Available languages

Taxonomy tags

Info

References in this case

Share

Highlight in text

Go

Edizzjoni Provviżorja

KONKLUŻJONIJIET TAL-AVUKAT ĠENERALI

COLLINS

ippreżentati fit-28 ta’ Settembru 2023 (1)

Kawża C-341/22

Feudi di San Gregorio Aziende Agricole SpA

vs

Agenzia delle Entrate

(Talba għal deċiżjoni preliminari mressqa mill-Corte suprema di cassazione (il-Qorti Suprema tal-Kassazzjoni, l-Italja))

(Rinviju għal deċiżjoni preliminari – Taxxa fuq il-valur miżjud (VAT) – Direttiva 2006/112/KE – Persuna taxxabbli – Kumpannija mhux operattiva – Preżunzjoni konfutabbli bbażata fuq proporzjon tal-valur tat-tranżazzjonijiet ekonomiċi meta mqabbla mal-assi fissi – Limitazzjoni tad-dritt għal tnaqqis – Prinċipju ta’ newtralità tal-VAT – Proporzjonalità – Ċertezza legali – Aspettattivi leġittimi)






 I.      Introduzzjoni

1.        Id-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (2) (iktar ’il quddiem id-“Direttiva tal-VAT”) tippermetti li Stat Membru jadotta leġiżlazzjoni li permezz tagħha kumpannija rreġistrata bħala persuna taxxabbli tista’ titqies bħala mhux operattiva sabiex, mingħajr preġudizzju għad-dritt tagħha li tpaċi l-VAT tal-input imħallsa mal-VAT imposta fir-rigward tat-tranżazzjonijiet tal-output tagħha, jekk din il-kumpannija ma tissodisfax livell minimu ta’ tranżazzjonijiet tal-output suġġetti għall-VAT għal tliet snin fiskali konsekuttivi, hija titlef id-dritt li tittrasferixxi kwalunkwe kreditu tal-VAT għal perijodu ta’ taxxa sussegwenti sakemm ma tkunx tista’ turi li ma setgħetx tissodisfa dan il-livell għal raġunijiet oġġettivi?

 II.      Id-dritt nazzjonali

2.        Skont l-Artikolu 30 tal-legge n 724 – Misure di razzionalizzazione della Finanza pubblica tat-23 ta’ Diċembru 1994 (il-Liġi Nru 724/1994 dwar Miżuri għar-Razzjonalizzazzjoni tal-Finanzi Pubbliċi, iktar ’il quddiem il-“Liġi Nru 724/1994”) (3), intitolata “Kumpanniji fittizji. Valutazzjoni tat-titoli”, fil-verżjoni tagħha applikabbli għall-kawża prinċipali:

“(1)      Għall-iskopijiet ta’ dan l-artikolu, sakemm ma jkunx hemm provi kuntrarji, il-kumpanniji pubbliċi b’responsabbiltà limitata, is-soċjetajiet limitati b’ishma, il-kumpanniji b’responsabbiltà limitata, is-soċjetajiet ġenerali u s-soċjetajiet limitati, kif ukoll il-kumpanniji u l-entitajiet mhux residenti ta’ kwalunkwe tip, bi stabbiliment permanenti fit-territorju tal-Istat, għandhom jitqiesu mhux operattivi jekk l-ammont totali tad-dħul, iż-żieda fl-inventarji u d-dħul, eskluż id-dħul straordinarju kif muri mid-dikjarazzjoni tad-dħul, fejn meħtieġ, ikun inqas mis-somma tal-ammonti miksuba bl-applikazzjoni tal-perċentwali li ġejjin:

[…]

(c) 15 % għall-valur tal-assi fissi l-oħra, inklużi l-kuntratti ta’ twellija.

[…]

(4)      Fil-każ ta’ kumpanniji u entitajiet mhux operattivi, kwalunkwe eċċess ta’ kreditu li jirriżulta minn dikjarazzjoni sottomessa għall-finijiet tal-VAT ma għandux ikun eliġibbli għal rimbors, u lanqas ma jista’ jiġi paċut […] jew ittrasferit […] Fejn, għal tliet perijodi ta’ taxxa konsekuttivi, kumpannija jew entità mhux operattiva ma twettaqx tranżazzjonijiet rilevanti għall-finijiet tal-VAT ta’ valur mhux inqas mill-ammont li jirriżulta mill-applikazzjoni tal-perċentwal rilevanti msemmi fil-paragrafu 1, kwalunkwe eċċess ta’ kreditu bħal dan ma jistax jiġi ttrasferit ’il quddiem għall-iskop ta’ tpaċija tal-VAT pagabbli fir-rigward ta’ perijodi ta’ taxxa sussegwenti.

(4a)      Fejn ċirkustanzi oġġettivi għamluha impossibbli li jinkiseb id-dħul, iż-żidiet fl-inventarju jew id-dħul iddeterminat skont dan l-artikolu, jew għamluha impossibbli li jitwettqu t-tranżazzjonijiet rilevanti għall-finijiet tal-VAT imsemmija fil-paragrafu 4, il-kumpannija kkonċernata tista’ titlob li d-dispożizzjonijiet rilevanti kontra l-evitar […] ma jiġux applikati.

[…]”

 III.      Il-fatti li wasslu għall-kawża prinċipali, it-talba għal deċiżjoni preliminari u l-proċedura quddiem il-Qorti tal-Ġustizzja

3.        Sabiex tbigħ inbid li pproduċiet f’Campania (l-Italja) mill-1996, Vigna Ottieri s.r.l. investiet f’faċilitajiet ta’ produzzjoni, tagħmir u trademark. F’Diċembru 2005, Vigna Ottieri welliet l-assi tanġibbli u intanġibbli tagħha lil Feudi di San Gregorio Aziende Agricole SpA (iktar ’il quddiem “Feudi”) b’titolu oneruż. Dak iż-żmien, Feudi kienet proprjetarja ta’ 22.7 % ta’ Vigna Ottieri.

4.        Fl-2007, il-Kummissjoni bdiet proċeduri għal nuqqas ta’ twettiq ta’ obbligu kontra l-Italja, fejn ikkontestat il-kompatibbiltà tal-Artikolu 30 tal-Liġi Nru 724/1994 mad-Direttiva tal-VAT (4). Wara skambju ta’ korrispondenza, il-Kummissjoni għalqet din il-proċedura għal nuqqas ta’ twettiq ta’ obbligu f’Settembru 2010.

5.        F’Diċembru 2010, l-awtorità fiskali Taljana nnotifikat avviż ta’ valutazzjoni tal-VAT lil Vigna Ottieri. Dan l-avviż kellu l-għan li jittratta lil Vigna Ottieri bħala mhux operattiva fis-sena fiskali 2008 fuq il-bażi li l-valur tat-tranżazzjonijiet tal-output suġġetti għall-VAT li din il-kumpannija kienet irreġistrat kien inqas mil-livell li taħtu l-kumpanniji huma preżunti li ma humiex operattivi fis-sens tal-Artikolu 30 tal-Liġi Nru 724/1994 (5). L-uniku dħul li Vigna Ottieri kienet apparentement irċeviet f’dik is-sena fiskali kienu d-drittijiet li Feudi kienet ħallsitha għall-użu tat-trademark tagħha, it-twellija tat-tagħmir tagħha u l-bejgħ ta’ ċertu tagħmir użat. Meta applikat il-limiti fl-Artikolu 30 tal-Liġi Nru 724/1994, l-awtorità fiskali injorat dan id-dħul peress li qieset li d-drittijiet li Vigna Ottieri kienet irċeviet mingħand Feudi kienu jirrigwardaw trasferiment ta’ parti minn negozju u għalhekk kienu jaqgħu ’l barra mill-kamp ta’ applikazzjoni tal-VAT. L-avviż sab ukoll li l-valur tat-tranżazzjonijiet tal-output ta’ Vigna Ottieri ma kienx laħaq il-livell applikabbli għal tliet snin fiskali konsekuttivi. L-amministrazzjoni fiskali għalhekk ċaħdet it-talba ta’ Vigna Ottieri għal kreditu tal-VAT għas-sena 2009.

