Available languages

Taxonomy tags

Info

References in this case

Share

Highlight in text

Go

KONKLUŻJONIJIET TAL-AVUKAT ĠENERALI

WATHELET

ippreżentati fil-21 ta’ Diċembru 2016 (1)

Kawża C-628/15

The Trustees of the BT Pension Scheme

vs

Commissioners for Her Majesty’s Revenue and Customs

[talba għal deċiżjoni preliminari mressqa mill-Court of Appeal (England & Wales) (Civil Division) [qorti tal-appell (l-Ingilterra u Wales) (diviżjoni ċivili), ir-Renju Unit]

“Rinviju għal deċiżjoni preliminari – Artikolu 63 TFUE – Moviment liberu tal-kapital – Leġiżlazzjoni fiskali – Taxxa fuq il-kumpanniji – Rimbors ta’ pagament bil-quddiem tat-taxxa fil-każ ta’ ħlas ta’ dividendi minn kumpanniji stabbiliti fi Stati Membri oħra lil kumpannija stabbilita fir-Renju Unit – Rifjut tal-għoti tal-benefiċċju tal-kreditu ta’ taxxa lill-azzjonisti”







I –    Introduzzjoni

1.        Din it-talba għal deċiżjoni preliminari tal-15 ta’ Ottubru 2015 tal-Court of Appeal (England & Wales) (Civil Division) [qorti tal-appell (l-Ingilterra u Wales) (diviżjoni ċivili), ir-Renju Unit], li waslet fir-Reġistru tal-Qorti tal-Ġustizzja fl-24 ta’ Novembru 2015, tirrigwarda l-interpretazzjoni tal-Artikoli 49 u 63 TFUE.

2.        Din it-talba tressqet fil-kuntest ta’ kawża bejn it-Trustees of the BT Pension Scheme u l-Commissioners for Her Majesty’s Revenue and Customs (amministrazzjoni tat-taxxi u d-dwana tar-Renju Unit, iktar ’il quddiem l-“amministrazzjoni fiskali”) rigward is-sistema ta’ dividendi minn dħul barrani (“foreign income dividend”, iktar ’il quddiem l-“FID”) applikabbli fir-Renju Unit matul il-perijodu bejn l-1 ta’ Lulju 1994 u l-5 ta’ April 1999.

3.        Taħt is-sistema FID, kumpannija residenti fir-Renju Unit li tirċievi dividendi minn kumpannija li ma hijiex residenti setgħet tiddeċiedi, meta tqassam dividend lill-azzjonisti tagħha stess, li dan jiġi kklassifikat bħala FID. Din l-għażla kellha implikazzjonijiet fiskali kemm għall-kumpanniji li jqassmu kif ukoll għall-azzjonisti benefiċjarji.

4.        Din it-talba għal deċiżjoni preliminari tikkonċerna s-sitwazzjoni ta’ azzjonist li jirrisjedi fir-Renju Unit u li jirċievi mingħand kumpannija residenti f’dan l-istess Stat Membru dividendi ta’ oriġini barranija kklassifikati bħala FID (2)
.

5.        Hija tirrigwarda b’mod iktar partikolari l-assenza ta’ kreditu ta’ taxxa għal azzjonist eżentat mit-taxxa fuq id-dħul ta’ dividendi, iżda biss meta dawn ikunu dividendi ta’ oriġini barranija rċevuti fil-kuntest tas-sistema FID (3)
filwaqt li, lil hinn minn din is-sistema, huwa kien ikun intitolat għal dan il-kreditu ta’ taxxa.

6.        Il-qorti tar-rinviju tistaqsi jekk id-dritt tal-Unjoni jagħtix drittijiet lil dan l-azzjonist residenti fl-istess Stat Membru bħall-kumpannija li tqassam id-dividendi ta’ oriġini barranija kklassifikati bħala FID u, jekk ikun il-każ, dwar ir-rimedji ġudizzjarji li huma disponibbli għalih.

7.        Għandu jiġi osservat li fis-sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774), il-Qorti tal-Ġustizzja eżaminat is-sistema FID fil-kuntest ta’ rikorsi ppreżentati minn kumpanniji residenti li jirċievu dividendi ta’ oriġini barranija u li kienu għażlu s-sistema FID.

II – Id-dritt tar-Renju Unit

8.        Taħt il-leġiżlazzjoni fiskali fis-seħħ fir-Renju Unit, il-profitti magħmula, matul sena finanzjarja, minn kull kumpannija li tirrisjedi f’dan l-Istat Membru, kif ukoll minn kull kumpannija li ma tirrisjedix hemmhekk iżda li teżerċita f’dak l-Istat attività kummerċjali permezz ta’ fergħa jew aġenzija, huma suġġetti għat-taxxa fuq il-kumpanniji fl-imsemmi Stat. Ir-Renju Unit tal-Gran Brittanja u l-Irlanda ta’ Fuq ilu mill-1973 japplika sistema ta’ tassazzjoni magħrufa bħala “imputazzjoni parzjali”, li taħtha, sabiex tiġi evitata t-taxxa doppja ekonomika meta kumpannija residenti tqassam profitti, parti mit-taxxa fuq il-kumpanniji mħallsa minn din il-kumpannija tiġi imputata lill-azzjonisti tagħha. Sas-6 ta’ April 1999, din is-sistema kienet ibbażata, minn naħa, fuq il-pagament bil-quddiem tat-taxxa fuq il-kumpanniji mill-kumpannija li tqassam u, min-naħa l-oħra, fuq kreditu ta’ taxxa mogħti lill-azzjonisti li jibbenefikaw minn tqassim ta’ dividendi, flimkien ma’, f’dak li jikkonċerna l-kumpanniji benefiċjarji li jirrisjedu fir-Renju Unit, eżenzjoni mit-taxxa fuq il-kumpanniji fir-rigward ta’ dividendi mħallsa minn kumpannija oħra li tirrisjedi wkoll f’dan l-Istat Membru.

A –    Fuq il-pagament bil-quddiem tat-taxxa fuq il-kumpanniji

9.        F’konformità mal-Artikolu 14 tal-Income and Corporation Taxes Act 1988 (liġi tal-1988 dwar it-taxxi fuq id-dħul u fuq il-kumpanniji (iktar ’il quddiem l-“ICTA”), fil-verżjoni tagħha applikabbli fiż-żmien meta seħħew il-fatti fil-kawża prinċipali, kumpannija li tirrisjedi fir-Renju Unit li kienet tħallas dividendi lill-azzjonisti tagħha kellha tħallas bil-quddiem it-taxxa fuq il-kumpanniji (“advance corporation tax” [ACT]), ikkalkolata fuq l-ammont jew il-valur tat-tqassim magħmul.

10.      Kumpannija kellha d-dritt, sa ċertu punt, tnaqqas l-ACT imħallsa fir-rigward ta’ tqassim magħmul matul sena finanzjarja speċifika mill-ammont li hija kellha tħallas bħala taxxa fuq il-kumpanniji għal dik is-sena finanzjarja.

B –    Fuq is-sitwazzjoni tal-azzjonisti residenti li jirċievu dividendi minn kumpanniji residenti

11.      Skont l-Artikolu 208 tal-ICTA, meta kumpannija residenti fir-Renju Unit kienet tirċievi dividendi minn kumpannija li tirrisjedi wkoll f’dan l-Istat Membru, hija ma kinitx suġġetta għat-taxxa fuq il-kumpanniji fir-rigward ta’ dawn id-dividendi.

12.      Barra minn hekk, skont l-Artikolu 231(1) tal-ICTA, kull tqassim ta’ dividendi suġġett għall-ACT minn kumpannija residenti lil kumpannija residenti oħra kien jagħti lok, għall-benefiċċju ta’ din tal-aħħar, għal kreditu ta’ taxxa li jikkorrispondi għall-parti tal-ammont tal-ACT imħallas mill-ewwel kumpannija (4)
.

13.      Kumpannija li tirrisjedi fir-Renju Unit u li tkun irċeviet minn kumpannija residenti oħra dividendi li t-tqassim tagħhom kien ta lok għal kreditu ta’ taxxa, setgħet tirkupra l-ammont tal-ACT imħallas minn dik il-kumpannija l-oħra u tnaqqsu mill-ammont tal-ACT li hija stess kellha tħallas meta kienet tqassam dividendi lill-azzjonisti tagħha, b’tali mod li hija kienet tħallas l-ACT biss fuq l-ammont li jkun fadal.

14.      Skont il-qorti tar-rinviju “[m]eta l-kreditu ta’ taxxa kien ogħla mit-taxxa fuq id-dħul dovuta mill-benefiċjarju fuq it-total tal-ammont imqassam u tal-kreditu ta’ taxxa (bħal fil-każ ta’ azzjonist eżentat mit-taxxa), huwa seta’ jitlob il-pagament tal-ammont żejjed” taħt l-Artikolu 231(3) tal-ICTA.

15.      Skont l-Artikolu 592(2) tal-ICTA, is-sistemi ta’ pensjoni awtorizzati kienu jibbenefikaw minn eżenzjoni mit-taxxa fuq id-dħul fir-rigward tad-dividendi, irrispettivament minn jekk ikunux ta’ oriġini nazzjonali jew barranija.

16.      F’konformità mal-Artikolu 231(3) tal-ICTA, il-fondi għall-pensjoni li kellhom dritt għall-kreditu ta’ taxxa previst fl-Artikolu 231(1) tal-ICTA fir-rigward tad-dividendi li kienu jirċievu minn kumpanniji tar-Renju Unit u kellhom dritt għall-ħlas ta’ dan il-kreditu ta’ taxxa, peress li dawn kienu eżentati mit-taxxi fuq id-dħul fuq id-dividendi.

17.      Min-naħa l-oħra, dan il-ħlas tal-kreditu ta’ taxxa skont l-Artikolu 231(3) tal-ICTA, kien eskluż fil-każ ta’ applikazzjoni tas-sistema FID (5)
.

C –    Fuq is-sitwazzjoni ta’ azzjonisti residenti li jirċievu dividendi minn kumpanniji li ma humiex residenti

18.      Meta kumpannija residenti fir-Renju Unit kienet tirċievi dividendi minn kumpannija li tirrisjedi barra mir-Renju Unit, din tal-ewwel kienet suġġetta għat-taxxa fuq il-kumpanniji fuq dawn id-dividendi. Min-naħa l-oħra, f’konformità mal-Artikoli 788 u 790 tal-ICTA, din kienet tibbenefika minn tnaqqis fir-rigward tat-taxxa mħallsa mill-kumpannija li tqassam fl-Istat ta’ residenza tagħha.

