Available languages

Taxonomy tags

Info

References in this case

References to this case

Share

Highlight in text

Go

KONKLUŻJONIJIET TAL-AVUKAT ĠENERALI

MAZÁK

ippreżentati fis-26 ta’ Ottubru 2010 (1)

Kawża C-103/09

The Commissioners for Her Majesty’s Revenue & Customs

vs

Weald Leasing Limited

[talba għal deċiżjoni preliminari mill-Court of Appeal (England and Wales)]

“Taxxa fuq il-valur miżjud (VAT) – Sitt Direttiva tal-Kunsill 77/388/KEE– Kunċett ta’ ‘prattika abbużiva’ u ta’ ‘tranżazzjonijiet kummerċjali normali’ – Tranżazzjoni maħsuba biss biex jinkiseb vantaġġ fiskali – Tranżazzjonijiet ta’ kiri u ta’ sullokazzjoni maħsuba biex jiddifferixxu l-ħlas tal-VAT – Definizzjoni mill-ġdid ta’ prattika abbużiva”





I –    Introduzzjoni

1.        Din it-talba għal deċiżjoni preliminari tirrigwarda, inter alia, l-interpretazzjoni tal-kunċett ta’ “prattika abbużiva”, kif imsemmi fis-sentenza fil-Kawża C-255/02 Halifax et (2), u l-applikazzjoni tiegħu fil-Kawża C-425/06 Part Service (3) u l-Kawża C-162/07 Ampliscientifica and Amplifin (4). Din it-talba tresqet fil-kuntest ta’ kawża bejn il-Commissioners for Her Majesty’s Revenue and Customs (iktar ’il quddiem il-“Kummissarji”) u Weald Leasing Limited (iktar ’il quddiem “Weald Leasing”) dwar it-tassazzjoni ta’ tranżazzjonijiet ta’ kiri mwettqa minn Weald Leasing.

II – Il-kawża prinċipali u d-domandi preliminari

2.        Churchill Group of Companies (iktar ’il quddiem il-“Grupp Churchill”) primarjament jipprovdi servizzi ta’ assigurazzjoni eżentati mit-taxxa fuq il-valur miżjud (VAT) (5). Churchill Management Limited (iktar ’il quddiem “CML”) u s-sussidjarji tagħha, Churchill Accident Repair Centre (iktar ’il quddiem “CARC”) u Weald Leasing (6), huma membri tal-Grupp Churchill. CML u CARC għandhom rata ta’ rkupru tal-VAT tal-input ta’ madwar 1%, sabiex, meta jixtru assi/tagħmir, ikunu jistgħu jnaqqsu 1% biss mill-VAT fuq ix-xiri ta’ dawk l-assi/tagħmir (7). L-attività kummerċjali unika ta’ Weald Leasing tikkonsisti fix-xiri tal-assi/tagħmir inkwistjoni u mbagħad tikrihom lil Suas Limited (iktar ’il quddiem “Suas”). Weald Leasing hija rreġistrata għall-VAT b’mod indipendenti.

3.        Suas hi kumpannija li s-sidien tagħha huma konsulent dwar il-VAT għal Grupp Churchill u l-mara tiegħu, iżda Suas ma hijiex parti minn dak il-grupp u hija rreġistrata għall-VAT b’mod separat. L-unika attività tal-kummerċ sinjifikattiva ta’ Suas hija l-kiri tal-assi minn Weald Leasing u s-sullokazzjoni tagħhom lil CML u CARC.

4.        Meta CML jew CARC kienu jeħtieġu tagħmir ġdid, dan inxtara minn Weald Leasing, li krietu lil Suas, li, min-naħa tagħha, issullokatu lil CML jew CARC. Permezz ta’ din is-serje ta’ tranżazzjonijiet CML u CARC evitaw li jixtru direttament it-tagħmir li kienu jeħtieġu jew li jħallsu f’somma waħda l-ammont totali ta’ VAT li ma jitnaqqasx għal dawk ix-xirjiet. L-għan ta’ dawn it-tranżazzjonijiet kien li jiġi diviż u jinfirex il-ħlas ta’ dak l-ammont sabiex jiġi differit l-obbligu tal-ħlas tal-VAT tal-Grupp Churchill. CML u CARC ma kinux minnufih responsabbli għall-ħlas tal-VAT li ma jitnaqqasx fuq l-ispiża totali tat-tagħmir mixtri, iżda fuq l-ammont ta’ kera marbuta ma’ dak it-tagħmir, mifrux fuq il-perijodu taż-żmien tal-ftehim tal-kiri.

5.        Il-Kummissarji ħarġu stimi ta’ ħlas ta’ VAT li ma jħallux it-tnaqqis minn Weald Leasing tal-VAT tal-input imħallsa fuq l-assi mikrija bejn Ottubru 2000 u Ottubru 2004, fuq il-bażi li t-tranżazzjonijiet inkwistjoni ma kinux attivitajiet ekonomiċi u kienu jikkostitwixxu abbuż ta’ drittijiet. Weald Leasing appellat minn dawn l-istimi u argumentat li dawk it-tranżazzjonijiet ma kinux saru biss biex jinkisbu vantaġġi fiskali u li t-twettiq ta’ provvisti ta’ tagħmir taxxabbli permezz ta’ kiri ma kienx kuntrarju għall-għan tas-Sitt Direttiva. Wara li ngħatat is-sentenza Halifax (8), il-Kummissarji abbandunaw l-argument tagħhom li t-tranżazzjonijiet ta’ kiri inkwistjoni ma kinux attivitajiet ekonomiċi u argumentaw biss li dawk it-tranżazzjonijiet kienu jikkostitwixxu prattika abbużiva.

6.        Permezz ta’ deċiżjoni tas-7 ta’ Frar 2007, il-VAT and Duties Tribunal qies li l-għan essenzjali ta’ dawk it-tranżazzjonijiet kien li jinkiseb vantaġġ fiskali. Għaldaqstant, dawk it-tranżazzjonijiet kienu jissodisfaw it-tieni kundizzjoni għall-applikazzjoni tat-teorija tal-abbuż ta’ liġi, kif stabbilita fil-punt 75 tas-sentenza Halifax tal-Qorti tal-Ġustizzja. B’mod partikolari, it-tribunal qal li ma sab “ebda waħda mill-ispjegazzjonijiet għat-tranżazzjonijiet ħlief dik tal-ksib ta’ vantaġġi fiskali miċ-Churchill VAT Group bħala remotament konvinċenti”. Il-VAT and Duties Tribunal qies li l-għoti tal-vantaġġ fiskali ma kienx kuntrarju għall-għan tad-dispożizzjonijiet rilevanti fis-Sitt Direttiva u li għaldaqstant, l-ewwel kundizzjoni stabbilita fil-punt 74 tas-sentenza Halifax tal-Qorti tal-Ġustizzja ma ntlaħqitx. It-tribunal ma seta’ jsib xejn fis-Sitt Direttiva li juri li kummerċjant eżentat ma setax jiddifferixxi jew jifrex il-piż tat-taxxa tal-input permezz tal-kiri, anki f’każijiet bħal dan fejn Weald Leasing kienet kumpannija konnessa ma’ CML u CARC. Il-VAT and Duties Tribunal qies ukoll li abbuż seta’ joħroġ biss, mhux mill-kirjiet infushom, iżda mil-livell ta’ kera skont il-kirjiet u mill-arranġamenti biex tiġi evaża deċiżjoni mill-Kummissarji skont l-Anness 6 tal-Att tal-1994 dwar it-Taxxa fuq il-Valur Miżjud (iktar ’il quddiem “l-Att tal-1994 dwar il-VAT”) (9).