6.        Vigna Ottieri ppreżentat rikors għall-annullament tal-avviż ta’ valutazzjoni. Hija sostniet li d-dħul li hija kienet kisbet mit-twellija tal-assi tagħha kien jaqbeż il-limiti stabbiliti mill-Artikolu 30 tal-Liġi Nru 724/1994. Hija sostniet ukoll li ma kienx hemm trasferiment ta’ parti minn negozju peress li l-awtorità fiskali ma kinitx uriet li Feudi kienet qiegħda twettaq l-attività li Vigna Ottieri kienet wettqet preċedentement. F’April 2012, il-Commissione tributaria provinciale di Avellino (il-Kummissjoni Fiskali Provinċjali ta’ Avellino, l-Italja) ċaħdet ir-rikors għal annullament ta’ Vigna Ottieri. Vigna Ottieri appellat minn dik is-sentenza.

7.        F’Settembru 2012, Feudi saret proprjetarja ta’ Vigna Ottieri.

8.        F’Ottubru 2013, il-Commissione tributaria regionale della Campania (il-Kummissjoni Fiskali Provinċjali ta’ Campania, l-Italja) ċaħdet l-appell ta’ Vigna Ottieri. Dik il-qorti ddeċidiet li l-kumpanniji mhux operattivi spiss jippermettu lil terzi, normalment l-azzjonisti tagħhom, jużaw l-assi tagħhom b’kundizzjonijiet favorevoli. F’dawn iċ-ċirkustanzi, kumpanniji li huma proprjetarji ta’ dawn l-assi jistgħu jiġu ttrattati bħala mhux operattivi. Hija ddeċidiet ukoll li, permezz tat-twellija tal-assi tagħha lil Feudi, inkluż id-dritt li tuża t-trademark tagħha, Vigna Ottieri kienet, fil-fatt, ittrasferiet parti min-negozju tagħha lil Feudi, u b’dan il-mod poġġiet it-tranżazzjoni ’l barra mill-kamp ta’ applikazzjoni tal-VAT.

9.        F’Marzu 2014, Feudi appellat minn dik id-deċiżjoni quddiem il-Corte suprema di Cassazione (il-Qorti Suprema tal-Kassazzjoni, l-Italja). Hija sostniet li d-dritt għal tnaqqis tal-VAT jista’ jiġi limitat biss fis-sitwazzjonijiet li s-Sitt Direttiva tal-Kunsill (6) tipprevedi espressament. Skont l-Artikolu 27 ta’ din id-direttiva, il-Kunsill jista’, b’mod unanimu, jawtorizza miżuri nazzjonali intiżi sabiex jipprevjenu l-evażjoni tat-taxxa jew l-evitar tat-taxxa. Fin-nuqqas ta’ tali awtorizzazzjoni, Feudi sostniet li l-Artikolu 30 tal-Liġi Nru 724/1994 kien jikser is-Sitt Direttiva.

10.      L-awtorità fiskali sostniet li hija kienet applikat korrettament l-Artikolu 30 tal-Liġi Nru 724/1994, li huwa intiż li jipprekludi lill-persuni ġuridiċi li jkunu qegħdin jeżerċitaw formalment attivitajiet ekonomiċi, iżda li fil-fatt ma humiex operattivi, milli jibbenefikaw minn vantaġġi fiskali. Peress li Vigna Ottieri ma kinitx persuna taxxabbli għall-finijiet tal-Artikolu 9 tad-Direttiva tal-VAT, hija ġustament irrifjutatilha d-dritt għal tnaqqis tal-VAT.

11.      Il-Corte suprema di Cassazione (il-Qorti Suprema tal-Kassazzjoni) tossserva li l-Artikolu 30 tal-Liġi Nru 724/1994 huwa intiż li jiskoraġġixxi l-ħolqien ta’ kumpanniji mhux operattivi li jeżistu biss bl-għan li jinkisbu kundizzjonijiet fiskali vantaġġużi għall-ġestjoni tal-assi tal-azzjonisti tagħhom. B’riferiment għall-proporzjonijiet medji tal-profitabbiltà għall-assi tal-kumpannija, l-Artikolu 30 tal-Liġi Nru 724/1994 jistabbilixxi limiti biex jiġi identifikat meta kumpannija ma tkunx operattiva. Il-preżunzjoni li l-kumpanniji li ma jilħqux dawk il-limiti ma humiex operattivi hija bbażata fuq l-osservazzjoni li n-negozju ġenwin ma jsirx fin-nuqqas ta’ xi kontinwazzjoni minima tad-dħul. Kumpannija tista’ tikkonfuta din il-preżunzjoni billi turi li, minħabba ċirkustanzi oġġettivi, kien impossibbli li jinkiseb dan il-livell minimu ta’ dħul.

12.      Il-Corte suprema di Cassazione (il-Qorti Suprema tal-Kassazzjoni) tispjega li persuna taxxabbli mhux operattiva titlef id-dritt għar-rimbors ta’ kwalunkwe kreditu tal-VAT eċċessiva (7) li hija talbet fid-dikjarazzjoni tat-taxxa tagħha, id-dritt li tuża dan il-kreditu biex tpaċih ma’ obbligazzjonijiet oħra tal-VAT u d-dritt li tittrasferixxi dan il-kreditu lil terz. Filwaqt li din il-persuna taxxabbli żżomm id-dritt li tittrasferixxi dan il-kreditu u tnaqqsu mill-VAT dovuta f’perijodi ta’ taxxa sussegwenti, dan id-dritt jintilef jekk hija tonqos milli tissodisfa l-limiti li għalihom jirreferi l-punt 11 ta ’dawn il-konklużjonijiet għal tliet snin fiskali konsekuttivi. Id-dritt għal tnaqqis tal-VAT jitnissel meta persuna taxxabbli tipprovdi oġġetti jew servizzi lil persuna taxxabbli oħra biex jintużaw minn din tal-aħħar bħala inputs għall-finijiet tat-tranżazzjonijiet tal-output intaxxati tagħha. L-awtoritajiet fiskali nazzjonali ma jistgħux jimponu kundizzjonijiet addizzjonali. Huwa f’dan il-kuntest li l-Corte suprema di Cassazione (il-Qorti Suprema tal-Kassazzjoni) hija inċerta jekk huwiex possibbli li jiġi rtirat l-istatus ta’ persuna taxxabbli, fis-sens tal-Artikolu 9(1) tad-Direttiva tal-VAT, minn kumpannija li ma tissodisfax il-kriterju stabbilit fl-Artikolu 30 tal-Liġi Nru 724/1994 minħabba li twettaq volum insuffiċjenti ta’ tranżazzjonijiet tal-output suġġetti għall-VAT, anki meta r-raġunijiet għal dan ir-rifjut jistgħu jiġu kkonfutati.

13.      Id-Direttiva tal-VAT tirrikonoxxi wkoll li l-prevenzjoni tal-frodi, tal-evażjoni tat-taxxa u tal-abbuż huma għanijiet leġittimi. Id-dritt għal tnaqqis jista’ jiġi rrifjutat meta l-persuna taxxabbli, bl-iskuża li teżerċita attività ekonomika, fil-fatt tfittex li takkwista, bħala assi privati tagħha, oġġetti li fir-rigward tagħhom seta’ jsir tnaqqis kieku dawn ġew akkwistati fil-kuntest ta’ din l-attività ekonomika. Madankollu, l-awtoritajiet fiskali ma jistgħux jistabbilixxu regoli ta’ prova, bħal preżunzjoni tal-eżistenza ta’ abbuż jew frodi fil-każ ta’ abbandun ta’ investiment, li jagħmilha prattikament impossibbli jew eċċessivament diffiċli għall-persuni taxxabbli li jeżerċitaw id-dritt għal tnaqqis tal-VAT. Il-Corte suprema di Cassazione (il-Qorti Suprema tal-Kassazzjoni) għalhekk għandha dubji dwar jekk il-preżunzjoni stabbilita mill-Artikolu 30 tal-Liġi Nru 724/1994 hijiex konformi mal-prinċipju ta’ proporzjonalità, minkejja li, bi tweġiba għal mistoqsija fil-Parlament Ewropew, il-Kummissjoni wieġbet li kienet konformi (8)

14.      Fl-aħħar, il-Corte suprema di Cassazione (il-Qorti Suprema tal-Kassazzjoni) għandha dubji dwar jekk l-Artikolu 30 tal-Liġi Nru 724/1994 jiksirx il-prinċipji ta’ ċertezza legali u ta’ protezzjoni tal-aspettattivi leġittimi. Persuna taxxabbli li twettaq tranżazzjoni tkun inċerta dwar jekk din tistax tagħti dritt għal tnaqqis, jew biex jinkiseb rimbors tal-VAT, peress li l-eżerċizzju ta’ dawn id-drittijiet ikun suġġett għall-kundizzjoni li din il-persuna taxxabbli tirċievi ċertu livell ta’ dħul f’sena fiskali partikolari.

