Available languages

Taxonomy tags

Info

References in this case

Share

Highlight in text

Go

KONKLUŻJONIJIET TAL-AVUKAT ĠENERALI

BOT

ippreżentati fis-17 ta’ Frar 2016 (1)

Kawża C-518/14

Senatex GmbH

vs

Finanzamt Hannover-Nord

[talba għal deċiżjoni preliminari mressqa min-Niedersächsisches Finanzgericht (qorti tal-finanzi tal-Land Niedersachsen, il-Ġermanja)]

“Rinviju għal deċiżjoni preliminari – Tassazzjoni – Taxxa fuq il-valur miżjud – Tnaqqis tat-taxxa tal-input – Ħruġ ta’ fatturi mingħajr numru fiskali jew mingħajr numru ta’ identifikazzjoni tal-VAT – Leġiżlazzjoni ta’ Stat Membru li teskludi r-rettifika ex tunc ta’ fattura”





1.        Il-kuntest ġuridiku ta’ din il-kawża hija d-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud (2). B’mod partikolari, id-domandi magħmula hawnhekk, minn naħa, huma dwar liema effett għandu jingħata lir-rettifika ta’ fattura żbaljata jew inkompleta fil-mument meta jista’ jiġi eżerċitat id-dritt għal tnaqqis tat-taxxa fuq il-valur miżjud (iktar ’il quddiem il-“VAT”) u, min-naħa l-oħra, jekk tali rettifika tistax tkun limitata ratione temporis.

2.        F’dawn il-konklużjonijiet, se nispjega għaliex inqis li d-Direttiva tal-VAT għandha tiġi interpretata fis-sens li din tipprekludi leġiżlazzjoni nazzjonali, bħal dik inkwistjoni fil-kawża prinċipali, li skontha r-rettifika ta’ fattura li teħtieġ riferiment obbligatorju, jiġifieri n-numru ta’ identifikazzjoni tal-VAT, ma għandhiex effett fir-rigward tal-passat b’tali mod li d-dritt għal tnaqqis tal-VAT jista’ jiġi eżerċitat biss għas-sena li fiha ġiet irrettifikata l-fattura inizjali, u mhux għas-sena li fiha nħarġet din il-fattura.

3.        F’dan ir-rigward, se nispjega r-raġunijiet għaliex naħseb li l-Istati Membri jistgħu jipprevedu miżuri li jissanzjonaw in-nuqqas ta’ osservanza ta’ riferimenti obbligatorji, bil-kundizzjoni li dawn josservaw il-prinċipju ta’ proporzjonalità, kif ukoll miżuri li jillimitaw ratione temporis il-possibbiltà li tiġi rrettifikata fattura żbaljata jew inkompleta, sakemm dawn tal-aħħar ikunu japplikaw bl-istess mod għad-drittijiet simili fil-qasam fiskali bbażati fuq id-dritt intern u għal dawk ibbażati fuq id-dritt tal-Unjoni (il-prinċipju ta’ ekwivalenza) u sakemm dawn ma jirrendux l-eżerċizzju tad-dritt għal tnaqqis prattikament impossibbli jew eċċessivament diffiċli (il-prinċipju ta’ effettività).

I –    Il-kuntest ġuridiku

A –    Id-dritt tal-Unjoni

4.        L-Artikolu 63 tad-Direttiva tal-VAT jindika dan li ġej:

“Għandu jkun hemm avveniment li jagħti lok għal ħlas u l-VAT għandha tiġi imposta meta l-merkanzija [oġġetti] jew is-servizzi huma pprovduti.”

5.        Skont l-Artikolu 167 ta’ din id-direttiva:

“Dritt ta’ tnaqqis iseħħ fil-ħin meta t-taxxa mnaqqsa tiġi imposta.”

6.        L-Artikolu 168(a) tal-imsemmija direttiva huwa fformulat kif ġej

“Sakemm il-merkanzija [oġġetti] u s-servizzi jintużaw għall-iskopijiet tat-transazzjonijiet taxxabbli ta’ persuna taxxabbli, il-persuna taxxabbli għandha tkun intitolata, fl-Istat Membru li fih twettaq dawn it-transazzjonijiet, li tnaqqas mll-VAT li għandha tħallas dan li ġej:

(a)      il-VAT dovuta jew imħallsa f’dak l-Istat Membru rigward provvisti li sarulha ta’ merkanzija jew servizzi, li twettqu jew li għad iridu jitwettqu minn persuna taxxabli oħra”.

7.        L-Artikolu 178(a) tad-Direttiva tal-VAT jipprevedi:

“Biex teżerċita d-dritt ta’ tnaqqis, persuna taxxabbli għandha tissodisfa l-kondizzjonijiet li ġejjin:

(a)      għall-finijiet ta’ tnaqqis skond l-Artikolu 168(a), fir-rigward tal-provvista ta’ merkanzija [oġġetti] jew servizzi, hi għandha jkollha fattura imħejjija skond l-Artikoli 220 sa 236 u l-Artikoli 238, 239 u 240”.

8.        Skont l-Artikolu 179 ta’ din id-direttiva:

“Il-persuna taxxabbli għandha teffettwa t-tnaqqis billi tnaqqas mill-ammont totali tal-VAT dovuta għal perijodu partikolari ta’ taxxa l-ammont totali ta’ VAT li fir-rigward tagħha, matul l-istess perijodu, id-dritt li tnaqqas irriżulta u hu eżerċitat skont l-Artikolu 178.

Madanakollu, l-Istati Membi jistgħu jeħtieġu li persuni taxxabbli li jwettqu transazzjonijiet okkażjonali, kif definiti fl-Artikolu 12, jeżerċitaw id-dritt tagħhom ta’ tnaqqis fil-ħin tal-provvista biss.”

9.        Skont l-Artikolu 219 tal-imsemmija direttiva:

“Kwalunkwe dokument jew messaġġ li jemenda u jirreferi speċifikament u mingħajr ambigwità għall-fattura inizzjali għandu jitqies bħala fattura.”

10.      L-Artikolu 226 tad-Direttiva tal-VAT huwa fformulat kif ġej:

“Mingħajr preġudizzju għad-disposizzjonijiet partikolari stabbiliti f’din id-Direttiva, dawn id-dettalji li ġejjin biss huma meħtieġa għall-finijiet ta’ VAT fuq fatturi maħruġa skond l-Artikoli 220 u 221

[...]

(3)      in-numru ta’ identifikazzjoni tal-VAT msemmi fl-Artikolu 214 li taħtu l-persuna taxxabbli pprovdiet il-merkanzija [oġġetti] jew servizzi;

[...]”