7.        Il-Kummissarji appellaw minn din id-deċiżjoni quddiem iċ-Chancery Division of the High Court of Justice of England and Wales. L-unika kwistjoni appellata kienet dwar jekk il-vantaġġ fiskali miksub mill-Grupp Churchill kienx kuntrarju għall-għan tas-Sitt Direttiva. Permezz ta’ sentenza tas-16 ta’ Jannar 2008, iċ-Chancery Division tal-High Court of Justice of England and Wales ċaħdet l-appell tal- Kummissarji minn dik id-deċiżjoni, fuq il-bażi li l-fatt li t-tranżazzjonijiet inkwistjoni ma kinux twettqu fil-kuntest ta’ operazzjonijiet kummerċjali normali ma kienx suffiċjenti biex jiġi konkluż li dawn kienu prattika abbużiva, peress li l-vantaġġ fiskali miksub mill-Grupp Churchill permezz ta’ dawk it-tranżazzjonijiet ma kienx kuntrarju għall-prinċipju ta’ newtralità fiskali jew għal kwalunkwe dispożizzjoni oħra tas-Sitt Direttiva. (10)

8.        Kien taħt dawn iċ-ċirkustanzi li l-Court of Appeal of England and Wales (Civil Division) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:

“(1)      F’ċirkustanzi bħal dawk fil-kawża preżenti, fejn kummerċjant fil-parti l-kbira eżenti jadotta struttura ta’ kiri ta’ attivi li tinvolvi parti terza intermedjarja, minflok ma jixtri direttament l-attivi, l-istruttura ta’ kiri ta’ attivi jew kwalunkwe parti minnha tagħti lok għal vantaġġ fiskali li jmur kontra l-għan tas-Sitt Direttiva fis-sens tal-punt 74 tas-sentenza tal-21 ta’ Frar, Halifax et, C-255/02 [...]?

(2)      Fid-dawl tal-fatt li s-Sitt Direttiva VAT tikkunsidra l-kiri tal-attivi minn kummerċjanti eżenti jew parzjalment eżenti, tar-riferiment tal-Qorti tal-Ġustizzja għal “tranżazzjonijiet kummerċjali normali” fil-punti 69 u 80 tas-sentenza Halifax u fil-punt 27 tas-sentenza [...] Ampliscientifica [u Amplifin] u tan-nuqqas ta’ tali riferiment fis-sentenza [...] Part Service, [...] tkun prattika abbużiva għal kummerċjant eżenti jew parzjalment eżenti li jagħmel dan anki jekk, fil-kuntest tat-tranżazzjonijiet kummerċjali normali tiegħu, dan ma jwettaqx tranżazzjonijiet ta’ kiri?

(3)      Fil-każ li tingħata risposta pożittiva għad-domanda 2:

(a)      x’inhi r-rilevanza tal-kunċett “tranżazzjonijiet kummerċjali normali” fil-kuntest tal-punti 74 u 75 tas-sentenza Halifax: dan il-kunċett huwa rilevanti għall-punt 74 jew għall-punt 75 jew għat-tnejn;

(b)      ir-riferiment għal “tranżazzjonijiet kummerċjali normali” jirreferi għal:

(1)      tranżazzjonijiet li l-persuna taxxabbli inkwistjoni ġeneralment twettaq;

(2)      tranżazzjonijiet li żewġ partijiet jew iktar iwettqu fil-kundizzjonijiet normali tas-suq;

(3)      tranżazzjonijiet li huma kummerċjalment vijabbli;

(4)      tranżazzjonijiet li joħolqu piż u riskji kummerċjali ġeneralment assoċjati mal-benefiċċji kummerċjali relatati;

(5)      tranżazzjonijiet li mhumiex artifiċjali inkwantu għandhom portata kummerċjali;

(6)      kwalunkwe tip jew kategorija oħra ta’ tranżazzjonijiet?

(4)      Jekk jiġi deċiż li l-istruttura ta’ kiri ta’ attivi jew kwalunkwe parti minnha tikkostitwixxi prattika abbużiva, x’inhi d-definizzjoni mill-ġdid adattata? B’mod partikolari, il-qorti nazzjonali jew l-awtorità tat-taxxa għandha:

(a)      tinjora l-eżistenza ta’ parti terza intermedjarja u tordna li l-VAT għandha titħallas fuq il-valur ta’ suq miftuħ tal-kiri;

(b)      tiddefinixxi mill-ġdid l-istruttura ta’ kiri bħala xiri dirett; jew

(c)      tiddefinixxi mill-ġdid t-tranżazzjonijiet fi kwlaunkwe mod li l-qorti nazzjonali jew l-awtorità tat-taxxa jikkunsidraw bħala mod adattat sabiex tiġi stabbilita mill-ġdid s-sitwazzjoni li kienet tinħoloq fin-nuqqas tat-tranżazzjonijiet li jikkostitwixxu l-prattika abbużiva?”

III – Il-proċedura quddiem il-Qorti tal-Ġustizzja

9.        Ġew sottomessi osservazzjonijiet bil-miktub minn Weald Leasing, il-Gvern Grieg, l-Irlanda, il-Gvern Taljan, il-Gvern tar-Renju Unit u l-Kummissjoni. Kollha, minbarra l-Gvern Taljan, għamlu sottomissjonijiet verbali fis-seduta li nżammet fit-3 ta’ Ġunju 2010.

IV – Kunsiderazzjonijiet preliminari

10.      Wara s-sentenza Halifax tal-Qorti tal-Ġustizzja, huwa ċar li l-prinċipju ta’ abbuż ta’ liġi, kif stabbilit fil-ġurisprudenza tal-Qorti tal-Ġustizzja u li ma jippermettix li d-dritt tal-Unjoni Ewropea (UE) jintuża għal skopijiet abbużivi jew frawdolenti, japplika wkoll fil-każijiet tal-VAT. Madankollu, l-estensjoni tal-prinċipju ta’ abbuż ta’ liġi għall-isfera tal-liġi tal-VAT ma tistax ikollha effett fuq il-prinċipju ta’ ċertezza legali jew fuq il-libertà ta’ kummerċjant li jistruttura n-negozju tiegħu jew li jagħżel tranżazzjonijiet sabiex iħallas inqas VAT (11).

11.      Peress li abbuż ta’ liġi fil-qasam tal-VAT jista’ jirriżulta minkejja l-fatt li kummerċjant ikun formalment ikkonforma ruħu mal-leġiżlazzjoni tal-VAT, inqis li l-prinċipju inkwistjoni għandu japplika biss f’każijiet eċċezzjonali meta l-abbuż ikun evidenti u kwalunkwe rimedji għandhom japplikaw b’reqqa kbira u sa fejn biss jasal l-abbuż inkwistjoni. Fis-sentenza Halifax, il-Qorti tal-Ġustizzja pprovdiet li fin-nuqqas ta’ bażi legali ċara u mhux ambigwa, ma tistax tiġi imposta penali għas-sejbien ta’ prattika abbużiva (12). Minflok, it-tranżazzjonijiet involuti fi prattika abbużiva għandhom jiġu ddefiniti mill-ġdid sabiex tiġi stabbilita mill-ġdid is-sitwazzjoni li kienet tipprevali fin-nuqqas tat-tranżazzjonijiet li jikkostitwixxu prattika abbużiva (13).