15.      F’dawn iċ-ċirkustanzi, il-Corte suprema di Cassazione (il-Qorti Suprema tal-Kassazzjoni) iddeċidiet li tissospendi l-proċeduri u li tagħmel lill-Qorti tal-Ġustizzja d-domandi preliminari li ġejjin:

“(1)      L-Artikolu 9(1) tad-[Direttiva tal-VAT] jista’ jiġi interpretat fis-sens li jiċħad il-kwalità ta’ persuna taxxabbli u, għaldaqstant, id-dritt għat-tnaqqis jew għar-rimbors tal-VAT tal-input, lil persuna li tkun wettqet tranżazzjonijiet attivi suġġetti għall-VAT b’mod li jitqies inkompatibbli – għaliex eċċessivament baxx – ma’ dak li jista’ raġjonevolment jiġi mistenni mill-assi patrimonjali li din ikollha matul tliet snin konsekuttivi skont kriterji stabbiliti minn qabel bil-liġi, u li ma tkunx f’pożizzjoni li tipprova, biex tiġġustifika din iċ-ċirkustanza, li jeżistu ċirkustanzi oġġettivi li jipprekludu dan?

(2)      F’każ ta’ risposta fin-negattiv għall-ewwel domanda, l-Artikolu 167 tad-[Direttiva tal-VAT] u l-prinċipji ġenerali ta’ newtralità tal-VAT u ta’ proporzjonalità tal-limitazzjoni tad-dritt għal tnaqqis tal-VAT jipprekludu leġiżlazzjoni nazzjonali li, permezz tal-Artikolu 30(4) tal-Liġi Nru 724 tal-1994, iċċaħħad mid-dritt għal tnaqqis tal-VAT tal-input imħallsa fuq ix-xiri, għar-rimbors tagħha jew għall-użu matul perijodu taxxabbli ulterjuri, lil persuna taxxabbli li, matul tliet perijodi ta’ taxxa konsekuttivi, wettqet tranżazzjonijiet attivi suġġetti għall-VAT b’mod li jitqies inkompatibbli – għaliex eċċessivament baxx – ma’ dak li jista’ raġjonevolment jiġi mistenni mill-assi patrimonjali li din ikollha matul tliet snin konsekuttivi skont kriterji stabbiliti minn qabel bil-liġi, u li ma tkunx f’pożizzjoni li tipprova, biex tiġġustifika din iċ-ċirkustanza, li jeżistu ċirkustanzi oġġettivi li jipprekludu dan?

(3)      F’każ ta’ risposta fin-negattiv għat-tieni domanda, il-prinċipji ta’ ċertezza legali u ta’ protezzjoni tal-aspettattivi leġittimi tad-dritt tal-Unjoni jipprekludu leġiżlazzjoni nazzjonali li, permezz tal-Artikolu 30(4) tal-Liġi Nru 724 tal-1994, iċċaħħad mid-dritt għal tnaqqis tal-VAT tal-input imħallsa fuq ix-xiri, għar-rimbors tagħha jew għall-użu matul perijodu taxxabbli ulterjuri, lil persuna taxxabbli li, matul tliet perijodi ta’ taxxa konsekuttivi, wettqet tranżazzjonijiet attivi suġġetti għall-VAT b’mod li jitqies inkompatibbli – għaliex eċċessivament baxx – ma’ dak li jista’ raġjonevolment jiġi mistenni mill-assi patrimonjali li din ikollha matul tliet snin konsekuttivi skont kriterji stabbiliti minn qabel bil-liġi, u li ma tkunx f’pożizzjoni li tipprova, biex tiġġustifika din iċ-ċirkustanza, li jeżistu ċirkustanzi oġġettivi li jipprekludu dan?”

16.      Feudi, il-Gvern Taljan u l-Kummissjoni ppreżentaw osservazzjonijiet bil-miktub. Fis-seduta tal-14 ta’ Ġunju 2023, dawn il-partijiet għamlu sottomissjonijiet orali u wieġbu għall-mistoqsijiet tal-Qorti Ġenerali.

 IV.      Evalwazzjoni

 A.      L-ewwel domanda

17.      Feudi tissottometti li għandha tingħata risposta fin-negattiv għall-ewwel domanda. L-istatus ta’ persuna taxxabbli hija l-konsegwenza tal-eżerċizzju ta’ attività ekonomika, indipendentement mill-profittabbiltà tagħha jew mill-valur tat-tranżazzjonijiet tal-output tagħha. Skont il-ġurisprudenza, il-fatt li proprjetà tkun adattata għal użu ekonomiku normalment ikun biżżejjed sabiex jiġi kkonstatat li l-proprjetarju tagħha jużaha għall-finijiet ta’ attività ekonomika u, konsegwentement, jikseb dħul kontinwu minn dan l-użu. Meta proprjetà tista’ tintuża kemm għal skopijiet ekonomiċi kif ukoll għal skopijiet privati, għandhom jiġu eżaminati ċ-ċirkustanzi tal-użu tagħha sabiex jiġi ddeterminat jekk effettivament tintużax sabiex jinkiseb dħul kontinwu (9). Feudi tenfasizza li l-assi tagħha, fil-forma ta’ installazzjonijiet, tagħmir u trademark, jistgħu jintużaw biss sabiex jinbiegħ l-inbid. L-Artikolu 9(1) tad-Direttiva tal-VAT jipprekludi għalhekk l-applikazzjoni ta’ preżunzjoni b’riferiment għall-valur tat-tranżazzjonijiet tal-output suġġetti għall-VAT.

18.      Il-Gvern Taljan isostni li l-Artikolu 9(1) tad-Direttiva tal-VAT ma jipprekludix leġiżlazzjoni nazzjonali bħal dik inkwistjoni fil-kawża prinċipali, li hija intiża sabiex tipprevjeni l-użu abbużiv tal-kumpanniji sabiex jiksbu vantaġġi fiskali. Kumpannija li ma tikkunsinnax oġġetti jew servizzi f’suq ma tistax titqies bħala li teżerċita attività ekonomika. Billi tintroduċi preżunzjoni konfutabbli skont il-valur tat-tranżazzjonijiet tal-output suġġetti għall-VAT, li l-applikazzjoni tagħha hija suġġetta għal stħarriġ ġudizzjarju, il-leġiżlazzjoni nazzjonali hija intiża biss sabiex tidentifika sitwazzjonijiet li fihom kumpannija fil-fatt ma teżerċitax attività ekonomika reali.

19.      Il-Kummissjoni tosserva li l-leġiżlazzjoni Taljana għandha l-għan li tevita l-abbużi li jseħħu meta l-kumpanniji jkollhom assi produttivi li ma jiġġenerawx dħul taxxabbli. Hija tidentifika lil dawn il-kumpanniji billi tqabbel il-valur tal-assi li huma għandhom ma’ ċerti limiti ta’ dħul. Meta d-dħul taxxabbli ddikjarat ikun inqas minn dawn il-limiti f’perijodu partikolari, kumpannija titqies li ma tkunx operattiva, sakemm ma tkunx tista’ tispjega għaliex tkun irċeviet dħul daqstant baxx. Il-liġi Taljana tissuġġetta wkoll lil dawn il-kumpanniji għat-taxxa korporattiva b’rata kkalkolata fuq il-bażi ta’ dħul minimu preżunt. L-Artikolu 30 tal-Liġi Nru 724/1994 jillimita d-dritt tal-kumpanniji mhux operattivi li jnaqqsu l-VAT bi tliet modi. L-ewwel, kumpannija mhux operattiva ma tistax tikseb ir-rimbors tal-eċċess tal-VAT imħallsa matul sena fiskali li matulha jitqies li ma tkunx operattiva (10). It-tieni, kumpannija ma tistax tpaċi l-eċċess tal-VAT imħallsa ma’ taxxi jew tariffi oħra dovuti u ma tistax tittrasferixxi kreditu ta’ VAT lil terz f’sena fiskali li matulha titqies li ma hijiex operattiva. It-tielet, filwaqt li, bħala prinċipju, kumpannija mhux operattiva tista’ tittrasferixxi kreditu tal-VAT għas-sena fiskali ta’ wara, dan id-dritt jintilef meta titqies li ma kinitx operattiva għal tliet snin fiskali konsekuttivi.