11.      L-Artikolu 239 ta’ din id-direttiva huwa fformulat b’dan il-mod:

“F’każijiet fejn l-Istati Membri jagħmlu użu mill-għażla skond il-punt (b) tal-ewwel subparagrafu ta’ l-Artikolu 272(1) li ma jallokawx numru ta’ identifikazzjoni tal-VAT lil persuni taxxabbli li ma jwettqu l-ebda waħda mit-transazzjonijiet msemmija fl-Artikoli 20, 21, 22, 33, 36, 138 u 141, u fejn il-fornitur jew il-konsumatur ma jkunx ġie allokat numru ta’ identifikazzjoni ta’ dak it-tip, numru ieħor magħruf bħala n-numru ta’ referenza tat-taxxa, kif inhu definit mill-Istati Membri kkonċernati, għandu jiddaħħal fil-fattura minflok.”

B –    Id-dritt Ġermaniż

12.      L-ewwel sentenza tal-Artikolu 15(1)(1) tal-Liġi tal-2005 dwar it-taxxa fuq id-dħul mill-bejgħ (Umsatzsteuergesetz 2005) (3), fil-verżjoni tagħha applikabbli għall-kawża prinċipali (iktar ’il quddiem l-“UStG”), jipprevedi li l-imprenditur jista’ jnaqqas, bħala taxxi tal-input imħallsa, it-taxxa dovuta legalment għal provvisti u servizzi oħra li kienu ġew eżegwiti minn imprenditur ieħor għall-bżonnijiet tal-impriża tiegħu. Barra minn hekk, din id-dispożizzjoni tindika li l-eżerċizzju tad-dritt għal tnaqqis huwa suġġett għaż-żamma, mill-imprenditur, ta’ fattura maħruġa f’konformità mal-Artikoli 14 u 14a tal-UStG. Tali fattura, b’mod partikolari, għandha tinkludi r-riferimenti kollha elenkati fl-Artikolu 14(4) tal-UStG.

13.      L-ammonti tat-taxxi tal-input imħallsa jistgħu jitnaqqsu biss matul il-perijodu ta’ taxxa li matulu jiġu ssodisfatti l-kundizzjonijiet bażiċi kollha għall-eżerċizzju ta’ dan id-dritt, fis-sens tal-Artikolu 15(1) tal-UStG.

14.      F’konformità mal-Artikolu 31(5) tar-Regolament ta’ implementazzjoni tal-UStG (Umsatzsteuer-Durchführungsverordnung), fil-verżjoni tiegħu applikabbli għall-kawża prinċipali, fattura tista’ tiġi rrettifikata meta ma jkollhiex ir-riferimenti kollha previsti fl-Artikoli 14(4) u 14a tal-UStG jew meta r-riferimenti li jkun hemm fiha ma jkunux preċiżi. Għal dan l-għan, ikun biżżejjed li jintbagħtu r-riferimenti nieqsa jew korretti permezz ta’ dokument li jirreferi b’mod speċifiku u ċar għall-fattura. Din ir-rettifika tkun suġġetta għall-istess rekwiżiti proċedurali u sostantivi bħal dawk previsti fl-Artikolu 14 tal-UStG.

15.      Fil-każ partikolari ta’ riferiment mhux preċiż jew mhux iġġustifikat tal-VAT, għandu japplika b’analoġija l-Artikolu 17(1) tal-UStG. Skont din id-dispożizzjoni, ir-rettifika ta’ fattura ma toħloqx effett fir-rigward tal-passat, iżda fir-rigward tal-perijodu li matulu l-fattura rrettifikata tintbagħat lix-xerrej jew li matulu tintlaqa’ t-talba għal rettifika wara li jkun ġie eliminat il-ksur li seta’ jseħħ fir-rigward tad-dħul mit-taxxa.

16.      Il-qorti tar-rinviju tispjega wkoll li, jekk it-tnaqqis jiġi rrifjutat minħabba n-nuqqas jew l-ineżattezza ta’ ċerti elementi tal-fattura, id-dritt għal tnaqqis jista’ jitnissel, permezz tal-korrezzjoni tal-fattura, fil-mument tar-rettifika. F’dan il-każ, id-dħul tal-amministrazzjoni fiskali tal-VAT jibqa’ l-istess. Għall-kuntrarju, minn dan tista’ tirriżulta żieda fid-dejn fiskali għall-imprenditur. Fil-fatt, jekk it-tnaqqis jiġi rrifjutat biss diversi snin wara, pereżempju fil-kuntest ta’ kontroll fuq il-post, l-interessi moratorji previsti fl-Artikolu 233a tal-Kodiċi tal-Taxxa (Abgabenordnung), kif kien fis-seħħ matul il-perijodu inkwistjoni fil-kawża prinċipali, ikunu jinvolvu piżijiet finanzjarji sostanzjali.

II – Il-fatti tal-kawża prinċipali

17.      Senatex GmbH (iktar ’il quddiem “Senatex”) tmexxi impriża għall-kummerċ ta’ prodotti tat-tessuti bl-ingrossa. Għas-snin 2008-2011, fid-dikjarazzjonijiet tat-taxxa tagħha, hija indikat tnaqqis tat-taxxa tal-input imħallsa għall-kalkoli ta’ kummissjonijiet mogħtija minnha lill-aġenti kummerċjali tagħha kif ukoll għal fatturi ta’ kreatur pubbliċitarju (iktar ’il quddiem, flimkien, il-“fatturi kkontestati”).

18.      Bejn il-11 ta’ Frar u s-17 ta’ Mejju 2013, Senatex kienet suġġetta għal kontroll mill-Finanzamt Hannover-Nord (iċ-ċentru tat-taxxa ta’ Hannover-Nord) fir-rigward tas-snin 2008-2011. Matul dan il-kontroll, ġie kkonstatat li l-fatturi kkontestati ppreżentati għall-finijiet tat-tnaqqis tat-taxxa tal-input imħallsa ma kinux leġittimi, fis-sens tal-Artikoli 15(1) u 14(4) tal-UStG. Fil-fatt, dawn il-fatturi ma kienx fihom numru fiskali jew numru ta’ identifikazzjoni tal-VAT tal-aġenti kummerċjali u lanqas tal-kreatur pubbliċitarju, la fil-fatturi nfushom u lanqas fid-dokumenti annessi.

19.      Fit-2 ta’ Mejju 2013, jiġifieri matul il-perijodu ta’ kontroll, Senatex irrettifikat ir-renidkonti tal-kummissjonijiet, għas-snin 2009-2011 biss, billi ssupplimentathom bir-riferiment tan-numru fiskali jew in-numru ta’ identifikazzjoni tal-VAT ta’ kull aġent kummerċjali kkonċernat. Il-fatturi tal-kreatur pubbliċitarju ukoll ġew suġġetti għal rettifika analoga għas-snin 2009-2011.

