat-tip li s-soltu tinħareġ f’ċirkostanzi bħal dawn m’hemmx bżonn li tiddikjara l-ammont eżatt ta’ VAT inkluż fil-prezz finali imma tista’ sempliċement tindika r-rata applikabbli; u, anki jekk jingħata ammont arrotondat, m’hemmx bżonn li jkun jorbot bejn il-kummerċjant u l-awtorità fiskali; konformi mal-Artikolu 18(1)(a) tas-Sitt Direttiva, sempliċi rċevuta li la hija fattura tal-VAT sħiħa jew inqas iddettaljata ma tistax tintuża sabiex jiġi eżerċitat id-dritt għal tnaqqis. Fil-każ ta’ fattura tal-VAT inqas iddettaljata (li tista’ tiġi użata sabiex isir tnaqqis), jien ninnota li la l-Artikolu 22(9)(d) tas-Sitt Direttiva u lanqas ir-Regolament 16(1) tar-Regolamenti tal-VAT ma jeħtieġ li jiġi ddikjarat – imma biss “l-informazzjoni meħtieġa biex tiġi kkalkolata” jew “ir-rata ta’ VAT applikabbli” (18).

41.      Is-sitwazzjoni tinbidel meta kummerċjant, li jbiegħ bi prezzijiet arrotondati bil-VAT inkluża, joħroġ fattura tal-VAT sħiħa? (19)

42.      Meta tinħareġ fattura bħal din, fiha għandu jiġi ddikjarat l-ammont taxxabbli u l-ammont ta’ VAT pagabbli. Evidentement iż-żewġ ammonti jridu flimkien jaslu għal total li jkun jista’ jiġi mħallas mill-fornitur, u li għalhekk ma jistax jinkludi frazzjoni tal-iżgħar unità tal-valuta. Madankollu, ma nista’ nsib l-ebda ħtieġa speċifika fis-Sitt Direttiva li kull ammont separat irid ikun multiplu arrotondat ta’ dik l-iżgħar unità. Lanqas ma jidher fil-fatt, li hemm xi raġuni imperattiva għalfejn l-arrotondar ma setax jiġi pospost sal-istadju tad-dikjarazzjoni perjodika tal-VAT. Il-fornitur seta’ jiġbor flimkien l-ammonti kollha ta’ frazzjonijiet qabel ma jagħmel l-arrotondament fid-dikjarazzjoni tiegħu, kif seta’ jagħmel il-klijent, jekk huwa persuna taxxabbli. Jekk il-klijent mhuwiex persuna taxxabbli m’hemm ebda obbligu fuqu li jikkontja għal VAT f’ammonti arrotondati – hu sempliċement għandu jkun f’pożizzjoni li jħallas il-prezz bil-VAT inkluża f’din il-forma.

43.      Huwa veru li liġi jew regolament nazzjonali jista’ jirrikjedi li l-ammonti kollha fuq fatturi ta’ VAT ikunu ddikjarati f’multipli tal-iżgħar unita tal-valuta (20), jew jista’ jawtorizza lil kummerċjanti li jarrotondaw dawn l-unitajiet għal ikkontjar u amministrazzjoni iktar faċli. Fejn tali arrotondament huwa meħtieġ jew awtorizzat, l-ammont iddikjarat “jikkristalizza” ammont attwali ta’ VAT, imħallas mill-klijent lill-fornitur u li għandu jiġi kkontjat mill-fornitur lill-awtorità fiskali. F’dan il-każ, il-livell ta’ arrotondar li jikkawża l-inqas żnaturament ikun dak tal-fattura għat-tranżazzjoni kollha, li tista’ ċertament tinkludi numru ta’ artikli jew provvisti separati (dan hu l-“livell ta’ basket tax-xiri” imsemmi mill-qorti nazzjonali).

44.      Għalhekk, filwaqt li l-leġiżlazzjoni tal-Komunità dwar il-VAT ma teħtieġx l-arrotondar f’xi livell speċifiku u għalhekk tippermetti lill-Istati Membri grad ta’ latitudni, dik il-latitudni trid tiġi eżerċitata b’mod konformi mal-prinċipji ta’ proporzjonalità u newtralità, li huma moqdija l-aħjar b’arrotondar fl-aħħar stadju li hu konsistenti mal-ħtiġiet prattiċi tal-ħlas u l-ikkontjar.