20.      L-Artikolu 9 tad-Direttiva tal-VAT jiddefinixxi l-kunċett ta’ “attività ekonomika” b’mod wiesa’ ħafna sabiex ikopri kull attività permanenti mwettqa bi ħlas, indipendentement mill-għanijiet jew mir-riżultat ta’ din l-attività. Il-Kummissjoni tqis li kumpannija ma titlifx neċessarjament l-istatus tagħha ta’ persuna taxxabbli minħabba li tkun ikkunsidrata bħala mhux operattiva skont il-leġiżlazzjoni nazzjonali applikabbli. L-istatus ta’ persuna taxxabbli, kif iddefinita fl-Artikolu 9 tad-Direttiva tal-VAT, huwa indipendenti mill-profittabbiltà tal-attivitajiet ekonomiċi li hija teżerċita. Kumpannija mhux operattiva tista’ dejjem tindika li hija ma akkwistatx oġġetti jew servizzi għall-bżonnijiet tat-tranżazzjonijiet tal-output taxxabbli tagħha, f’liema każ hija ma għandhiex id-dritt li tnaqqas kwalunkwe VAT imħallsa, konformement mal-Artikolu 168 tad-Direttiva tal-VAT. Skont il-Kummissjoni, l-awtorità fiskali Taljana ma kkontestatx in-natura ekonomika tal-attivitajiet ta’ Vigna Ottieri, iżda pjuttost qieset lil din il-kumpannija mhux operattiva minħabba li t-tranżazzjonijiet tal-output tagħha suġġetti għall-VAT ma kinux profittabbli biżżejjed.

21.      Il-kunċett ta’ “persuna taxxabbli” fis-sens tad-Direttiva tal-VAT huwa ddefinit b’riferiment għall-kunċett ta’ “attività ekonomika” li jinsab fit-tieni subparagrafu tal-Artikolu 9(1) tagħha. Hija l-eżistenza ta’ attività ekonomika li tagħti l-istatus ta’ “persuna taxxabbli” skont l-ewwel subparagrafu tal-Artikolu 9(1) ta’ din id-direttiva (11).

22.      It-tieni subparagrafu tal-Artikolu 9(1) tad-Direttiva tal-VAT jiddefinixxi l-kunċett ta’ “attività ekonomika” bħala li jinkludi kwalunkwe attività ta’ produtturi, kummerċjanti jew persuni li jipprovdu servizzi, b’tali mod li jinkludi l-“isfruttament ta’ proprjetà tanġibbli jew intanġibbli għal skopijiet ta’ dħul minnha fuq bażi kontinwa”. It-terminu “sfruttament”, skont il-prinċipju ta’ newtralità tal-VAT, jagħmel riferiment għat-tranżazzjonijiet kollha, irrispettivament mill-forma ġuridika tagħhom, li huma intiżi sabiex jiġġeneraw dħul minn proprjetà fuq bażi kontinwa (12). In-numru jew il-valur tat-tranżazzjonijiet ma jikkostitwixxux kriterji validi sabiex issir distinzjoni bejn l-attivitajiet ta’ operatur li jaġixxi f’kapaċità privata, li ma jaqax fil-kamp ta’ applikazzjoni tal-VAT, u dawk ta’ operatur li t-tranżazzjonijiet tiegħu jikkostitwixxu attività ekonomika. (13)

23.      It-termini “provvista ta’ oġġetti” u “provvisti ta’ servizzi” huma ta’ natura oġġettiva u japplikaw indipendentement mill-għanijiet u mir-riżultati ta’ dawn it-tranżazzjonijiet (14). Huwa irrilevanti li t-tranżazzjonijiet huma intiżi sabiex isir profitt (15). Il-fatt li l-prezz imħallas għal tranżazzjoni ekonomika huwa ogħla jew inqas mill-valur tagħha fis-suq huwa, għalhekk, irrilevanti sabiex jiġi ddeterminat jekk din saritx bi ħlas (16).

24.      La l-akkwist u lanqas il-bejgħ ta’ ass ma jikkostitwixxi l-isfruttament ta’ ass intiż li jipproduċi dħul fuq bażi kontinwa għall-finijiet tat-tieni subparagrafu tal-Artikolu 9(1) tad-Direttiva tal-VAT, peress li l-uniku korrispettiv ta’ tali tranżazzjonijiet huwa dak tal-profitt possibbli mill-bejgħ tal-ass (17). Is-sempliċi żamma ta’ assi lanqas ma hija meqjusa bħala attività ekonomika fis-sens tad-Direttiva tal-VAT (18). L-ewwel paragrafu tal-Artikolu 19 tad-Direttiva tal-VAT, li jipprevedi li, fil-każ ta’ trasferiment, kemm bi ħlas kif ukoll jekk le, tal-assi kollha jew parti minnhom, l-Istati Membri jistgħu jqisu li ma tkun saret ebda kunsinna ta’ oġġetti, jirrifletti dan il-fatt. Din id-dispożizzjoni hija intiża sabiex tippermetti lill-Istati Membri jiffaċilitaw it-trasferimenti ta’ impriżi jew ta’ partijiet minn impriżi billi jissimplifikawhom u billi jevitaw li ċ-ċessjonarju jkun suġġett għall-ħlas ta’ piż fiskali sproporzjonat li jkun, fi kwalunkwe każ, finalment irkuprat billi titnaqqas il-VAT imħallsa (19). Fid-dawl ta’ dan l-għan, il-kunċett ta’ trasferiment, bi ħlas jew le jew bħala kontribuzzjoni lil kumpannija, tal-assi kollha jew parti minnhom, jinkludi t-trasferiment ta’ negozju jew ta’ parti indipendenti ta’ impriża, li jinkludu elementi tanġibbli u intanġibbli li jikkostitwixxu, flimkien, impriża jew parti minn impriża li tista’ teżerċita attività ekonomika indipendenti. Dan il-kunċett ma jinkludix sempliċi trasferiment ta’ assi, bħall-bejgħ ta’ stokk ta’ prodotti (20). Trasferiment ta’ assi jista’ jseħħ ukoll meta bini ta’ negozju jitqiegħed għad-dispożizzjoni ta’ ċessjonarju taħt twellija, jew fejn iċ-ċessjonarju jkollu post xieraq fejn l-assi kollha ttrasferiti jistgħu jitpoġġew u fejn huwa jista’ jkompli jeżerċita l-istess attività ekonomika (21)

25.      Filwaqt li t-trasferimenti li l-Artikolu 19 tad-Direttiva tal-VAT jagħmel riferiment għalihom huma dawk li fihom iċ-ċessjonarju jkollu l-intenzjoni li jopera n-negozju jew il-parti tal-impriża ttrasferita, xejn f’din id-dispożizzjoni ma jeżiġi li, qabel it-trasferiment, iċ-ċessjonarju jkun wettaq l-istess attività ekonomika bħaċ-ċedent (22).

26.      Tranżazzjoni tikkostitwixxi kunsinna ta’ oġġetti jew provvista ta’ servizzi u għalhekk tikkostitwixxi attività ekonomika ladarba tissodisfa l-kriterji oġġettivi li fuqhom huwa bbażat dan il-kunċett. Dan huwa l-każ anki meta tranżazzjoni titwettaq bl-għan uniku li jinkiseb vantaġġ fiskali. (23)

27.      Minn dan isegwi li l-istatus ta’ persuna taxxabbli japplika għal kwalunkwe persuna li teżerċita, b’mod indipendenti, attività ekonomika intiża sabiex tikseb dħul fuq bażi kontinwa, irrispettivament mir-riżultati ta’ din l-attività. Id-Direttiva tal-VAT tipprekludi għalhekk leġiżlazzjoni nazzjonali li tissuġġetta l-istatus ta’ persuna taxxabbli għad-dħul ta’ ċertu livell ta’ dħul minn attività ekonomika.

28.      Għaldaqstant, nipproponi li l-Qorti tal-Ġustizzja tirrispondi għall-ewwel domanda tal-qorti tar-rinviju li l-Artikolu 9(1) tad-Direttiva tal-VAT għandu jiġi interpretat fis-sens li l-istatus ta’ persuna taxxabbli ma jistax jiġi rrifjutat meta, għal tliet snin konsekuttivi, it-tranżazzjonijiet rilevanti għall-finijiet tal-VAT imwettqa jkunu ta’ valur li huwa meqjus mhux proporzjonali mad-dħul li l-assi disponibbli jistgħu raġonevolment ikunu mistennija li jipproduċu.