12.      Fis-sentenza Halifax, il-Qorti tal-Ġustizzja stabbilixxiet test b’żewġ partijiet li għandu jiġi sodisfatt sabiex jinstab li kien hemm prattika abbużiva. L-ewwel nett, it-tranżazzjonijiet ikkonċernati, minkejja l-applikazzjoni formali tal-kundizzjonijiet stabbiliti mid-dispożizzjonijiet rilevanti tas-Sitt Direttiva u l-leġiżlazzjoni nazzjonali li tittrasponiha, jirriżultaw fl-akkumulazzjoni ta’ vantaġġ fiskali li l-għoti tiegħu jkun kuntrarju għall-għan ta’ dawn id-dispożizzjonijiet. It-tieni nett, għandu jkun evidenti wkoll minn numru ta’ fatturi oġġettivi li l-għan essenzjali tat-tranżazzjonijiet ikkonċernati hu li jinkiseb vantaġġ fiskali (14).

13.      It-test b’żewġ partijiet inkwistjoni, kif sottomess mill-Gvern Grieg, huwa kumulattiv fin-natura tiegħu. Għalhekk, sabiex tiġi stabbilita l-eżistenza ta’ prattika abbużiva għal finijiet ta’ VAT ma huwiex biżżejjed li jiġi ppruvat li tranżazzjoni partikolari tirriżulta fl-akkumulazzjoni ta’ vantaġġ fiskali jew li t-tranżazzjoni għandha essenzjalment l-għan li jinkiseb dan il-vantaġġ jew li ma għandha l-ebda bażi loġika jew spjegazzjoni oħra ħlief dik li jinkiseb dan il- vantaġġ. Deċiżjoni mod ieħor tirrestrinġi b’mod sinjifikattiv id-dritt rikonoxxut tal-kummerċjant li jillimita d-dejn fiskali tiegħu (15). Għaldaqstant huwa neċessarju li wieħed jistabbilixxi wkoll li t-tranżazzjoni tirriżulta f’vantaġġ fiskali li jkun kuntrarju għall-għan tas-Sitt Direttiva u l-leġiżlazzjoni nazzjonali li tittrasponiha.

14.      Mid-digriet tar-rinviju jidher li t-tieni parti tat-test ta’ Halifax intlaħaq fil-kawża prinċipali għax il-VAT and Duties Tribunal qies li l-għan essenzjali tal-arranġamenti tal-kiri u tas-sullokazzjoni rilevanti fil-kawża prinċipali kien il-ksib ta’ vantaġġ fiskali. Skont id-digriet tar-rinviju, l-arranġamenti rriżultaw, inter alia, f’vantaġġ ta’ cash-flow għal CARC u CML.

15.      Id-digriet tar-rinviju jipprovdi wkoll li f’dak il-kuntest, il-kera nżammet baxxa għax iżjed ma tkun għolja l-kera, iżjed ikun għoli l-VAT li ma jistax jiġi rkuprat dovut minn CML u CARC. Barra minn hekk, mid-digriet tar-rinviju jidher li skont il-ftehim tal-kiri bejn Weald Leasing u Suas, il-kera pagabbli fuq l-assi kienet ikkalkulata b’mod li jsir ħlas lura ta’ 100 % tal-ispiża lil Weald Leasing fi żmien għaxar snin, irrispettivament mit-tul tal-ħajja mistennija tal-assi/tagħmir speċifiċi inkwistjoni.

V –    L-ewwel u r-raba’ domandi

16.      Il-qorti tar-rinviju essenzjalment tistaqsi jekk l-arranġamenti kif stabbiliti hawn fuq jew kwalunkwe parti minnhom jirriżultawx fl-akkumulazzjoni ta’ vantaġġ fiskali li l-għoti tiegħu jkun kuntrarju għall-għan tas-Sitt Direttiva u l-leġiżlazzjoni nazzjonali li tittrasponiha.

17.      Weald Leasing issostni li fil-kuntest tal-VAT, wieħed mill-vantaġġi fiskali tal-kiri għal kummerċjanti eżentati jew parzjalment eżentati huwa l-possibbiltà li dan jifrex taxxa tal-input li ma tistax tiġi rkuprata għat-tul taż-żmien tal-kiri. Madankollu, dan il-vantaġġ fiskali, fih innifsu, ma huwiex biżżejjed sabiex jirrendi t-tranżazzjonijiet abbużivi għax huwa sempliċement l-effett fiskali tal-għażla tagħhom li huwa speċifikament ikkontemplat mis-Sitt Direttiva. Ma huwiex abbużiv għax ma nkisibx irregolarment. B’mod partikolari, ma kien hemm l-ebda tentattiv minn CML u CARC biex jirkupraw taxxa tal-input iktar minn dik li għaliha huma intitolati. Filwaqt li Weald Leasing kisbet vantaġġ ta’ cash-flow, ma kienx hemm iffrankar dirett tat-taxxa u qatt ma kien intiż li jkun hemm tali ffrankar. Skont Weald Leasing dan huwa fattur ewlieni ta’ distinzjoni bejn dan il-każ u l-Kawża C-223/03 (16) għax l-uniku element tal-arranġamenti tal-kiri li jistgħu jitqiesu bħala potenzjalment abbużivi huwa l-livell tal-kera. Weald Leasing tosserva li l-unika dispożizzjoni leġiżlattiva li setgħet potenzjalment inkisret hija l-paragrafu 1 tal-Anness 6 tal-Att tal-1994 dwar il-VAT li hija dispożizzjoni tal-liġi domestika li ma tittrasponix dispożizzjoni tas-Sitt Direttiva. Minflok, din hija eċċezzjoni għar-regola bażika tal-valutazzjoni fl-Artikolu 11A(1) tas-Sitt Direttiva, magħmula taħt deroga mogħtija lir-Renju Unit skont l-Artikolu 27(2) ta’ dik id-direttiva. Tali derogi ma jwasslux għal drittijiet jew obbligi tad-dritt Komunitarju (u issa tal-UE). (17) Konsegwentement, it-teorija tal-abbuż ta’ liġi skont id-dritt tal-UE ma tapplikax għal ksur tal-paragrafu 1 tal-Anness 6, li hija biss kwistjoni tad-dritt nazzjonali.

18.      Il-Gvern tar-Renju Unit iqis li minkejja d-dehra formali tal-kiri, l-arranġamenti inkwistjoni ma sarux skont kundizzjonijiet normali tas-suq u kienu tentattiv sfurzat u artifiċjali biex jaħbu r-realtà kummerċjali u ekonomika sottostanti li kienet dik li Churchill Group of companies, permezz ta’ CML u CARC, għażlet u xtrat l-assi għall-użu fin-negozju tal-assigurazzjoni eżentat tagħha. Effettivament, Weald Leasing ippruvat tiżgura l-vantaġġi tal-VAT mingħajr ma tassumi l-piżijiet ekonomiċi u kummerċjali relatati. Il-Gvern Grieg iqis li l-iskema tal-kiri inkwistjoni kellha bħala l-għan u l-effett tagħha li l-akkwisti tal-assi minn CARC u CML jiġu ntaxxati b’mod differenti minn akkwisti simili mill-kompetituri tagħhom li jipprovdu servizzi simili. L-applikazzjoni ta’ din l-iskema tikser il-prinċipju ta’ ugwaljanza fiskali u, b’estensjoni, il-prinċipju ta’ newtralità fiskali. L-Irlanda tqis li l-Grupp Churchill jipprovdi 99 % servizzi eżentati u, sa fejn it-taxxa tal-input tiegħu ma titnaqqasx, is-Sitt Direttiva għandha titqies bħala waħda li tipprovdi li l-piż tal-ħlas ta’ din it-taxxa jkun dovut minnufih hekk kif issir pagabbli, sabiex tgħaddi fuq il-konsumatur finali. Weald Leasing u Suas huma prinċipalment, jekk mhux hekk biss, mekkaniżmi biex dan jiġi evitat, u peress li dawn huma b’mod ċar artifiċjali, jikkostitwixxu abbuż. L-Irlanda ssostni li l-arranġamenti kollha tal-kiri jew il-parti l-kbira tagħhom huma artifiċjali u għaldaqstant abbużivi u mhux sempliċement il-livell ta’ ħlas ta’ kera. Il-Gvern Taljan iqis li struttura ta’ kiri intiża sabiex tippermetti li persuna taxxabbli prinċipalment eżentata tnaqqas l-ammont sħiħ tal-VAT tal-input imħallas fuq oġġetti jew servizzi mixtrija għan-negozju tagħha hija kuntrarju għall-prinċipju ta’ newtralità fiskali tal-VAT stipulat fis-Sitt Direttiva.

