Available languages

Taxonomy tags

Info

References in this case

Share

Highlight in text

Go

KONKLUŻJONIJIET TAL-AVUKAT ĠENERALI

MAZÁK

ippreżentati fl-24 ta’ Mejju 2012 (1)

Kawża C-160/11

Bawaria Motors Sp. z o. o.

vs

Minister Finansów

[talba għal deċiżjoni preliminari mressqa min-Naczelny Sąd Administracyjny (il-Polonja)]

“Direttiva 2006/112/KE — VAT — Arranġamenti speċjali għan-negozjanti taxxabbli — Bejgħ ta’ vetturi użati lil konsumatur finali — Applikazzjoni tal-iskema tal-marġni ta’ profitt meta n-negozjant ikun xtara l-vettura eżentata mit-taxxa mingħand persuna li hi nnifisha kienet eżerċitat id-dritt li tnaqqas parti mit-taxxa tal-input”






1.        Permezz ta’ din it-talba għal deċiżjoni preliminari, il-Qorti tal-Ġustizzja qiegħda tiġi mitluba tikkjarifika jekk l-iskema speċjali “tal-marġni ta’ profitt” — arranġamenti li permezz tagħhom it-taxxa fuq il-valur miżjud (iktar ’il quddiem il-“VAT”) tiġi imposta biss fuq il-marġni (2) ta’ negozjant taxxabbli, b’mod speċifiku fil-kuntest tal-bejgħ mill-ġdid ta’ karozzi personali użati, irregolati mill-Artikolu 311 et seq tad-Direttiva tal-Kunsill 2006/112/KE (3) — hijiex applikabbli f’sitwazzjoni fejn in-negozjant taxxabbli jkun xtara dawk il-vetturi mingħand persuni taxxabbli li, meta huma jkunu akkwistaw dawk il-vetturi jkunu eżerċitaw dritt parzjali ta’ tnaqqis fir-rigward tat-taxxa tal-input max-xiri ta’ dawk l-oġġetti.

I –    Il-kuntest ġuridiku

2.        Jien ser nispjega d-dispożizzjonijiet rilevanti tal-qafas ġuridiku tal-UE iktar ’l isfel, fil-kuntest tal-evalwazzjoni tiegħi. F’dak li jirrigwarda l-qafas ġuridiku nazzjonali, l-Artikolu 43(1)(2) tal-Liġi Pollakka dwar il-VAT (4), fil-verżjoni applikabbli fil-kawża prinċipali, jipprovdi li “il-provvista ta’ oġġetti użati għandha tkun eżentata mit-taxxa, sakemm fir-rigward ta’ dawn l-oġġetti l-persuna li tkun qed tipprovdihom ma kellhiex id-dritt li tnaqqas it-taxxa tal-input mill-ammont tat-taxxa dovuta”.

3.        Sal-31 ta’ Diċembru 2010, l-Artikolu 86(3) tal-Liġi dwar il-VAT kien jipprovdi li: “fil-każ ta’ xiri ta’ karozzi personali u vetturi oħra bil-mutur li l-piż totali awtorizzat tagħhom ma jaqbiżx it-3.5 tunnellati, l-ammont ta’ taxxa tal-input għandu jkun ta’ 60 % [sat-22 ta’ Awissu 2005: 50 %, suġġett għal kundizzjonijiet kemxejn differenti applikati skont metodu partikolari] tal-ammont ta’ taxxa ddikjarat fil-fattura jew tal-ammont ta’ taxxa dovuta fuq l-akkwist intra-Komunitarju tal-oġġetti jew tal-ammont ta’ taxxa dovuta fuq il-provvista ta’ oġġetti li jkunu nxtraw minn persuna taxxabbli, iżda mhux iżjed minn PLN 6 000 [sat-22 ta’ Awissu 2005: PLN 5 000, suġġett għal kundizzjonijiet kemxejn differenti applikati skont metodu partikolari].”

4.        L-Artikolu 120 tal-Liġi dwar il-VAT jipprovdi li:

“1.      […]

(4)      Għall-iskopijiet ta’ dan il-kapitolu, “oġġetti użati” tfisser proprjetà mobbli tanġibbli li tista’ tkompli tintuża kif inhi jew inkella wara li tissewwa, u li ma hijiex waħda minn dawk l-oġġetti msemmija fil-paragrafi 1 sa 3 [dawk il-paragrafi jirrigwardaw xogħolijiet artistiċi, oġġetti tal-kollezzjoni u antikitajiet u ma japplikawx fil-kawża inkwistjoni] u li ma hijiex oġġett tal-metall prezzjuż jew ħaġar prezzjuż […]

[…]

4.      Fil-każ ta’ persuna taxxabbli li tkun qed twettaq transazzjonijiet li jikkonsistu fil-provvista ta’ oġġetti użati, xogħolijiet artistiċi, oġġetti tal-kollezzjoni jew antikitajiet li jkunu ġew preċedentement akkwistati minn dik il-persuna taxxabbli għall-iskopjijiet tal-attività mwettqa jew inkella importati bl-iskop li jerġgħu jinbiegħu, l-ammont taxxabbli għandu jkun id-differenza bejn l-ammont totali li għandu jħallas min ikun qed jakkwista dawn l-oġġetti u l-ammont tal-akkwist, nieqes l-ammont tat-taxxa.

[…]

10.      Il-paragrafi 4 u5 jirrigwardaw il-provvista ta’ oġġetti użati, xogħolijiet artistiċi, oġġetti tal-kollezzjoni jew antikitajiet li persuna taxxabbli tkun akkwistat mingħand:

(1)      persuna fiżika, persuna ġuridika, jew unità organizzattiva mingħajr personalità ġuridika li ma hijiex persuna taxxabbli taħt l-Artikolu 15, jew li ma hijiex persuna taxxabbli għall-iskopijiet tal-VAT;

(2)      persuni taxxabbli msemmija fl-Artikolu 15, meta l-provvista ta’ dawk l-oġġetti kienet eżentata mit-taxxa skont l-Artikolu 43(1)(2) jew l-Artikolu 113;

(3)      persuni taxxabbli, meta l-provvista ta’ dawk l-oġġetti tkun ġiet intaxxata skont il-paragrafi 4 u 5;

(4)      persuni taxxabbli, għall-iskopijiet tal-VAT, meta l-provvista ta’ dawk l-oġġetti kienet eżentata mit-taxxa skont regoli li jikkorrispondu mar-regolamenti stabbiliti fl-Artikolu 43(1)(2) jew fl-Artikolu 113;

(5)      persuni taxxabbli għall-iskopijiet tal-VAT, fejn il-VAT ikun impost fuq il-provvista ta’ dawk l-oġġetti skont regoli li jikkorrispondu mar-regolamenti msemmija fil-paragrafi 4 u 5, u fejn l-akkwirent ikollu fil-pussess tiegħu dokumenti li jikkonfermaw b’mod ċar li l-oġġetti ġew akkwistati skont dawk ir-regoli.”

5.        L-Artikolu 13(1)(5) tad-Digriet li jimplementa l-Liġi dwar il-VAT (5) jipprovdi li: “[i]l-provvista ta’ karozzi personali jew ta’ vetturi bil-mutur minn persuni taxxabbli li, mal-akkwist tagħhom, kellhom id-dritt li jnaqqsu t-taxxa tal-input kif imsemmi fl-Artikolu 86(3) tal-Liġi għandhom ikunu eżentati mit-taxxa meta dawk il-karozzi personali jew vetturi bil-mutur jkunu oġġetti użati fi ħdan it-tifsira tal-Artikolu 43(2) tal-Liġi dwar il-VAT”.