 Ir-raba’ domanda

45.      Il-VAT and Duties Tribunal essenzjalment tistaqsi, jekk il-fatt li r-Renju Unit jippermetti kummerċjanti bil-fattura li jarrotondaw ’l isfel b’mod sistematiku għandux xi implikazzjonijiet prattiċi li dan irid iseħħ ukoll fir-rigward ta’ kummerċjanti bl-imnut (bħal J D Wetherspoon), b’mod partikolari fid-dawl tal-prinċipji tad-dritt Komunitarju tat-trattament ugwali u newtralità fiskali.

46.      Id-differenzi, minn banda, bejn provvisti lil persuni taxxabbli u provvisti lil konsumaturi finali u, mill-banda l-oħra, bejn prezzijiet bil-VAT eskluża u prezzijiet bil-VAT inkluża huma rilevanti għall-kunsiderazzjoni tal-metodu u tal-livell ta’ arrotondar xieraq għal kummerċ bl-imnut. Jien għalhekk nikkunsidra l-implikazzjonijiet ta’ dawk id-differenzi fil-konklużjonijiet tiegħi f’Koninklijke Ahold, b’mod partikolari f’punti 56 sa 62, li għalihom nagħmel referenza.

47.      Fid-dawl ta’ dawk il-kunsiderazzjonijiet, u ta’ dawk imsemmija f’punti 37 sa 42 tal-istess konklużjonijiet, jiena tal-fehma li mhuwiex inkompatibbli mal-prinċipji tat-trattament ugwali u newtralità fiskali (a) li tippermetti kummerċjanti li jiffissaw prezzjijiet bil-VAT eskluża li jarrotondaw iċ-ċifri, li magħhom tiġi miżjuda l-VAT, u li jissupplixxu persuni taxxabbli bi dritt għal tnaqqis, li jarrotondaw ’l isfel l-ammont ta’ VAT b’mod sistematiku filwaqt li fl-istess ħin (b) tobbliga kummerċjanti li jiffissaw prezzijiet bil-VAT inkluża b’numri arrotondati, li minnhom l-ammont ta’ VAT inkluża jrid jiġi kkalkolat, u li jissupplixxu konsumaturi finali, li jarrotondaw l-ammont ta’ VAT b’mod aritmetiku fil-każijiet kollha.

48.      Fil-każ (a), bis-saħħa tal-mekkaniżmu ta’ tnaqqis, l-arrotondar (kemm jekk ’il fuq, ’l isfel jew b’mod aritmetiku) m’għandu ebda effett fuq il-piż tat-taxxa la tal-fornitur u la tal-klijent, u lanqas ma jaffettwa l-ammont totali ta’ taxxa miġbura ultimament mit-teżor. Fil-każ (b), l-arrotondar ’il fuq jew ’l isfel għandu jwassal biex il-kummerċjant ikun responsabbli, u biex it-teżor jiġbor, rispettivament iktar jew inqas VAT mill-proporzjon eżatt tal-prezz li għandu jirriżulta mill-applikazzjoni tar-rata korretta. Dik id-diskrepanza tiġi konsiderevolment imnaqqsa bl-arrotondar aritmetiku (partikolarment l-arrotondar għal numru biż-żewġ), b’hekk tiġi żgurata ugwaljanza akbar fit-trattament bejn każijiet (a) u (b) u għal newtralità fiskali akbar fil-każ (b).

49.      J D Wetherspoon madankollu, tissottometti, jekk jiġi aċċettat arrotondar sistematiku għal xi kummerċjanti filwaqt li jiġi impost arrotondar aritmetiku għal oħrajn iwassal għal żnaturament tal-kompetizzjoni bejn żewġ klassijiet ta’ kummerċjanti – fuq bażi li hi għal kollox arbitrarja, peress li l-klassijiet ta’ kummerċjanti bil-fattura u kummerċjanti bl-imnut imkien ma jiġu definiti. Din tagħti l-eżempju ta’ żewġ kummerċjanti li jbiegħu landa żebgħa GBP 4.94, bil-VAT inkluża. Għal kummerċjant bil-fattura, dan ikun magħmul minn prezz nett ta’ GBP 4.21, b’VAT ta’ 0.73675, arrotondata ’l isfel għal GBP 0.73. Madankollu, l-kummerċjant bl-imnut, jkollu jarrotonda l-ammont ta’ VAT (li, f’7/47 tal-prezz bil-VAT inkluża, jien nikkalkola li jiġi GBP 0.73574) b’mod aritmetiku għal GBP 0.74 u għandu jirċievi prezz nett ta’ GBP 4.20 biss. Dan, tikkontesta J D Wetherspoon, imur kontra l-ġurisprudenza tal-Qorti tal-Ġustizzja fis-sens li provvisti simili, li jikkompetu ma’ xulxin, m’għandhomx jiġu ttrattati b’mod differenti għal skopijiet ta’ VAT, indipendentement minn jekk l-iżnaturament tal-kompetizzjoni huwiex sostanzjali jew le (21).