19.      Il-Kummissjoni tqis li l-kiri tal-assi ma jwassalx għal vantaġġ fiskali kuntrarju għall-għan tal-leġiżlazzjoni tal-VAT. Ma hemmx differenza f’termini ekonomiċi għall-Istat jekk l-assi humiex mixtrija jew mikrija. Filwaqt li d-differiment tal-piż tat-taxxa jista’ jitqies minn min iħallas it-taxxa li jipprovdi vantaġġ ta’ cash-flow, ikun qed iħallas għal dak il-vantaġġ fuq perijodu ta’ żmien twil. Il-Kummissjoni tqis ukoll li l-użu ta’ kumpannija tal-kiri dipendenti ma jikkostitwixxix fih innifsu abbuż ta’ liġi. Ir-riskju reali ta’ abbuż f’dawn iċ-ċirkustanzi jinsab fl-opportunità għal min iħallas it-taxxa li jimmanipula l-ammont tal-pagamenti tal-kiri sabiex inaqqas l-ammont ta’ VAT imħallas. Il-Kummissjoni tosserva li l-intervent ta’ Suas jidher li kellu l-iskop uniku li jipprekludi lill-awtoritajiet tat-taxxa jivverifikaw u jirrevedu l-kalkolu tal-ammont taxxabbli. Għalhekk, jidher li dik it-tranżazzjoni tissodisfa l-ewwel parti tat-test ta’ Halifax. Tranżazzjoni li għandha l-għan li tipprekludi l-infurzar effettiv tar-regoli tal-VAT għandha titqies li hija ekwivalenti għal waħda li għandha l-għan li tikseb vantaġġ kuntrarju għall-għan ta’ dawk ir-regoli.

20.      Fl-opinjoni tiegħi, u kif sottomess mill-Kummissjoni fl-osservazzjonijiet tagħha, kummerċjant huwa liberu, bħala prinċipju, li jagħżel jekk jixtrix jew jikrix l-assi/tagħmir (18) għall-użu tul il-kors tan-negozju tiegħu. Barra minn hekk, il-fatt li kummerċjant eżentat jagħżel li jidħol f’arranġament ta’ kiri fir-rigward tal-assi/tagħmir minflok jixtrihom direttament biex jibbenefika minn trattament iżjed favorevoli taħt il-leġiżlazzjoni tal-VAT, billi jiddifferixxi (19) il-piż tal-VAT tiegħu ma huwiex, fih innifsu, biżżejjed sabiex jiġi konkluż li sar abbuż ta’ dik il-leġiżlazzjoni. Meta kummerċjant jagħżel li jikri tagħmir, iħallas il-VAT fuq il-pagamenti perijodiċi tal-kera magħmula matul iż-żmien tal-kiri minflok pagament ta’ darba tal-VAT fuq ix-xiri ta’ dak it-tagħmir. Inqis li din it-tranżazzjoni ma hijiex fiha innifisha kuntrarja għall-għan tas-Sitt Direttiva u l-leġiżlazzjoni nazzjonali li tittrasponiha. Fl-opinjoni tiegħi, it-tranżazzjoni ma tiksirx neċessarjament il-prinċipju ta’ newtralità fiskali. Kif Weald Leasing u l-Kummissjoni indikaw, il-kiri minflok ix-xiri ta’ tagħmir fih innifsu ma jwassalx biex il-kummerċjant iħallas inqas VAT jew biex ikollu tnaqqis ta’ VAT iktar minn dak li għalih kummerċjant huwa intitolat. Għaldaqstant, filwaqt li jista’ jkun hemm vantaġġi ta’ cash-flow għall-kummerċjant, ma hemmx iffrankar tal-VAT inerenti fil-kiri minflok fix-xiri tat-tagħmir.

21.      Nikkunsidra li t-twaqqif u l-użu ta’ sussidjarja li hija kompletament proprjetà ta’ jew ‘dipendenti’, f’dan il-każ Weald Leasing, li għall-finijiet tal-VAT hija persuna li tħallas it-taxxa separata jew indipendenti, (20) bl-għan uniku li tikseb vantaġġ tal-VAT fil-forma ta’ differiment tal-VAT ma hijiex per se abbużiva, għax tali vantaġġ jista’ jinkiseb billi wieħed jidħol f’arranġament ta’ kiri taħt kundizzjonijiet normali tas-suq ma’ terza parti mhux relatata. (21). Għaldaqstant, l-adozzjoni ta’ struttura tal-kiri tal-assi li tinvolvi terz mhux konness jew sussidjarja li hija kompletament proprjetà tagħha li hija rreġistrata b’mod indipendenti għall-VAT minn kummerċjant prinċipalment eżentat minflok ix-xiri dirett tal-assi sabiex tiddiferixxi l-ħlas ta’ taxxa li ma tistax tiġi rkuprata ma twassalx fiha nnifisha għal vantaġġ fiskali li jmur kontra l-għan tas-Sitt Direttiva. Madankollu, meta l-ħlas tal-kera taħt l-arranġamenti tal-kera jiġi stabbilit f’livelli artifiċjalment baxxi, li ma jirriflettux it-tnaqqis tal-ammont tal-VAT pagabbli, dik il-parti tat-tranżazzjoni relatata mal-livell ta’ pagamenti minflok mal-kirja nnifisha tkun, fl-opinjoni tiegħi, kuntrarja għall-għan tas-Sitt Direttiva u l-leġiżlazzjoni nazzjonali li tittrasponiha.

22.      Fir-rigward tal-arranġamenti li jikkonċernaw lil Suas, id-digriet tar-rinviju jipprovdi li l-interpożizzjoni ta’ dik il-kumpannija bejn Weald Leasing u CARC u CML kienet tfisser li l-Kummissarji ma setgħux jagħtu deċiżjoni taħt l-Anness 6 (tal-Att tal-1994 dwar il-VAT). Mingħajr ħsara għal verifika mill-qorti tar-rinviju, jidher li sabiex il-Kummissarji jkunu jistgħu jagħtu deċiżjoni taħt l-Anness 6, u b’hekk jimplikaw li l-valur ta’ provvista hu kkalkulat skont il-valur tiegħu fis-suq miftuħ, il-Kummissarji għandhom juru, inter alia, li l-persuna li qed tagħmel il-provvista u l-persuna lil min issir huma konnessi (22) u li l-provvista kienet inqas mill-valur tagħha fis-suq miftuħ.