19.      F’każ bħal dan, il-kumpannija benefiċjarja tal-imsemmija dividendi ma kellhiex dritt għal kreditu ta’ taxxa.

20.      Barra minn hekk, sa fejn il-kumpannija residenti kienet tqassam hija stess dividendi lill-azzjonisti tagħha, hija kienet suġġetta għall-ACT.

21.      Konsegwentement, il-fatt li kumpannija residenti kienet tirċievi dividendi minn kumpannija li ma hijiex residenti seta’ jwassal għal eċċess tal-ACT, b’mod partikolari minħabba li t-tqassim ta’ dividendi minn kumpannija li ma hijiex residenti ma kienx jagħti lok għal kreditu ta’ taxxa li jista’ jitnaqqas mill-ammont tal-ACT li l-kumpannija residenti kellha tħallas meta hija kienet tqassam dividendi lill-azzjonisti tagħha.

22.      Mill-1 ta’ Lulju 1994, kienet ingħatat soluzzjoni għal din il-problema permezz tas-sistema FID, sabiex il-kumpanniji jkunu jistgħu jtaffu l-effett tal-eċċess tal-ACT.

D –    Fuq is-sistema FID

23.      Taħt is-sistema FID, kumpannija residenti li tirċievi dividendi minn kumpannija li ma hijiex residenti setgħet tiddeċiedi, meta tqassam dividend lill-azzjonisti tagħha, li dan id-dividend, li fuqu kienet dovuta l-ACT, jiġi kklassifikat bħala FID, u dan kien jippermetti lil din il-kumpannija titlob rimbors tal-eċċess tal-ACT li tkun ħallset, sa fejn l-FID jilħaq il-livell tad-dividendi barranin rċevuti.

24.      Kumpannija residenti fir-Renju Unit li kienet tirċievi dħul ta’ oriġini barranija kellha interess tagħżel l-applikazzjoni tas-sistema FID. Fil-fatt, tali kumpannija seta’ jkollha tħallas taxxa fuq il-kumpanniji li tkun insuffiċjenti biex minnha titnaqqas l-ACT dovuta fuq id-dividendi kollha li hija kienet ħallset. Bl-għażla li tikklassifika dividend bħala FID, hija setgħet tirkupra l-ACT mill-amministrazzjoni fiskali u b’dan il-mod tevita eċċess ta’ ACT.

25.      Madankollu, l-azzjonist benefiċjarju ta’ dividendi ta’ oriġini barranija kklassifikati bħala FID ma kellux dritt għal kreditu ta’ taxxa. L-Artikolu 246 C tal-ICTA fil-fatt kien jipprevedi espressament dan li ġej:

“L-Artikolu 231(1) ma japplikax meta t-tqassim inkwistjoni jikkostitwixxi dividend ta’ dħul barrani.”

26.      Skont il-qorti tar-rinviju, l-Artikolu 246 D tal-ICTA madankollu kien jipprevedi li l-azzjonisti ntaxxati kienu meqjusa bħala li rċevew dħul li kien ġie diġà ntaxxat b’rata iktar baxxa (20 %) għas-sena finanzjarja kkonċernata. Għal azzjonist intaxxat b’dan il-mod, l-effett tal-Artikolu 246 D kien l-istess bħallikieku kien ibbenefika minn kreditu ta’ taxxa taħt l-Artikolu 231 tal-ICTA. Konsegwentement, għal tali azzjonist, id-dividendi mqassma bl-applikazzjoni tas-sistema FID jew mingħajrha fir-realtà kienu ntaxxati bl-istess mod.

27.      Madankollu, fil-każ ta’ azzjonist li ma kienx suġġett għat-taxxa fir-rigward tad-dividendi rċevuti (b’mod partikolari bħas-sistemi ta’ pensjoni awtorizzati) (6)
, is-sistema FID kienet twassal għal differenza fit-trattament: għad-dividendi mqassma mingħajr l-applikazzjoni tas-sistema FID, dan l-azzjonist kellu dritt għal kreditu ta’ taxxa pagabbli fi flus kontanti, filwaqt li, għad-dividendi mqassma li kienu kklassifikati bħala FID, huwa ma kellux dan id-dritt.

28.      Fil-fatt, bħalma diġà ġie indikat, skont l-Artikolu 246 C tal-ICTA, għad-dividendi rċevuti minn kumpanniji li ddeċidew li japplikaw is-sistema FID fir-rigward tagħhom, is-sistemi ta’ pensjoni eżentati awtorizzati ma kellhomx dritt għall-kreditu ta’ taxxa previst fl-Artikolu 231(1) tal-ICTA [u a fortiori għall-ħlas tiegħu kif previst fl-Artikolu 231(3) tal-ICTA].

29.      Is-sistema tal-ACT, inkluża s-sistema FID, tneħħiet għat-tqassim ta’ dividendi mwettaq mis-6 ta’ April 1999.

III – Il-kawża prinċipali u d-domandi preliminari

30.      Il-BT Pension Scheme (iktar ’il quddiem il-“fond għall-pensjoni”) huwa l-ikbar fond għall-pensjoni b’benefiċċju ddefinit fir-Renju Unit. Il-membri tiegħu huma impjegati jew ex impjegati ta’ British Telecommunications plc (iktar ’il quddiem “BT”). Il-fond għall-pensjoni huwa ġestit minn kumpannija fiduċjarja, BT Pension Scheme Trustees Limited. Mil-lat fiskali, il-fiduċjarji (“trustees”) tal-fond għall-pensjoni (iktar ’il quddiem it-“Trustees”) jikkostitwixxu l-entità taxxabbli rilevanti u l-fond għall-pensjoni huwa l-benefiċjarju effettiv tal-attivi rilevanti.

31.      Il-fond għall-pensjoni huwa fond għall-pensjoni awtorizzat, li huwa u li dejjem kien eżentat fir-Renju Unit mit-taxxa fuq id-dħul iġġenerat mill-investimenti tiegħu.

32.      Fiż-żmien ikkonċernat, l-azzjonijiet tal-kumpanniji kienu jirrappreżentaw madwar 70 % sa 75 % tal-investimenti tal-fond għall-pensjoni (skont il-valur tas-suq). Xi wħud mill-ishma tal-fond għall-pensjoni kienu investimenti f’kumpanniji residenti fir-Renju Unit, oħrajn kienu investimenti f’kumpanniji residenti fl-Unjoni Ewropea jew xi mkien ieħor. Il-parti l-kbira (madwar 97 %) tal-portafoll ta’ azzjonijiet tal-fond għall-pensjoni kienu investiti f’kumpanniji kbar elenkati fir-Renju Unit u barra mill-pajjiż. F’kull każ, il-fond għall-pensjoni b’mod ġenerali kellu inqas minn 2 % tal-kapital tal-kumpannija u dejjem inqas minn 5 %. Il-fond għall-pensjoni kellu relazzjoni ta’ sempliċi azzjonist mal-kumpanniji li kien investa fihom.

33.      Il-portafoll ta’ investiment tal-fond għall-pensjoni kien jinkludi azzjonijiet ta’ kumpanniji residenti fir-Renju Unit li kienu għażlu li japplikaw is-sistema FID. Il-fond għall-pensjoni għalhekk irċieva dividendi ta’ oriġini barranija kklassifikati bħala FID. F’konformità mas-sistema FID, skont l-Artikolu 246 C tal-ICTA, it-Trustees ma kellhomx dritt għal krediti ta’ taxxa għal dawn id-dividendi.

34.      It-Trustees, li jqisu li l-assenza ta’ kreditu ta’ taxxa għal dividendi ta’ oriġini barranija kklassifikati bħala FID kienet inkompatibbli mad-dritt tal-Unjoni, ippreżentaw rikors sabiex jiksbu kreditu ta’ taxxa jew, b’mod sussidjarju, il-ħlas lura tat-taxxa żejda mħallsa jew il-ħlas ta’ danni għan-nuqqas tal-għoti ta’ kreditu ta’ taxxa. Huma sostnew quddiem il-qorti tar-rinviju li, peress li, minn naħa, l-Artikolu 246 C tal-ICTA kien iwassal għal differenza fit-trattament ta’ dividendi ta’ oriġini barranija kklassifikati bħala FID meta mqabbla mad-dividendi ta’ oriġini nazzjonali li hija kuntrarja għad-dritt tal-Unjoni, b’mod partikolari għall-Artikolu 63 TFUE, u li, min-naħa l-oħra, huma l-persuni li ġarrbu l-iżvantaġġ inkwistjoni, id-dritt tal-Unjoni jippermettilhom li jevitaw l-applikazzjoni tal-Artikolu 246 C tal-ICTA fis-sitwazzjoni tagħhom, li jagħtihom dritt għal kreditu ta’ taxxa għall-FID li huma rċevew.

35.      Il-qorti tar-rinviju tinnota li, skont il-Gvern tar-Renju Unit, is-sistema FID kienet kuntrarja għad-dritt tal-Unjoni sa fejn din kienet tirrestrinġi d-drittijiet tal-kumpanniji residenti fir-Renju Unit li jħallsu FID. Dan il-Gvern sostna quddiem il-qorti tar-rinviju li minn dan ma kienx jirriżulta li l-azzjonisti residenti ta’ dawn il-kumpanniji kellhom drittijiet li jirriżultaw mid-dritt tal-Unjoni li s-sistema FID kienet irrestrinġiet u li kienu jippermettulhom jevitaw l-applikazzjoni tal-Artikolu 246 C tal-ICTA. Dan il-Gvern iqis li t-Trustees ma jistgħux jinvokaw id-dritt tal-Unjoni biex jevitaw l-applikazzjoni tal-Artikolu 246 C tal-ICTA, minħabba li meta investew f’kumpanniji residenti fir-Renju Unit u suġġetti għas-sistema FID, huma ma eżerċitaw l-ebda dritt tal-Unjoni li jista’ jiġi invokat direttament. It-Trustees kienu jirrappreżentaw fond għall-pensjoni residenti fir-Renju Unit li jinvesti f’kumpanniji residenti fir-Renju Unit.