50.      L-ewwel nett f’dak ir-rigward, hija kwistjoni unikament għall-qorti nazzjonali sabiex tiddetermina jekk il-klassifikazzjoni ta’ kummerċjanti bħala kummerċjanti bil-fattura jew kummerċjanti bl-imnut hija b’xi mod inċerta jew arbitrarja. Hija wkoll il-qorti nazzjonali li għandha tiddetermina jekk, fil-fatt, ikel u xorb simili għal u, b’kompetizzjoni ma’ dawk forniti minn J D Wetherspoon jiġu fornuti wkoll minn kummerċjanti bil-fattura awtorizzati li jarrotondaw ’l isfel l-ammont ta’ VAT meta J D Wetherspoon mhijiex permessa li tagħmel dan (22).

51.      Fuq is-suppożizzjoni li l-aħħar punt jista’ fil-fatt jiġi stabbilit, tqum il-kwistjoni jekk id-differenza fit-trattament fil-fatt tippenalizzax xi tip ta’ kummerċjant u mhux l-ieħor, u jekk din tirriżultax mill-metodu tal-arrotondar jew mill-metodu tal-kostruzzjoni tal-prezz (jiġifieri jekk il-prezz b’numri arrotondati li wieħed jibda minnu huwiex bil-VAT eskluża jew bil-VAT inkluża). Għal darb’oħra dawn huma primarjament domandi li jmissu lill-qorti nazzjonali, imma l-kunsiderazzjonijiet li ġejjin jistgħu jkunu ta’ għajnuna.

52.      Il-konċessjoni tal-arrotondar li tapplika fir-Renju Unit għal kummerċjanti bil-fattura, u l-metodu li J D Wetherspoon tipprova tuża’, huma bbażati fuq arrotondar ’l isfel fil-livell ta’ basket tax-xiri għall-iżgħar unità ta’ valuta, wara li tiġi arrotondata ’l isfel fil-livell ta’ linja għal 1/10 ta’ dik l-unità. Għalhekk huwa utli li jiġi kkomparat it-trattament mhux ta’ artikli singoli (bħal pereżempju, landa waħda ta’ żebgħa msemmija minn J D Wetherspoon) imma ta’ basktijiet tal-istess artiklu (pereżempju, tnejn, ħamsa, għaxra jew iktar laned ta’ żebgħa).

53.      Jekk, fl-eżempju ta’ J D Wetherspoon, il-kummerċjant ibiegħ iktar minn landa waħda taż-żebgħa, ix-xenarju jinbidel. Il-prezz tal-bejgħ tal-kummerċjant bil-fattura, jeċċedi dak tal-kummerċjant bl-imnut hekk kif anki t-tieni landa tiġi mibjugħa flimkien mal-ewwel waħda, u d-differenza tiżdied man-numru ta’ laned. Meta iktar minn 10 laned jinbiegħu flimkien, l-ammont ta’ VAT fil-prezz tal-kummerċjant bil-fattura hu ogħla mill-ammont f’dik tal-kummerċjant bl-imnut, u għal darb’oħra d-differenza tiżdied man-numru ta’ laned.

54.      Ikun tedjanti li joqogħdu jingħataw kalkolazzjonijiet għal numri differenti possibbli ta’ laned. Madankollu, ibbażat fuq iċ-ċifri ta’ J D Wetherspoon, kummerċjant bil-fattura li b’mod sistematiku jarrotonda ’l isfel ibiegħ 20 landa taż-żebgħa għal GBP 98.93, bil-VAT inkluża ta’ GBP 14.73, filwaqt li kummerċjant bl-imnut li jarrotonda b’mod aritmetiku ibiegħhom għal GBP 98.80, inkluża l-VAT ta’ GBP 14.71 (tabilħaqq f’dan l-eżempju, iċ-ċifri tal-kummerċjant bl-imnut ikunu l-istess anki jekk kellu jitħalla jarrotonda ’l isfel – kif ikun il-każ kull fejn l-arrotondament aritmetiku jsir ’l isfel). Il-prezz bil-VAT eskluża għall-klijent kummerċjali għalhekk ikun ta’ GBP 84.20 fil-każ ta’ kummerċjant bil-fattura, u ta’ GBP 84.09 fil-każ ta’ kummerċjant bl-imnut.