23.      Mid-digriet tar-rinviju jidher li Weald Leasing innifisha argumentat quddiem il-qorti tar-rinviju li “l-vantaġġ fiskali reali miksub mill-parteċipanti ħareġ mill-interpożizzjoni ta’ Suas, u b’hekk evita deċiżjoni taħt l-Anness 6”. Fis-sottomissjonijiet tagħha quddiem il-Qorti tal-Ġustizzja, Weald Leasing ikkunsidrat li l-prinċipju tal-abbuż japplika biss għal vantaġġi fiskali li huma kuntrarji għad-dispożizzjonijiet tad-dritt Komunitarju u mhux għal tentattivi sabiex tiġi evaża l-liġi domestika.

24.      Nikkunsidra li s-sottomissjoni ta’ Weald Leasing ma tistax tiġi aċċettata. Mill-proċess quddiem il-Qorti tal-Ġustizzja u mingħajr ħsara għall-verifika mill-qorti tar-rinviju jidher li l-paragrafu 1 tal-Anness 6 tal-Att tal-1994 dwar il-VAT sar skont deroga skont l-Artikolu 27 tas-Sitt Direttiva. (23) Fil-fehma tiegħi, id-dispożizzjonijiet tal-leġiżlazzjoni nazzjonali li ġew adottati skont id-derogi stabbiliti fl-Artikolu 27 tas-Sitt Direttiva jiffurmaw parti integrali mis-sistema nazzjonali tal-VAT, jorbtu fuq persuna taxxabbli skont il-liġi nazzjonali (24) u jistgħu jintużaw kontra dik il-persuna mill-awtoritajiet tat-taxxa ta’ Stat Membru quddiem il-qrati nazzjonali (25). Għall-finijiet tal-applikazzjoni mill-qrati nazzjonali tal-prinċipju ta’ abbuż ta’ liġi kif stabbilit fis-sentenza Halifax, kwalunkwe distinzjoni bejn id-dispożizzjonijiet nazzjonali li jimplementaw id-dispożizzjonijiet tas-Sitt Direttiva u dawk li ġew adottati b’konformità sħiħa ma’ deroga permessa skont dik id-direttiva hija, fl-opinjoni tiegħi, artifiċjali u għandha tendenza li xxekkel l-integrità tas-sistema nazzjonali tal-VAT u indirettament is-sistema tal-VAT tal-UE.

25.      Għaldaqstant nikkunsidra li l-prinċipju ta’ abbuż ta’ liġi kif stabbilit fis-sentenza Halifax (26) japplika għal abbużi ta’ dispożizzjonijiet nazzjonali li ġew adottati b’konformità sħiħa mat-termini tal-Artikolu 27 tas-Sitt Direttiva. Fir-rigward tal-applikazzjoni ta’ dak il-prinċipju fil-kawża prinċipali li hija kwistjoni għall-qorti nazzjonali, nikkunsidra li huwa prattika abbużiva l-użu ta’ struttura purament artifiċjali essenzjalment maħsuba sabiex jinkiseb vantaġġ fiskali billi tipprekludi lill-awtoritajiet tat-taxxa milli jiddeċiedu, skont id-dispożizzjonijiet tal-liġi nazzjonali adottata b’konformità sħiħa mas-Sitt Direttiva, li l-valur tal-arranġamenti tal-kiri bejn persuni konnessi jitqies li huwa l-valur tagħhom fis-suq miftuħ.

26.      Permezz tar-raba’ domanda tagħha, il-qorti tar-rinviju tistaqsi dwar kif għandhom jiġu ddefiniti mill-ġdid l-arranġamenti f’każ li l-istruttura tal-kiri tal-assi jew kwalunkwe parti minnha jinstabu li jikkostitwixxu prattika abbużiva.

27.      Fil-punt 94 tas-sentenza Halifax, il-Qorti tal-Ġustizzja qieset li t-tranżazzjonijiet involuti fi prattika abbużiva għandhom jiġu ddefiniti mill-ġdid sabiex tiġi stabbilita mill-ġdid is-sitwazzjoni li kienet tipprevali fin-nuqqas tat-tranżazzjonijiet li jikkostitwixxu prattika abbużiva. Mill-evalwazzjoni tiegħi tal-ewwel domanda dwar l-eżistenza u l-limitu tal-abbuż fil-kawża prinċipali jsegwi li jekk il-qorti nazzjonali tiddeċiedi li l-interpożizzjoni ta’ Suas fl-arranġamenti rilevanti kienet artifiċjalment orkestrata essenzjalment għall-iskop tal-prevenzjoni ta’ deċiżjoni skont il-Paragrafu 1 tal-Anness 6 (tal-Att tal-1994 dwar il-VAT) sabiex jinkiseb vantaġġ fiskali, l-awtoritajiet tat-taxxa tar-Renju Unit għandhom ikunu intitolati, kif indikat mill-Kummissjoni fis-sottomissjonijiet tagħha, li jqisu s-serje ta’ tranżazzjonijiet fil-kawża prinċipali bħala kirjiet minn Weald Leasing lil CML u CARC biex b’hekk jiżguraw li l-VAT titħallas fuq valutazzjoni ta’ dawk il-kirjiet fis-suq miftuħ (27).

28.      Għaldaqstant, meta struttura purament artifiċjali tiġi adottata f’arranġamenti ta’ kiri sabiex ma tħallix lill-awtoritajiet tat-taxxa milli jiddeċiedu, skont id-dispożizzjonijiet tal-liġi nazzjonali adottata b’konformità sħiħa ma’ deroga permessa skont is-Sitt Direttiva, li l-valur ta’ dawk l-arranġamenti bejn persuni konnessi jittieħed li hu l-valur fis-suq miftuħ, dawk l-arranġamenti għandhom jiġu ddefiniti mill-ġdid billi ma titqiesx il-preżenza ta’ dik l-istruttura.

VI – It-tieni u t-tielet domandi

29.      Permezz tat-tieni domanda tagħha, il-qorti tar-rinviju tistaqsi dwar jekk hijiex prattika abbużiva għal kummerċjant eżentat, jew parzjalment eżentat, li jinvolvi ruħu fil-kiri tal-assi avolja fil-kuntest tat-“tranżazzjonijiet kummerċjali normali” tiegħu, huwa ma jagħmilx hekk. Permezz tat-tielet domanda tagħha, il-qorti tar-rinviju tagħmel numru ta’ domandi dwar l-interpretazzjoni u l-applikazzjoni tat-termini “tranżazzjonijiet kummerċjali normali”.

30.      L-espressjoni “tranżazzjonijiet kummerċjali normali” tintuża f’żewġ paragrafi tas-sentenza Halifax. Fil-punt 69 tas-sentenza Halifax, il-Qorti tal-Ġustizzja stipulat prinċipju wiesa’ li tranżazzjonijiet li ma humiex imwettqa fil-kuntest ta’ tranżazzjonijiet kummerċjali normali għandhom jiġu kkunsidrati abbużivi meta l-iskop tagħhom huwa dak li jittieħed b’mod abbużiv vantaġġ previst mid-dritt tal-UE. Fil-punt 80 tas-sentenza, il-Qorti tal-Ġustizzja qieset li “li tippermetti li persuni taxxabbli jnaqqsu t-totalità ta’ l-input VAT imħallsa filwaqt li, fil-kuntest tat-tranżazzjonijiet kummerċjali normali tagħhom, ebda tranżazzjoni konformi mad-dispożizzjonijiet tas-sistema ta’ tnaqqis tas-Sitt Direttiva jew tal-leġiżlazzjoni nazzjonali li tittrasponiha ma tippermettilhom li jnaqqsu l-imsemmija VAT, jew tippermettilhom li jnaqqsu parti biss, ikun kuntrarju għall-prinċipju tan-newtralità fiskali u, għalhekk, kuntrarju għall-għan ta’ l-imsemmija sistema”. Il-Qorti tal-Ġustizzja pprovdiet ukoll fil-punt 81 tas-sentenza Halifax li “[f]ir-rigward tat-tieni element [tat-test b’żewġ partijiet], li skond dawn it-tranżazzjonijiet in kwistjoni kellhom ikollhom bħala skop essenzjali li jinkiseb vantaġġ fiskali, hemm lok li jiġi mfakkar li hija l-qorti nazzjonali li għandha tistabbilixxi l-kontenut u t-tifsira vera tat-tranżazzjonijiet in kwistjoni. B’dan, hija tista’ tieħu inkunsiderazzjoni l-karattru purament artifiċjali ta’ dawn it-tranżazzjonijiet kif ukoll ir-rabtiet ta’ natura ġuridika, ekonomika u/jew personali bejn l-operaturi involuti fil-pjan ta’ tnaqqis tal-piż tat-taxxa.”