20.      Minkejja dawn ir-rettifiki, il-Finanzamt Hannover-Nord, fit-2 ta’ Lulju 2013, ħareġ avviżi ta’ rettifika għas-snin 2008-2011, li fihom jindika li t-tnaqqis tat-taxxa tal-input imħallsa fir-rigward tal-fatturi inkwistjoni ma setax isir għas-snin 2009-2011, minħabba li l-kundizzjonijiet biex jingħata dan it-tnaqqis kienu ssodisfatti biss fil-mument meta saru r-rettifiki, jiġifieri matul is-sena 2013, u mhux matul is-snin 2009-2011.

21.      Senatex għalhekk ippreżentat ilment kontra dawn l-avviżi ta’ rettifika. Barra minn hekk, matul din il-proċedura ta’ lment, ġie kkonstatat li hija ma għamlitx rettifiki tal-fatturi kkontestati għas-sena 2008. Għalhekk, fil-11 ta’ Frar 2014, Senatex irrettifikat ir-rendikonti tal-kummissjonijiet għal din is-sena 2008 billi ssupplimentathom bl-indikazzjoni tan-numru fiskali jew tan-numru ta’ identifikazzjoni tal-VAT tal-aġenti kummerċjali kkonċernati. Il-fatturi tal-kreatur pubbliċitarju marbuta mas-sena 2008 ġew ukoll suġġetti għal rettifika analoga.

22.      Permezz tad-Deċiżjoni tat-3 ta’ Marzu 2014, il-Finanzamt Hannover-Nord żamm il-pożizzjoni tiegħu, billi qies li l-kundizzjonijiet ta’ tnaqqis tat-taxxa tal-input imħallsa fir-rigward tal-fatturi inkwistjoni ma kinux issodisfatti fil-mument meta saru r-rettifiki ta’ dawn il-fatturi, fl-2013 u l-2014. Fil-fehma tiegħu, ma huwiex possibbli li r-rettifika ta’ fattura jkollha effett retroattiv għall-mument tal-forniment tas-servizz, u li b’hekk jingħata effett ex tunc.

23.      Fil-5 ta’ Marzu 2014, Senatex ippreżentat rikors kontra din id-deċiżjoni quddiem il-qorti tar-rinviju. Hija tqis, fil-fatt, li r-rettifiki ta’ fatturi jipproduċu effett fir-rigward tal-passat, jiġifieri għas-snin 2008-2011, sa fejn dawn ir-rettifiki jkunu twettqu qabel l-aħħar deċiżjoni amministrattiva, jiġifieri d-deċiżjoni tat-3 ta’ Marzu 2014. Għalhekk, hija titlob lill-qorti tar-rinviju tannulla l-avviżi ta’ rettifika maħruġa mill-Finanzamt Hannover-Nord għas-snin 2008-2011.

III – Id-domandi preliminari

24.      Peress li n-Niedersächsisches Finanzgericht (qorti tal-finanzi tal-Land Niedersachsen) kellha xi dubji dwar l-interpretazzjoni li għandha tingħata lis-sentenzi tal-Qorti tal-Ġustizzja kif ukoll lid-dispożizzjonijiet tad-Direttiva tal-VAT, iddeċidiet li tissospendi l-proċeduri quddiemha u tagħmel id-domandi preliminari li ġejjin:

“1)      L-effett ex nunc tal-ewwel emissjoni [ħruġ] ta’ fattura, kif stabbilit mill-Qorti tal-Ġustizzja fis-sentenza tagħha Terra Baubedarf-Handel [C-152/02, EU:C:2004:268], huwa rrelativizzat bis-sentenzi Pannon Gép Centrum [C-368/09, EU:C:2010:441] u Petroma Transports et [C-271/12, EU:C:2013:297], għall-każ, inkwistjoni fil-kawża prinċipali, ta’ addendum ta’ fattura inkompleta, sa fejn, f’tali każ, il-Qorti tal-Ġustizzja riedet fil-fatt tawtorizza effett retroattiv?

2)      Liema huma r-rekwiżiti minimi meħtieġa sabiex fattura li tista’ tiġi rrettifikata jkollha effett retroattiv? Huwa neċessarju li l-fattura inizjali jkollha numru fiskali jew numru ta’ identifikazzjoni tal-VAT jew dawn jistgħu jiġu miżjuda iktar tard bil-konsegwenza li d-dritt għal tnaqqis tat-taxxa tal-input imħallsa jinżamm abbażi tal-fattura inizjali?

3)      Ir-rettifika ta’ fatturi titqies li tkun saret fi żmien xieraq biss meta tkun saret fil-kuntest ta’ proċedura ta’ kontestazzjoni kontra d-deċiżjoni (avviż ta’ rettifika) tal-awtorità fiskali?”

IV – L-analiżi tiegħi

25.      Permezz tal-ewwel u t-tieni domandi tagħha, il-qorti tar-rinviju tixtieq tkun taf jekk, fil-verità, l-Artikoli 167, 178(a), 179 u 226(3) tad-Direttiva tal-VAT għandhomx jiġu interpretati fis-sens li jipprekludu leġiżlazzjoni nazzjonali, bħal dik inkwistjoni fil-kawża prinċipali, li skontha r-rettifika ta’ fattura li teħtieġ indikazzjoni obbligatorja, jiġifieri n-numru ta’ identifikazzjoni tal-VAT, ma tipproduċix effett fir-rigward tal-passat b’tali mod li d-dritt għal tnaqqis jista’ jiġi eżerċitat biss għas-sena li fiha ġiet irrettifikata l-fattura inizjali, u mhux għas-sena li fiha nħarġet din il-fattura.

26.      Permezz tat-tielet domanda tagħha, il-qorti tar-rinviju tistaqsi dwar jekk id-Direttiva tal-VAT għandhiex tiġi interpretata fis-sens li tipprekludi leġiżlazzjoni jew prattika nazzjonali li skontha d-dritt għal tnaqqis tal-VAT jiġi rrifjutat lil persuna taxxabbli meta r-rettifika ta’ fattura li tirrigwarda indikazzjoni obbligatorja ssir wara l-adozzjoni ta’ deċiżjoni li tirrifjuta t-tnaqqis tal-VAT minħabba li din l-indikazzjoni fil-bidu kienet tħalliet barra.

27.      L-ewwel u t-tieni domandi jġiegħluni nistaqsi dwar il-konsegwenzi tar-rettifika ta’ fattura għall-mument meta jista’ jiġi eżerċitat id-dritt għal tnaqqis. Fil-fatt, skont il-leġiżlazzjoni Ġermaniża, ir-rettifika tal-fattura tinvolvi l-eżerċizzju tad-dritt għal tnaqqis tal-VAT għas-sena li matulha ġiet irrettifikata l-fattura inizjali biss, u mhux għas-sena li matulha nħarġet din il-fattura.