36.      Din it-talba għal deċiżjoni preliminari tressqet fil-kuntest ta’ appell quddiem il-Court of Appeal (England & Wales) (Civil Division) [qorti tal-appell (l-Ingilterra u Wales) (diviżjoni ċivili), ir-Renju Unit] ippreżentat kontra deċiżjoni tal-Upper Tribunal (Tax and Chancery Chamber) [qorti superjuri (awla tat-tassazzjoni u tal-Chancery), ir-Renju Unit], li kienet ċaħdet l-appell u l-appelli inċidentali kontra sentenza tal-First-tier Tribunal (Tax Chamber) [qorti tal-ewwel istanza (awla tat-tassazzjoni), ir-Renju Unit].

37.      Il-First-tier Tribunal (Tax Chamber) [qorti tal-ewwel istanza, (awla tat-tassazzjoni)] u l-Upper Tribunal (Tax and Chancery Chamber) [qorti superjuri (awla tat-tassazzjoni u tal-Chancery)] it-tnejn li huma jqisu li, fil-prinċipju, it-Trustees għandhom dritt għall-pagament ta’ krediti ta’ taxxa relatati mad-dividendi ta’ oriġini barranija kklassifikati bħala FID li huma rċevew għas-sena finanzjarja għas-snin 1997-1998, iżda li r-rikorsi relatati mas-snin l-oħra kienu preskritti bl-applikazzjoni tad-dritt nazzjonali.

38.      Il-qorti tar-rinviju tqis li l-kwistjoni dwar jekk it-Trustees għandhomx dritt għall-krediti ta’ taxxa fuq id-dividendi ta’ oriġini barranija kklassifikati bħala FID tqajjem punti ta’ dritt tal-Unjoni dwar il-kamp ta’ applikazzjoni tal-Artikolu 63 TFUE. Din tqis li, sakemm it-Trustees ma jkollhomx drittijiet direttament applikabbli li jirriżultaw mid-dritt tal-Unjoni li jikkonċernaw l-Artikolu 246 C tal-ICTA, il-leġiżlazzjoni nazzjonali ma timponix l-evitar tal-applikazzjoni ta’ dan l-artikolu għas-sitwazzjoni tat-Trustees u li, konsegwentement, ir-rikorsi tat-Trustees relatati mal-krediti ta’ taxxa għandhom jiġu miċħuda.

39.      F’dawn il-kundizzjonijiet, il-Court of Appeal (England & Wales) (Civil Division) [qorti tal-appell (l-Ingilterra u Wales) (diviżjoni ċivili)] iddeċidiet li tissospendi l-proċeduri quddiemha u tagħmel lill-Qorti tal-Ġustizzja d-domandi preliminari li ġejjin:

“1)Fid-dawl tal-fatt li r-risposta tal-Qorti tal-Ġustizzja għar-raba’ domanda fis-sentenza tat-12 ta’ Diċembru 2006 fil-kawża [Test Claimants in the FII Group Litigation (C-446/04, EU:C:2006:774)] kienet li l-Artikoli 43 u 56 KE – li issa saru l-Artikoli 49 u 63 TFUE – jipprekludu leġiżlazzjoni ta’ Stat Membru li tagħti lil kumpanniji residenti li jqassmu lill-azzjonisti tagħhom dividendi li joriġinaw minn dividendi ta’ oriġini barranija li huma jkunu rċevew il-possibbiltà li jagħżlu sistema li tippermettilhom jirkupraw it-taxxa fuq il-kumpanniji mħallsa bil-quddiem, iżda, minn naħa, tobbliga lil dawn il-kumpanniji jħallsu l-imsemmija taxxa bil-quddiem u jitolbu r-rimbors sussegwentement u, min-naħa l-oħra, ma tipprovdix kreditu ta’ taxxa għall-azzjonisti tagħhom, filwaqt li kienu jirċievu tali kreditu li kieku twettaq tqassim minn kumpannija residenti abbażi ta’ dividendi ta’ oriġini nazzjonali, id-dritt tal-Unjoni jagħti drittijiet lil dawn l-azzjonisti, kemm jekk taħt l-Artikolu 63 TFUE kif ukoll b’titolu ieħor, meta dawn ikunu l-benefiċċjarji tad-dividendi li l-kumpannija għażlet li tqassam billi tagħżel din is-sistema, b’mod partikolari meta l-azzjonist jirrisjedi fl-istess Stat Membru bħall-kumpannija li tqassam id-dividendi?

2)Jekk l-azzjonist imsemmi fid-domanda 1 ma jkunx jista’ jinvoka huwa stess drittijiet li jirriżultaw mill-Artikolu 63 TFUE, huwa jkun jista’ jinvoka ksur tad-drittijiet li l-Artikoli 49 u 63 TFUE jagħtu lill-kumpannija li tqassam id-dividendi?

3)Jekk ir-risposta għall-ewwel jew għat-tieni domanda tkun li d-dritt tal-Unjoni jagħti drittijiet lill-azzjonist jew li dan jista’ jiġi invokat minn dan tal-aħħar, id-dritt tal-Unjoni jimponi kundizzjonijiet fir-rigward tar-rimedji ġudizzjarji li l-azzjonist għandu jkollu taħt id-dritt nazzjonali?

4)Iċ-ċirkustanzi sussegwenti jaffettwaw ir-risposti tal-Qorti tal-Ġustizzja għad-domandi precedenti:

a)l-azzjonist ma jkunx suġġett għat-taxxa fuq id-dħul fl-Istat Membru fir-rigward tad-dividendi li huwa jirċievi, b’mod li fil-każ ta’ tqassim minn kumpannija residenti barra mis-sistema msemmija iktar ’il fuq, il-kreditu ta’ taxxa li l-azzjonist għandu dritt għalih bis-saħħa tal-leġiżlazzjoni nazzjonali jkun jista’ jagħti lok għall-ħlas ta’ dan il-kreditu lill-azzjonist mill-Istat Membru;

b)il-qorti nazzjonali tqis li l-ksur tad-dritt tal-Unjoni mil-leġiżlazzjoni nazzjonali inkwistjoni ma jkunx serju biżżejjed sabiex l-Istat Membru jiġi obbligat jikkumpensa d-danni fir-rigward tal-kumpannija li tqassam id-dividendi, skont il-prinċipji stabbiliti fis-sentenza [tal-5 ta’ Marzu 1996, Brasserie du pêcheur u Factortame (C-46/93 u C-48/93, EU:C:1996:79)], jew

c)f’ċerti każijiet biss, il-kumpannija li tqassam id-dividendi taħt is-sistema msemmija iktar ’il fuq setgħet żiedet l-ammont tad-distribuzzjonijiet [tqassim] tagħha lill-azzjonisti kollha b’mod li tħallas somma fi flus kontanti ekwivalenti għal dik li jkun kiseb azzjonist eżentat waqt il-ħlas ta’ dividendi barra minn din is-sistema?”

IV – Il-proċedura quddiem il-Qorti tal-Ġustizzja

40.      Ġew ippreżentati osservazzjonijiet bil-miktub mit-Trustees, mill-Gvern tar-Renju Unit kif ukoll mill-Kummissjoni Ewropea. L-istess partijiet ippreżentaw osservazzjonijiet orali waqt is-seduta li saret fid-9 ta’ Novembru 2016.

V –    Analiżi

A –    Fuq l-ewwel domanda preliminari

41.      Permezz tal-ewwel domanda tagħha, il-qorti tar-rinviju tistaqsi, essenzjalment, jekk id-dritt tal-Unjoni, b’mod partikolari, l-Artikolu 63 TFUE, jagħtix drittijiet lil azzjonist benefiċjarju ta’ dividendi ta’ oriġini barranija kklassifikati bħala FID, meta l-azzjonist jirrisjedi fl-istess Stat Membru bħall-kumpannija li tqassam.

1.      Id-dispożizzjoni tat-Trattat FUE applikabbli

42.      Fil-punti 89 sa 92 tas-sentenza tat-13 ta’ Novembru 2012, Test Claimants in the FII Group Litigation (C-35/11, EU:C:2012:707), il-Qorti tal-Ġustizzja ddeċidiet li t-trattament fiskali ta’ dividendi seta’ jaqa’ fil-kamp ta’ applikazzjoni tal-Artikolu 49 TFUE dwar il-libertà ta’ stabbiliment u tal-Artikolu 63 TFUE dwar il-moviment liberu tal-kapital. Skont il-Qorti tal-Ġustizzja, sabiex isir magħruf jekk leġiżlazzjoni nazzjonali taqax fil-kamp ta’ applikazzjoni ta’ libertà ta’ moviment waħda jew oħra, hemm lok li jittieħed inkunsiderazzjoni s-suġġett tal-leġiżlazzjoni inkwistjoni. Leġiżlazzjoni nazzjonali li hija intiża sabiex tapplika biss għall-ishma li jippermettu li tiġi eżerċitata influwenza determinanti fuq id-deċiżjonijiet ta’ kumpannija u li jiġu ddeterminati l-attivitajiet tagħha taqa’ fil-kamp ta’ applikazzjoni tal-Artikolu 49 TFUE, dwar il-libertà ta’ stabbiliment. Min-naħa l-oħra, dispożizzjonijiet nazzjonali li japplikaw biss għal ishma miksuba biss bl-intenzjoni li jsir investiment finanzjarju mingħajr l-intenzjoni li jkun hemm impatt fuq it-tmexxija tal-impriża u li jiġi eżerċitat il-kontroll tagħha għandhom jiġu eżaminati biss fid-dawl tal-moviment liberu tal-kapital (7)
.

43.      F’din l-istess sentenza tat-13 ta’ Novembru 2012, Test Claimants in the FII Group Litigation (C-35/11, EU:C:2012:707), il-Qorti tal-Ġustizzja qieset li s-suġġett tal-leġiżlazzjoni nazzjonali inkwistjoni, li kien l-istess bħal dak inkwistjoni f’dan il-każ, ma kienx jippermetti li jiġi ddeterminat jekk din taqax b’mod ċar taħt l-Artikolu 49 TFUE jew taħt l-Artikolu 63 TFUE. F’dawn iċ-ċirkustanzi, il-Qorti tal-Ġustizzja tieħu inkunsiderazzjoni l-elementi fattwali tal-każ inkwistjoni sabiex tiddetermina jekk is-sitwazzjoni msemmija fil-kawża prinċipali taqax taħt waħda jew l-oħra mill-imsemmija dispożizzjonijiet (8)
.