29.      Madankollu nosserva li, waqt is-seduta, il-Kummissjoni qalet li, sa fejn persuna taxxabbli li ma tilħaqx il-livell ta’ dħul meħtieġ tista’ parzjalment tpaci l-VAT tal-input imħallsa mal-VAT iffatturata fil-kuntest tat-tranżazzjonijiet tal-output tagħha, il-leġiżlazzjoni nazzjonali inkwistjoni ma taffettwax l-istatus ta’ persuna taxxabbli. L-unika konsegwenza tan-nuqqas li jintlaħaq il-livell ta’ dħul rilevanti fi tliet snin fiskali konsekuttivi hija li l-persuna taxxabbli ma tista’ tittrasferixxi ebda kreditu għall-eċċess tal-VAT tal-input imħallsa u għalhekk titlef id-dritt li titlob dan il-kreditu. Għalkemm hija l-qorti tar-rinviju li għandha tivverifika dan, jekk ikun il-każ, il-leġiżlazzjoni nazzjonali kkunsidrata ma tissuġġettax, fil-fatt, l-istatus ta’ persuna taxxabbli għall-kundizzjoni li din tilħaq ċertu livell ta’ dħul matul perijodu ta’ tassazzjoni partikolari.

 B.      It-tieni domanda

30.      Skont il-prinċipju ta’ newtralità tal-VAT, Feudi ssostni li d-dritt għal tnaqqis tal-VAT tal-input imħallsa ma jistax jiġi suġġett għal kundizzjonijiet oħra għajr l-eżerċizzju ta’ attività ekonomika u l-użu tal-oġġetti u tas-servizzi akkwistati għal dan l-għan. Persuna taxxabbli għandha d-dritt li tnaqqas il-VAT tal-input imħallsa ladarba t-tranżazzjonijiet tal-output tagħha jkunu suġġetti għal din it-taxxa. Filwaqt li awtorità fiskali tista’ tirrifjuta d-dritt għal tnaqqis fil-każ ta’ evażjoni fiskali jew frodi, kif jidher b’riferiment għal elementi oġġettivi, Feudi ssostni li hija ma tistax tibbaża ruħha fuq preżunzjoni għal dan l-għan. Fi kwalunkwe każ, kriterju bbażat fuq il-volum tat-tranżazzjonijiet tal-output suġġetti għall-VAT huwa miżura mhux xierqa sabiex tiġi evalwata l-eżistenza ta’ frodi.

31.      Il-Gvern Taljan isostni li l-leġiżlazzjoni nazzjonali tiegħu ma tirrendix impossibbli jew eċċessivament diffiċli l-eżerċizzju tad-dritt għal tnaqqis tal-VAT, peress li l-kumpanniji jistgħu juru li huma effettivament jeżerċitaw attività ekonomika minkejja l-fatt li jirċievu livell baxx ta’ dħul. L-Artikolu 30 tal-Liġi Nru 724/1994 josserva għalhekk il-prinċipji ta’ newtralità tal-VAT u ta’ proporzjonalità.

32.      Skont il-Kummissjoni, sakemm persuna taxxabbli tuża oġġetti jew servizzi għall-iskopijiet ta’ tranżazzjonijiet taxxabbli, hija għandha d-dritt li tnaqqas il-VAT imħallsa jew li għandha titħallas fir-rigward ta’ dawn l-oġġetti jew servizzi. Dan it-tnaqqis huwa, bħala prinċipju, ikkalkolat billi jitnaqqas mill-ammont tal-VAT dovuta għal perijodu ta’ taxxa l-ammont tal-VAT li fir-rigward tiegħu jitnissel id-dritt għal tnaqqis matul dan l-istess perijodu. Fejn l-ammont ta’ tnaqqis għal perijodu partikolari ta’ taxxa jkun ogħla mill-ammont tal-VAT dovuta, l-Istati Membri jistgħu jew iħallsu lura l-eċċess jew imexxuh għall-perijodu tat-taxxa li jmiss.

33.      Fil-kawża quddiem il-qorti tar-rinviju, id-dritt li tmexxi l-kreditu tal-VAT ġie rrifjutat għaliex Feudi ma laħqitx, għal tliet snin fiskali konsekuttivi, il-livell minimu ta’ tranżazzjonijiet tal-output suġġetti għall-VAT stabbilit mil-leġiżlazzjoni Taljana. Il-Kummissjoni ssostni li, sa fejn il-leġiżlazzjoni Taljana tikkunsidra ċerti persuni taxxabbli bħala mhux operattivi, hija tagħmel dan abbażi tal-fatt li persuna taxxabbli setgħet twettaq tranżazzjonijiet tal-VAT tal-input mingħajr ma twettaq ukoll volum suffiċjenti ta’ tranżazzjonijiet tal-output suġġetti għall-VAT. Peress li, f’dawn iċ-ċirkustanzi, il-persuna taxxabbli ma għandhiex id-dritt li tnaqqas il-VAT tal-input imħallsa żejda, il-prinċipju ta’ newtralità tal-VAT ma jipprekludix din l-interpretazzjoni tal-leġiżlazzjoni Taljana.

34.      Il-Kummissjoni tqis ukoll li l-Artikolu 30 tal-Liġi Nru 724/1994 huwa proporzjonat mal-għan li kumpannija tiġi prekluża milli tnaqqas indebitament il-VAT tal-input, sakemm din il-kumpannija għandha d-dritt li tipproduċi l-prova, f’kundizzjonijiet li ma humiex eċċessivament diffiċli, li hija wettqet tranżazzjonijiet tal-input sabiex twettaq tranżazzjonijiet tal-output suġġetti għall-VAT.

35.      Is-sistema ta’ tnaqqis li d-Direttiva tal-VAT tistabbilixxi hija maħsuba b’tali mod sabiex tneħħi għal operatur ekonomiku il-piż kollu tal-VAT imħallsa jew li għandha titħallas fil-kuntest tal-attivitajiet ekonomiċi tiegħu kollha. Is-sistema komuni tal-VAT hija intiża li tiżgura n-newtralità sħiħa tat-tassazzjoni tal-attivitajiet ekonomiċi kollha, irrispettivament mill-għanijiet jew mir-riżultati tagħhom, bil-kundizzjoni li dawn l-attivitajiet ikunu suġġetti għall-VAT (24). Id-dritt għal tnaqqis jagħmel parti integrali mis-sistema tal-VAT. Sakemm il-persuni taxxabbli li jixtiequ jeżerċitaw dan id-dritt josservaw ir-rekwiżiti jew il-kundizzjonijiet materjali u formali li huwa suġġett għalihom, l-applikazzjoni ta’ dan id-dritt ma tistax, bħala prinċipju, tiġi limitata (25).

36.      Skont l-Artikolu 168 tad-Direttiva tal-VAT, persuna taxxabbli għandha d-dritt li tnaqqas il-VAT tal-input imħallsa sakemm l-oġġetti u s-servizzi akkwistati jintużaw għall-iskopijiet tat-tranżazzjonijiet taxxabbli tagħha (26). Meta oġġetti jew servizzi li persuna taxxabbli takkwista jintużaw għall-iskopijiet ta’ tranżazzjonijiet li huma eżentati jew li ma jaqgħux fil-kamp ta’ applikazzjoni tal-VAT, it-taxxa tal-output ma tistax tinġabar u t-taxxa tal-input lanqas ma tista’ titnaqqas (27).

37.      Skont l-ewwel paragrafu tal-Artikolu 273 tad-Direttiva tal-VAT, l-Istati Membri jistgħu jimponu obbligi oħra, minbarra dawk previsti minn din id-direttiva, meta jqisu li dawn l-obbligi huma neċessarji sabiex jiġi żgurat il-ġbir korrett tal-VAT u sabiex tiġi evitata l-evażjoni. Tali miżuri ma għandhomx imorru lil hinn minn dak li huwa neċessarju sabiex jintlaħqu l-għanijiet imfittxija u ma jistgħux jintużaw b’mod li jikkompromettu sistematikament id-dritt għal tnaqqis tal-VAT u, għaldaqstant, in-newtralità ta’ din it-taxxa (28).

38.      Id-dritt tal-Unjoni ma jistax jiġi invokat għal finijiet abbużivi jew frawdolenti. Il-benefiċċju tad-dritt tal-Unjoni ma japplikax għal tranżazzjonijiet li ma jitwettqux fil-kuntest ta’ tranżazzjonijiet kummerċjali normali, iżda biss bl-għan li jiksbu, b’mod abbużiv, vantaġġ previst mid-dritt tal-Unjoni. Il-projbizzjoni ta’ prattiki abbużivi tapplika wkoll għall-VAT u d-Direttiva tal-VAT tirrikonoxxi u tinkoraġġixxi l-prevenzjoni ta’ evażjoni fiskali, l-evitar tat-taxxa u l-abbużi possibbli (29).