II – Il-fatti u d-domanda magħmula

6.        Bawaria Motors Spółka z o. o. (iktar ’il quddiem “Bawaria”) hiJA persuna attiva taxxabbli skont l-Artikolu 15 tal-Liġi dwar il-VAT u twettaq attività ekonomika li tikkonsisti fil-ġestjoni ta’ showroom tal-karozzi li permezz tiegħu tixtri u sussegwentement tbigħ karozzi personali, kemm ġodda kif ukoll użati. Bħala parti mill-attivitajiet tagħha, din ukoll takkwista karozzi personali użati mingħand operaturi ekonomiċi li lil Bawaria jipprovduha b’fatturi tal-VAT b’rata “eżentata”, u li jagħmlu riferiment għall-Artikolu 43(1)(2) dwar il-Liġi dwar il-VAT (bejgħ ta’ oġġetti użati). Bawaria terġa’ tbigħ dawk il-karozzi personali użati billi tagħmel użu mill-iskema ta’ marġni ta’ profitt stabbilita fl-Artikolu 120 tal-Liġi dwar il-VAT.

7.        Fit-twettiq tal-attivitajiet ta’ Bawaria, jinqalgħu wkoll sitwazzjonijiet fejn hi tixtri karozzi personali użati mingħand operaturi ekonomiċi li, meta huma jkunu akkwistaw dawn il-karozzi, ikunu naqqsu t-taxxa tal-input skont il-limiti statutorji (6). F’sitwazzjoni bħal din, dawn l-operaturi lil Bawaria jipprovduha b’fattura tal-VAT bir-rata l-“eżentata”, u li tagħmel referenza għall-Artikolu 13(1)(5) tad-“Digriet li jimplementa l-Liġi dwar il-VAT” bħala l-bażi li fuqha din il-provvista għandha tiġi eżentata mill-VAT. Minħabba li f’każ bħal dan Bawaria tkun intitolata tapplika l-iskema tal-marġni ta’ profitt, fid-9 ta’ Frar 2009 hi saqsiet lill-Ministru tal-Finanzi Pollakk jagħti interpretazzjoni bil-miktub tad-dispożizzjonijiet rilevanti.

8.        Fl-interpretazzjoni individwali tal-20 ta’ Frar 2009, il-Ministru tal-Finanzi kkonkluda li l-fehma ta’ Bawaria ma kinitx korretta. Fil-motivi tad-deċiżjoni tiegħu, hu essenzjalment ikkonkluda li l-iskema ta’ marġni ta’ profitt hi applikabbli biss f’sitwazzjonijiet fejn in-negozjant taxxabbli jkun akkwista l-oġġett użat mingħand persuna taxxabbli li ma kellhiex id-dritt li tnaqqas it-taxxa tal-input max-xiri ta’ dak l-oġġett u għalhekk fejn hi tkun inkorporat dik it-taxxa fil-prezz tal-bejgħ tagħha.

9.        Bawaria għamlet kawża kontra l-interpretazzjoni hawn fuq imsemmija quddiem il-Wojewódzki Sąd Administracyjny w Warszawie (iktar ’il quddiem il-Qorti Reġjunali Amministrattiva, Varsavja), billi sostniet li din tmur kontra l-Artikolu 120(4) u (10) tal-Liġi dwar il-VAT minħabba interpretazzjoni żbaljata li riżultat tagħha tiġi eskluża l-possibiltà tat-tassazzjoni, taħt l-iskema ta’ marġni ta’ profitt, tal-provvista tal-oġġetti użati akkwistati bil-benefiċċju tal-eżenzjoni skont l-Artikolu 13(1)(5) tad-Digriet li jimplementa l-Liġi dwar il-VAT.

10.      Permezz ta’ sentenza tal-10 ta’ Novembru 2009, il-Wojewódzki Sąd Administracyjny annullat l-interpretazzjoni kkontestata. Hi kkonkludiet li l-problema fundamentali fil-kawża kienet l-Artikolu 13(1)(5) tad-Digriet li jimplementa l-Liġi dwar il-VAT, li introduċa eżenzjoni mit-taxxa li ma hijiex prevista fid-dritt tal-UE, u li tikkawża distorsjoni fl-iskema ċara u loġika tal-marġni ta’ profitt — u mhux biss l-iskema skont id-dritt tal-UE iżda anki l-iskema skont id-dispożizzjonijiet nazzjonali li jirrigwardaw t-tassazzjoni tal-marġni waħedha. Iggwidata min-neċessità li tippreserva l-koerenza tas-sistema tat-taxxa fuq oġġetti u servizzi u l-prinċipju ta’ supremazija tad-dritt tal-UE, il-Wojewódzki Sąd Administracyjny deherilha li l-Artikolu 13(1)(5) tad-Digriet li jimplementa l-Liġi dwar il-VAT ma jeżentax persuna taxxabbli mill-VAT fuq provvista ta’ vettura użata li, mal-akkwist tagħha, il-persuna taxxabbli ma kinitx intitolata tnaqqas it-taxxa tal-input kollha: l-eżenzjoni tirrigwarda biss dik il-parti tat-taxxa dovuta li kienet mħallsa de facto minn dik il-persuna taxxabbli skont il-limitazzjonijiet stabbiliti fl-Artikolu 86(3) tal-Liġi dwar il-VAT. Għalhekk, l-eżenzjoni ma tkoprix l-ammont ta’ PLN 6 000 (jew 60 % tal-ammont ta’ taxxa ddikjarat fuq il-fattura) minħabba li l-persuna taxxabbli tkun effettivament ċediet dak l-ammont meta hi tkun xtrat il-vettura. Dan iwassal għall-konklużjoni li Bawaria tista’ tapplika l-iskema ta’ marġni ta’ profitt, iżda dan biss sa fejn il-persuna li tkun qed tipprovdi l-provvista ma tkunx tista’ tagħmel it-tnaqqis qabel.

11.      Madankollu, Bawaria appellat fil-kassazzjoni kontra s-sentenza fuq imsemmija quddiem il-qorti tar-rinviju — in-Naczelny Sąd Administracyjny (iktar ’il quddiem il-Qorti Amministrattiva Suprema) — billi essenzjalment ikkontendiet li kien sar ksur tad-dispożizzjonijiet tad-dritt sostantiv minħabba l-interpretazzjoni żbaljata u l-applikazzjoni ħażina tagħhom, jiġifieri, il-ksur tal-Artikolu 120(4) u (10) tal-Liġi dwar il-VAT meta jinqara flimkien mal-Artikolu 13(1)(5) tad-Digriet li jimplementa l-Liġi dwar il-VAT u mal-Artikolu 91(4) sa (6) tal-Liġi dwar il-VAT, minħabba li dan jirriżulta fl-esklużjoni tal-possibiltà, fi ħdan l-iskema ta’ marġni ta’ profitt, li l-provvista ta’ oġġetti użati akkwistati bil-benefiċċju tal-eżenzjoni skont l-Artikolu 13(1)(5) tad-Digriet li jimplementa l-Liġi dwar il-VAT tiġi ntaxxata b’mod komplet.