28.      Skont il-Gvern Ġermaniż, mid-dispożizzjonijiet tad-Direttiva tal-VAT jirriżulta li d-dritt għal tnaqqis jista’ jiġi eżerċitat biss meta żewġ kundizzjonijiet jiġu ssodisfatti fl-istess ħin. Minn naħa, id-dritt għal tnaqqis għandu jitnissel, fis-sens tal-Artikolu 167 ta’ din id-direttiva, u, min-naħa l-oħra, il-persuna taxxabbli għandha tissodisfa l-kundizzjonijiet previsti fl-Artikolu 178 tagħha, fosthom iż-żamma ta’ fattura maħruġa f’konformità mal-Artikoli 220 sa 236 u 238 sa 240 tal-imsemmija direttiva. Madankollu, meta fattura tiġi rrettifikata, dawn iż-żewġ kundizzjonijiet jiġu ssodisfatti biss fil-mument ta’ din ir-rettifika, u mhux meta tinħareġ il-fattura inizjali. Minn dan jirriżulta li d-dritt għal tnaqqis jista’ jiġi eżerċitat biss fil-mument tar-rettifika.

29.      Jien ma naqbilx ma’ din l-opinjoni, u dan għar-raġunijiet li ġejjin.

30.      Skont ġurisprudenza ferm stabbilita, id-dritt għal tnaqqis huwa prinċipju fundamentali tas-sistema komuni tal-VAT li, fil-prinċipju, ma jistax jiġi limitat u li jiġi eżerċitat mill-ewwel fir-rigward tat-taxxi kollha imposti fuq it-tranżazzjonijiet relatati ma’ inputs (4). Id-dritt għal tnaqqis għalhekk għandu natura immedjata u globali. Għaldaqstant, bħalma tfakkar b’mod regolari l-Qorti tal-Ġustizzja, is-sistema ta’ tnaqqis hija intiża sabiex l-imprenditur jinħeles kompletament mill-piż tal-VAT dovuta jew imħallsa fil-kuntest tal-attivitajiet ekonomiċi tiegħu kollha. Is-sistema komuni tal-VAT konsegwentement tiggarantixxi n-newtralità fir-rigward tal-piż fiskali tal-attivitajiet ekonomiċi kollha, irrispettivament mill-għanijiet u r-riżultati ta’ dawn l-attivitajiet, sakemm l-imsemmija attivitajiet ikunu, fil-prinċipju, huma stess suġġetti għall-VAT (5).

31.      Skont l-Artikolu 167 tad-Direttiva tal-VAT, id-dritt għal tnaqqis jitnissel fil-mument meta tiġi imposta t-taxxa mnaqqsa. Il-kundizzjonijiet materjali meħtieġa sabiex jitnissel dan id-dritt huma elenkati fl-Artikolu 168(a) ta’ din id-direttiva. Għalhekk, sabiex tibbenefika mill-imsemmi dritt, hemm bżonn, minn naħa, li l-persuna kkonċernata tkun persuna taxxabbli fis-sens tal-imsemmija direttiva u, min-naħa l-oħra, li l-oġġetti jew is-servizzi invokati bħala bażi tad-dritt għal tnaqqis jintużaw fir-rigward tal-outputs mill-persuna taxxabbli għall-bżonnijiet tat-tranżazzjonijiet taxxabbli tagħha stess u li, bħala inputs, dawn l-oġġetti jew servizzi jiġu pprovduti minn persuna taxxabbli oħra (6).

32.      Fir-rigward tal-modalitajiet ta’ eżerċizzju tad-dritt għal tnaqqis, dawn huma elenkati fl-Artikolu 178 tad-Direttiva tal-VAT. B’mod partikolari, il-persuna taxxabbli għandu jkollha fattura maħruġa skont l-Artikolu 226 ta’ din id-direttiva (7), li fuqha, fost oħrajn, għandu jkun hemm in-numru ta’ identifikazzjoni tal-VAT (8).

33.      Dawn il-kundizzjonijiet li għandha tissodisfa l-persuna taxxabbli sabiex teżerċita d-dritt tagħha għal tnaqqis ġew ikklassifikati bħala “kundizzjonijiet formali” mill-Qorti tal-Ġustizzja (9). Dawn ma jikkostitwixxux il-kundizzjonijiet li għandhom jiġu ssodisfatti għat-tnissil tad-dritt għal tnaqqis tal-VAT, iżda jippermettu li l-awtoritajiet fiskali jkollhom l-informazzjoni kollha meħtieġa biex jiġbru l-VAT kif ukoll biex jeżerċitaw il-kontroll tagħhom sabiex tiġi evitata l-frodi (10).

34.      Fil-każ fejn, pereżempju, waqt kontroll mill-awtoritajiet fiskali, dawn tal-aħħar jikkonstataw żbalji jew ommissjonijiet fil-mod kif inħarġet il-fattura, il-persuna taxxabbli għandha l-possibbiltà li tirrettifika din il-fattura għall-finijiet tal-eżerċizzju tad-dritt tagħha għal tnaqqis. Din il-possibbiltà tinsab fl-Artikolu 219 tad-Direttiva tal-VAT, li jindika li “[k]walunkwe dokument jew messaġġ li jemenda u jirreferi speċifikament u mingħajr ambigwità għall-fattura inizzjali għandu jitqies bħala fattura”. Il-Qorti ddeċidiet ukoll li din id-direttiva ma tipprojbixxix ir-rettifika ta’ fatturi żbaljati (11).

35.      Fuq din il-bażi, id-domanda hija liema huma l-effetti ratione temporis tar-rettifika ta’ fattura fuq id-dritt għal tnaqqis tal-VAT.

36.      F’dan ir-rigward, il-qorti tar-rinviju ssemmi s-sentenzi Terra Baubedarf-Handel (C-152/02, EU:C:2004:268); Pannon Gép Centrum (C-368/09, EU:C:2010:441), kif ukoll Petroma Transports et (C-271/12, EU:C:2013:297). Fir-rigward tal-aħħar żewġ sentenzi, għalkemm huwa veru li dawn jirrigwardaw ir-rettifika ta’ fattura bil-għan li jiġi eżerċitat id-dritt għal tnaqqis, min-naħa l-oħra, il-kwistjoni tal-effett ratione temporis ta’ tali rettifika fuq l-eżerċizzju tad-dritt għal tnaqqis ma ġietx indirizzata.