31.      Ir-riferiment għal “tranżazzjonijiet kummerċjali normali” hi mandakollu nieqsa fis-sentenza Part Service (28) minkejja li l-Qorti tal-Ġustizzja qagħdet fuq it-test b’żewġ partijiet stabbilit fil-punti 74 u 75 tas-sentenza Halifax (29). Fis-sentenza Ampliscientifica u Amplifin (30) il-Qorti tal-Ġustizzja fil-punti 27 u 28 qieset li “[l]-prinċipju tal-projbizzjoni tal-abbuż ta’ dritt huwa intiż li jiżgura, b’mod partikolari fil-qasam tal-VAT, li l-leġiżlazzjoni Komunitarja ma tkunx tinftiehem bħala li tkopri l-prattiċi abbużivi ta’ operaturi ekonomiċi, jiġifieri t-tranżazzjonijiet li huma mwettqa mhux fil-kuntest ta’ tranżazzjonijiet kummerċjali normali, iżda biss bl-għan li jibbenefikaw b’mod abbużiv mill-vantaġġi previsti mid-dritt Komunitarju. Għalhekk, dan il-prinċipju jwassal sabiex jiġu pprojbiti skemi purament artifiċjali, nieqsa mir-realtà ekonomika, li jitwettqu bl-għan li jinkiseb vantaġġ fiskali.”

32.      Nikkunsidra li t-termini “tranżazzjonijiet kummerċjali normali” ma jeħtieġux eżami tal-attività tan-negozju “tipika” ta’ kummerċjant partikolari. (31). Għaldaqstant il-kunċett ta’ “tranżazzjonijiet kummerċjali normali” fil-kuntest tal-abbuż tal-VAT ma huwiex relatat mal-operazzjonijiet li intraprenditur normalment jinvolvi ruħu fihom. Li jsir tentattiv li wieħed jixtarr x’inhuma l-operazzjonijiet kummerċjali tipiċi jew normali ta’ kummerċjant partikolari hi, fl-opinjoni tiegħi, eżerċizzju li fih innifsu ma huwiex prevedibbli (32) u għaldaqstant ma jirnexxix f’kuntest ta’ liġi tat-taxxa fejn iċ-ċertezza legali hi meħtieġa.

33.      Valutazzjoni ta’ jekk tranżazzjoni titwettaqx fil-kuntest ta’ “tranżazzjonijiet kummerċjali normali” tirreferi, fl-opinjoni tiegħi, għat-tieni parti (33) tat-test b’żewġ friegħi stabbiliti fis-sentenza Halifax u għaldaqstant in-natura tat-tranżazzjoni jew skema inkwistjoni u jekk hijiex ħolqien purament artifiċjali stabbilit essenzjalment għall-kisba ta’ vantaġġ fiskali iżjed milli għal raġunijiet kummerċjali (34). F’dan ir-rigward, ir-rabtiet ta’ natura legali, ekonomika u/jew personali bejn l-operaturi involuti fl-iskema għat-tnaqqis tal-piż tat-taxxa (35) huma rilevanti u għaldaqstant jekk il-partijiet fi tranżazzjoni joperawx fil-kundizzjonijiet normali tas-suq (36). Barra minn hekk, il-kwistjoni ta’ jekk tranżazzjoni twassalx għal piżijiet u riskji kummerċjali tipikament assoċjati ma’ dawn it-tranżazzjonijiet hi rilevanti għall-evalwazzjoni tan-natura artifiċjali tat-tranżazzjoni u għaldaqstant jekk l-għan essenzjali tagħha huwiex il-ksib ta’ vantaġġ fiskali. Barra minn hekk nosserva li hi n-natura oġġettiva tat-tranżazzjoni (37) li hi rilevanti f’din l-evalwazzjoni iżjed milli l-motivazzjoni suġġettiva tal-persuna li tħallas it-taxxa.

VII – Konklużjoni

34.      Fid-dawl ta’ dawn l-osservazzjonijiet, nipproponi li l-Qorti tal-Ġustizzja għandha twieġeb kif ġej għad-domandi preliminari tal-Court of Appeal (England and Wales):

1.      L-adozzjoni ta’ struttura għall-kiri tal-assi li tinvolvi terz mhux konness jew sussidjarja miżmuma kompletament bi proprjetà li hija indipendentement irreġistrata għat-taxxa fuq il-valur miżjud minn kummerċjant fil-parti l-kbira eżentat minflok ix-xiri dirett tal-assi sabiex il-ħlas ta’ taxxa li ma tistax tiġi rkuprata jiġi ddifferit, ma tagħtix, fiha nnifisha, vantaġġ fiskali kuntrarju għall-għan tas-Sitt Direttiva tal-Kunsill 77/388/KEE tas-17 ta’ Mejju 1977 fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ - Sistema komuni ta’ taxxa fuq il-valur miżjud: bażi uniformi ta’ stima.

2.      L-użu ta’ struttura purament artifiċjali essenzjalment maħsuba għall-ksib ta’ vantaġġ fiskali billi tipprekludi lill-awtoritajiet tat-taxxa milli jiddeċiedu skont id-dispożizzjonijiet tal-liġi nazzjonali adottati b’konformità sħiħa mas-Sitt Direttiva 77/388 li l-valur tal-arranġamenti tal-kiri bejn persuni konnessi jitqies li hu l-valur fis-suq miftuħ, jikkostitwixxi prattika abbużiva.

3.      Meta jirriżulta li jkun hemm prattika abbużiva, it-tranżazzjonijiet involuti għandhom jiġu ddefiniti mill-ġdid sabiex tiġi stabbilita mill-ġdid is-sitwazzjoni li kienet tipprevali fin-nuqqas tat-tranżazzjonijiet li jikkostitwixxu prattika abbużiva. Meta struttura purament artifiċjali tiġi adottata f’arranġamenti tal-kiri essenzjalment sabiex tipprekludi lill-awtoritajiet tat-taxxa milli jiddeċiedu li l-valur ta’ dawk l-arranġamenti bejn persuni konnessi jitqies li hu l-valur tagħhom fis-suq miftuħ, dawk l-arranġamenti għandhom jiġu ddefiniti mill-ġdid billi tiġi injorata l-preżenza ta’ dik l-istruttura.