12.      Fil-fatt, il-Ministru tal-Finanzi wkoll appella fil-kassazzjoni, billi sostna li s-sentenza appellata kisret il-liġi, jiġifieri, l-Artikolu 43(1)(2) tal-Liġi dwar il-VAT u l-Artikolu 13(1)(5) tad-Digriet li jimplementa l-Liġi dwar il-VAT. Hu sostna li s-sentenza appellata hi bbażata fuq is-suppożizzjoni li, meta tiġi pprovduta vettura personali akkwistata mingħand operatur li jkun naqqas it-taxxa tal-input hekk kif hu jkun akkwistaha, ma tkun teżisti ebda bażi legali biex tiġi ntaxxata l-provvista tal-vettura skont ir-regoli ġenerali. Il-Ministru tal-Finanzi wkoll sostna l-opinjoni espressa fl-interpretazzjoni individwali tal-20 ta’ Frar 2009: meta vettura personali tiġi akkwistata mingħand operatur li jkun parzjalment naqqas it-taxxa tal-input hekk kif hu jkun akkwistaha, u li meta jkun biegħha jkun għamel użu tal-eżenzjoni skont l-Artikolu 13(1)(5) tad-Digriet li jimplementa l-Liġi dwar il-VAT, il-kumpannija, ma jkollha ebda dritt, mal-provvista ta’ dik il-vettura, tiddetermina l-ammont taxxabbli permezz tal-metodu tal-marġni, minħabba li l-kundizzjonijiet stipulati fl-Artikolu 120(10) tal-Liġi dwar il-VAT ma jkunux ġew issodisfatti u għalhekk f’dik is-sitwazzjoni jkun meħtieġ li t-transazzjoni tiġi ntaxxata skont ir-regoli ġenerali.

13.      Skont il-qorti tar-rinviju, ma hemm ebda dubju li, meta introduċiet l-Artikolu 13(1)(5) tad-Digriet li jimplementa l-Liġi dwar il-VAT, il-leġiżlatura Pollakka introduċiet eżenzjoni mit-taxxa li ma hijiex prevista fid-dritt tal-UE. Il-qorti tar-rinviju tqis li d-dispożizzjonijiet rilevanti jwasslu għal inċertezza ġġustifikata f’dak li jirrigwarda jekk, meta l-fornitur ikun parzjalment naqqas il-VAT, il-kuntrattur tiegħu — in-negozjant taxxabbli — jistax jagħmel użu tal-iskema speċjali tal-“marġni”, peress illi waħda mill-kundizzjonijiet biex tkun tista’ tiġi applikata dik l-iskema hi li ma setgħax kien possibbli, fil-konfront ta’ dawk l-oġġetti, li l-ammont tat-taxxa tal-input tagħhom jitnaqqsu bl-ammont tat-taxxa tal-output impost max-xiri tagħhom.

14.      Il-qorti tar-rinviju, waqt li enfasizzat li l-għan tal-arranġamenti għat-tassazzjoni ta’ oġġetti użati hu li jipprevjeni t-tassazzjoni doppja u d-distorsjoni tal-kompetizzjoni bejn il-persuni taxxabbli, osservat li, mill-perspettiva ta’ negozjant taxxabbli, ma hemm ebda differenza bejn, minn naħa, provvista mwettqa minn persuna taxxabbli għall-iskopijiet tal-VAT, meta l-persuna ma kellha ebda possibiltà li tnaqqas it-taxxa tal-input, u min-naħa l-oħra, provvista mwettqa minn persuna taxxabbli għall-iskopijiet tal-VAT li kellha din il-possibiltà sa ċertu punt — minħabba li, skont id-dispożizzjonijiet tad-dritt nazzjonali dwar it-taxxa, dawn huma kollha eżentati meta jkunu qed ibiegħu karozzi personali użati.

15.      Il-qorti tar-rinviju tkompli biex tgħid li, meta introduċiet l-Artikolu 13(1)(5) tad-Digriet li jimplementa l-Liġi dwar il-VAT, il-leġiżlatura Pollakka effettivament ġabet fi tmiemha l-applikazzjoni tal-VAT fi stadji diversi. Minħabba dik l-emenda, negozjant taxxabbli kummerċjali tilef kemm id-dritt li jirriduċi t-taxxa billi jnaqqas it-taxxa tal-input, minħabba li l-fornitur tiegħu hu eżentat minnha, kif ukoll id-dritt li japplika l-iskema speċjali tat-tassazzjoni tal-marġni, minħabba li l-fornitur tiegħu jkun għamel tnaqqis parzjali hekk kif hu jkun xtara l-vettura personali. Barra minn hekk, dan fl-aħħar mill-aħħar iwassal għat-tassazzjoni doppja minħabba li l-fornitur ma jkunx naqqas it-taxxa (’il fuq mil-livelli massimi ta’ 50 % u PLN 5 000 jew 60 % u PLN 6 000).

16.      Kien f’dan il-kuntest, li l-qorti tar-rinviju ddeċidiet li tissospendi l-proċeduri quddiemha u li tagħmel is-segwenti domandi preliminari lill-Qorti tal-Ġustizzja:

“Id-dispożizzjonijiet tal-Artikoli 313(1) u 314 [tad-Direttiva tal-VAT] flimkien mal-Artikoli 136 u 315 ta’ din l-istess direttiva, għandhom jiġu interpretati fis-sens li jawtorizzaw l-applikazzjoni tal-iskema partikolari tal-“marġni” għan-negozjanti taxxabbli fir-rigward ta’ provvisti ta’ oġġetti użati anki meta jerġgħu jbigħu l-karozzi personali u vetturi bil-mutur oħrajn mixtrija li għalihom ġiet applikata l-eżenzjoni mit-taxxa għall-provvista ta’ karozzi personali u vetturi oħrajn minn persuni taxxabbli li għandhom biss dritt parzjali li jnaqqsu t-taxxa tal-input fuq ix-xiri tagħhom, kif ipprovdut fl-Artikolu 86(3) [tal-Liġi dwar il-VAT], skont id-dispożizzjonijiet nazzjonali Pollakki stipulati fl-Artikolu 13(1)(5) [tad-Digriet li jimplementa l-Liġi dwar il-VAT], meta dawn il-karozzi u l-vetturi bil-mutur huma “oġġetti użati” fis-sens tal-Artikolu 43(2) tal-Liġi dwar il-VAT u tal-Artikolu 311(1)(1) [tad-Direttiva tal-VAT]?”

III – Evalwazzjoni

17.      Ġew ippreżentati osservazzjonijiet bil-miktub u orali minn Bawaria, mill-Gvern Pollakk u mill-Kummissjoni.

18.      Bawaria ssostni li negozjant taxxabbli jista’ japplika l-iskema tal-marġni ta’ profitt fil-kuntest ta’ bejgħ mill-ġdid ta’ vetturi użati li, meta nxtraw, kienu koperti mill-eżenzjoni tal-VAT prevista fil-Liġi Pollakka dwar il-VAT fir-rigward ta’ bejgħ ta’ oġġetti li jkun sar minn persuni taxxabbli li kellhom biss dritt parzjali li jnaqqsu t-taxxa tal-input max-xiri ta’ dawk l-oġġetti.

19.      Bawaria tissottometti li l-kundizzjonijiet biex ikun jista’ jiġi applikat l-Artikolu 314 tad-Direttiva tal-VAT ġew issodisfatti fil-kawża preżenti: il-provvisti tagħha jirrigwardaw oġġetti użati; ix-xiri ta’ dawk l-oġġetti mingħand persuna taxxabbli oħra kien eżentat mill-VAT; u l-persuna taxxabbli l-oħra ma kellhiex, fid-dawl tal-Artikolu 86(3) tal-Liġi dwar il-VAT, dritt sħiħ ta’ tnaqqis fir-rigward tat-taxxa tal-input mal-akkwist tal-oġġetti.

20.      Skont Bawaria, l-interpretazzjoni tal-Artikoli 311 sa 315 tad-Direttiva dwar il-VAT għandha tieħu kont tal-għanijiet ta’ dik id-direttiva, jiġifieri, il-prevenzjoni tat-tassazzjoni doppja u tad-distorsjoni tal-kompetizzjoni, l-universalità tal-VAT u n-newtralità fiskali.