44.      Peress li l-fond għall-pensjoni b’mod ġenerali kellu inqas minn 2 % u dejjem inqas minn 5 % tal-kapital tal-kumpanniji li kien investa fihom, u peress li kellu relazzjoni ta’ sempliċi azzjonist ma’ dawn il-kumpanniji, inqis, bħal ma josservaw it-Trustees, il-Gvern tar-Renju Unit u l-Kummissjoni, li l-investimenti inkwistjoni jaqgħu taħt il-moviment liberu tal-kapital previst fl-Artikolu 63 TFUE. Fil-fatt, dawn l-investimenti ma kinux jippermettu lit-Trustees jeżerċitaw influwenza determinanti fuq id-deċiżjonijiet ta’ kumpannija u li jiddeterminaw l-attivitajiet tagħha.

2.      Is-sitwazzjoni ta’ kumpannija residenti fir-Renju Unit li tqassam dividendi ta’ oriġini barranija kklassifikati bħala FID (9)

45.      Fis-sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774), il-Qorti tal-Ġustizzja ddeċidiet “li t-trattament fiskali tal-kumpanniji residenti li jirċievu dividendi ta’ oriġini barranija u li jagħżlu s-sistema FID [kien] inqas vantaġġuż minn dak applikat fir-rigward tal-kumpanniji residenti li jirċievu dividendi ta’ oriġini nazzjonali” (10)
.

46.      Fil-fatt, dwar l-assenza ta’ kreditu ta’ taxxa li huwa l-kwistjoni rilevanti f’dan il-każ, il-Qorti tal-Ġustizzja ddeċidiet li peress li “l-azzjonist li jibbenefika minn tqassim ta’ dividendi minn kumpannija residenti abbażi ta’ dividendi ta’ oriġini barranija kklassifikati bħala FID m’għandux id-dritt għal kreditu ta’ taxxa” u li tali azzjonist “m’għandu dritt għal ebda ħlas lura [rimbors] meta t-taxxa fuq id-dħul dovuta hija inferjuri għat-taxxa bir-rata l-iktar baxxa fuq id-dividend”, “dan iwassal għas-sitwazzjoni li fiha kumpannija li tkun għażlet is-sistema FID trid iżżid l-ammont tat-tqassim tagħha jekk hija tixtieq tiggarantixxi lill-azzjonisti tagħha dħul ekwivalenti għal dak li jirriżulta minn tqassim ta’ dividendi ta’ oriġini nazzjonali” (11)
.

47.      Huwa importanti li jitfakkar li r-rikorrenti fil-kawża prinċipali f’dik il-kawża kienu kumpanniji residenti fir-Renju Unit u li kellhom ishma f’kumpanniji residenti fi Stat Membru ieħor jew f’pajjiż terz. Din il-kawża tirrigwarda s-sitwazzjoni ta’ azzjonisti ta’ dawn il-kumpanniji, li, bħalhom, huma residenti fir-Renju Unit.

3.      Is-sitwazzjoni tal-azzjonist residenti li jibbenefika minn tqassim minn kumpannija residenti ta’ dividendi li joriġinaw minn dividendi ta’ oriġini barranija kklassifikati bħala FID: inugwaljanza fit-trattament

48.      Minkejja l-fatt li r-rikorrenti fil-kawża prinċipali li wasslet għas-sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774), kienu kumpanniji residenti fir-Renju Unit li kellhom ishma f’kumpanniji residenti fi Stat Membru ieħor jew f’pajjiż terz, il-Qorti tal-Ġustizzja fil-punt 173 ta’ din is-sentenza ddeċidiet li, fir-rigward tal-azzjonisti ta’ kumpanniji residenti li jirċievu dividendi ta’ oriġini barranija kklassifikati bħala FID, “l-Artikoli 43 KE u 56 KE jipprekludu leġiżlazzjoni ta’ Stat Membru li, filwaqt li teżenta mill-ħlas bil-quddiem tat-taxxa fuq il-kumpanniji l-kumpanniji residenti li jqassmu lill-azzjonisti tagħhom dividendi li joriġinaw minn dividendi ta’ oriġini nazzjonali li jkunu rċevew, tagħti lill-kumpanniji residenti li jqassmu lill-azzjonisti tagħhom dividendi li joriġinaw minn dividendi ta’ oriġini barranija li jkunu rċevew il-possibbiltà li jagħżlu sistema li tippermettilhom jirkupraw it-taxxa fuq il-kumpanniji mħallsa bil-quddiem, iżda, [...] ma tipprovdix kreditu ta’ taxxa għall-azzjonisti tagħhom, filwaqt li kienu jirċievu tali kreditu li kieku twettaq tqassim minn kumpannija residenti abbażi ta’ dividendi ta’ oriġini nazzjonali” (12)
.

49.      Fil-fehma tiegħi, mill-imsemmi punt ta’ din is-sentenza (13)
jirriżulta li l-Qorti tal-Ġustizzja qieset li l-azzjonisti li jibbenefikaw minn dividendi ta’ oriġini barranija kklassifikati bħala FID, bħall-fond għall-pensjoni f’dan il-każ, kienu leżi direttament mid-dispożizzjonijiet diskriminatorji (14)
tas-sistema FID u, b’mod iktar speċifiku, mill-assenza ta’ dritt għal kreditu ta’ taxxa (15)
.

4.      Sitwazzjoni purament interna?

50.      Minkejja dan it-trattament diskriminatorju ta’ dawn l-azzjonisti, li huwa prekluż mill-Artikoli 49 u 63 TFUE, il-Gvern tar-Renju Unit iqis li huma ma għandhom l-ebda dritt taħt l-Artikolu 63 TFUE.

51.      Fil-fatt, għalkemm il-Gvern tar-Renju Unit ma jikkontestax direttament il-punt 173 u l-punt 4 tad-dispożittiv tas-sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774), huwa jqis madankollu li l-akkwist ta’ azzjonijiet ta’ kumpannija stabbilita fi Stat Membru minn investitur li jirrisjedi fl-istess Stat Membru hija sitwazzjoni purament interna li ma taqax fil-kamp ta’ applikazzjoni tad-dritt tal-Unjoni (16)
. Konsegwentement, dan l-akkwist ma jkun jimplika l-ebda moviment tal-kapital fis-sens tal-Artikolu 63 TFUE u tali investitur ma jeżerċitax drittijiet mogħtija minn din id-dispożizzjoni.

52.      Barra minn hekk, min-nomenklatura li tinsab fl-Anness I tad-Direttiva tal-Kunsill 88/361/KEE, tal-24 ta’ Ġunju 1988, għall-implimentazzjoni tal-Artikolu 67 tat-Trattat (17)
, jirriżulta, b’mod partikolari, li l-element transkonfinali tat-tranżazzjonijiet elenkati f’dan l-anness jikkostitwixxi karatteristika essenzjali tal-klassifikazzjoni.

53.      Jien tal-fehma li għandu jiġi miċħud l-argument tal-Gvern tar-Renju Unit, li skontu l-kawża prinċipali, li tirrigwarda d-drittijiet tal-azzjonisti li jibbenefikaw minn tqassim minn kumpannija residenti ta’ dividendi li joriġinaw minn dividendi ta’ oriġini barranija kklassifikati bħala FID, tikkonċerna sitwazzjoni purament interna għal Stat Membru.

54.      Dan l-argument tal-Gvern tar-Renju Unit fil-fatt jidhirli li huwa bbażat fuq interpretazzjoni selettiva u formalista (18)
tas-sistema FID u taċ-ċirkustanzi fattwali inkwistjoni fil-kawża prinċipali. Dan il-Gvern jikkonċentra biss fuq aspett iżolat ta’ din is-sistema FID u ta’ dawn iċ-ċirkustanzi, jiġifieri l-fatt li l-kumpannija li tqassam u l-azzjonist jirrisjedu fl-istess Stat Membru, filwaqt li jinjora elementi oħra u b’mod partikolari l-għan u l-portata ekonomika ta’ din is-sistema (19)
. Fil-fatt, is-sistema FID u t-trattament żvantaġġuż tal-azzjonisti inkwistjoni għandhom jiġu evalwati fl-intier tagħhom u mhux b’mod frammentat u parzjali, bħalma għamel il-Gvern tar-Renju Unit.

55.      Is-sistema FID kienet ġiet adottata sabiex tippermetti lil kumpannija residenti li tirċievi dividendi minn kumpannija li ma hijiex residenti ttaffi l-effett tal-eċċessi tal-ACT. Madankollu, il-possibbiltà għall-kumpanniji li jagħżlu s-sistema FID kellha konsegwenzi diretti u sinjifikattivi, mhux biss għall-kumpanniji residenti li jqassmu d-dividendi li joriġinaw minn dividendi ta’ oriġini barranija kklassifikati bħala FID, iżda wkoll għall-azzjonisti benefiċjarji (20)
li kienu żvantaġġati mil-lat fiskali meta mqabbla mat-tqassim purament intern. Ikun biżżejjed li jitfakkar li l-Artikolu 246 C tal-ICTA kien jipprevedi b’mod espliċitu li l-Artikolu 231(1) tal-ICTA, u għalhekk id-dritt għal kreditu ta’ taxxa, ma kienx japplika meta t-tqassim inkwistjoni jkun jikkostitwixxi dividend ta’ dħul barrani.

56.      L-istess test tal-Artikolu 246 C tal-ICTA jindika b’mod ċar li l-kreditu ta’ taxxa huwa marbut man-natura nazzjonali jew barranija tad-dħul li jwassal għad-dividend.

57.      Huwa għalhekk inkontestabbli li s-sistema FID kienet intiża b’mod speċifiku għat-tqassim ta’ dividendi bejn l-Istati u li l-elementi rilevanti kollha ta’ din is-sistema ma kinux ristretti fi Stat Membru wieħed. Inqis, bħall-Kummissjoni, li l-azzjonisti inkwistjoni fil-kawża prinċipali kienu suġġetti għal diskriminazzjoni manifesta meta mqabbla mal-azzjonisti ta’ kumpanniji residenti li jirċievu dividendi ta’ oriġini nazzjonali.