37.      Għalhekk, fis-sentenza Pannon Gép Centrum (C-368/09, EU:C:2010:441), id-domanda kienet dwar jekk id-dispożizzjonijiet tad-Direttiva tal-VAT kellhomx jiġu interpretati fis-sens li jipprekludu leġiżlazzjoni jew prattika nazzjonali, li skontha d-dritt għal tnaqqis tal-VAT kien qed jiġi rrifjutat meta l-fattura b’rabta mal-oġġetti kkunsinnati lill-persuna taxxabbli jew mas-servizzi li kienu ġew ipprovduti lilha inizjalment kellha indikazzjoni żbaljata li r-rettifika sussegwenti tagħha ma kinitx tosserva l-kundizzjonijiet kollha stabbiliti mir-regoli nazzjonali applikabbli (12). Il-Qorti tal-Ġustizzja għalhekk kellha tiġġudika jekk ir-rettifika ta’ fattura għall-finijiet tal-eżerċizzju tad-dritt għal tnaqqis kinitx possibbli u jekk l-Istati Membri kellhomx il-possibbiltà li jimponu kundizzjonijiet oħra addizzjonali għall-kundizzjonijiet materjali u formali imposti mid-Direttiva tal-VAT, f’dan il-każ sekwenza numerika kontinwa tal-fattura rrettifikata (13). Fis-sentenza tagħha Petroma Transports et (C-271/12, EU:C:2013:297), il-Qorti tal-Ġustizzja fakkret li s-sistema komuni tal-VAT ma tipprojbixxix ir-rettifika ta’ fatturi żbaljati, iżda ddeċidiet li, fir-rigward tat-tilwima inkwistjoni fil-kawża li wasslet għal din is-sentenza, l-informazzjoni meħtieġa sabiex tikkompleta u tirregolarizza l-fatturi kienet ġiet ippreżentata wara li l-amministrazzjoni fiskali kienet adottat id-deċiżjoni tagħha ta’ rifjut tad-dritt għal tnaqqis tal-VAT, b’tali mod li, qabel l-adozzjoni ta’ din id-deċiżjoni, il-fatturi pprovduti lill-imsemmija amministrazzjoni ma kinux għadhom irrettifikati sabiex jippermettulha li tiżgura l-ġbir eżatt tal-VAT kif ukoll il-kontroll tiegħu (14). Għalhekk għandu jiġi kkonstatat li s-sentenzi Pannon Gép Centrum (C-368/09, EU:C:2010:441) kif ukoll Petroma Transports et (C-271/12, EU:C:2013:297) ma jiħdux pożizzjoni dwar l-effett retroattiv jew mhux retroattiv tar-rettifika ta’ fattura fuq l-eżerċizzju tad-dritt għal tnaqqis.

38.      Fir-rigward ta’ applikazzjoni tal-ġurisprudenza li tirriżulta mis-sentenza Terra Baubedarf-Handel (C-152/02, EU:C:2004:268) insostenn tal-argument tal-Gvern Ġermaniż, jidhirli li din għandha tiġi eskluża. Fil-fatt, f’din is-sentenza, il-Qorti tal-Ġustizzja indikat li d-dritt għal tnaqqis tal-VAT għandu jiġi eżerċitat fir-rigward tal-perijodu ta’ dikjarazzjoni li matulu ż-żewġ kundizzjonijiet mitluba mill-ewwel subparagrafu tal-Artikolu 18(2) tas-Sitt Direttiva tal-Kunsill 77/388/KEE (15) jiġu ssodisfatti (16). Fi kliem ieħor, żiedet il-Qorti tal-Ġustizzja, il-kunsinna tal-oġġetti jew il-forniment tas-servizzi għandhom ikunu saru u l-persuna taxxabbli għandu jkollha f’idejha l-fattura (17). Madankollu, f’dan il-każ, Terra Baubedarf-Handel GmbH ma kellhiex fattura fil-mument meta din eżerċitat id-dritt tagħha għal tnaqqis tal-VAT għal servizzi li kienu ġew ipprovduti lilha fil-kuntest tal-attività tagħha. Din għalhekk ma setgħetx tħallas u għalhekk ma ġietx imħallsa ta’ din il-VAT matul il-perijodu ta’ tnaqqis. Il-VAT, f’dan il-każ, ma setgħetx titqies bħala imposta fuq tranżazzjoni speċifika (18). Din hija r-raġuni għaliex il-Qorti tal-Ġustizzja ddeċidiet li huwa neċessarju li jiġu ssodisfatti ż-żewġ kundizzjonijiet meħtieġa mill-ewwel subparagrafu tal-Artikolu 18(2) tas-Sitt Direttiva tal-Kunsill 77/388 sabiex jiġi osservat il-prinċipju li skontu d-dritt għal tnaqqis għandu jiġi eżerċitat mill-ewwel fir-rigward tat-taxxi kollha imposti fuq it-tranżazzjonijiet relatati mal-inputs.

39.      Il-kawża li wasslet għas-sentenza Terra Baubedarf-Handel (C-152/02, EU:C:2004:268) għalhekk hija differenti minn din il-kawża ladarba Senatex, għall-kuntrarju ta’ Terra Baubedarf-Handel GmbH, kellha l-fatturi fil-mument tal-eżerċizzju tad-dritt għal tnaqqis u kienet ħallset il-VAT tal-input. Din it-taxxa għalhekk ġiet imposta fuq tranżazzjoni relatata mal-inputs fil-kuntest tal-attività ekonomika ta’ Senatex. Dik is-sentenza għalhekk ma tistax, fil-fehma tiegħi, tiġi invokata f’din il-kawża sabiex jiġi sostnut li l-Qorti tal-Ġustizzja pprojbixxiet l-effett retroattiv tad-dritt għal tnaqqis tal-VAT wara r-rettifika ta’ fattura.

40.      Min-naħa l-oħra, jidhirli li s-sentenza Terra Baubedarf-Handel (C-152/02, EU:C:2004:268) issostni l-argument oppost. Fil-fatt, fil-punt 35 ta’ din is-sentenza, il-Qorti tal-Ġustizzja tirreferi għal ġurisprudenza stabbilita li skontha d-dritt għal tnaqqis tal-VAT jiġi eżerċitat mill-ewwel fir-rigward tat-taxxi kollha imposti fuq it-tranżazzjonijiet relatati ma’ inputs. L-ewwel paragrafu tal-Artikolu 179 tad-Direttiva tal-VAT għalhekk jipprevedi li “[l]-persuna taxxabbli għandha teffettwa t-tnaqqis billi tnaqqas mill-ammont totali tal-VAT dovuta għal perijodu partikolari ta’ taxxa l-ammont totali ta’ VAT li fir-rigward tagħha, matul l-istess perijodu, id-dritt li tnaqqas irriżulta u hu eżerċitat skond l-Artikolu 178”.