21.      Madankollu, l-ewwel nett, meta kkombinat mal-obbligu li tiġi applikata l-iskema tal-VAT normali, il-fatt li l-eżenzjoni prevista fl-Artikolu 13(1)(5) tad-Digriet li jimplementa l-Liġi dwar il-VAT, tirriżulta fil-fatt li Bawaria titlef id-dritt li tnaqqas dik il-parti tat-taxxa li l-fornitur tagħha ma setgħax inaqqas — u li, barra dan, dak il-fornitur ikun inkorpora fil-prezz tal-bejgħ tiegħu — jirriżulta f’tassazzjoni doppja.

22.      It-tieni nett, skont Bawaria, il-fatt li l-istess tranżazzjoni — il-bejgħ mill-ġdid ta’ vettura użata partikolari — hi suġġetta għal trattament differenti skont jekk il-fornitur kienx kompletament imċaħħad minn kwalunkwe dritt ta’ tnaqqis jew jekk kellux dritt parzjali ta’ tnaqqis, jirriżulta fi ksur tal-prinċipju ta’ fiskalità newtrali, minħabba li kemm fl-ewwel kif ukoll fit-tieni każ, l-eżenzjoni li minnha bbenefika l-fornitur tkun ċaħdet lil Bawaria, bħala n-negozjant taxxabbli, minn kull dritt ta’ tnaqqis.

23.      It-tielet nett, jekk Bawaria ma titħalliex tapplika l-iskema tal-marġni ta’ profitt f’ċirkustanzi bħal dawk inkwistjoni jkun qed isir distorsjoni sinjifikattiva tal-kompetizzjoni fil-konfront ta’ dawk li fil-każ tagħhom l-iskema tiġi applikata, filwaqt li l-valur miżjud fuq l-oġġett użat minn meta jkun inxtara sa meta jerġa’ jinbiegħ ikun identiku f’kull każ. F’ekonomija f’suq ħieles, Bawaria ma tkunx tista’ tinkorpora fil-prezz tal-bejgħ għall-konsumatur finali dik iż-żieda fil-VAT ikkaġunata mill-applikazzjoni tal-iskema normali tal-VAT, u għalhekk tkun obbligata tadatta l-prezz tagħha għal dak tas-suq (jiġifieri, il-prezz użat minn dawk in-negozjanti taxxabbli li tiġi applikata lilhom l-iskema ta’ marġni ta’ profitt) u barra dan, tbigħ b’telf meta l-kompetituri tagħha jkunu qed jagħmlu profitt, filwaqt li tkun obbligata wkoll tħallas lill-Istat ammont ta’ VAT sostanzjalment ogħla minn dak li jħallsu dawk il-kompetituri.

24.      Min-naħa l-oħra, l-Gvern Pollakk u l-Kummissjoni, huma essenzjalment tal-opinjoni li l-iskema tal-marġni ta’ profitt ma hijiex applikabbli fil-kawża quddiem il-qorti tar-rinviju.

 Evalwazzjoni

25.      Il-qorti tar-rinviju essenzjalment qiegħda tistaqsi jekk in-negozjant taxxabbli (Bawaria) — li jixtri karozzi personali użati mingħand persuni taxxabbli, li min-naħa tagħhom meta huma jkunu akkwistawhom ikunu eżerċitaw dritt parzjali ta’ tnaqqis fir-rigward tat-taxxa tal-input — huwiex intitolat japplika l-iskema speċjali tal-marġni ta’ profitt meta jkun qed jerġa’ jbigħ dawk il-vetturi lill-konsumatur finali.

26.      Hu xieraq li wieħed jibda billi l-ewwel jikkunsidra d-dispożizzjonijiet rilevanti.

27.      L-iskema tal-marġni ta’ profitt hi rregolata mit-Titolu XII (“skemi speċjali”) tad-Direttiva tal-VAT u, b’mod speċifiku, mis-subtaqsima 1 (“skema ta’ marġni”) tat-Taqsima 2 (“Arranġamenti speċjali għal negozjanti taxxabbli”) tal-Kapitolu 4 (“Arranġamenti speċjali għal oġġetti użati, xogħolijiet ta’ l-arti, oġġetti tal-kollezzjoni u antikitajiet”) ta’ dak it-titolu, jiġifieri, mill-Artikolu 312 sa 325 tad-Direttiva.

28.      B’mod partikolari, skont l-Artikolu 314 tad-Direttiva dwar il-VAT, l-iskema tal-marġni ta’ profitt tirrigwarda biss dawk il-provvisti ta’ oġġetti użati li n-negozjanti taxxabbli (bħal ma hi Bawaria) jakkwistaw minn xi waħda mill-persuni segwenti: (a) persuna mhux taxxabbli, (b) persuna taxxabli oħra, sa fejn il-provvista ta’ oġġetti minn dik il-persuna taxxabbli l-oħra tkun eżentata skont l-Artikolu 136; (ċ) persuna taxxabbli oħra, sa fejn il-provvista ta’ oġġetti minn dik il-persuna taxxabbli l-oħra tkun koperta mill-eżenzjoni tal-intrapriżi ż-żgħar kif previst fl-Artikolu 282 sa 292 u tkun tinvolvi beni kapitali; u (d) negozjant taxxabbli ieħor, sa fejn il-VAT ikun ġie applikat lill-provvista ta’ oġġetti minn dak in-negozjant taxxabbli l-ieħor skont l-iskema tal-marġni ta’ profitt.

29.      Wieħed għandu jsemmi li l-Artikolu 314 tad-Direttiva tal-VAT jelenka — jidhirli li b’mod komplet — dawk il-persuni taxxabbli li jipprovdu oġġetti li fir-rigward tagħhom tista’ tiġi applikata l-iskema tal-marġni ta’ profitt min-negozjant taxxabbli fl-istadju ta’ kummerċ li jkun imiss.

30.      Hu ċar li karatteristika komuni fil-każijiet elenkati fl-Artikolu 314 hi l-fatt li l-persuna li tkun qed tipprovdi l-vettura użata lin-negozjant taxxabbli tkun sostniet il-piż kollu kemm hu tal-VAT. Fi kliem ieħor, dik il-persuna ma jkollha ebda dritt tnaqqas it-taxxa tal-input mal-akkwist tal-vettura.

31.      Għalhekk, kif ser naraw iżjed l-isfel u għall-kuntrarju ta’ dak li jidher li qed tissuġġerixxi Bawaria, hu ċar li s-sitwazzjoni fil-kawża inkwistjoni ma hijiex prevista mill-Artikolu 314 tad-Direttiva; lanqas ma jista’ jitqies li din hi koperta b’dik id-dispożizzjoni.

32.      Fil-fatt, l-ewwel nett jirriżulta mid-digriet tar-rinviju li l-każ inkwistjoni ma jaqax fil-kamp ta’ applikazzjoni tal-punt (a) tal-Artikolu 314 tad-Direttiva tal-VAT. Il-persuna li qiegħda tipprovdi l-oġġett użat lil Bawaria hi persuna taxxabbli hi nnifisha.

33.      It-tieni nett jidher ukoll ċar mid-digriet tar-rinviju li l-każ inkwistjoni ma huwiex kopert mill-punt (ċ) tal-Artikolu 314 minħabba li l-provvista tal-oġġett użat lil Bawaria ma kinitx taqa’ taħt l-eżenzjoni għall-intrapriżi żgħar prevista fl-Artikoli 282 sa 292, jew tinvolvi beni kapitali. Minflok, din kienet eżentata abbażi ta’ dispożizzjoni partikolari tad-dritt Pollakk; l-Artikolu 13(1)(5) tad-Digriet li jimplementa l-Liġi dwar il-VAT.