58.      F’dan ir-rigward, is-sentenza tat-23 ta’ Frar 2006, Keller Holding (C-471/04, EU:C:2006:143), li tirrigwarda l-kompatibbiltà mal-libertà ta’ stabbiliment u l-moviment liberu tal-kapital ta’ leġiżlazzjoni nazzjonali li teskludi t-tnaqqis tal-ispejjeż ta’ finanzjament tal-ishma f’sussidjarja marbuta ma’ dividendi li ġejjin minn sussidjarja indiretta (21)
stabbilita fi Stat Membru ieħor, hija partikolarment informattiva.

59.      Il-Qorti tal-Ġustizzja f’din is-sentenza ċaħdet mill-bidu l-argument, b’mod partikolari tal-gvernijiet tal-Ġermanja u tar-Renju Unit, li skontu l-kawża kienet tikkonċerna sitwazzjoni purament interna għal Stat Membru b’tali mod li ma kienx hemm lok li jiġu interpretati d-dispożizzjonijiet tat-Trattat relatati mal-libertà ta’ stabbiliment jew mal-moviment liberu tal-kapital. Fil-fatt, il-Qorti tal-Ġustizzja ddeċidiet li, fil-każ fejn kumpannija parent li l-uffiċċju rreġistrat tagħha jkun fil-Ġermanja tikkontesta d-deċiżjoni tal-amministrazzjoni fiskali Ġermaniża li rrifjutatilha l-benefiċċju tat-tnaqqis tal-ispejjeż magħmula għall-finijiet ta’ akkwist ta’ ishma f’sussidjarja stabbilita wkoll fil-Ġermanja, minħabba r-rabta ekonomika diretta li allegatament teżisti bejn dawn u d-dividendi mħallsa minn sussidjarja indiretta stabbilita fl-Awstrija (22)
, il-leġiżlazzjoni li fuqha hija bbażata din id-deċiżjoni għandha titqies bħala li tapplika għal sitwazzjonijiet li għandhom rabta mal-kummerċ fl-Unjoni, u dan jista’ jwassal għall-applikazzjoni tad-dispożizzjonijiet tat-Trattat dwar il-libertajiet fundamentali (23)
.

60.      Barra minn hekk, fir-rigward tal-osservazzjoni tal-Gvern tar-Renju Unit ibbażata fuq in-nomenklatura li tikkostitwixxi l-Anness I tad-Direttiva 88/361, din ukoll għandha tiġi miċħuda peress li huwa ċar li hemm element barrani fit-tranżazzjonijiet finanzjarji inkwistjoni.

61.      Minn dan jirriżulta li l-Artikolu 63 TFUE effettivament jagħti drittijiet lil azzjonist li jibbenefika minn dividendi kklassifikati bħala FID, minkejja l-fatt li dan l-azzjonist jirrisjedi fl-istess Stat Membru bħall-kumpannija li tqassam, u li dan jista’ jinvokah quddiem il-qrati.

5.      Fuq il-ġustifikazzjoni

62.      Għadu jrid jiġi stabbilit jekk l-inugwaljanza fit-trattament li tinvolvi s-sistema FID tistax tiġi ġġustifikata fid-dawl tad-dispożizzjonijiet tat-Trattat FUE dwar il-moviment liberu tal-kapital.

63.      Fil-każ li l-Qorti tal-Ġustizzja tiċħad l-argument tiegħu li d-dritt tal-Unjoni ma japplikax, il-Gvern tar-Renju Unit iqis li jekk jingħad li, minn naħa, l-azzjonist ikun kellu drittijiet rilevanti taħt id-dritt tal-Unjoni u, min-naħa l-oħra, l-assenza ta’ kreditu ta’ taxxa li jkollha titħallas fuq dividend ta’ oriġini barranija kklassifikat bħala FID imqassam lil azzjonist eżentat mit-taxxa rrestrinġiet dawn id-drittijiet, din ir-restrizzjoni tad-drittijiet tal-azzjonist tkun iġġustifikata mill-koeżjoni tas-sistema fiskali.

64.      Skont dan il-Gvern, fil-kuntest tas-sistema ta’ imputazzjoni li kienet fis-seħħ fir-Renju Unit, kienet teżisti rabta diretta bejn il-vantaġġ fiskali mogħti lill-azzjonist, jiġifieri l-kreditu ta’ taxxa fuq dividend, u l-ACT imħallsa mill-kumpannija minħabba dan id-dividend. Dan il-Gvern jinnota li, skont il-loġika ta’ din is-sistema, peress li l-ACT imħallsa fuq dividend ta’ oriġini barranija kklassifikat bħala FID kienet rimborsabbli lill-kumpannija, il-kreditu ta’ taxxa kien irrifjutat lill-azzjonist.

65.      Fil-fehma tiegħi, il-ġustifikazzjoni invokata mill-Gvern tar-Renju Unit ma tistax tiġi aċċettata.

66.      Din hija biss repetizzjoni tal-argumenti analogi diġà invokati minn dan il-Gvern, u li ġew miċħuda mill-Qorti tal-Ġustizzja, fil-kawża li wasslet għas-sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774).

67.      Mill-punti 93 u 163 tal-imsemmija sentenza jirriżulta b’mod ċar li l-Qorti tal-Ġustizzja ddeċidiet li l-inugwaljanza fit-trattament ikkonstatata fir-rigward tad-dispożizzjonijiet tat-Trattat FUE dwar il-libertà ta’ stabbiliment u l-moviment liberu tal-kapital ma kinitx iġġustifikata min-neċessità li tinżamm il-koerenza tas-sistema fiskali tar-Renju Unit.

68.      Għandu jiġi nnotat li mill-punt 173 tas-sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774), jirriżulta li l-inugwaljanza fit-trattament inkwistjoni kienet tirrigwarda b’mod partikolari l-assenza ta’ kreditu ta’ taxxa għal azzjonist li jirċievi dividendi ta’ oriġini barranija kklassifikati bħala FID. Din hija l-istess sitwazzjoni bħal dik inkwistjoni f’din il-kawża.

69.      Barra minn hekk, f’din is-sentenza, il-Qorti tal-Ġustizzja ċaħdet l-argument tal-Gvern tar-Renju Unit li skontu kreditu ta’ taxxa jingħata lil azzjonist li jibbenefika minn tqassim biss meta tkun teżisti taxxa doppja ekonomika tal-profitti mqassma li għandha tiġi evitata jew imnaqqsa (24)
. Il-Qorti tal-Ġustizzja ddeċidiet li “[r]-riskju [ta’ taxxa doppja kien] jeżisti [...] fil-każ ta’ dividendi mħallsa minn kumpannija li ma hijiex residenti, li l-profitti tagħha huma suġġetti wkoll, fl-Istat fejn tirrisjedi, għat-taxxa fuq il-kumpanniji, skond ir-rata u r-regoli li japplikaw hemmhekk” (25)
.

B –    Fuq it-tieni domanda preliminari

70.      It-tieni domanda magħmula mill-qorti tar-rinviju teżiġi risposta biss jekk l-azzjonist li jibbenefika minn dividendi ta’ oriġini barranija kklassifikati bħala FID ma setax jinvoka huwa nnifsu drittijiet li jirriżultaw mill-Artikolu 63 TFUE.

71.      Fid-dawl tar-risposta tiegħi għall-ewwel domanda magħmula mill-qorti tar-rinviju, inqis li ma hemmx lok li tingħata risposta għat-tieni domanda.

C –    Fuq it-tielet u r-raba’ domandi preliminari

72.      Permezz tat-tielet u r-raba’ domandi tagħha, il-qorti tar-rinviju tistaqsi lill-Qorti tal-Ġustizzja, essenzjalment, dwar il-konsegwenzi li l-awtoritajiet ġudizzjarji ta’ Stat Membru għandhom jisiltu mill-konstatazzjoni tal-inkompatibbiltà mad-dritt tal-Unjoni ta’ dispożizzjonijiet tad-dritt intern u, b’mod iktar partikolari, ir-rimedji ġudizzjarji li dawn għandhom joffru lill-azzjonisti li jibbenefikaw minn dividend ta’ oriġini barranija kklassifikati bħala FID (it-tielet domanda) u l-eventwali effett jew le ta’ ċerti ċirkustanzi (ir-raba’ domanda).

1.      Il-konsegwenzi li għandhom jirriżultaw mill-konstatazzjoni tal-inkompatibbiltà mad-dritt tal-Unjoni ta’ ċerti dispożizzjonijiet nazzjonali

73.      Skont il-prinċipju ta’ kooperazzjoni leali stabbilit fl-Artikolu 4(3) TUE, huma l-qrati tal-Istati Membri li għandhom jiżguraw il-protezzjoni ġudizzjarja tad-drittijiet li l-individwi għandhom taħt id-dritt tal-Unjoni. Barra minn hekk, l-Artikolu 19(1) TUE jobbliga lill-Istati Membri jipprevedu r-rimedji ġudizzjarji meħtieġa sabiex jiżguraw protezzjoni ġudizzjarja effettiva fl-oqsma koperti mid-dritt tal-Unjoni (26)
.

74.      It-Trustees iqisu li rikors effettiv għandu jwassal għall-ħlas lura tal-benefiċċju ekonomiku miksub mill-Istat Membru mill-ksur tal-Artikolu 63 TFUE, inkella l-ksur ta’ dan l-artikolu jitkompla. Huma jqisu li dan jirrigwarda dritt għar-rimbors li, f’konformità mal-prinċipji stabbiliti mis-sentenzi tad-9 ta’ Novembru 1983, San Giorgio (199/82, EU:C:1983:318) u tat-8 ta’ Marzu 2001, Metallgesellschaft et (C-397/98 u C-410/98, EU:C:2001:134), huwa l-konsegwenza u jikkomplementa d-drittijiet mogħtija permezz tad-dispożizzjonijiet tal-Unjoni kif interpretati mill-Qorti tal-Ġustizzja.

75.      Skont it-Trustees, ma jeżisti l-ebda prinċipju ġuridiku li skontu r-rimbors mogħti minn Stat Membru huwa limitat għall-ammont tat-taxxi li jkun talab mingħand il-persuna kkonċernata. Huma jqisu li l-azzjonisti għandhom dritt għar-rimbors tas-somom li kienu jingħatawlhom li kieku s-sistema fiskali nazzjonali kienet irrispettat id-dritt tal-Unjoni u li l-Istat Membru ma ħallasx, u għalhekk ibbenefika mis-somom miżmuma. Rimedju effettiv ma jeżiġix biss il-pagament tas-somom inkwistjoni, iżda wkoll il-pagament tal-interessi li jirriżultaw mill-indisponibbiltà preċedenti ta’ dawn is-somom għall-azzjonisti.