39.      Fis-sistema tal-VAT, ikun hemm prattika abbużiva biss jekk, l-ewwel, minkejja l-applikazzjoni formali tal-kundizzjonijiet previsti mid-dispożizzjonijiet rilevanti tad-Direttiva tal-VAT u tal-leġiżlazzjoni nazzjonali li tittrasponiha, it-tranżazzjonijiet inkwistjoni jkollhom bħala riżultat li jinkiseb vantaġġ fiskali li l-għoti tiegħu jkun kuntrarju għall-għan imfittex minn dawn id-dispożizzjonijiet. It-tieni, għandu jkun evidenti wkoll li l-għan essenzjali tat-tranżazzjonijiet inkwistjoni huwa li jinkiseb vantaġġ fiskali (30)

40.      It-tieni domanda, li teħtieġ risposta fid-dawl tar-risposta proposta tiegħi għall-ewwel domanda, għandha tingħata risposta fid-dawl tal-kunsiderazzjonijiet preċedenti.

41.      L-Artikolu 30 tal-Liġi Nru 724/1994 jipprevedi li, bħala prinċipju, kumpannija mhux operattiva hija tali li ma twettaqx volum minimu ta’ tranżazzjonijiet ekonomiċi suġġetti għall-VAT meta mqabbla mal-valur tal-assi li żżomm din il-kumpannija. Din il-preżunzjoni tista’ tiġi kkonfutata billi tiġi prodotta l-prova tar-raġunijiet oġġettivi tal-volum anormalment baxx tat-tranżazzjonijiet tal-output suġġetti għall-VAT tal-kumpannija. Meta tapplika l-preżunzjoni, il-kumpannija mhux operattiva tista’ tmexxi l-kreditu għall-eċċess tal-VAT tal-input imħallsa għas-sena fiskali ta’ wara biss. Meta kumpannija ma tissodisfax il-livelli ta’ dħul ta’ riferiment għal tliet snin konsekuttivi, hija ma tista’ tmexxi ’l quddiem l-ebda kreditu tal-VAT. Kif osservat il-Kummissjoni waqt is-seduta, mingħajr ma l-partijiet l-oħra ma kkontestawha fuq dan il-punt, kumpannija mhux operattiva ma titlifx id-dritt għal tnaqqis fir-rigward tat-tranżazzjonijiet tal-output tagħha suġġetti għall-VAT, anki meta dawn ikunu inqas mil-livell, billi l-VAT tal-input imħallsa titnaqqas mill-VAT li għandha titħallas.

42.      Sa fejn il-leġiżlazzjoni Taljana tipprovdi li l-kumpanniji jitilfu d-dritt li jnaqqsu kwalunkwe eċċess tal-VAT tal-input imħallsa meta jwettqu volum insuffiċjenti ta’ tranżazzjonijiet tal-output suġġetti għall-VAT għal tliet snin fiskali konsekuttivi, din il-leġiżlazzjoni tapplika l-prinċipju stabbilit fl-Artikolu 168 tad-Direttiva tal-VAT, kif interpretat mill-ġurisprudenza li għaliha jirreferi l-punt 36 ta’ dawn il-konklużjonijiet, peress li persuna taxxabbli għandha dritt għal tnaqqis tal-VAT tal-input imħallsa biss meta l-oġġetti jew is-servizzi akkwistati jintużaw għall-bżonnijiet tat-tranżazzjonijiet tal-output tagħha suġġetti għall-VAT. Għalhekk hija tikkostitwixxi miżura kontra l-evitar li għandha għan leġittimu, jiġifieri li tipprekludi lill-kumpanniji mhux operattivi milli jabbużaw mis-sistema tal-VAT, għan li huwa konsistenti mal-Artikolu 273 tad-Direttiva tal-VAT u mal-ġurisprudenza li għaliha jirreferu l-punti 38 u 39 ta’ dawn il-konklużjonijiet.

43.      Fir-rigward tal-prinċipju ta’ proporzjonalità, il-Qorti tal-Ġustizzja ddeċidiet li l-Istati Membri għandhom jirrikorru għal mezzi li, filwaqt li jippermettulhom effettivament li jilħqu l-għanijiet imfittxija mid-dritt intern tagħhom, joħolqu l-inqas deterrent possibbli għall-għanijiet u l-prinċipji stabbiliti mil-leġiżlazzjoni tal-Unjoni rilevanti (31). Leġiżlazzjoni nazzjonali li tistabbilixxi preżunzjoni konfutabbli sabiex jitnaqqsu kemm jista’ jkun ir-riskji ta’ evitar u ta’ evażjoni tat-taxxa għalhekk ma tmurx, bħala tali, kontra l-prinċipju ta’ proporzjonalità, bil-kundizzjoni li l-persuni kkonċernati minn tali regoli jingħataw possibbiltà reali li jipprovdu raġunijiet oġġettivi sabiex jispjegaw volum anormalment baxx ta’ tranżazzjonijiet tal-output suġġetti għall-VAT fis-snin fiskali kkonċernati (32). Tali prova għandha tiġi prodotta skont ir-regoli tad-dritt nazzjonali, li ma għandhomx jirrendu prattikament impossibbli jew eċċessivament diffiċli l-eżerċizzju tad-dritt għal tnaqqis tal-VAT (33). Il-livell ta’ prova meħtieġ sabiex tiġi kkonfutata l-preżunzjoni ma għandux, barra minn hekk, ikun eċċessivament għoli.

44.      F’dan il-każ, kif indika l-Gvern Taljan, sabiex tiġi kkonfutata l-preżunzjoni, kumpannija ma hijiex ristretta li turi li hija kienet laħqet il-livell ta’ dħul. Kumpanija tista’ wkoll tipprovdi spjegazzjonijiet suffiċjenti dwar ir-raġunijiet għaliex wettqet valur baxx ħafna ta’ tranżazzjonijiet tal-output fis-snin fiskali kkonċernati (pereżempju, problemi ta’ produzzjoni jew reċessjoni ekonomika). Il-fatt li l-preżunzjoni konfutabbli stabbilita mil-leġiżlazzjoni Taljana tapplika meta l-livelli tad-dħul ma jintlaħqux għal tliet snin fiskali konsekuttivi jindika li hija ddisinjata b’mod adegwat biex tidentifika l-arranġamenti artifiċjali. Fil-każ ta’ tilwima, hija l-qorti tar-rinviju li għandha tivverifika jekk ir-regoli ta’ prova previsti mid-dritt Taljan sabiex tiġi kkonfutata l-preżunzjoni jirrendux prattikament impossibbli jew eċċessivament diffiċli l-eżerċizzju tad-dritt għal tnaqqis tal-VAT mill-persuni kkonċernati.

45.      Għalhekk nipproponi li l-Qorti tal-Ġustizzja tirrispondi għat-tieni domanda tal-qorti tar-rinviju li l-prinċipju ta’ newtralità tal-VAT u l-prinċipju ta’ proporzjonalità ma jipprekludux leġiżlazzjoni nazzjonali li tipprovdi li d-dritt għal tnaqqis tal-VAT tal-input imħallsa fuq xiri jew għar-rimbors ta’ din il-VAT jew li din il-VAT tintuża f’perijodu ta’ taxxa sussegwenti jista’ jiġi rrifjutat meta, fi tliet snin fiskali konsekuttivi, it-tranżazzjonijiet rilevanti għall-finijiet tal-VAT imwettqa jkunu ta’ valur li ma huwiex meqjus proporzjonali mad-dħul li l-assi disponibbli jistgħu raġonevolment ikunu mistennija li jirrendu u l-persuna taxxabbli kkonċernata ma tkunx f’pożizzjoni li tipproduċi l-prova ta’ ċirkustanzi oġġettivi sabiex jiġi spjegat dan ir-riżultat. Il-kundizzjonijiet li fihom tista’ tiġi prodotta din il-prova ma għandhomx jirrendu prattikament impossibbli jew eċċessivament diffiċli għall-persuni kkonċernati l-eżerċizzju tad-dritt għal tnaqqis tal-VAT, aspett li għandu jiġi vverifikat mill-qorti tar-rinviju.

 C.      It-tielet domanda

46.      Fid-dawl tar-risposta proposta tiegħi għat-tieni domanda tal-qorti tar-rinviju, ser nirrispondi għat-tielet domanda tagħha.