34.      It-tielet nett, lanqas il-każ inkwistjoni ma jaqa’ taħt il-punt (d) tal-Artikolu 314 tad-Direttiva tal-VAT. Il-persuna taxxabbli li pprovdiet l-oġġett użat lil Bawaria ħarġet fatturi tal-VAT bir-rata tal-“eżenzjoni” u ma pprovdietx dawk l-oġġetti taħt l-iskema tal-marġni ta’ profitt.

35.      Fl-aħħar nett, jirriżulta li l-aħħar punt tal-Artikolu 314 li baqgħalna nikkunsidraw hu l-punt (b). Dan jirrigwarda l-provvista ta’ oġġetti minn persuni taxxabbli li huma eżentati skont l-Artikolu 136 tad-Direttiva tal-VAT.

36.      Meta wieħed janalizza l-Artikolu 136 jara li dik id-dispożizzjoni mbagħad tipprovdi għall-eżenzjoni ta’ żewġ tipi ta’ tranżazzjonijiet.

37.      F’punt (a), l-Artikolu 136 jipprovdi li l-Istati Membri għandhom jeżentaw: il-provvista ta’ oġġetti użati esklużivament fir-rigward ta’ attività eżentata skont l-Artikolu 132 (transazzjoni li tkun fl-interess pubbliku), l-Artikolu 135 (transazzjonijiet oħra eżentati, bħal ma huma s-servizzi finanzjarji), l-Artikolu 371 (ingħidu aħna, biljetti ta’ dħul għal avvenimenti sportivi jew il-provvista ta’ servizzi tat-telekomunikazzjoni jew oġġetti permezz ta’ servizzi postali), l-Artikoli 375, 376 jew 377, l-Artikolu 378(2), l-Artikolu 379(2) jew l-Artikoli 380 sa 390 (eżenzjonijiet mogħtija lill-ċerti Stati Membri), meta dawk l-oġġetti ma jkunux involvew xi tnaqqis. Madankollu, hu biżżejjed li wieħed jgħid li ebda waħda minn dawk il-kategoriji ta’ eżenzjoni ma tapplika fil-każ inkwistjoni.

38.      F’punt (b), l-Artikolu 136 jipprovdi li l-Istati Membri għandhom jeżentaw il-provvista ta’ merkanzija li fuq l-akkwist jew l-applikazzjoni tagħha l-VAT ma segħtax jitnaqqas, skont l-Artikolu 176. L-Artikolu 176 tad-Direttiva tal-VAT jistabilixxi l-klawżola ta’ Standstill. Skont dik il-klawżola, fejn il-Kunsill ikun għadu ma adottax waħda mill-miżuri msemmija f’dik id-dispożizzjoni, l-Istati Membri jistgħu jżommu kwalunkwe liġi li tikkonċerna l-esklużjonijiet mid-dritt li jitnaqqas il-VAT eżistenti fl-1 ta’ Jannar 1979, jew fil-każ ta’ dawk l-Istati Membri li l-adeżjoni tagħhom mal-Unjoni Ewropea seħħet wara dik id-data, eżistenti fid-data li fiha huma aderew. Fil-każ tal-Polonja, id-data tal-adeżjoni kienet l-1 ta’ Mejju 2004. Wieħed jista’ jżid jgħid li l-Qorti tal-Ġustizzja diġà kkonfermat dik l-interpretazzjoni tal-Artikolu 176 tad-Direttiva tal-VAT (7).

39.      Hu ċar li l-limitazzjoni statutorja fuq id-dritt ta’ tnaqqis tal-VAT stabbilit mil-leġiżlatura Pollakka fl-Artikolu 86(3) tal-Liġi dwar il-VAT, fl-istess ħin tikkostitwixxi esklużjoni parzjali mid-dritt ta’ tnaqqis: dan hu limitat għal 60 % tal-ammont ta’ taxxa ddikjarat fil-fattura u għal massimu ta’ PLN 6 000.

40.      Fil-fatt, sal-1 ta’ Mejju 2004, skont l-Artikolu 25(1)(2) tal-Liġi tal-1993 dwar il-VAT u d-Dazji tas-Sisa (8), ix-xiri minn persuna taxxabbli, ta’ vetturi użati b’piż massimu ta’ 500 kg ma kienx kopert mid-dritt tat-tnaqqis tal-VAT: jiġifieri, kienet fis-seħħ esklużjoni totali. Madankollu, mill-1 ta’ Mejju 2004, l-Artikolu 86(3) tal-Liġi tal-2004 dwar il-VAT għamel provvediment għal tnaqqis parzjali — jiġifieri, fil-verżjoni fis-seħħ fit-22 ta’ Awwissu 2005, l-ewwel ta’ 50 %, u mbagħad ta’ 60 %, iżda mhux iżjed minn PLN 6 000. Jien nixtieq niġbed l-attenzjoni li intrinsikament, dan jagħmel sens sa fejn l-oġġetti inkwistjoni jkunu “oġġetti b’użu doppju”: karozzi personali li barra li jintużaw professjonalment, jintużaw ukoll privatament (9).

41.      Kif osservat sew il-Kummissjoni, fid-dawl tal-ġurisprudenza tal-Qorti tal-Ġustizzja (10), l-Artikolu 86(3) tal-Liġi dwar il-VAT ma estendiex, fil-każ tax-xiri ta’ vetturi personali, il-miżuri li jillimitaw id-dritt ta’ tnaqqis kif stipulat fil-leġiżlazzjoni Pollakka qabel l-1 ta’ Mejju 2004. B’konsegwenza ta’ dan, il-kundizzjonijiet biex tkun tista’ tiġi applikata l-klawżola ta’ Standstill huma ssodisfatti u l-leġiżlatura Pollakka tista’ tkompli tiġi applikata wara l-1 ta’ Mejju 2004.

42.      Ta’ min wieħed jinnota li l-Artikolu 136 tad-Direttiva tal-VAT ma jkoprix sitwazzjonijiet li fihom persuna taxxabbli tkun eżerċitat dritt “parzjali” tat-tnaqqis tat-taxxa tal-input (11). Kif diġà rajna fil-punt 38 iktar ’il fuq, l-Artikolu 136 tad-Direttiva tal-VAT jippermetti li l-Istati Membri jeżentaw il-provvista ta’ oġġetti li mal-akkwist tagħhom il-VAT ma kienx deduċibbli skont l-Artikolu 176 tad-Direttiva tal-VAT.

43.      Jidhrili li hu ċar li, sa fejn dan jifforma parti mill-arranġamenti li jidderogaw mill-iskema ġenerali tal-VAT, l-Artikolu 136 — u, b’mod partikolari l-kliem “il-provvista ta’ merkanzija li fuq l-akkwist […] [i]l-VAT ma segħtex [j]itnaqqas” (12) — għandhom jiġu interpretati b’mod strett.

44.      Dan l-approċċ ġie kkonfermat mill-ġurisprudenza. Fis-sentenza Jyske Finans (13) — li kienet tittratta l-kwistjoni ta’ taxxa fis-suq sekondarju tal-bejgħ ta’ karozzi użati — il-Qorti tal-Ġustizzja diġà kellha l-okkażjoni tenfasizza li “[i]l-kliem użat sabiex jispjega l-eżenzjonijiet previsti fl-Artikolu 13 tas-Sitt Direttiva [(14)] [b’mod partikolari l-Artikolu 13B(ċ) — li issa sar l-Artikolu 136 tad-Direttiva tal-VAT] għandu jiġi interpretat strettament, peress li dawn l-eżenzjonijiet jikkostitwixxu derogazzjonijiet għall-prinċipju ġenerali li, in konformità mal-Artikolu 2 ta’ l-imsemmija Direttiva, igħid li l-VAT tinġabar fuq kull provvista ta’ oġġetti jew servizzi magħmula b’titolu oneruż minn persuna taxxabbli li taġixxi bħali tali” (15).

