Available languages

Taxonomy tags

Info

References in this case

Share

Highlight in text

Go

17.8.2015   

MT

Il-Ġurnal Uffiċjali tal-Unjoni Ewropea

C 270/17

Rikors ippreżentat fit-8 ta’ Ġunju 2015 – Il-Kummissjoni Ewropea vs Il-Gran Dukat tal-Lussemburgu

(Kawża C-274/15)

(2015/C 270/22)

Lingwa tal-kawża: il-Franċiż

Partijiet

Rikorrenti: Il-Kummissjoni Ewropea (rappreżentanti: F. Dintilhac, C. Soulay, aġenti)

Konvenut: Il-Gran Dukat tal-Lussemburgu

Talbiet

—

tikkonstata li billi tipprevedi li s-sistema tal-VAT għal gruppi ta’ persuni indipendenti, kif definit mill-Artikolu 44(1)(y) tal-liġi tat-12 ta’ Frar 1979, dwar il-VAT, mill-Artikoli 1 sa 4 regolament Gran Dukali tal-21 ta’ Jannar 2004, dwar l-eżenzjoni mill-VAT għall-provvista ta’ servizzi lill-membri tagħhom mill-gruppi ta’ persuni indipendenti, miċ-ċirkulari amministrattiva Nru 707, tad-29 ta’ Jannar 2004, peress li din tikkummenta dwar l-Artikoli 1 sa 4 tal-imsemmi regolament Gran Dukali, u min-nota tat-18 ta’ Diċembru 2008, redatta mill-grupp ta’ ħidma attiv fi ħdan il-Comité d’Observation des Marchés (Cobma) [kumitat li jissorvelja s-swieq] bi ftehim mal-Administration de l’Enregistrement et des Domaines [amministrazzjoni responsabbli mir-reġistrazzjoni u mill-beni], il-Gran Dukat tal-Lussemburgu naqas milli jwettaq l-obbligi tiegħu taħt id-Direttiva tal-VAT (1), b’mod partikolari l-Artikoli 2(1)(ċ) u 132(1)(f), it-tieni subparagrafu tal-Artikolu 1(2) u l-Artikoli 168(a) u 178(a), u l-Artikoli 14(2)(ċ) u 28 ta’ din id-direttiva;

—

tikkundanna lill-Gran Dukat tal-Lussemburgu għall-ispejjeż.

Motivi u argumenti prinċipali

Skont it-termini tal-Artikolu 132(1)(f) tad-Direttiva tal-VAT, l-Istati Membri għandhom jeżentaw mill-VAT “il-provvista ta’ servizzi minn gruppi ta’ persuni indipendenti, li qed iwettqu attività li hi eżenti mill-VAT jew għaliha mhumiex persuni taxxabbli, għall–finijiet li jagħtu lill-membri tagħhom is-servizzi meħtieġa direttament għall-eżerċizzju ta’ dik l-attività, fejn dawk il-gruppi kemm jitolbu mill-membri tagħhom ħlas lura eżatt tas-sehem tagħhom ta’ l-ispejjeż konġunti, sakemm tali eżenzjoni mhux probabbli li tikkawża distorsjoni tal-kompetizzjoni”.

Madankollu, skont il-Kummissjoni, ir-regolamenti applikabbli fil-Lussemburgu ma jillimitawx l-eżenzjoni mill-VAT biss għas-servizzi pprovduti mill-grupp indipendenti ta’ persuni u li huma direttament neċessarji għall-attivitajiet mhux taxxabbli għall-VAT jew eżenti mwettqa mill-membri tagħha.

Barra minn hekk, il-Kummissjoni tqis li, skont id-dritt Lussemburgiż, il-membri ta’ grupp indipendenti ta’ persuni li jwettqu attivitajiet taxxabbli għal parti mid-dħul mill-bejgħ tagħhom jistgħu jnaqqsu mill-VAT li għaliha huma stess suġġetti, il-VAT imħallsa għall-grupp indipendenti ta’ persuni fir-rigward tax-xiri ta’ prodotti jew servizzi mingħand terzi, filwaqt li skont l-Artikolu 168 tad-Direttiva tal-VAT, id-dritt għal tnaqqis tat-taxxa tal-input fuq il-valur miżjud jingħata biss lill-persuna taxxabbli li tixtri l-prodotti u s-servizzi li huma suġġetti għall-VAT u li tużahom għall-bżonnijiet diretti tat-tranżazzjonijiet taxxabbli tagħha.

Fl-aħħar nett, il-Kummissjoni ssostni li l-Artikoli 14(2)(ċ) u 28 tad-Direttiva tal-VAT jipprekludu liġi nazzjonali milli tipprevedi li fil-każ fejn membru ta’ grupp indipendenti ta’ persuni jixtri prodotti u servizzi minn terzi f’ismu stess, iżda għall-grupp, li t-tranżazzjoni ta’ dan il-membru li tassenja lill-grupp l-ispejjeż li ġew permessi milli jkunu esklużi mill-kamp tal-VAT.

(1)  Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud (ĠU L 347, p. 1).