76.      Il-Gvern tar-Renju Unit iqis li għalkemm, skont id-dritt tal-Unjoni, Stat Membru huwa obbligat jirrimborsa t-taxxi rċevuti bi ksur ta’ dan id-dritt, dan il-prinċipju ma japplikax għat-Trustees. Skont dan il-gvern, it-Trustees kienu, skont id-dritt nazzjonali, eżentati mit-taxxa fuq id-dħul li jirriżulta mid-dividendi u, konsegwentement, ma kienu suġġetti għall-ebda taxxa u ma kienu ħallsu l-ebda taxxa fuq l-FID li rċevew.

77.      Ninnota li, fl-assenza ta’ leġiżlazzjoni tal-Unjoni dwar is-suġġett, ma hijiex il-Qorti tal-Ġustizzja li għandha tiddetermina liema rimedji ġudizzjarji jistgħu jintużaw mill-azzjonisti li jibbenefikaw minn dividendi ta’ oriġini barranija kklassifikati bħala FID u lanqas f’liema kundizzjonijiet jistgħu jintużaw (27)
.

78.      Fil-fatt, huwa l-kompitu tal-ordinament ġuridiku nazzjonali ta’ kull Stat Membru li jaħtar il-qrati kompetenti u li jirregola l-modalitajiet proċedurali għal azzjonijiet ġudizzjarji li huma intiżi sabiex jiżguraw il-protezzjoni ta’ drittijiet li l-individwi jinvokaw taħt id-dritt tal-Unjoni, sakemm tali modalitajiet ma jkunux inqas favorevoli minn dawk applikabbli għal azzjonijiet simili bbażati fuq id-dritt intern (prinċipju ta’ ekwivalenza) u sakemm ma jirrendux prattikament impossibbli jew eċċessivament diffiċli l-eżerċizzju tad-drittijiet li jirriżultaw mill-ordinament ġuridiku tal-Unjoni (prinċipju ta’ effettività) (28)
.

a)      L-irkupru ta’ ammonti mħallsa indebitament

79.      Għall-kuntrarju ta’ dak li jsostnu t-Trustees, jien ma nqisx li l-fond għall-pensjoni għandu dritt għal irkupru ta’ ammonti mħallsa indebitament f’konformità mal-prinċipji stabbiliti mis-sentenzi tad-9 ta’ Novembru 1983, San Giorgio (199/82, EU:C:1983:318), u tat-8 ta’ Marzu 2001, Metallgesellschaft et (C-397/98 u C-410/98, EU:C:2001:134).

80.      Id-dritt li jingħata r-rimbors ta’ taxxi miġbura minn Stat Membru bi ksur tar-regoli tad-dritt tal-Unjoni jirriżulta minn u jikkomplementa d-drittijiet mogħtija lill-individwi permezz tad-dispożizzjonijiet tad-dritt tal-Unjoni li jipprojbixxu tali taxxi. Għaldaqstant, l-Istat Membru huwa obbligat, fil-prinċipju, li jirrimborsa t-taxxi miġbura bi ksur tad-dritt tal-Unjoni. B’eċċezzjoni mill-prinċipju tar-rimbors ta’ taxxi inkompatibbli mad-dritt tal-Unjoni, il-ħlas lura ta’ taxxa miġbura indebitament jista’ jiġi rrifjutat biss meta dan iwassal għal arrikkiment indebitu tal-aventi kawża, jiġifieri meta jiġi stabbilit li l-persuna responsabbli li tħallas dawn id-dazji tkun effettivament għaddiethom direttament fuq, b’mod partikolari, ix-xerrej ta’ oġġett. Fil-fatt, id-dritt għall-irkupru ta’ ammonti mħallsa indebitament huwa intiż sabiex jirrimedja l-konsegwenzi tal-inkompatibbiltà tat-taxxa mad-dritt tal-Unjoni billi jinnewtralizza l-piż ekonomiku li hija indebitament imponiet fuq l-operatur li, definittivament, effettivament sostnih (29)
.

81.      Madankollu, huwa importanti li jitfakkar li, peress li l-fond għall-pensjoni huwa fond għall-pensjoni awtorizzat, it-Trustees ma ħallsu l-ebda taxxa, b’mod partikolari fuq id-dividendi ta’ oriġini barranija kklassifikati bħala FID li huma rċevew.

82.      Minn dan jirriżulta li, fl-assenza ta’ taxxi effettivament imħallsa mit-Trustees, inqis li dawn ma għandhomx dritt għal irkupru ta’ ammonti mħallsa indebitament f’konformità mal-prinċipji stabbiliti b’mod partikolari mis-sentenzi tad-9 ta’ Novembru 1983, San Giorgio (199/82, EU:C:1983:318), u tat-8 ta’ Marzu 2001, Metallgesellschaft et (C-397/98 u C-410/98, EU:C:2001:134).

b)      Il-prinċipju ta’ supremazija

83.      Dan ifisser li l-azzjonisti li jibbenefikaw minn dividendi ta’ oriġini barranija kklassifikati bħala FID bħat-Trustees ma għandhomx rimedji oħra? Fil-fehma tiegħi, dan ma huwiex il-każ.

84.      Qabelxejn, għandu jitfakkar li, skont il-prinċipju ta’ supremazija tad-dritt tal-Unjoni, id-dispożizzjonijiet tat-Trattati u l-atti tal-istituzzjonijiet direttament applikabbli għandhom l-effett, fir-relazzjonijiet tagħhom mad-dritt intern tal-Istati Membri, li jirrendu ipso jure inapplikabbli, mill-fatt innifsu tad-dħul fis-seħħ tagħhom, kull dispożizzjoni kuntrarja tal-leġiżlazzjoni nazzjonali (30)
.

85.      Hekk kif jirriżulta minn ġurisprudenza stabbilita, f’sitwazzjoni ta’ inkompatibbiltà ta’ regola tad-dritt nazzjonali mad-dritt tal-Unjoni li huwa direttament applikabbli, il-qorti nazzjonali għandha twarrab l-applikazzjoni ta’ din ir-regola nazzjonali, u tapplika, fost id-diversi proċeduri tal-ordinament ġuridiku nazzjonali, dawk li huma xierqa sabiex jipproteġu d-drittijiet individwali mogħtija mid-dritt tal-Unjoni (31)
.

86.      Il-prinċipju ta’ supremazija jobbliga lill-Istati Membri jadottaw il-miżuri neċessarji sabiex kull persuna vittma ta’ diskriminazzjoni pprojbita b’mod partikolari mill-Artikolu 63 TFUE tkun tista’ tikseb il-pagament tas-somom kollha li hija kien ikollha dritt għalihom fl-assenza ta’ tali diskriminazzjoni. Fil-fatt, sabiex tinżamm l-effettività ta’ dan l-artikolu u sabiex tiġi żgurata protezzjoni ġudizzjarja effettiva lill-azzjonisti li jibbenefikaw minn dividendi ta’ oriġini barranija kklassifikati bħala FID, huwa neċessarju li huma jitqiegħdu, sa fejn huwa possibbli, filwaqt li jiġu osservati l-prinċipji ta’ ekwivalenza u ta’ effettività, fil-pożizzjoni li kienu jkunu fiha kieku ma kinux ġew suġġetti għal diskriminazzjoni mid-dispożizzjonijiet nazzjonali inkwistjoni.

87.      F’dan il-każ, inqis li l-applikazzjoni tal-prinċipju ta’ supremazija jimplika li t-Trustees li għandhom dritt għal kreditu ta’ taxxa għandhom ukoll dritt għall-ħlas ta’ dan il-kreditu ta’ taxxa fuq il-bażi tal-Artikolu 231(3) tal-ICTA, kif ukoll għall-ħlas tal-interessi fuq dan l-ammont li jirrifletti t-telf ikkostitwit mill-indisponibbiltà tiegħu (32)
, peress li l-Artikolu 246 C tal-ICTA tneħħa.

2.      L-eventwali effett ta’ ċerti ċirkustanzi

a)      Iċ-ċirkustanza li l-azzjonist ikun eżentat mit-taxxa

88.      Il-fatt li, fl-Istat ta’ residenza tiegħu, l-azzjonist ma huwiex (33)
suġġett għat-taxxa fuq id-dividendi li jirċievi hemmhekk b’tali mod li, fil-każ ta’ tqassim minn kumpannija residenti barra mis-sistema FID, il-kreditu ta’ taxxa li għandu dritt għalih bis-saħħa tal-leġiżlazzjoni nazzjonali jkun jista’ jagħti lok għall-ħlas tal-imsemmi kreditu lill-azzjonist mill-Istat Membru, ma għandu l-ebda effett (34)
. L-osservanza tal-Artikolu 63 TFUE timplika sempliċiment l-applikazzjoni tal-istess regola fil-kuntest tas-sistema FID, fi kliem ieħor li l-fond għall-pensjoni jitqiegħed fl-istess sitwazzjoni bħas-sistemi ta’ pensjoni eżentati awtorizzati li kellhom dritt, lil hinn mis-sistema FID, għal ħlas tal-ammont tal-kreditu ta’ taxxa (35)
bl-applikazzjoni tal-Artikolu 231(3) tal-ICTA.

b)      Iċ-ċirkustanza li l-qorti nazzjonali kkonkludiet li ma kienx hemm ksur suffiċjentement serju tad-dritt tal-Unjoni mill-Istat Membru f’konformità mal-prinċipji stabbiliti fis-sentenza tal-5 ta’ Marzu 1996, Brasserie du pêcheur u Factortame (C-46/93 u C-48/93, EU:C:1996:79).

89.      F’dan il-każ, l-azzjoni għad-danni inkwistjoni nbdiet mill-kumpannija li tqassam id-dividendi.

90.      Peress li l-azzjonisti li jibbenefikaw minn tqassim minn kumpannija residenti ta’ dividendi ta’ oriġini barranija kklassifikati bħala FID, bħall-fond għall-pensjoni f’dan il-każ, ġew leżi direttament mid-dispożizzjonijiet diskriminatorji tas-sistema FID u, b’mod iktar speċifiku min-nuqqas ta’ rispett tad-dritt tagħhom għal kreditu ta’ taxxa, u peress li l-Artikolu 63 TFUE jagħtihom drittijiet li huma jistgħu jinvokaw quddiem il-qrati, iċ-ċirkustanza nnotata mill-qorti tar-rinviju ma jista’ jkollha l-ebda effett fuq id-drittijiet tal-azzjonisti, indipendentement mill-eventwali drittijiet mogħtija lill-kumpanniji li jqassmu (36)
.