45.      Barra dan, fis-sentenza Jyske Finans (16) il-Qorti tal-Ġustizzja sostniet ukoll li “huwa veru li s-sistema ta’ taxxa fuq il-marġni ta’ profitt magħmul min-negozjant taxxabbli fl-okkażjoni tal-provvista ta' oġġetti użati […] tikkostitwixxi sistema speċjali tal-VAT — li tidderoga mis-sistema ġenerali tas-Sitt Direttiva — li, bħas-sistemi speċjali l-oħra previsti fl-Artikoli 24, 25 u 26 tal-imsemmija Direttiva, għandha tiġi applikata biss sa fejn huwa neċessarju sabiex jintlaħaq l-għan tagħha”. Fil-fatt, jien inqis li, sa fejn l-arranġamenti hawn fuq imsemmi biex jiġi ntaxxat il-marġni ta’ profitt jikkostitwixxi deroga, wieħed jista’ jsostni li dawn għandhom ikunu applikabbli biss f’każijiet fejn dawn ikunu espressament previsti fis-sistema tal-VAT stabbilita mid-Direttiva tal-VAT (ara l-Artikolu 131 et seq tagħha).

46.      Imbagħad, kienet f’dik l-istess sentenza (17) li l-Qorti tal-Ġustizzja enfasizzat li “l-eżenzjoni prevista fid-dispożizzjonijiet tal-Artikolu 13(B)(c) [tal-Artikolu 13B(ċ)] tas-Sitt Direttiva tista’ tapplika biss għall-provvista ta’ oġġetti li l-akkwist tagħhom ġie eskluż mid-dritt ta’ tnaqqis skond il-leġiżlazzjoni nazzjonali”.

47.      Bħala risposta għall-argumenti ta’ Bawaria fil-kawża preżenti, hu biżżejjed li wieħed isemmi li, fl-istess paragrafu fis-sentenza Jyske Finans (18) il-Qorti tal-Ġustizzja enfasizzat li “f’dan ir-rigward, it-termini [il-kliem] tal-[Artikolu 13B(ċ) tas-Sitt Direttiva] ma jistgħu jiġu interpretati b’ebda mod ieħor li jippermetti li jiġi evitat li persuna taxxabbli, li ma tistax tibbenefika minn tali esklużjoni, issib ruħha f'sitwazzjoni ta’ taxxa doppja.”

48.      Minn dan jirriżulta li l-Artikolu 136 tad-Direttiva tal-VAT, li hemm riferiment għalih fl-Artikolu 314(b) tal-istess direttiva, ma jistax jiġi interpretat fis-sens li jkopri ċ-ċirkustanzi tal-kawża quddiem il-qorti tar-rinviju, li fihom il-persuna taxxabbli inkwistjoni kellha biss “dritt parzjali” li tnaqqas it-taxxa tal-input — iżda li xorta waħda hu dritt ta’ tnaqqis. L-Artikolu 136 jirrigwarda biss dawk il-provvisti ta’ oġġetti li x-xiri tagħhom ġie kompletament eskluż, skont id-dritt nazzjonali, minn kull dritt ta’ tnaqqis.

49.      Jien għalhekk jidhirli li, fil-kawża preżenti, il-limitazzjoni imposta fuq id-dritt ta’ tnaqqis mill-Artikolu 86(3) tal-Liġi dwar il-VAT — filwaqt li, wieħed għandu jammetti, hi koperta mill-klawżola ta’ Standstill skont l-Artikolu 176 tad-Direttiva tal-VAT (19), li jirreferi għaliha l-Artikolu 136(b) ta’ dik id-direttiva — xorta waħda ma tammontax, skont kif meħtieġ, għall-esklużjoni tad-dritt ta’ tnaqqis fis-sens strett, minħabba li għall-kuntrarju, din tipprovdi għal dritt ta’ tnaqqis parzjali.

50.      L-iskema tal-marġni ta’ profitt, li tikkonsisti fl-applikazzjoni tal-VAT esklużivament fuq id-differenza bejn il-prezz tal-bejgħ ta’ oġġett użat, kif iffissat minn negozjant taxxabbli, u l-prezz tax-xiri, hi skema speċjali li tagħmilha possibbli li, meta l-oġġetti użati jerġgħu jiġu introdotti fis-suq kummerċjali, ma jiġux intaxxati għat-tieni darba — jiġifieri tgħin biex tiġi evitata t-tassazzjoni doppja — mingħajr ma jittieħed kont tat-taxxa li tkun għadha inkluża fil-prezz tagħhom (20).

51.      Meta dawn l-oġġetti użati jerġgħu jiġu introdotti fis-suq kummerċjali suġġetti għall-VAT, l-iskema speċjali tal-marġni ta’ profitt tkun tapplika biss f’dawk il-każijiet fejn dawn l-oġġetti jkunu ġew introdotti mill-ġdid minn persuna mhux taxxabbli (klijent finali), jew inkella jekk dawn ikunu ġew introdotti mill-ġdid minn persuna taxxabbli, jekk dan iseħħ biss fi żmien meta l-introduzzjoni mill-ġdid tkun kompletament eżentata mill-VAT.

52.      Jirriżulta li kull meta negozjant taxxabbli jkun eżerċità d-dritt tiegħu li jnaqqas it-taxxa tal-input, anki jekk sempliċiment b’mod parzjali, l-iskema tal-marġni ta’ profitt ma għandhiex tiġi applikata.

53.      F’dan ir-rigward jista’ jingħad, wieħed għandu jammetti, li l-għan tal-iskema tal-marġni ta’ profitt hu l-evitar ta’ sitwazzjonijiet fejn l-oġġetti użati jiġu esposti għat-tassazzjoni doppja meta jerġgħu jiġu introdotti fis-suq kummerċjali minħabba li ma tkunx ġiet ikkunsidrata t-taxxa li tkun għadha inkorporata fil-prezz tagħhom. Madankollu, biżżejjed illi wieħed jgħid li, fil-kawża preżenti hi r-responsabbiltà tar-Repubblika Pollakka li tieħu l-miżuri neċessarji biex tipprevjeni t-tassazzjoni doppja ta’ negozjanti taxxabbli bħal ma hi Bawaria; sitwazzjoni li tinqala’ minħabba li jkun hemm kombinazzjoni ta’ (i) l-applikazzjoni tal-iskema normali tal-VAT u (ii) il-fatt li Bawaria hi pprojbita milli tnaqqas it-taxxa inkluża fil-prezz ta’ vettura użata mixtrija minn fornitur li kien ibbenefika mill-eżenzjoni prevista fl-Artikolu 13(1)(5) tad-Digriet li jimplementa l-Liġi dwar il-VAT (21) u li wieħed jista’ jgħid ma hijiex kompletament konsistenti mad-Direttiva tal-VAT.

54.      Fil-fatt, l-eżenzjoni ma ssib ebda sostenn fid-dispożizzjonijiet tad-Direttiva tal-VAT li, fl-Artikolu 131 et seq tagħha, tistabilixxi lista kompleta ta’ dawk l-attivitajiet li huma eżentati mill-VAT.

55.      Bħala rimarka ġenerali, jien jidhirli (bħal ma jidhrilha wkoll il-Kummissjoni) li dak li hu meħtieġ hu li tiġi pprovduta sistema li hi adattata għall-funzjonament ta’ dawk il-kumpanniji li jużaw il-vetturi, iżda mhux fuq bażi full-time, għall-ħtiġiet tal-attività taxxabbli. Madankollu, jien nixtieq ngħid li l-Istati Membri ma għandhomx is-setgħa li jipprovdu soluzzjonijiet li ma humiex previsti fid-Direttiva tal-VAT biex itaffu d-diffikultajiet li jħabbtu wiċċhom magħhom il-kumpanniji fl-attivitajiet tagħhom ta’ kuljum.