47.      Feudi ssostni li leġiżlazzjoni nazzjonali li toħloq sitwazzjoni permanenti ta’ inċertezza fir-rigward tal-possibbiltà li titnaqqas il-VAT tal-input imħallsa tmur kontra l-prinċipju ta’ ċertezza legali.

48.      Il-Gvern Taljan u l-Kummissjoni jsostnu li l-leġiżlazzjoni Taljana la tmur kontra l-prinċipju ta’ ċertezza legali u lanqas kontra l-prinċipju ta’ protezzjoni tal-aspettattivi leġittimi, peress li hija topera fil-qafas ta’ kuntest ġuridiku ċar li jiddefinixxi bi preċiżjoni s-sitwazzjonijiet li fihom persuna taxxabbli tista’ titlef id-dritt għal tnaqqis tal-VAT tal-input imħallsa. Kumpannija li ma teżerċitax attività ekonomika lanqas ma tista’ tibbenefika minn aspettattivi leġittimi li hija tista’ tnaqqas il-VAT tal-input imħallsa.

49.      Kif il-Qorti tal-Ġustizzja ddeċidiet diversi drabi, il-leġiżlazzjoni tal-Unjoni għandha tkun ċerta u l-applikazzjoni tagħha għandha tkun prevedibbli għall-persuni suġġetti għaliha. Dan ir-rekwiżit ta’ ċertezza legali għandu jiġi osservat b’rigorożità partikolari fil-każ ta’ regoli li jistgħu jinvolvu piżijiet finanzjarji, sabiex il-persuni kkonċernati jkunu jafu b’eżattezza l-portata tal-obbligi li dik il-leġiżlazzjoni timponi fuqhom (34).

50.      Il-leġiżlazzjoni nazzjonali inkwistjoni fil-kawża prinċipali tikkonsisti fi preżunzjoni konfutabbli li tapplika meta l-persuna taxxabbli twettaq volum insuffiċjenti ta’ tranżazzjonijiet tal-output suġġetti għall-VAT bħala perċentwali tal-valur tal-assi tagħha għal tliet snin fiskali konsekuttivi. Il-leġiżlazzjoni tipprevedi għalhekk regola ċara, li l-persuna taxxabbli għandha preavviż tagħha, li tpoġġi limiti fuq id-dritt għal tnaqqis tal-VAT tal-input imħallsa. Fil-mument meta persuna taxxabbli tippreżenta dikjarazzjoni tal-VAT, hija tkun taf b’ċertezza jekk din ir-regola tapplikax fiċ-ċirkustanzi tagħha, bl-istess mod bħalma l-persuni taxxabbli l-oħra kollha jistabbilixxu r-responsabbiltà tagħhom għall-VAT għal perijodu ta’ taxxa partikolari meta tiġi ppreżentata dikjarazzjoni tal-VAT. Il-persuna taxxabbli tista’, fejn xieraq, turi li t-tranżazzjonijiet tal-output tagħha suġġetti għall-VAT laħqu l-livell rilevanti jew li ma għamlux dan għal raġunijiet oġġettivi.

51.      Il-prinċipju tal-protezzjoni tal-aspettattivi leġittimi japplika għal kull persuna li fir-rigward tagħha awtorità amministrattiva tkun ipprovdiet assigurazzjonijiet preċiżi li joħolqu, f’moħħ operatur ekonomiku prudenti u attent, aspettattivi raġonevoli, sakemm dawn l-aspettattivi jkunu leġittimi (35).

52.      Mid-dokumenti ippreżentati lill-Qorti tal-Ġustizzja ma jidhirx li l-awtorità fiskali Taljana pprovdiet lil Vigna Ottieri assigurazzjonijiet preċiżi li hija ma kinitx ser titqies bħala kumpannija mhux operattiva fis-snin fiskali rilevanti, aspett li hija l-qorti tar-rinviju li għandha tistabbilixxi. Persuna taxxabbli mhux operattiva ma tistax tinvoka l-prinċipju tal-protezzjoni tal-aspettattivi leġittimi sabiex tnaqqas il-VAT tal-input imħallsa meta l-oġġetti u s-servizzi li tkun akkwistat ma jkunux intużaw għall-bżonnijiet ta’ tranżazzjonijiet tal-output suġġetti għall-VAT, kif jeżiġi l-Artikolu 168 tad-Direttiva tal-VAT.

53.      Għalhekk nipproponi li l-Qorti tal-Ġustizzja tirrispondi għat-tielet domanda tal-qorti tar-rinviju li l-prinċipji ta’ ċertezza legali u ta’ protezzjoni tal-aspettattivi leġittimi ma jipprekludux leġiżlazzjoni nazzjonali li tipprovdi li d-dritt għal tnaqqis tal-VAT tal-input imħallsa fuq xiri jew għar-rimbors ta’ din il-VAT jew li din il-VAT tintuża f’perijodu ta’ taxxa sussegwenti jista’ jiġi rrifjutat meta, fi tliet snin fiskali konsekuttivi, it-tranżazzjonijiet rilevanti għall-finijiet tal-VAT imwettqa jkunu ta’ valur li ma huwiex meqjus proporzjonali mad-dħul li l-assi disponibbli jistgħu raġonevolment ikunu mistennija li jirrendu u l-persuna taxxabbli kkonċernata ma tkunx f’pożizzjoni li tipproduċi l-prova ta’ ċirkustanzi oġġettivi sabiex jiġi spjegat dan ir-riżultat.

 V.      Konklużjoni

54.      Fid-dawl tal-kunsiderazzjonijiet preċedenti, nipproponi lill-Qorti tal-Ġustizzja tirrispondi kif ġej għad-domandi preliminari magħmula mill-Corte suprema di Cassazione (il-Qorti Suprema tal-Kassazzjoni, l-Italja):

(1)      L-Artikolu 9(1) tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud

għandu jiġi interpretat fis-sens li l-istatus ta’ persuna taxxabbli ma jistax jiġi rrifjutat meta, għal tliet snin konsekuttivi, it-tranżazzjonijiet rilevanti għall-finijiet tal-VAT imwettqa jkunu ta’ valur li huwa meqjus mhux proporzjonali mad-dħul li l-assi disponibbli jistgħu raġonevolment ikunu mistennija li jipproduċu.

(2)      Il-prinċipju ta’ newtralità tal-VAT u l-prinċipju ta’ proporzjonalità

għandhom jiġu interpretati fis-sens li ma jipprekludux leġiżlazzjoni nazzjonali li tipprovdi li d-dritt għal tnaqqis tal-VAT tal-input imħallsa fuq xiri jew għar-rimbors ta’ din il-VAT jew li din il-VAT tintuża f’perijodu ta’ taxxa sussegwenti jista’ jiġi rrifjutat meta, fi tliet snin fiskali konsekuttivi, it-tranżazzjonijiet rilevanti għall-finijiet tal-VAT imwettqa jkunu ta’ valur li ma huwiex meqjus proporzjonali mad-dħul li l-assi disponibbli jistgħu raġonevolment ikunu mistennija li jirrendu u l-persuna taxxabbli kkonċernata ma tkunx f’pożizzjoni li tipproduċi l-prova ta’ ċirkustanzi oġġettivi sabiex jiġi spjegat dan ir-riżultat. Il-kundizzjonijiet li fihom tista’ tiġi prodotta din il-prova ma għandhomx jirrendu prattikament impossibbli jew eċċessivament diffiċli għall-persuni kkonċernati l-eżerċizzju tad-dritt għal tnaqqis tal-VAT, aspett li għandu jiġi vverifikat mill-qorti tar-rinviju.

(3)      Il-prinċipji ta’ ċertezza legali u ta’ protezzjoni tal-aspettattivi leġittimi

għandhom jiġu interpretati fis-sens li ma jipprekludux leġiżlazzjoni nazzjonali li tipprovdi li d-dritt għal tnaqqis tal-VAT tal-input imħallsa fuq xiri jew għar-rimbors ta’ din il-VAT jew li din il-VAT tintuża f’perijodu ta’ taxxa sussegwenti jista’ jiġi rrifjutat meta, fi tliet snin fiskali konsekuttivi, it-tranżazzjonijiet rilevanti għall-finijiet tal-VAT imwettqa jkunu ta’ valur li ma huwiex meqjus proporzjonali mad-dħul li l-assi disponibbli jistgħu raġonevolment jkunu mistennija li jirrendu u l-persuna taxxabbli kkonċernata ma tkunx f’pożizzjoni li tipproduċi l-prova ta’ ċirkustanzi oġġettivi sabiex jiġi spjegat dan ir-riżultat.