55.      Għal din ir-raġuni, il-prezz bil-VAT inkluża tal-kummerċjant bl-imnut jista’ jkun iktar attraenti għall-konsumaturi finali, u l-prezz tiegħu bil-VAT eskluża jista’ jkun iktar attraenti għal persuni taxxabbli peress li kull wieħed minn dawn il-prezzijiet huwa iktar baxx minn dak fl-istruttura tal-prezzijiet tal-kummerċjant bl-imnut. Fl-ambitu tal-medda normali tal-infiq tal-konsumatur, madankollu, id-differenzi tant huma żgħar li aktarx li minnhom infushom mhux probabbli li se jaffettwaw l-għażla – kunsiderazzjonijiet bħal li jkun qrib jew id-disponibbiltà ta’ konsenja b’xejn jista’ jkollhom piż ugwali jew akbar. Għalhekk kummerċjanti bl-imnut jista’ jkollhom skop jaġġustaw il-prezzijiet tagħhom sabiex ipaċu xi żvantaġġ (żgħir bl-istess mod) f’termini ta’ dħul nett mingħajr ma jqegħdu lilhom infushom fi żvantaġġ kompetittiv globali.

56.      Għalhekk jidher li l-effetti tad-differenza fit-trattament bejn kummerċjanti bil-fattura u kummerċjanti bl-imnut fir-Renju Unit (a) mhumiex neċessarjament tali li joperaw sistematikament għad-detriment ta’ kummerċjanti bl-imnut u (b) jistgħu joriġinaw iktar mid-differenza bejn l-użu ta’ prezzijiet bil-VAT eskluża u bil-VAT inkluża, kull wieħed minnhom b’ċifri arrotondati, bħala l-bażi tal-kalkolu milli mill-metodu tal-arrotondar applikat.

57.      Fir-rigward ta’ dan tal-aħħar, wieħed għandu jiftakar li d-Direttiva 98/6 teħtieġ li l-prezz tal-bejgħ ikun bil-VAT inkluża – li hu l-uniku prezz li jimporta għall-konsumatur finali – li għandu jiġi indikat għall-prodotti kollha offruti minn kummerċjanti lil persuni naturali li jixtru mingħandhom għal skopijiet li ma jaqgħux fl-isfera tal-attività kummerċjali jew professjonali tagħhom, filwaqt li fil-kummerċ bejn persuni taxxabbli intitolati li jnaqqsu t-taxxa fuq ix-xiri l-uniku prezz li jimporta huwa l-prezz bil-VAT eskluża. Għalhekk m’hemm l-ebda ksur apparenti tan-newtralità fiskali jew ugwaljanza fit-trattament fi jew li jiġi interpretat mill-fatt li kategoriji differenti ta’ kummerċjanti jibnu l-prezzijiet tagħhom b’metodi differenti.

58.      Sakemm il-metodi differenti ta’ arrotondar jiġu tabilħaqq applikati abbażi ta’ distinzjoni bejn il-metodi li bihom il-kummerċjanti jiffissaw il-prezzijiet tagħhom, għalhekk fil-fehma tiegħi l-konċessjoni tal-arrotondar ’l isfel tal-HMRC għal kummerċjanti bil-fattura m’għandha l-ebda implikazzjonijiet materjali għall-arrotondar għal kummerċjanti bl-imnut bħal J D Wetherspoon.

59.      F’dak ir-rigward, huwa irrilevanti li J D Wetherspoon, meta tiffissa l-prezzijiet bil-VAT inkluża, jkollha tikkontja għal inqas VAT b’mod sinjifikanti billi sistematikament tarrotonda ’l isfel b’mod aritmetiku. Il-paragun rilevanti hu bejn kummerċjanti bil-fattura u kummerċjanti bl-imnut. Madankollu, evidentement ikun imur kontra l-ħtieġa ta’ trattament ugwali jekk, minn grupp ta’ kummerċjanti li jagħmel provvisti simili u li jikkompetu ma’ xulxin abbażi ta’ prezzijiet bil-VAT inkluża, xi wħud jitħallew jarrotondaw l-ammont tal-VAT b’mod sistematiku u oħrajn le. U, f’dak il-każ, il-kummerċjanti li jitħallew jarrotondaw ’l isfel ikunu qed iżommu għalihom frazzjoni tal-ammont eżatt tal-VAT dovuta, li jkun imur kontra l-prinċipju tan-newtralità fiskali.