56.      Jien jidhirli wkoll li l-applikazzjoni tal-iskema tal-marġni ta’ profitt fil-kawża inkwistjoni tkun, fi kwalunkwe każ, tmur kontra l-prinċipji li fuqhom hi bbażata d-Direttiva tal-VAT u għalhekk mhux iġġustifikata.

57.      L-importanza li tiġi evitata t-tassazzjoni doppja hi r-raġuni għaliex hija karatteristika komuni tad-dispożizzjonijiet rilevanti tal-VAT li l-piż għandu jkun inġarr kollu kemm hu. Dan ovvjament jiddependi fuq il-fatt li l-fornitur ma jkollu assolutament ebda dritt ta’ tnaqqis f’każ bħal dan — li jfisser li l-VAT xorta waħda għandu jkun inkorporat fit-total.

58.      Li kieku l-iskema tal-marġni ta’ profitt kellha tiġi applikata f’sitwazzjoni bħal dik ta’ Bawaria, ir-riżultat ikun li ma ssir ebda tassazzjoni fuq il-parti fejn ikun sar it-tnaqqis. Dan ikun imur kontra l-prinċipju ta’ universalità tal-VAT, minħabba li l-profitt tan-negozjant taxxabbli ma jkunx qed jiġi ntaxxat b’mod komplet, filwaqt li l-fornitur li jkun ipprovdielu l-oġġetti użati jkun seta’ jeżerċita dritt parzjali ta’ tnaqqis tat-taxxa. Wieħed jista’ jżid jgħid li, fl-istess ħin, dan ikun imur ukoll kontra l-prinċipju ta’ ħarsien tal-kompetizzjoni.

59.      Il-prinċipju ta’ universalità tal-VAT jinsab imħaddan fl-Artikolu 1 tad-Direttiva tal-VAT. Dik id-dispożizzjoni tipprovdi, inter alia, li “[f]uq kull transazzjoni, il-VAT, kalkulata fuq il-prezz tal-oġġetti u s-servizzi bir-rata applikabbli għat-tali oġġetti jew servizzi, għandha tkun imposta wara t-tnaqqis tal-ammont tal-VAT li qed jinġarr direttament mid-diversi komponenti tal-prezz”. L-universalità tal-impożizzjoni tal-VAT hi ċara kemm fil-livell personali (kull transazzjoni tiġi intaxxata indipendentement mill-persuna li jwettaqha — sakemm dik it-transazzjoni titwettaq fil-kuntest ta’ attività ekonomika fis-sens tad-Direttiva tal-VAT) kif ukoll fil-livell materjali (kull provvista ta’ oġġetti tiġi, fil-prinċipju, intaxxata).

60.      Għalhekk il-kawża inkwistjoni turi b’mod preċiż għaliex hu neċessarju li deroga mir-regola tal-universalità tal-VAT għandha tiġi ttratata bħala ħaġa kompletament u esklużivament eċċezzjonali, u li deroga bħal din għandha tiġi bbażata fuq id-dispożizzjonijiet tad-Direttiva tal-VAT.

61.      Madankollu, Bawaria, qiegħda tibbaża ruħha fuq l-iskema tal-“aġġustament” prevista fl-Artikoli 187 sa 189 tad-Direttiva tal-VAT — li, hi ssostni, ma għandiex tiġi żgiċċata minn fornitur li, waqt li jkun naqqas parti mit-taxxa tal-input max-xiri, ibigħ l-oġġett użat lin-negozjant taxxabbli mingħajr VAT, u li hi maħsuba biex tgħin biex jiġi evitat ir-riskju li jonqos id-dħul mit-taxxa f’każ bħal dak.

62.      Dan l-argument ma jistax jintlaqa’.

63.      Kif osservat il-Kummissjoni waqt is-seduta, dak l-approċċ iwassal għat-tassazzjoni ripetut tax-xerrejja tal-karozzi meta l-VAT ma jkunx tnaqqasx — u barra dan anki fir-rigward ta’ użu li ma huwiex taxxabbli. Kif innota sew il-Gvern Pollakk, l-approċċ iffavorit minn Bawaria jkun sempliċement jirriżulta fi tnaqqis fit-taxxa tal-input u — b’mod importanti — jibqa’ l-fatt li xorta waħda dan ma jeliminax t-tassazzjoni doppja. Skont kif naħsibha jien, hu ċar li l-iskema tal-marġni ta’ profitt ma huwiex mod adattat biex wieħed jirrimedja l-fatt li ċerti dispożizzjonijiet tad-dritt Pollakk (l-Artikolu 13(1)(5) tad-Digriet li jimplementa l-Liġi dwar il-VAT) ma humiex għalkollox konsistenti mad-Direttiva tal-VAT (22). Fil-fatt, jien jidhirli li hu ċar li fil-każ ta’ Bawaria, għandhom minflok jiġu applikati d-dispożizzjonijiet in-normali.

64.      Hu wkoll ċar li, jekk l-eżenzjoni skont l-Artikolu 13(1)(5) tad-Digriet li jimplementa l-Liġi dwar il-VAT tiġi eliminata, il-fattura inkwistjoni tkun tindika t-taxxa tal-input, u b’hekk isir possibbli li negozjant taxxabbli (dak li jkun qed ibigħ mill-ġdid) bħal ma hi Bawaria, inaqqas il-VAT: b’dan il-mod, il-problema fil-kawża prinċipali tkun tidher li ġiet eliminata.

65.      Waqt li jkun jidher li fil-każ ta’ Bawaria qed nittrattaw sitwazzjoni ta’ tassazzjoni doppja, li normalment hi inkompatibbli mal-prinċipji fundamentali tal-VAT, jibqa’ l-fatt li l-każ inkwistjoni jirrigwarda oġġett partikolari: vetturi użati li kienu jintużaw mhux biss professjonalment iżda anki privatament. Hu ovvju li, sa fejn il-vettura kienet qed tintuża privatament, ma jistax jitnaqqas VAT.

66.      Fid-dawl tal-kunsiderazzjonijiet preċedenti kollha, jien jidhirli li, meta d-Direttiva tal-VAT tiġi interpretata kif suppost, jirriżulta ċar li, meta negozjant taxxabbli jiġi pprovdut b’vetturi użati minn persuna taxxabbli li, mal-akkwist ta’ dawk il-vetturi jkun eżerċità dritt parzjali ta’ tnaqqis, skont l-Artikoli 86(3) tal-Liġi dwar il-VAT, il-kundizzjoni stipulata fl-Artikolu 314(b) tad-Direttiva tal-VAT ma tkunx ġiet sodisfatta. Minħabba dan, in-negozjant taxxabbli ma huwiex intitolat japplika l-iskema speċjali tal-marġni ta’ profitt.

IV – Konklużjoni

67.      Fid-dawl tal-kunsiderazzjonijiet ta’ hawn fuq, jien nissuġġerixxi li l-Qorti tal-Ġustizzja għandha tagħti r-risposta li ġejja għad-domanda magħmula min-Naczelny Sąd Administracyjny:

L-Artikoli 313(1) u 314 tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud, meta jinqraw flimkien mal-Artikolu 136 u 315 ta’ dik id-direttiva, għandhom jiġu interpretati b’tali mod li jipprekludu l-applikazzjoni tal-iskema speċjali tal-marġni għan-negozjanti taxxabbli f’dak li jirrigwarda l-bejgħ mill-ġdid ta’ karozzi personali użati u vetturi oħra bil-mutur mixtrija mingħand persuni taxxabbli li, malli jakkwistaw dawk il-vetturi, ikunu eżerċitaw id-dritt li jnaqqsu parti mit-taxxa tal-input max-xiri, skont l-Artikolu 86(3) tal-Liġi Pollakka dwar il-VAT.