41.      In-natura immedjata tat-tnaqqis għandha l-għan, b’mod partikolari, li tiggarantixxi n-newtralità tas-sistema komuni tal-VAT u li tiżgura li l-persuni taxxabbli ma jidħlux f’riskju finanzjarju meta jġarrbu b’mod sħiħ jew parzjali l-piż ta’ din it-taxxa (19). Din hija r-raġuni għaliex, f’konformità mal-Artikolu 179 tad-Direttiva tal-VAT, il-perijodu li matulu l-oġġett mixtri jew s-servizz ipprovdut ikunu ġew intaxxati, li jnissel id-dritt għal tnaqqis, għandu jaqbel mal-perijodu li matulu jiġi eżerċitat id-dritt għal tnaqqis. Dan il-prinċipju, f’din id-direttiva, jirrikonoxxi biss eċċezzjoni waħda, jiġifieri li l-Istati Membri jistgħu jobbligaw lill-persuni taxxabbli li jwettqu tranżazzjonijiet okkażjonali, kif definiti fl-Artikolu 12 tal-imsemmija direttiva, jeżerċitaw id-dritt għal tnaqqis tagħhom fil-mument tal-provvista biss (20), li ma huwiex il-każ hawnhekk.

42.      Jekk jitqies li r-rettifika ta’ fattura tinvolvi l-eżerċizzju tad-dritt għal tnaqqis għall-perijodu li matulu tkun saret din ir-rettifika biss, u mhux għall-perijodu li matulu tkun inħarġet u tħallset din il-fattura, bħal fil-kawża prinċipali, dan imur kontra l-prinċipju li skontu dan id-dritt għandu natura immedjata. Dan, barra minn hekk, idaħħal lill-persuna taxxabbli f’riskju finanzjarju kunsiderevoli sa fejn, billi l-awtoritajiet fiskali jqisu li din tal-aħħar ma tistax teżerċita d-dritt tagħha għal tnaqqis tal-VAT tal-input imħallsa qabel ir-rettifika tal-fattura, tkun tista’ tiġi suġġetta għall-ħlas tal-interessi moratorji, bħalma jipprevedi, barra minn hekk, il-Kodiċi tat-Taxxa, u dan għalkemm l-Istat Membru ma jġarrab l-ebda telf fiskali, peress li d-dħul mill-VAT jibqa’, in fine, l-istess (21).

43.      Madankollu, ma inix qed nikkontesta l-importanza tal-fattura fis-sistema komuni tal-VAT. Din hija prova li tippermetti l-ġbir tal-VAT jew it-tnaqqis tiegħu. Għalhekk, l-imprenditur li jiffattura l-bejgħ ta’ oġġett jew servizz joħroġ fattura bil-VAT u jiġbor din tal-aħħar f’isem l-Istat. Bl-istess mod, din il-fattura tippermetti lill-persuna taxxabbli li tkun ħallset il-VAT li tagħti prova ta’ dan u, għalhekk, tnaqqasha. Iktar speċifikament, in-numru ta’ identifikazzjoni tal-VAT jippermetti lill-awtoritajiet fiskali jiġbru l-VAT iktar faċilment billi jidentifikaw lill-persuna taxxabbli u jistħarrġu dwar ir-realtà tat-tranżazzjonijiet sabiex jiġġieldu l-frodi.

44.      Madankollu, bħalma ddeċidiet il-Qorti tal-Ġustizzja diversi drabi, il-prinċipju fundamentali ta’ newtralità tal-VAT jeżiġi li t-tnaqqis tat-taxxa tal-input fuq il-valur miżjud jingħata jekk ir-rekwiżiti sostantivi jkunu ssodisfatti, minkejja l-fatt li l-persuni taxxabbli jkunu naqsu milli jissodisfaw ċerti rekwiżiti proċedurali (22). Din il-ġurisprudenza tapplika b’mod speċjali fil-każ li għandi quddiemi hawnhekk, ladarba l-ommissjoni tan-numru ta’ identifikazzjoni tal-VAT tkun ġiet korretta mill-persuna taxxabbli li tirrettifika l-fatturi, li b’hekk tosserva wkoll ir-rekwiżiti formali previsti mid-dritt tal-Unjoni.

45.      F’dan ir-rigward, għalkemm l-Istati Membri huma marbuta jivverifikaw id-dikjarazzjonijiet tal-persuni taxxabbli u jistħarrġu d-dokumenti rilevanti kollha sabiex jikkalkulaw l-ammont tat-taxxa jew jivverifikaw ir-realtà tat-tranżazzjonijiet, ma hemm xejn li jxekkilhom milli jipprevedu sanzjonijiet għan-nuqqas ta’ osservanza tar-rekwiżiti formali. Fil-fatt, is-sanzjoni imposta b’dan il-mod ikollha natura dissważiva bl-għan li tiżgura l-effettività tal-obbligu li fuq il-fatturi jidhru r-riferimenti obbligatorji previsti mid-Direttiva tal-VAT, tinkoraġġixxi lill-persuna taxxabbli tkun iktar diliġenti fil-futur u tippermetti li jitqiesu l-ispejjeż amministrattivi mġarrba wara l-ommissjoni u r-rettifika li kienet meħtieġa biex tiġi kkoreġuta dik il-fattura (23). Madankollu, l-Istati Membri huma marbuta jeżerċitaw din il-kompetenza filwaqt li josservaw id-dritt tal-Unjoni, u b’mod l-prinċipju ta’ proporzjonalità.