91.      Id-drittijiet mogħtija lill-azzjonisti inkwistjoni mill-Artikolu 63 TFUE huma indipendenti minn dawk mogħtija lill-kumpanniji li jqassmu d-dividendi.

c)      Iċ-ċirkustanza tal-eventwali żieda tas-somom imqassma

92.      Il-qorti tar-rinviju tistaqsi jekk il-fatt li, f’ċerti każijiet biss, il-kumpannija li tqassam id-dividendi taħt is-sistema FID setgħet żiedet l-ammont tat-tqassim tagħha lill-azzjonisti kollha b’tali mod li tħallas somma fi flus kontanti ekwivalenti għal dik li jkun kiseb azzjonist eżentat waqt il-ħlas ta’ dividendi lil hinn minn din is-sistema, jistax ikollu effett (37)
.

93.      Għandu jiġi nnotat li skont il-qorti tar-rinviju “[f]il-proċeduri li huma s-suġġett ta’ din it-talba, l-ebda element probatorju ma jistabbilixxi li d-dividendi fir-realtà żdiedu, lanqas, jekk huwa l-każ, l-ammont ta’ din iż-żieda, u lanqas jekk din kinitx tassew ta’ vantaġġ għall-azzjonisti jew ta’ piż għall-kumpanniji” (38)
.

94.      Fid-dawl ta’ dawn l-elementi inqis li d-domanda magħmula mill-qorti tar-rinviju hija impreċiża ħafna, jew saħansitra ipotetika.

95.      Fi kwalunkwe każ, għandu jiġi ppreċiżat għal darba oħra li l-konstatazzjoni ta’ trattament diskriminatorju tal-azzjonisti fil-punt 173 tas-sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774) tapplika irrispettivament mill-miżuri korrettivi li jistgħu jittieħdu eventwalment favur l-azzjonisti tagħhom mill-kumpanniji residenti li jqassmu dividendi ta’ oriġini barranija kklassifikati bħala FID. Il-Qorti tal-Ġustizzja fil-fatt ma rabtet l-ebda konsegwenza maċ-ċirkustanza li hija tinnota fil-punt 149 tas-sentenza tagħha, jiġifieri li kumpannija li tkun għażlet is-sistema FID twasslet biex “iżżid l-ammont tat-tqassim tagħha [biex] tiggarantixxi lill-azzjonisti tagħha dħul ekwivalenti għal dak li jirriżulta minn tqassim ta’ dividendi ta’ oriġini nazzjonali”.

VI – Konklużjoni

96.      Fid-dawl tal-kunsiderazzjonijiet preċedenti, nipproponi li l-Qorti tal-Ġustizzja tirrispondi għad-domandi preliminari magħmula mill-Court of Appeal (England & Wales) (Civil Division) [qorti tal-appell (l-Ingilterra u Wales) (diviżjoni ċivili)] kif ġej:

1)L-Artikolu 63 TFUE jagħti drittijiet lil azzjonist li jibbenefika minn dividendi ta’ oriġini barranija kklassifikati bħala FID li huwa jista’ jinvoka quddiem il-qrati.

2)Il-prinċipju ta’ supremazija jobbliga lill-Istati Membri jadottaw il-miżuri neċessarji sabiex kull persuna vittma ta’ diskriminazzjoni pprojbita, b’mod partikolari, mill-Artikolu 63 TFUE tkun tista’ tikseb il-pagament tas-somom kollha li hija kien ikollha dritt għalihom fl-assenza ta’ tali diskriminazzjoni. Sabiex tinżamm l-effettività tal-Artikolu 63 TFUE u sabiex tiġi żgurata protezzjoni ġudizzjarja effettiva lill-azzjonisti li jibbenefikaw minn dividendi ta’ oriġini barranija kklassifikati bħala FID, huwa neċessarju li huma jitqiegħdu, sa fejn huwa possibbli, filwaqt li jiġu osservati l-prinċipji ta’ ekwivalenza u ta’ effettività, fil-pożizzjoni li kienu jkunu fiha kieku ma kinux ġew suġġetti għal diskriminazzjoni mid-dispożizzjonijiet nazzjonali inkwistjoni.

3)Ma għandhomx effett:

–        il-fatt li, fl-Istat ta’ residenza tiegħu, l-azzjonist ma jkunx suġġett għat-taxxa fuq id-dividendi li huwa jirċievi hemmhekk b’tali mod li, fil-każ ta’ tqassim minn kumpannija residenti lil hinn mis-sistema FID, il-kreditu ta’ taxxa li għandu dritt għalih taħt il-leġiżlazzjoni nazzjonali jista’ jagħti lok għall-ħlas tal-imsemmi kreditu lill-azzjonist mill-Istat Membru;

–        il-fatt li l-qorti nazzjonali tqis li l-ksur tad-dritt tal-Unjoni mil-leġiżlazzjoni nazzjonali inkwistjoni ma huwiex suffiċjentement serju sabiex l-Istat Membru jiġi obbligat jikkumpensa d-danni favur il-kumpannija li tqassam id-dividendi, skont il-prinċipji stabbiliti fis-sentenza tal-5 ta’ Marzu 1996, Brasserie du pêcheur u Factortame (C-46/93 u C-48/93, EU:C:1996:79), peress li d-drittijiet mogħtija lill-azzjonisti inkwistjoni mill-Artikolu 63 TFUE huma indipendenti minn dawk mogħtija lill-kumpanniji li jqassmu d-dividendi;

–        il-fatt li l-kumpannija li tqassam id-dividendi taħt is-sistema msemmija iktar ’il fuq setgħet żiedet l-ammont tat-tqassim tagħha lill-azzjonisti kollha b’tali mod li tħallas somma fi flus kontanti ekwivalenti għal dik li jkun kiseb azzjonist waqt il-ħlas ta’ dividendi lil hinn mis-sistema FID.

1 –      Lingwa oriġinali: il-Franċiż.

2 –      Fis-sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774, punt 148), il-Qorti tal-Ġustizzja tkellmet dwar “l-azzjonist li jibbenefika minn tqassim ta’ dividendi minn kumpannija residenti abbażi ta’ dividendi ta’ oriġini barranija kklassifikati bħala FID”.

3 –      Li ser jiġu kklassifikati f’dawn il-konklużjonijiet bħala “dividendi ta’ oriġini barranija kklassifikati bħala FID”.

4 –      L-Artikolu 231(1) tal-ICTA kien jipprevedi li “[m]eta kumpannija residenti fir-Renju Unit twettaq tqassim suġġett għall-ACT u l-persuna li tirċievi t-tqassim hija kumpannija oħra residenti fir-Renju Unit jew persuna residenti fir-Renju Unit li ma hijiex kumpannija, il-benefiċjarju tat-tqassim għandu dritt għal kreditu ta’ taxxa ekwivalenti għall-proporzjon tal-ammont jew tal-valur tat-tqassim li jikkorrispondi għar-rata tal-ACT fis-seħħ għas-sena finanzjarja li matulha jkun twettaq it-tqassim”.

5 –Ara l-punti 23 sa 29 ta’ dawn il-konklużjonijiet.

6 –      Ara l-Artikolu 592(2) tal-ICTA, kif ukoll il-punt 15 ta’ dawn il-konklużjonijiet.

7 –      Ara wkoll, is-sentenza tal-15 ta’ Settembru 2011, Accor (C-310/09, EU:C:2011:581, punti 30 sa 32).

8 –      Sentenza tat-13 ta’ Novembru 2012, Test Claimants in the FII Group Litigation (C-35/11, EU:C:2012:707, punt 94 u l-ġurisprudenza ċċitata).

9 –      Fis-sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774, punt 148), il-Qorti tal-Ġustizzja użat l-espressjoni “tqassim ta’ dividendi minn kumpannija residenti abbażi ta’ dividendi ta’ oriġini barranija kklassifikati bħala FID”.

10 –      Ara s-sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774, punt 145). Enfasi miżjuda minni.

11 –      Sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774, punti 148 u 149).

12 –      Enfasi miżjuda minni.

13 –      Ara, ukoll, il-punt 4 tad-dispożittiv tal-imsemmija sentenza.

14 –      Ninnota li ma huwiex ikkontestat li l-azzjonisti li jirċievu dividendi ta’ oriġini barranija kklassifikati bħala FID kienu f’sitwazzjoni komparabbli għall-azzjonisti li jirċievu dividendi ta’ oriġini nazzjonali.

15 –      Fil-fatt, skont il-qorti tar-rinviju, fir-“rigward tad-dividendi mqassma mingħajr l-applikazzjoni tas-sistema FID, il-pagament ta’ krediti ta’ taxxa jiżgura li r-Renju Unit jikkompleta l-ammont tad-dividend irċevut mill-fond għall-pensjoni. Kwota tat-taxxa fuq il-kumpanniji li kienet tħallset mill-kumpannija residenti fir-Renju Unit (jew mis-sussidjarji residenti tagħhom) kienet fil-fatt għalhekk irrimborsata fil-fond għall-pensjoni azzjonist”. Il-qorti tar-rinviju tinnota li “dividend ta’ 80 kien iwassal għal kreditu ta’ taxxa ta’ 20, li kien iwassal għal dħul totali ta’ 100 għall-fond għall-pensjoni”.