 Konklużjoni

60.      Għaldaqstant fid-dawl tal-kunsiderazzjonijiet kollha ta’ hawn fuq, fl-opinjoni tiegħi l-Qorti tal-Ġustizzja għandha tagħti r-risposti li ġejjin għad-domandi mressqa mill-VAT and Duties Tribunal, Londra:

(1)      Fin-nuqqas ta’ leġiżlazzjoni tal-Komunità speċifika, huma l-Istati Membri li għandhom jiddeċiedu dwar ir-regoli u metodi tal-arrotondar ta’ ammonti ta’ VAT, bil-kundizzjoni li meta jagħmlu dan huma josservaw il-prinċipji li jirfdu s-sistema komuni tal-VAT, b’mod partikolari dawk tan-newtralità fiskali u ta’ proporzjonalità.

(2)      Id-dritt Komunitarju la jipprekludi Stati Membri milli jobbligaw persuni taxxabli li jarrotondaw l-ammonti ta’ VAT b’mod aritmetiku fil-każijiet kollha u lanqas ma jobbligahom jippermettu persuni taxxabbli milli jarrotondaw l-ammont ’l isfel fil-każijiet kollha.

(3)      Meta jsir bejgħ bi prezzijiet tal-unità bil-VAT inkluża f’ċifri arrotondati u l-ammont ta’ VAT jinkludi frazzjoni tal-iżgħar unità ta’ valuta disponibbli, id-dritt Komunitarju ma jeħtieġx li dak l-ammont jiġi arrotondat għal unità sħiħa qabel l-istadju li fih irid jiġi espress bħala ċifra li ma tinkludix frazzjoni bħal din, partikolarment biex tkun tista’ tiġi mħallsa bħala somma indipendenti.

(4)      Jekk kummerċjanti li jagħmlu provvisti bbażati fuq prezzijiet tal-unità f’ċifri arrotondati, li magħhom trid tiżdied il-VAT, jitħallew jarrotondaw l-ammont tal-VAT ’l isfel fuq kull fattura, il-prinċipji tat-trattament ugwali u tan-newtralità fiskali ma jipprekludux li kummerċjanti li jagħmlu provvisti bbażati fuq prezzijiet tal-unità bil-VAT inkluża b’ċifri arrotondati, minn liema irid jiġi kkalkolat l-element tal-VAT, jiġu obbligati jarrotondaw l-ammont ta’ VAT b’mod aritmetiku.

1 – Lingwa oriġinali: l-Ingliż.

2 – Sentenza tal-10 ta’ Lulju 2008 (C-484/06, li għadha ma ġietx ippubblikata fil-Ġabra).

3 – L-Ewwel Direttiva tal-Kunsill 67/227/KEE tal-11 ta’ April 1967 fuq l-armonizzazzjoni tal-leġiżlazzjoni tal-Istati Membri dwar it-taxxi fuq il-bejgħ (ĠU, Edizzjoni Speċjali bil-Malti 2004, Kapitolu 9 Volum 1, p. 3-4); is-Sitt Direttiva tal-Kunsill 77/388/KEE tas-17 ta’ Mejju 1977, fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ – Sistema komuni ta’ taxxa fuq il-valur miżjud: bażi uniformi ta’ stima (ĠU 1977 L 145, p. 1, emendata f’diversi okkażjonijiet). B’effett mill-1 ta’ Jannar 2007, iż-żewġ direttivi ġew annullati u mħassra bid-Direttiva tal-Kunsill 2006/112/KE tat-28 ta’ Novembru 2006 dwar sistema komuni ta’ taxxa fuq il-valur miżjud (ĠU 2006 L 347, p.1), li l-għan tagħha huwa li jiġu ppreżentati d-dispożizzjonijiet applikabbli tal-Komunità dwar il-VAT b’mod ċar u razzjonali fi struttura u diċitura miktubin mill-ġdid mingħajr ma, fil-prinċipju, jsir tibdil materjali fil-leġiżlazzjoni eżistenti.

4 – Direttiva 98/6/KE tal-Parlament Ewropew u tal-Kunsill tas-16 ta’ Frar 1998 dwar il-protezzjoni tal-konsumatur fl-indikazzjoni tal-prezzijiet ta’ prodotti offruti lill-konsumaturi (ĠU 1998 L 80, p. 27).

5 – U, meta l-fornitur huwa kummerċjant bl-imnut, f’każ biss jekk il-klijent jitlob fattura.