4.      Il-kunċett ta’ “tranżazzjonijiet kummerċjali normali” fil-kuntest ta’ abbuż ta’ taxxa fuq il-valur miżjud ma huwiex marbut mal-operazzjonijiet li persuna suġġetta għat-taxxa tipikament jew normalment tinvolvi ruħha fihom. Evalwazzjoni ta’ jekk tranżazzjoni titwettaqx fil-kuntest ta’ “tranżazzjonijiet kummerċjali normali” tirreferi għan-natura tat-tranżazzjoni jew l-iskema inkwistjoni u jekk din hijiex ħolqien purament artifiċjali stabbilita essenzjalment għall-ksib ta’ vantaġġ fiskali iżjed milli għal raġunijiet kummerċjali. Ir-rabtiet ta’ natura legali, ekonomika u/jew personali bejn l-operaturi involuti fl-iskema għat-tnaqqis tal-piż tat-taxxa u għaldaqstant jekk il-partijiet fi tranżazzjoni joperawx taħt kundizzjonijiet normali tas-suq, il-kwistjoni dwar jekk tranżazzjoni twassalx għal piżijiet u riskji tipikament assoċjati ma’ tali tranżazzjonijiet huma rilevanti għall-finijiet tal-evalwazzjoni tan-natura tat-tranżazzjoni.

1 – Lingwa oriġinali: l-Ingliż.

2 – Sentenza tal-21 ta’ Frar 2006, Halifax et (C-255/02, Ġabra p. I-1609), iktar ’il quddiem is-“sentenza Halifax”.

3 – Sentenza tal-21 ta’ Frar 2008, Part Service (C-425/06, Ġabra p. I-897).

4 – Sentenza tat-22 ta’ Mejju 2008, Ampliscientifica u Amplifin (C-162/07, Ġabra p. I-4019).

5 – Ara l-Artikolu 13 B tas-Sitt Direttiva tal-Kunsill 77/388/KEE tas-17 ta’ Mejju 1977 fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ - Sistema komuni ta’ taxxa fuq il-valur miżjud: bażi uniformi ta’ stima (ĠU L 145, p. 1, iktar ’il quddiem is-“Sitt Direttiva”) li tipprovdi, inter alia, li l-Istati Membri għandhom jeżentaw tranżazzjonijiet tal-assigurazzjoni. Ara issa l-Artikolu 135(1) tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxi fuq il-valur miżjud (ĠU 2006 L 347, p. 1) (“id-Direttiva tal-VAT”).

6 – Weald Leasing hija sussidjarja kompletament proprjetà ta’ CML u hija rreġistrata għall-VAT b’mod indipendenti.

7 – Ara l-Artikolu 17(2) u (5) tas-Sitt Direttiva, ara issa l-Artikoli 168 u 173 tad-Direttiva tal-VAT.

8 – Iċċitata fin-nota ta’ qiegħ il-paġna 2.

9 – Punt 1(1) fl-Anness 6 tal-Att tal-1994 dwar il-VAT jipprovdi:

      “1(1) Fejn –

      (a) il-valur tal-provvista ta’ prodott jew servizz magħmula minn persuna taxxabbli għal ħlas fi flus huwa (apparti dan il-paragrafu) inqas mill-valur fis-suq miftuħ tagħha, u

      (b) il-persuna li tagħmel il-provvista u l-persuna lil lilha issir ikunu konnessi, u

      (c) jekk il-provvista hi provvista taxxabbli, il-persuna li lilha ssir il-provvista ma tkunx intitolata taħt l-Artikoli 25 u 26 għal kreditu għall-VAT kollu fuq il-provvista,

      il-Kummissarji jistgħu jiddeċiedu li l-valur ta’ din il-provvista għandu jiġi kkunsidrat li huwa l-valur tagħha fis-suq miftuħ.”

10 – Il-High Court aċċettat is-sottomissjoni tal-Kummissarji li CML, CARC, Weald Leasing u Suas ma kellhomx ir-riskji ekonomiċi u kummerċjali ordinarji tipikament assoċjati mal-kiri tal-assi. Hija aċċettat li l-arranġamenti tal-kiri kienu “kummerċjalment artifiċjali” għax kienu differenti ħafna minn dak li hu mistenni minn partijiet li jkunu distakkati minn xulxin u kellhom ħafna fi ħsiebhom l-għan li jaġixxu bħallikieku kienu qegħdin jagħmlu operazzjonijiet kummerċjali normali. Hija aċċettat ukoll li minkejja li l-arranġamenti tal-kiri ma kinux fittizji u minkejja tentattivi biex jingħatawlhom id-dehra esterna ta’ arranġamenti kummerċjali familjari, it-tranżazzjonijiet kienu artifiċjali fis-sens li ħlief għall-għan essenzjali li jinkiseb vantaġġ fiskali, qatt ma kienu jsiru fi kwalunkwe kuntest kummerċjali. Għaldaqstant, il-High Court aċċettat li t-tranżazzjonijiet ma kinux jaqgħu fl-operazzjonijiet kummerċjali normali tal-partijiet. Madankollu, wara li rreferiet għall-paragrafi 69 sa 80 tas-sentenza Halifax tal-Qorti tal-Ġustizzja (iċċitata fin-nota ta’ qiegħ il-paġna 2), l-Imħallef ikkonkluda li s-sempliċi fatt li skema ma kinitx taqa’ fl-operazzjonijiet kummerċjali normali, ma fissirx li din kienet tammonta għal prattika abbużiva. F’dan il-kuntest, l-Imħallef osserva li l-Qorti tal-Ġustizzja ma rreferietx għal “tranżazzjonijiet kummerċjali normali” la fil-punt 74 u lanqas fil-punt 86 tas-sentenza tagħha meta stabbilixxiet l-ewwel kundizzjoni għall-applikazzjoni tat-teorija tal-abbuż ta’ liġi. Huwa kkonkluda li, kieku l-Qorti tal-Ġustizzja kellha l-intenzjoni li tqis bħala importanti r-referimenti għal “tranżazzjonijiet kummerċjali normali” fil-paragrafi 69 u 80 tas-sentenza Halifax tagħha, hija kienet tispjega iktar x’kienet qed tfisser b’dan it-terminu.

11 – Ara s-sentenza Halifax (iċċitata fin-nota ta’ qiegħ il-paġna 2), punti 69 sa 73.

12 – Ara s-sentenza Halifax (iċċitata fin-nota ta’ qiegħ il-paġna 2), punt 93.

13 – Ara s-sentenza Halifax (iċċitata fin-nota ta’ qiegħ il-paġna 2), punt 94.

14 – Ara s-sentenza Halifax (iċċitata fin-nota ta’ qiegħ il-paġna 2), punti 74 u 75.

15 – Ara s-sentenza Halifax (iċċitata fin-nota ta’ qiegħ il-paġna 2), punt 73.

16 – Sentenza tal-21 ta’ Frar 2006, University of Huddersfield (C-223/03, Ġabra p. I-1751).

17 – Sentenza tal-10 ta’ April 2008, Marks & Spencer (C-309/06, Ġabra p. I-2283, punt 28).

18 – Il-kiri tat-tagħmir jikkostitwixxi, bħala prinċipju, provvista ta’ servizzi skont l-Artikolu 6(1) tas-Sitt Direttiva u l-Artikolu 24(1) tad-Direttiva tal-VAT.

19 – Għall-kuntrarju, nosserva li l-Irlanda tgħid fin-noti tagħha li l-prinċipju ta’ newtralità fiskali jeħtieġ li persuna li ma hijiex intitolata biex tnaqqas it-taxxa meta ssir dovuta għandha tkun responsabbli sabiex iġġorr il-piż tan-nuqqas tat-tnaqqis tagħha billi tħallasha f’dak il-mument partikolari.

20 – Skont l-Artikolu 4 tas-Sitt Direttiva, persuna taxxabbli tfisser kull persuna li b’mod indipendenti twettaq fi kwalunkwe post attività ekonomika msemmija fil-paragrafu 2, ikun x’ikun l-iskop jew ir-riżultati ta’ dik l-attività.