1      Lingwa oriġinali: l-Ingliż.

2      ĠU 2006, L 347, p. 1, rettifika fil-ĠU 2007, L 335, p. 60.

3      Gazzetta Ufficiale Nru 304 tat-30 ta’ Diċembru 1994.

4      Proċedura għal nuqqas ta’ twettiq ta’ obbligu Nru 2007/4392.

5      Jiġifieri, il-valur tat-tranżazzjonijiet tal-output ta’ Vigna Ottieri suġġetti għall-VAT kien inqas minn 15 % tal-valur tal-assi tagħha.

6      Is-Sitt Direttiva tal-Kunsill tas-17 ta’ Mejju 1977 fuq l-armonizzazzjoni tal-liġijiet ta’ l-Istati Membri dwar taxxi fuq id-dħul mill-bejgħ – Sistema komuni ta’ taxxa fuq il-valur miżjud: bażi uniformi ta’ stima (ĠU Edizzjoni Speċjali bil-Malti, Kapitolu 9, Vol. 1, p. 23; iktar ’il quddiem is-“Sitt Direttiva”). Mill-1 ta’ Jannar 2007, id-Direttiva tal-VAT ħassret u ssostitwixxiet is-Sitt Direttiva.

7      Il-kunċett ta’ “kreditu tal-VAT eċċessiv” japplika meta kumpannija li wettqet iktar tranżazzjonijiet tal-input minn tranżazzjonijiet tal-output suġġetti għall-VAT ma tkunx tista’ tpaċi għalkollox il-VAT imħallsa mal-VAT imposta f’sena fiskali partikolari.

8      Ara t-tweġiba tal-Kummissjoni tat-30 ta’ Novembru 2010 għall-Mistoqsija Parlamentari P-9064/2010 (ĠU 2011, C 249 E, p. 1).

9      Sentenza tal-20 ta’ Ġunju 2013, Finanzamt Freistadt Rohrbach Urfahr (C-219/12, EU:C:2013:413, punt 20).

10      Il-Kummissjoni żiedet tgħid, waqt is-seduta, li kumpannija mhux operattiva ma titlifx id-dritt għal tnaqqis f’dak li jirrigwarda t-tranżazzjonijiet tal-output suġġetti għall-VAT, anki meta l-volum ta’ dawn it-tranżazzjonijiet jaqa’ taħt il-livell. L-Artikolu 30 tal-Liġi Nru 724/1994 jirrestrinġi biss l-eżerċizzju tad-dritt għal tnaqqis tal-eċċess tal-VAT imħallsa.

11      Sentenzi tal-15 ta’ Settembru 2011, Słaby et (C-180/10 u C-181/10, EU:C:2011:589, punt 43), u tal-20 ta’ Jannar 2021, AJFP Sibiu u DGRFP Braşov (C-655/19, EU:C:2021:40, punt 25).

12      Sentenzi tal-15 ta’ Settembru 2011, Słaby et (C-180/10 u C-181/10, EU:C:2011:589, punt 45), u tal-20 ta’ Jannar 2021, AJFP Sibiu u DGRFP Braşov (C-655/19, EU:C:2021:40, punt 27).

13      Sentenzi tal-15 ta’ Settembru 2011, Slaby et (C-180/10 u C-181/10, EU:C:2011:589, punt 37); tas-17 ta’ Ottubru 2019, Paulo Nascimento Consulting (C-692/17, EU:C:2019:867, punt 25), u tal-20 ta’ Jannar 2021, AJFP Sibiu u DGRFP Braşov (C-655/19, EU:C:2021:40, punt 30).

14      Sentenza tat-2 ta’ Ġunju 2016, Lajvér (C-263/15, EU:C:2016:392, punt 22).

15      Ibid., punt 35.

16      Ibid., punt 45.

17      Sentenza tal-20 ta’ Jannar 2021, AJFP Sibiu u DGRFP Braşov (C-655/19, EU:C:2021:40, punt 28).

18      Ara, f’dan is-sens, is-sentenza tal-20 ta’ Ġunju 1991, Polysar Investments Netherlands (60/90, EU:C:1991:268, punti 13 u 14), li tistabbilixxi li kumpannija holding ma hijiex persuna taxxabbli.

19      Sentenza tas-27 ta’ Novembru 2003, Zita Modes (C-497/01, EU:C:2003:644, punt 39).

20      Sentenzi tas-27 ta’ Novembru 2003, Zita Modes (C-497/01, EU:C:2003:644, punt 40); tal-10 ta’ Novembru 2011, Schriever (C-444/10, EU:C:2011:724, punti 24 u 25), u tad-19 ta’ Diċembru 2018, Mailat (C-17/18, EU:C:2018:1038, punt 15).

21      Sentenza tal-10 ta’ Novembru 2011, Schriever (C-444/10, EU:C:2011:724, punt 29). Il-fatt li bini ta’ negozju huwa mwelli u mhux mibjugħ lix-xerrej tan-negozju ma jipprekludix li x-xerrej ikompli l-attività tal-bejjiegħ (ibid., punt 40).

22      Sentenzi tas-27 ta’ Novembru 2003, Zita Modes (C-497/01, EU:C:2003:644, punti 44 u 45), u tal-10 ta’ Novembru 2011, Schriever (C-444/10, EU:C:2011:724, punt 37).

23      Sentenza tal-21 ta’ Frar 2006, Halifax et (C-255/02, EU:C:2006:121, punt 60).

24      Sentenzi tat-12 ta’ Lulju 2012, EMS-Bulgaria Transport (C-284/11, EU:C:2012:458, punt 43), u tal-11 ta’ Novembru 2021, Ferimet (C-281/20, EU:C:2021:910, punt 30).

25      Sentenzi tat-12 ta’ Lulju 2012, EMS-Bulgaria Transport (C-284/11, EU:C:2012:458, punt 44), u tal-11 ta’ Novembru 2021, Ferimet (C-281/20, EU:C:2021:910, punt 31).

26      Sentenza tas-16 ta’ Frar 2012, Eon Aset Menidjmunt (C-118/11, EU:C:2012:97, punt 31 u 42).

27      Sentenzi tas-16 ta’ Frar 2012, Eon Aset Menidjmunt (C-118/11, EU:C:2012:97, punt 44), u tat-12 ta’ Novembru 2020, ITH Comercial Timişoara (C-734/19, EU:C:2020:919, punt 42).

28      Sentenzi tat-12 ta’ Lulju 2012, EMS-Bulgaria Transport (C-284/11, EU:C:2012:458, punt 44), u tal-11 ta’ Novembru 2021, Ferimet (C-281/20, EU:C:2021:910, punt 32).

29      Sentenza tal-21 ta’ Frar 2006, Halifax et (C-255/02, EU:C:2006:121, punti 68 sa 71).

30      Ibid., punti 74 u 75.

31      Sentenza tat-28 ta’ Frar 2018, Pieńkowski (C-307/16, EU:C:2018:124, punt 34).

32      Ara, b’analoġija, is-sentenza tal-21 ta’ Novembru 2018, Fontana (C-648/16, EU:C:2018:932, punti 42 u 44), li fiha l-Qorti tal-Ġustizzja ddeċidiet li l-prinċipju ta’ proporzjonalità ma jipprekludix leġiżlazzjoni nazzjonali li tistabbilixxi preżunzjoni konfutabbli dwar id-dħul mill-bejgħ suġġett għall-VAT, sakemm il-persuna taxxabbli tkun tista’ tikkontesta l-valutazzjoni tat- u l-istandard ta’ prova meħtieġ sabiex tirbaħ il-kontestazzjoni ma jkunx eċċessivament għoli..

33      Ara, għal dan l-għan, is-sentenzi tat-12 ta’ Novembru 2020, ITH Comercial Timişoara (C-734/19, EU:C:2020:919, punt 39), u tal-11 ta’ Novembru 2021, Ferimet (C-281/20, EU:C:2021:910, punt 51).

34      Sentenza tal-21 ta’ Frar 2006, Halifax et (C-255/02, EU:C:2006:121, punt 72 u l-ġurisprudenza ċċitata).

35      Ara, f’dan is-sens, is-sentenzi tad-9 ta’ Lulju 2015, Salomie u Oltean (C-183/14, EU:C:2015:454, punti 44 u 45), kif ukoll tal-15 ta’ April 2021, Administration de l’Enregistrement, des Domaines et de la TVA (C-846/19, EU:C:2021:277, punt 90).