1 —      Lingwa oriġinali: l-Ingliż.

2 —      Jiġifieri, id-differenza bejn il-prezz tal-bejgħ u dak tax-xiri.

3 —      Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud (ĠU L 347, p. 1, id-“Direttiva tal-VAT”).

4 —      Ustawa o podatku od towarów i usług (Liġi dwar it-Taxxa fuq Oġġetti u Servizzi), tal-11 ta’ Marzu 2004 (Dziennik Ustaw Nru 54, punt 535, kif emendata; “il-Liġi dwar il-VAT”).

5 —      Digriet tal-Ministru tal-Finanzi, tat-28 ta’ Novembru 2008, dwar l-implementazzjoni ta’ ċerti dispożizzjonijiet tal-Liġi dwar it-Taxxa fuq Oġġetti u Servizzi (Dziennik Ustaw Nru 212, punt 1336).

6 —      Stabbiliti fl-Artikolu 86(3) tal-Liġi dwar il-VAT (50 % jew 60 %, iżda mhux iktar minn PLN 5 000 jew PLN 6 000).

7 —      Ara, pereżempju, is-sentenzi tat-8 ta’ Diċembru 2005, Jyske Finans (C-280/04, Ġabra p. I-10683, punt 23); tal-11 ta’ Diċembru 2008, Danfoss u AstraZeneca (C-371/07, Ġabra p. I-9549, punti 28 sa 29); kawżi maqgħuda tal-15 ta’ April 2010, X Holding (C-538/08 u C-33/09 Ġabra p. I-3129, punt 38); u tat-30 ta’ Settembru 2010, Oasis East (C-395/09, Ġabra p. I-8811, punti 19 sa 20). Fis-sentenza tat-22 ta’ Diċembru 2008, Magoora (C-414/07, Ġabra p. I-10921), li kienet ukoll tirrigwarda l-Polonja, il-Qorti tal-Ġustizzja essenzjalment sostniet li l-klawżola ta’ Standstill ma hijiex maħsubha biex tippermetti Stat Membru ġdid li jemenda l-leġiżlazzjoni nazzjonali tiegħu b’tali mod li din ma tkunx konsistenti mal-għan tad-Direttiva tal-VAT. F’kull każ, id-Direttiva tal-VAT tipprekludi lil Stat Membru milli sussegwentement jemenda l-leġiżlazzjoni tiegħu li tkun daħlet fis-seħħ fl-imsemmija data b’mod li jwessa’ l-kamp ta’ applikazzjoni ta’ dawn il-limitazzjonijiet meta mqabbel mal-iskop tagħhom qabel din id-data.

8 —      Il-Liġi tat-8 ta’ Jannar 1993, dwar it-Taxxa fuq Oġġetti u Servizzi u dwar id-Dazji tas-Sisa, Dziennik Ustaw Nru 11, punt 50.

9 —      Fil-fatt, waqt is-seduta, il-Kummissjoni osservat li s-sitwazzjoni ta’ Bawaria fil-kawża inkwistjoni tikkostitwixxi “sitwazzjoni tipika ta’ dawk li jbigħu l-karozzi użati fil-Polonja”.

10 —      Ara pereżempju, is-sentenza Magoora, iċċitata fin-nota ta’ qiegħ il-paġna 7, u s-sentenza tan-Naczelny Sąd Administracyjny tad-9 ta’ Ġunju 2010, I FSK 960/09.

11 —      Fil-fatt, il-qorti tar-rinviju rrikonoxxiet dan fid-digriet tar-rinviju, fejn indikat b’mod korrett li bħala prinċipju, id-dritt tal-UE ma jippermittix li jsir tnaqqis parzjali tal-VAT mill-akkwirent tal-oġġetti u tas-servizzi, lanqas fir-rigward ta’ assi fissi (beni kapitali). Dan ifisser ukoll li ma jeżistux regoli tal-UE dwar jekk dawn l-oġġetti u s-servizzi jistgħux jiġu eżentati mill-VAT, jew dwar l-iskema speċjali tal-marġni ta’ profitt applikata min-negozjanti taxxabbli.

12 —      Enfasi miżjuda minni.

13 —      Iċċitata iktar ’il fuq fin-nota ta’ qiegħ il-paġna 7, punt 21.

14 —      Sitt Direttiva tal-Kunsill 77/338/KEE, tas-17 ta’ Mejju 1977, fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ — Sistema komuni ta’ taxxa fuq il-valur miżjud: bażi uniformi ta’ stima (ĠU Edizzjoni Speċjali bil-Malti, Kapitolu 9, Vol. 1, p. 23) kif emendata bid-Direttiva tal-Kunsill 94/5/KE, tal-14 ta’ Frar 1994 (ĠU Edizzjoni Speċjali bil-Malti, Kapitolu 9, Vol. 1, p. 255) (“Is-Sitt Direttiva”).

15 —      Ara, inter alia, is-sentenzi tal-20 ta’ Novembru 2003, Taksatorringen (C-8/01, Ġabra p. I-13711, punt 36); tat-3 ta’ Marzu 2005, Fonden Marselisborg Lystbådehavn (C-428/02, Ġabra p. I-1527, punt 29); u tas-16 ta’ Diċembru 2010, Macdonald Resorts Limited (C-270/09, Ġabra p. I-13179. punt 45) u l-ġurisprudenza ċċitata. Ara wkoll is-sentenza tat-28 ta’ Ottubru 2010, Axa UK (C-175/09 Ġabra p. I-10701, punt 25) u l-ġurisprudenza ċċitata.

16 —      Iċċitata fin-nota ta’ qiegħ il-paġna 7; ara l-punt 35, li jirrigwarda l-applikazzjoni tal-arranġamenti previsti fl-Artikolu 26 u fl-Artikolu 25 tas-Sitt Direttiva; ara wkoll is-sentenzi maqgħuda tat-22 ta’ Ottubru 1988, Madgett u Baldwin (C-308/96 u C-94/97, Ġabra p. I-6229, punt 34), u s-sentenza tal-15 ta’ Lulju 2004, Harbs (C-321/02, Ġabra p. I-7101, punt 27).

17 —      Is-sentenza Jyske Finans, iċċitata fin-nota ta’ qiegħ il-paġna 7, punt 24.

18 —      Idem.

19 —      Ara, għal dan il-għan, is-sentenza Magoora, iċċitata fin-nota ta’ qiegħ il-paġna 7; X Holding, iċċitata fin-nota ta’ qiegħ il-paġna 7, punti 59 sa 61, u Oasis East, iċċitata fin-nota ta’ qiegħ il-paġna 7, punti 19 u 20.

20 —      Ara s-sentenza tad-9 ta’ Lulju 1992, ‘K’ Line Air Service Europe (C-131/91, Ġabra p. I-4513, punt 19).

21 —      Anki l-qorti tar-rinviju, fl-analiżi tagħha fid-digriet tar-rinviju, tirrikonoxxi mill-bidu li “ma hemmx dubju li fl-Artikolu 13(1)(5) tad-Digriet li jimplementa l-Liġi dwar il-VAT, il-leġiżlatura Pollakka introduċiet eżenzjoni mit-taxxa li ma hijiex prevista fid-dritt tal-[UE].”

22 — Ara wkoll il-punt 54 iktar ’il fuq.