6 – Dawn id-dettalji, stipulati fir-Regolament 14(1), huma bażikament l-istess bħal dawk rikjesti bl-Artikolu 22(3)(b) tas-Sitt Direttiva.

7 – Regolament 16(1).

8 –      Għal spjegazzjoni tat-termini “linja”, “basket tax-xiri” eċċ, ara l-punt 25 hawn isfel.

9 – Ir-rata standard ta’ VAT fir-Renju Unit hija ta’ 17.5 %, jew 7/40, tal-prezz nett (VAT eskluż). L-ammont ta’ VAT fi prezz bl-imnut (VAT inkluża) huwa għalhekk 7/47.

10 – Wieħed għandu jżomm f’moħħu li, f’dan il-kuntest, “newtralità fiskali” tirreferi għall-ħtieġa li l-VAT tkun newtra fl-effett tagħha kemm fuq u anki bejn persuni taxxabbli, u l-“prinċipju tal-proporzjonalità” għandu t-tifsira speċifika ta’ obbligu li l-ammont tat-taxxa jkun eżattament proporzjonali għall-prezz tal-prodotti u servizzi (ara s-sentenza Koninklijke Ahold, punti 36 u 38).

11 – Punt 37 tas-sentenza.

12 – Punt 39.

13 – Punti 40 u 41, jagħmlu referenza għall-punt 47 tal-konklużjonijiet tiegħi f’dik il-kawża. F’punti 47 u 48, jien iddiskutejt l-arrotondament aritmetiku, u indikjat fin-nota ta’ qiegħ il-paġna 29 li s-sempliċi arrotondament aritmetiku jinvolvi żieda li hija ħarira ’l fuq (imneħħi b’ċerta ħila mill-kalkoli proposti mill-Gvern tar-Renju Unit fl-osservazzjonijiet tiegħu fil-kawża preżenti) li jista’ jiġi mmitigat bl-“arrotondament għal numri żewġ”.

14 – B’mod partikolari fil-punti 37 sa 42 u 49 sa 51.

15 – Fil-punti 42, 47 u 48, u n-nota ta’ qiegħ il-paġna 29.

16 – Ara l-punti 49 sa 51 tal-konklużjonijiet tiegħi f’Koninklijke Ahold.

17 – Ara, b’mod partikolari, il-punti 34 u 55 tal-konklużjonijiet tiegħi.

18 – Ara l-punti 11 u 14 hawn fuq.

19 – Ta’ min wieħed jiftakar li l-fatturi tal-VAT sħaħ irid ikun fihom ammont kunsiderevoli ta’ informazzjoni (inkluż l-isem u l-indirizz sħiħ tal-klijent), li tista’ tagħmel il-prattika inqas attraenti għall-bejjiegħa bl-imnut b’bejgħ b’volum għoli u ta’ valur baxx.

20 – Ir-Regolament 14(1) tar-Regolament tal-VAT jeħtieġ li l-ammont ta’ taxxa jiġi espress f’Lira Sterlina, l-istess bħalma l-Artikolu 22(3)(a) tas-Sitt Direttiva jeħtieġ li jkun espress fil-valuta nazzjonali tal-Istat Membru kkonċernat. Iż-żewġ dispożizzjonijiet huma siekta dwar id-domanda jekk għandhomx jiġu użati unitajiet arrotondati.

21 – Din tiċċita, b’mod partikolari, is-sentenza tat-28 ta’ Ġunju 2007, J P Morgan Fleming Claverhouse Investment Trust (C-363/05, Ġabra I-5517, punti 46 u 47) u l-ġurisprudenza hemmhekk ċitata, flimkien mas-sentenza tal-10 ta’ Settembru 2002, Kügler (C-141/00, Ġabra I-6833, punti 55 sa 58), u s-sentenza tas-6 ta’ Novembru 2003, Christoph-Dornier-Stiftung, (C-45/01, Ġabra I-12911, punti 69 sa 74).

22 – Waqt is-seduta, J D Wetherspoon issuġġeriet li sitwazzjoni bħal din tista’ teżisti bejnha u ditti tal-kejtering fil-kuntest ta’ riċevimenti u avvenimenti simili li jistgħu jiġu organizzati kemm għal persuni taxxabbli u għal individwi privati. Ditti bħal dawn, tasserixxi J D Wetherspoon, huma permessi li jarrotondaw ’l isfel, filwaqt li hija obbligata tarrotonda b’mod aritmetiku.