21 – Ara, b’analoġija, is-sentenza tas-27 ta’ Jannar 2000, Heerma (C-23/98, Ġabra p. I-419). F’din is-sentenza, il-Qorti tal-Ġustizzja qieset li soċju f’għaqda ta’ sħubija li kera proprjetà immobbli lill-għaqda li fiha huwa soċju u li hija fiha nnifisha persuna taxxabbli jaġixxi b’mod indipendenti skont it-tifsira tal-Artikolu 4(1) tas-Sitt Direttiva. Il-Qorti tal-Ġustizzja osservat li ma kienx hemm relazzjoni ta’ min iħaddem u impjegat simili għal dik imsemmija fl-ewwel subparagrafu tal-Artikolu 4(4) tas-Sitt Direttiva bejn l-għaqda ta’ sħubija u s-soċju li xxekkel l-indipendenza tas-soċju. Bil-kiri ta’ proprjetà tanġibbli lill-għaqda ta’ sħubija, is-soċju aġixxa f’ismu proprju u taħt ir-responsabbiltà tiegħu, minkejja li fl-istess żmien huwa kien maniġer tal-għaqda ta’ sħubija inkwilina. Għaldaqstant, fil-fehma tiegħi, minn dan isegwi li s-sempliċi eżistenza ta’ relazzjoni mill-qrib bejn iż-żewġ persuni li jħallsu t-taxxa ma hijiex biżżejjed sabiex l-awtoritajiet tat-taxxa jitrattawhom bħala persuna waħda. Ara min-naħa l-oħra, is-sentenza tat-18 ta’ Ottubru 2007, van der Steen (C-355/06, Ġabra p. I-8863). Il-Qorti tal-Ġustizzja ddeċidiet f’dik is-sentenza li kien hemm relazzjoni ta’ min jimpjega/impjegat bejn kumpannija u direttur tagħha. Il-Qorti tal-Ġustizzja stabbilixxiet, l-ewwel nett, li l-kumpannija kienet ħallset lid-direttur salarju fiss fix-xahar u pagament ta’ btala annwali. Il-kumpannija naqqset it-taxxa tad-dħul u l-kontribuzzjonijiet tas-sigurtà soċjali mis-salarju tiegħu. It-tieni nett, fiż-żmien tal-provvista tas-servizzi fil-kapaċità tiegħu bħala impjegat, id-direttur ma aġixxiex f’ismu proprju u taħt ir-responsabbiltà tiegħu, iżda għan-nom u taħt ir-responsabbiltà tal-kumpannija. It-tielet nett, id-direttur ma assuma ebda riskju tan-negozju ekonomiku meta aġixxa bħala maniġer u wettaq ix-xogħol fil-kors tan-negozju tal-kumpannija ma’ terzi.

22 – Jidher mill-fajl li jekk l-arranġamenti tal-kiri inkwistjoni ma involvewx lil Suas, li ma hijiex parti mill-Grupp Churchill u li ma hijiex formalment konnessa ma’ Weald Leasing jew CARC jew CML, l-awtoritajiet tat-taxxa nazzjonali kienu jkunu kapaċi li jagħtu deċiżjoni li l-valur tal-provvisti inkwistjoni jiġi kkunsidrat li hu l-valur fis-suq miftuħ.

23 – L-Artikolu 27(1) tas-Sitt Direttiva jipprovdi li “[i]l-Kunsill, jaġixxi b’mod unanimu fuq proposta mill-Kummissjoni, jista’ jawtorizza kwalunwe Stat Membru biex jintroduċi miżuri speċjali għal deroga mid-disposizzjonijiet ta’ din id-Direttiva, biex tissimplifika l-proċedura għall-ġbir tat-taxxa jew biex iżommu ċertu tipi ta’ evażjoni tat-taxxa jew evitar […]”. Il-proċedura għal din l-awtorizzazzjoni hi stabbilita fl-Artikolu 27(2) sa (4) tas-Sitt Direttiva. Skont l-Artikolu 27(5) “[d]awk l-Istati Membri li applikaw fl-1 ta’ Jannar 1977 miżuri speċjali tat-tip msemmija fil-paragrafu 1 fuq jistgħu iżommuhom dejjem jekk jinnotifikaw lill-Kummissjoni bihom qabel l-1 ta’ Jannar 1978 u jipprovdu li fejn it-tali derogi huma maħsuba biex jissimplifikaw il-proċedura għall-ġbir tat-taxxa huma jikkonformaw mal-ħtieġa stabbilita fil-paragrafu 1 fuq”.

24 – Ara, b’analoġija, is-sentenza Marks & Spencer, iċċitata fin-nota ta’ qiegħ il-paġna 17, punti 20 sa 28. Fl-opinjoni tiegħi, dik is-sentenza tipprovdi li persuna li tħallas it-taxxa ma tiksibx dritt infurzabbli direttament skont id-dritt tal-UE fir-rigward ta’ eżenzjonijiet jew derogi adottati minn Stat Membru b’konformità mas-Sitt Direttiva. Ara madankollu, il-konklużjonijiet tal-Avukat Ġenerali Kokott f'dik il-kawża fejn din effettivament tgħid li persuna li tħallas it-taxxa tikseb dritt kemm skont id-dritt nazzjonali u kif ukoll skont id-dritt tal-UE. Ara l-punt 43 tal-konklużjonijiet.

25 – Ara b’analoġija, is-sentenza tat-13 ta’ Frar 1985, Direct Cosmetics (5/84, Ġabra p. 617, punt 37).

26 – Iċċitata fin-nota ta’ qiegħ il-paġna 2.

27 – Sentenza Halifax, iċċitata fin-nota ta’ qiegħ il-paġna 2. Valutazzjoni tal-valur ta’ arranġament tal-kiri fis-suq miftuħ neċessarjament jimplika t-teħid inkunsiderazzjoni tat-tul taż-żmien ta’ dawk l-arranġamenti fid-dawl tan-natura tal-assi/tagħmir inkwistjoni.

28 – Iċċitata fin-nota ta’ qiegħ il-paġna 3.

29 – Iċċitata fin-nota ta’ qiegħ il-paġna 2.

30 – Iċċitata fin-nota ta’ qiegħ il-paġna 4.

31 – Minkejja l-inklużjoni tat-termini “tranżazzjonijiet kummerċjali normali tagħhom” (enfasi miżjuda) fil-punt 80 tas-sentenza Halifax (iċċitata fin-nota ta’ qiegħ il-paġna 2).

32 – Ġaladarba l-operazzjonijiet tan-negozju ta’ kummerċjant jistgħu jinbidlu u jevolvu maż-żmien.

33 – Ara, għaldaqstant, il-punt 75 tas-sentenza Halifax (iċċitat fin-nota ta’ qiegħ il-paġna 2).

34 – Il-qorti tar-rinviju użat it-termini “kummerċjalment vijabbli” fid-domanda tagħha 3(b)(3). Peress li dak it-termini jista’ jfisser tranżazzjoni li fin-natura tagħha hi ta’ profitt, se nevita li nuża dak it-terminu.

35 – Ara s-sentenza Halifax (iċċitata fin-nota ta’ qiegħ il-paġna 2), punt 81.

36 – Fil-fehma tiegħi, il-qorti tar-rinviju għandha teżamina u tiżen it-termini kuntrattwali applikabbli u ċ-ċirkustanzi rilevanti kollha.

37 – Ara l-punt 75 tas-sentenza Halifax (iċċitata fin-nota ta’ qiegħ il-paġna 2).