46.      Matul is-seduta, il-Gvern Ġermaniż indika li l-fatt li ġie pospost id-dritt għal tnaqqis u ġew imposti interessi moratorji fuq il-persuna taxxabbli li naqset, bħal fil-kawża prinċipali, serva bħala sanzjoni. Madankollu, jien naħseb li din is-sanzjoni ma tosservax il-prinċipju ta’ proporzjonalità. Fil-fatt, ir-riferimenti obbligatorji fuq il-fattura, fosthom in-numru ta’ identifikazzjoni tal-VAT, għandhom l-għan li jippermettu lill-awtoritajiet fiskali jwettqu l-ġbir eżatt tal-VAT u kontroll sabiex tiġi evitata l-frodi. Madankollu, kif spjegat matul is-seduta, jien ma narax kif, f’dan il-każ, l-awtoritajiet fiskali jistgħu jiddistingwu bejn persuna taxxabbli ta’ bona fide u waħda frawdolenti. Fil-fatt, għall-persuna taxxabbli frawdolenti, ikun iktar faċli li ddaħħal numru ta’ indentifikazzjoni tal-VAT falz, u b’hekk tieħu ċans li d-dikjarazzjoni tagħha taħrab lill-għajn, milli li lanqas biss tinkludih, press li dan, għall-kuntrarju, jiġbed l-attenzjoni tal-awtoritajiet fiskali u jwassal għal kontroll min-naħa tagħhom. Issa, ejjew nimmaġinaw persuna taxxabbli, ta’ bona fide, li l-fattura tagħha ppreżentata fid-dikjarazzjoni ma jkunx fiha numru ta’ identifikazzjoni tal-VAT. Din tal-aħħar toħloq riskju kbir ħafna ta’ kontroll mill-awtoritajiet fiskali u tkun tista’ ssib ruħha fl-istess sitwazzjoni bħal dik ta’ Senatex, jiġifieri d-dritt għal tnaqqis tagħha jiġi pospost u tiġi imposta interessi moratorji, b’konsegwenza finanzjarja kunsiderevoli. Tali sistema jidhirli li hija nieqsa miċ-ċertezza legali u mhux adatta sabiex tiġġieled kontra l-frodi b’mod effettiv. Barra minn hekk, din tista’ tissanzjona bl-istess mod lil persuna taxxabbli ta’ bona fide u lil waħda frawdolenti.

47.      Sabiex jiġi evitat l-abbuż, jien naħseb li l-Istati Membri jistgħu jipprevedu wkoll miżuri li jillimitaw ratione temporis il-possibbiltà li jiġu pprovduti fatturi rrettifikati. Dan iwassalni għat-tielet domanda tal-qorti tar-rinviju li permezz tagħha din tistaqsi lill-Qorti tal-Ġustizzja jekk id-Direttiva tal-VAT għandhiex tiġi interpretata fis-sens li din tipprekludi leġiżlazzjoni jew prattika nazzjonali li skontha d-dritt għal tnaqqis tal-VAT jiġi rrifjutat lil persuna taxxabbli meta r-rettifika ta’ fattura li tirrigwarda indikazzjoni obbligatorja ssir wara l-adozzjoni ta’ deċiżjoni li tirrifjuta t-tnaqqis tal-VAT minħabba li din l-indikazzjoni fil-bidu kienet tħalliet barra.

48.      L-istabbiliment ta’ miżuri li jistabbilixxu terminu sabiex tiġi limitata ratione temporis ir-rettifika ta’ fatturi żbaljati jew inkompleti ma huwiex previst mid-Direttiva tal-VAT. Għaldaqstant, jien naħseb li huma l-Istati Membri li għandhom jipprevedu tali miżuri fid-dritt nazzjonali tagħhom. Dawn għandhom jiżguraw li l-miżuri implementati josservaw il-prinċipji ta’ ekwivalenza u ta’ effettività.

49.      F’dan il-każ, il-projbizzjoni ta’ kwalunkwe rettifika wara deċiżjoni tal-amministrazzjoni fiskali li tirrifjuta l-eżerċizzju tad-dritt għal tnaqqis tista’ tidher eċċessiva, u b’hekk twassal sabiex tali eżerċizzju jkun prattikament impossibbli jew eċċessivament diffiċli.

50.      Fil-fatt, xi drabi, jista’ jkun biss fl-istadju tal-avviż ta’ rettifika – bl-esklużjoni tal-każ ta’ frodi – li l-persuna taxxabbli ssir taf dwar ommissjoni jew żball li jirrigwardaw indikazzjoni obbligatorja fuq il-fattura. Jekk tiġi pprojbita kwalunkwe rettifika wara deċiżjoni, bħal avviż ta’ rettifika, dan jista’ jwassal sabiex tiġi rrifjutata sempliċiment kwalunkwe rettifika ta’ fattura żbaljata jew inkompleta. Din ikollha l-konsegwenza serja li ċċaħħad lill-persuna taxxabbli mid-dritt tagħha għal tnaqqis, dritt fundamentali li jippermetti l-iżgurar tal-prinċipju ta’ newtralità fiskali, u dan b’mod speċjali meta żball jew ommissjoni ħafna drabi jistgħu joriġinaw minn min joħroġ il-fattura, jiġifieri l-bejjiegħ tal-oġġett jew il-fornitur tas-servizzi.

51.      Għaldaqstant naħseb li s-sentenza Petroma Transports et (C-271/12, EU:C:2013:297) għandha tiġi ċċarata b’mod wiesgħa dwar dan il-punt (24).

52.      Fid-dawl tal-kunsiderazzjonijiet preċedenti kollha, inqis li l-Artikoli 167, 178(a), 179 u 226(3) tad-Direttiva tal-VAT għandhom jiġu interpretati fis-sens li jipprekludu leġiżlazzjoni nazzjonali, bħal dik inkwistjoni fil-kawża prinċipali, li skontha r-rettifika ta’ fattura li tipprevedi indikazzjoni obbligatorja, jiġifieri n-numru ta’ identifikazzjoni tal-VAT, ma jkollhiex effett fir-rigward tal-passat b’tali mod li d-dritt għal tnaqqis tal-VAT jista’ jiġi eżerċitat biss għas-sena li fiha ġiet irrettifikata l-fattura inizjali, u mhux għas-sena li fiha nħarġet din il-fattura. F’dan ir-rigward, l-Istati Membri jistgħu jipprevedu miżuri li jissanzjonaw in-nuqqas ta’ osservanza ta’ riferimenti obbligatorji, bil-kundizzjoni li dawn josservaw il-prinċipju ta’ proporzjonalità, kif ukoll miżuri li jillimitaw ratione temporis il-possibbiltà li tiġi rrettifikata fattura żbaljata jew inkompleta, sakemm dawn tal-aħħar japplikaw bl-istess mod għad-drittijiet simili fil-qasam fiskali bbażati fuq id-dritt intern u għal dawk ibbażati fuq id-dritt tal-Unjoni (il-prinċipju ta’ ekwivalenza) u sakemm dawn ma jirrendux prattikament impossibbli jew eċċessivament diffiċli l-eżerċizzju tad-dritt għal tnaqqis (il-prinċipju ta’ effettività).