16 –      Il-Gvern tar-Renju Unit jibbaża ruħu, f’dan ir-rigward, fuq is-sentenza tas-16 ta’ Lulju 1998, ICI (C-264/96, EU:C:1998:370, punt 34). Skont il-Gvern tar-Renju Unit “moviment tal-kapital fis-sens tal-Artikolu 63 TFUE jippreżumi [...] l-akkwist ta’ titoli barranin u mhux ta’ titoli nazzjonali. Għaldaqstant, l-akkwist ta’ ishma nazzjonali minn azzjonist residenti ma jikkostitwixxix moviment tal-kapital fis-sens tal-Artikolu 63 TFUE”. Inqis li l-imsemmija sentenza ċċitata mill-Gvern tar-Renju Unit ma hijiex rilevanti f’dan il-każ. Fil-punt 33 tagħha, il-Qorti tal-Ġustizzja ddikjarat ġustament li l-Artikoli 49 u 54 TFUE dwar il-libertà ta’ stabbiliment “ma jipprekludux leġiżlazzjoni nazzjonali li tirrifjuta li tagħti t-tnaqqis lil kumpannija ta’ konsorzju residenti meta l-attività tal-kumpannija holding miżmuma mill-konsorzju tikkonsisti biss jew prinċipalment fiż-żamma ta’ partijiet fis-sussidjarji li għandhom is-sede tagħhom f’pajjiż terz. [...]”. Għandu jiġi nnotat li għalkemm il-Qorti tal-Ġustizzja fil-punt 34 iddeċidiet li l-kawża kienet tikkonċerna sitwazzjoni barranija għall-kamp ta’ applikazzjoni tad-dritt tal-Unjoni, jiġifieri l-libertà ta’ stabbiliment, din ma ħadet l-ebda pożizzjoni dwar jekk din tirrigwardax sitwazzjoni purament interna, u lanqas dwar il-moviment liberu tal-kapital.

17 –      ĠU Edizzjoni Speċjali bil-Malti, Kapitolu 10, Vol. 1, p. 10.

18 –      Interpretazzjoni li ma tiħux inkunsiderazzjoni “r-realtà ekonomika”, bħalma qalet il-Kummissjoni waqt is-seduta.

19 –      Jien naqbel mal-osservazzjonijiet tat-Trustees li skonthom “is-sistema FID toħloq rabta espliċita bejn il-profitti tal-kumpanniji barranin u t-trattament fiskali tal-azzjonisti bħall-[fond għall-pensjoni]: id-dividendi assoċjati ma’ dħul li joriġina minn profitti magħmula minn kumpanniji barranin biss kienu kklassifikati bħala FID li wasslu għat-tnaqqis mitlub mill-kumpanniji fir-rigward tal-eċċess ta’ ACT”. “FID jippreżumi neċessarjament element barrani. Mid-definizzjoni stess, l-FID jirrappreżentaw it-tqassim mill-ġdid tad-dħul li l-kumpannija parent li tirrisjedi fir-Renju Unit kisbet minn sussidjarji barranin”.

20 –      Ara l-punti 148 u 173 tas-sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774).

21 –      Keller Holding (il-kumpannija parent), billi kellha l-uffiċċju rreġistrat tagħha u s-sede tat-tmexxija tagħha fit-territorju Ġermaniż, kellha bħala membru uniku, b’mod partikolari, l-ishma ta’ kumpannija oħra stabbilita fil-Ġermanja, Keller Grundbau GmbH. Min-naħa tagħha, din tal-aħħar kellha l-ishma kollha ta’ kumpannija stabbilita fl-Awstrija, Keller Grundbau GmbH Wien (is-sussidjarja indiretta/sottosussidjarja).

22 –      Ara, f’dan is-sens, is-sentenza tat-23 ta’ Frar 2006, Keller Holding (C-471/04, EU:C:2006:143, punt 23). Ara, ukoll, b’analoġija, is-sentenza tal-10 ta’ Marzu 2005, Laboratoires Fournier (C-39/04, EU:C:2005:161) fejn il-Qorti tal-Ġustizzja ddeċidiet li dispożizzjonijiet nazzjonali li kienu jirriżervaw il-benefiċċju ta’ kreditu ta’ taxxa għar-riċerka għal dawk l-attivitajiet ta’ riċerka mwettqa fl-Istat Membru inkwistjoni biss kienu kuntrarji għall-Artikolu 59 TFUE. Skont il-punt 11 tal-konklużjonijiet li l-Avukat Ġenerali Jacobs ippreżenta fil-kawża Laboratoires Fournier (C-39/04, EU:C:2004:789, punt 11), “[d]awn ir-regoli jittrattaw kumpannija residenti li aċċettat is-servizzi pprovduti mit-territorju ta’ l-Istat Membru in kwistjoni b’mod aktar favorevoli minn kumpannija residenti li aċċettat servizzi pprovduti mit-territorju ta’ Stat Membru ieħor. Għalhekk, għalkemm b’mod indirett, dawn huma bbażati fuq il-post ta’ l-istabbiliment ta’ min jipprovdi s-servizzi u konsegwentement jistgħu jfixxklu l-attivitajiet trans fruntaljieri tagħha; konsegwentement dawn huma f’kunflitt manifest ma’ l-Artikolu [59 TFUE]”. (enfażi miżjuda minni). Ara, ukoll, is-sentenza tat-12 ta’ April 1994, Halliburton Services (C-1/93, EU:C:1994:127, punt 20) fejn il-Qorti tal-Ġustizzja ddeċidiet li differenza fit-trattament li għandha portata indiretta fuq is-sitwazzjoni tal-kumpanniji kkostitwiti skont id-dritt ta’ Stati Membri oħra kienet tikkostitwixxi diskriminazzjoni minħabba n-nazzjonalità, ipprojbita mill-Artikolu 49 TFUE.

23 –      Ara s-sentenza tat-23 ta’ Frar 2006, Keller Holding (C-471/04, EU:C:2006:143, punt 24).

24 –      Madankollu, skont dan il-Gvern, “ma kinitx teżisti taxxa doppja ekonomika fir-rigward tas-sistema FID sa fejn, minn naħa, ma kienet titħallas l-ebda ACT fuq id-dividendi ta’ oriġini barranija u, min-naħa l-oħra, l-ACT, li l-kumpannija residenti li tibbenefika mill-imsemmija dividendi għandha tħallas meta tqassam lill-azzjonisti tagħha, imbagħad tiġi rrimborsata”. Ara, ukoll, f’dan is-sens, is-sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774, punt 158).

25 –      Ara s-sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774, punt 159).

26 –      Sentenza tad-19 ta’ Novembru 2014, ClientEarth (C-404/13, EU:C:2014:2382, punt 52 u l-ġurisprudenza ċċitata). Ara, ukoll, il-punt 81 tal-konklużjonijiet li l-Avukat Ġenerali Mengozzi ppreżenta fil-kawża Texdata Software (C-418/11, EU:C:2013:50); u l-punt 37 tal-konklużjonijiet li l-Avukat Ġenerali Sharpston ippreżenta fil-kawżi magħquda Star Storage et (C-439/14 u C-488/14, EU:C:2016:307); ara, ukoll, in-nota ta’ qiegħ il-paġna 32 ta’ dawn il-konklużjonijiet tal-aħħar, fejn E. Sharpston tinnota li “[s]a fejn japplika għall-Istati Membri, l-Artikolu 47 tal-Karta jixbah it-tieni subparagrafu tal-Artikolu 19(1) TUE u jippreċiża l-prinċipju ta’ kooperazzjoni leali stabbilit fl-Artikolu 4(3) TUE [...]”.

27 –      Ara, b’analoġija, is-sentenza tat-12 ta’ Diċembru 2006, Test Claimants in the FII Group Litigation (C-446/04, EU:C:2006:774, punt 201).

28 –      Sentenza tad-19 ta’ Mejju 2011, Iaia et (C-452/09, EU:C:2011:323, punt 16 u l-ġurisprudenza ċċitata).

29 –      Sentenza tal-20 ta’ Ottubru 2011, Danfoss u Sauer-Danfoss (C-94/10, EU:C:2011:674, punti 20, 21 u 23).

30 –      Sentenza tal-4 ta’ Frar 2016, Ince (C-336/14, EU:C:2016:72, punt 52).

31 –      Ara, f’dan is-sens, is-sentenza tad-19 ta’ Lulju 2012, Littlewoods Retail et (C-591/10, EU:C:2012:478, punt 33 u l-ġurisprudenza ċċitata).

32 –      Ara, b’analoġija, is-sentenza tad-19 ta’ Lulju 2012, Littlewoods Retail et (C-591/10, EU:C:2012:478, punti 25 u 33).

33 –      Jiġifieri, f’dan il-każ, fir-Renju Unit.

34 –Ara r-raba’ domanda preliminari, parti (a), magħmula mill-qorti tar-rinviju.

35 –      Ara, b’analoġija, il-punt 49 tas-sentenza tas-7 ta’ Settembru 2004, Manninen (C-319/02, EU:C:2004:484) fejn il-Qorti tal-Ġustizzja qalet ġustament li “l-għoti ta’ kreditu fiskali taħt it-taxxa fuq il-kumpanniji dovuta fi Stat Membru ieħor jinvolvi, għar-Repubblika tal-Finlandja, tnaqqis fid-dħul fiskali tagħha fir-rigward tad-dividendi mħallsa minn kumpanniji stabbiliti fi Stati Membri oħra [...] [li] m’għandux jitqies bħala raġuni imperattiva ta’ interess ġenerali li tista’ tiġi invokata sabiex tiġġustifika miżura li tmur kontra liberta fundamentali[...]”.

36 –Ara r-raba’ domanda preliminari, parti (b), magħmula mill-qorti tar-rinviju.

37 –Ara r-raba’ domanda preliminari, parti (c), magħmula mill-qorti tar-rinviju.

38 –Ara s-sentenza The BT Pension Scheme (Trustees of) vs HM Revenue and Customs, [2015], EWCA Civ 713, punt 22. Skont il-Court of Appeal (England & Wales) (Civil Division) [qorti tal-appell (l-Ingilterra u Wales) (diviżjoni ċivili)] “ħafna [minn dawn il-kumpanniji] għażlu li jżidu d-dividendi li dawn setgħu jħallsu mod ieħor”. Fil-punt 23 ta’ din is-sentenza, il-Court of Appeal (England & Wales) (Civil Division) [qorti tal-appell (l-Ingilterra u Wales) (diviżjoni ċivili)] tqis li l-ebda element fattwali ma jippermetti li jiġi ddeterminat jekk l-FID żdidux, “wisq inqas jekk dawn żdidux biżżejjed biex jikkumpensaw bis-sħiħ għall-iżvantaġġ imġarrab mit-Trustees minħabba r-rifjut li jingħata kreditu ta’ taxxa rimborsabbli li jikkonċerna tali dividendi”. F’dan il-punt, il-Court of Appeal (England & Wales) (Civil Division) [qorti tal-appell (l-Ingilterra u Wales) (diviżjoni ċivili)] bdiet mill-premessa [li] ż-żidiet “ma kkumpensawx għalkollox għall-iżvantaġġ”.