V –    Konklużjoni

53.      Fid-dawl tal-kunsiderazzjonijiet preċedenti, nipproponi lill-Qorti tal-Ġustizzja tagħti r-risposta għad-domandi tan-Niedersächsisches Finanzgericht (Qorti tal-Finanzi tal-Land Niedersachsen) bil-mod li ġej:

L-Artikoli 167, 178(a), 179 u 226, punt 3 tad-Direttiva tal-Kunsill 2006/112/KE, tat-28 ta’ Novembru 2006, dwar is-sistema komuni ta’ taxxa fuq il-valur miżjud, għandhom jiġu interpretati fis-sens li jipprekludu leġiżlazzjoni nazzjonali, bħal dik inkwistjoni fil-kawża prinċipali, li skontha r-rettifika ta’ fattura li tipprevedi indikazzjoni obbligatorja, jiġifieri n-numru ta’ identifikazzjoni tat-taxxa fuq il-valur miżjud, ma jkollhiex effett fir-rigward tal-passat b’tali mod li d-dritt għal tnaqqis ta’ din it-taxxa jista’ jiġi eżerċitat biss għas-sena li fiha ġiet irrettifikata l-fattura inizjali, u mhux għas-sena li matulha nħarġet din il-fattura.

F’dan ir-rigward, l-Istati Membri jistgħu jipprevedu miżuri li jissanzjonaw in-nuqqas ta’ osservanza ta’ riferimenti obbligatorji, bil-kundizzjoni li dawn josservaw il-prinċipju ta’ proporzjonalità, kif ukoll miżuri li jillimitaw ratione temporis il-possibbiltà li tiġi rrettifikata fattura żbaljata jew inkompleta, sakemm dawn tal-aħħar japplikaw bl-istess mod għad-drittijiet simili fil-qasam fiskali bbażati fuq id-dritt intern u għal dawk ibbażati fuq id-dritt tal-Unjoni (il-prinċipju ta’ ekwivalenza) u sakemm dawn ma jirrendux prattikament impossibbli jew eċċessivament diffiċli l-eżerċizzju tad-dritt għal tnaqqis (il-prinċipju ta’ effettività).

1 – Lingwa oriġinali: il-Franċiż.

2 – ĠU L 347, p. 1, iktar ’il quddiem id-“Direttiva tal-VAT”.

3 – BGBl. 2005 I, p. 386.

4 – Ara s-sentenza PPUH Stehcemp (C-277/14, EU:C:2015:719, punt 26 u l-ġurisprudenza ċċitata).

5 – Ara s-sentenza PPUH Stehcemp (C-277/14, EU:C:2015:719, punt 27 u l-ġurisprudenza ċċitata).

6 – Ara s-sentenza PPUH Stehcemp (C-277/14, EU:C:2015:719, punt 28 u l-ġurisprudenza ċċitata).

7 – Ara l-Artikolu 178(a) tal-imsemmija direttiva.

8 – Ara l-Artikolu 226(3) tad-Direttiva tal-VAT.

9 – Ara s-sentenzi Collée (C-146/05, EU:C:2007:549, punt 25); Polski Trawertyn (C-280/10, EU:C:2012:107, punt 41), u PPUH Stehcemp (C-277/14, EU:C:2015:719, punt 29).

10 – Ara, fir-rigward tal-obbligi l-oħra li l-Istati Membri jistgħu jadottaw biex jiżguraw il-ġbir eżatt tal-VAT u biex jevitaw il-frodi, is-sentenzi Nidera Handelscompagnie (C-385/09, EU:C:2010:627, punti 49 u 50) kif ukoll VSTR (C-587/10, EU:C:2012:592, punti 44 u 45).

11 – Sentenzi Pannon Gép Centrum (C-368/09, EU:C:2010:441, punti 43 sa 45) kif ukoll Petroma Transports et (C-271/12, EU:C:2013:297, punt 34).

12 – Ara l-punt 36 ta’ din is-sentenza.

13 – Ara l-punti 42 sa 45 tal-imsemmija sentenza.

14 – Ara l-punti 21, 34 u 35 tal-imsemmija sentenza.

15 – Is-Sitt Direttiva tal-Kunsill, tas-17 ta’ Mejju 1977, fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ – Sistema komuni ta’ taxxa fuq il-valur miżjud: bażi uniformi ta’ stima (ĠU Edizzjoni Speċjali bil-Malti, Kapitolu 9, Vol. 1, p. 23).

16 – Din id-dispożizzjoni ġiet issostitwita bl-ewwel paragrafu tal-Artikolu 179 tad-Direttiva tal-VAT.

17 – Sentenza Terra Baubedarf-Handel (C-152/02, EU:C:2004:268, punt 34).

18 – Sentenza Terra Baubedarf-Handel (C-152/02, EU:C:2004:268, punt 35).

19 – Fir-rigward tat-trasferiment tal-eċċess tal-VAT għall-perijodu tat-taxxa segwenti, ara s-sentenza Il-Kummissjoni vs L-Ungerija (C-274/10, EU:C:2011:530, punt 45 u l-ġurisprudenza ċċitata).

20 – Ara t-tieni paragrafu tal-Artikolu 179 tad-Direttiva tal-VAT.

21 – Ara l-punt 5 tad-deċiżjoni tar-rinviju.

22 – Ara s-sentenzi Nidera Handelscompagnie (C-385/09, EU:C:2010:627, punti 50 u 51) kif ukoll Polski Trawertyn (C-280/10, EU:C:2012:107, punt 43). Ara wkoll, fir-rigward tal-obbligu ta’ dikjarazzjoni tal-bidu ta’ attività taxxabbli, is-sentenza Dankowski (C-438/09, EU:C:2010:818, punti 33 sa 36) u, fir-rigward tal-irregolaritajiet fil-kontabbiltà u fid-dikjarazzjoni li jaffettwaw it-tranżazzjonijiet suġġetti għas-sistema ta’ awtolikwidazzjoni, is-sentenza Ecotrade (C-95/07 u C-96/07, EU:C:2008:267, punt 63).

23 – Jien ninnota, f’dan ir-rigward, li diversi Stati Membri jipprevedu tali multi (ara l-Artikolu 70 tal-Kodiċi tal-VAT Belġjan, l-Artikolu 77 tal-liġi Lussemburgiża dwar it-taxxa fuq il-valur miżjud jew anki l-Artikolu 1737 tal-Kodiċi Ġenerali tat-Taxxi Franċiż).

24 – F’din is-sentenza il-Qorti tal-Ġustizzja indikat li “[g]ħandu jitfakkar li s-sistema komuni tal-VAT ma tipprojbixxix il-korrezzjoni ta’ fatturi żbaljati. Għaldaqstant, meta l-kundizzjonijiet materjali kollha meħtieġa sabiex ikun jista’ jsir benefiċċju mid-dritt għat-tnaqqis tal-VAT ikunu ssodisfatti u meta, qabel l-adozzjoni tad-deċiżjoni mill-awtorità kkonċernata, il-persuna taxxabbli tkun ipprovditilha fattura kkoreġuta, din ma tistax tiġi rrifjutata l-benefiċċju ta’ dan id-dritt minħabba li l-fattura inizjali kienet tinkludi żball” (punt 34, korsiv miżjud minni).